క్రీస్తుతో 40 శ్రమానుభవములు 12వ అనుభవం

  • Author: Dr. G. Praveen Kumar
  • Category: Suffering with Christ
  • Reference: Sajeeva Vahini

శ్రమలయందును ఇబ్బందులయందును ఇరుకులయందును దెబ్బలయందును చెరసాలలలోను అల్లరులలోను ప్రయాసములలోను జాగరములలోను ఉపవాసములలోను మిగుల ఓర్పుగలవారమై 2 కొరింథీ 6:5

"మాతృదేవోభవ" అనేది మనదేశ సంస్కృతి "కనిపించే తల్లి అంటే కనిపించే వేల్పు" అనేది కవుల భావన. స్త్రీ దేవుని సృష్టిలో విలువైన బహుమానం. తల్లిగా, చెల్లిగా, భార్యగా ఇలా ఎన్నో రూపాల్లో నీకంటూ నేనున్నానని ఆదరించే ప్రేమామూర్తిపై సమాజానికి చిన్న చూపే నాడు-నేడూ.

అమ్మ గర్భంలోనే ఆచూకీ తెలుసుకునే స్కానింగులు, అంతంచేసే ప్లానింగులు, దైవవశాత్తు భూమ్మీద పడితే పారేసే ప్రయత్నాలు, గండాలన్ని గట్టెక్కితే ఆడపిల్లా! అంటూ అమ్మలక్కలు చేసే ఆరళ్ళు, ఈ సమాజం ఎప్పుడు తెలుసుకుంటుందో మహిళలను గౌరవించాలని? అందుకే క్రీస్తు కూడా స్త్రీలపై తనదైన గౌరవాన్ని తెలియజేయడానికి యావత్ సార్వత్రిక సంఘాన్ని స్త్రీతోనే పోల్చాడు.

ఎటువంటి పరిస్థితినైనా ఎదుర్కొని, అవమానాన్ని భరిస్తూ సమర్ధవంతమైన అడుగులు వేసిన ప్రతి మహిళ అనేకులకు ప్రోత్సాహకరంగా నిలబడుతుంది.

చిన్నప్పుడే తండ్రిని పోగొట్టుకొని, 12వ ఏటనే ఆధ్యాత్మిక పట్టుదల కలిగి జీవితం దేవునికి సమర్పించుకుంది. తల్లి బోధలు అనుసరించి దైవిక సామాజిక కార్యకలాపాల్లో ముందడుగు వేసింది. ఆమెకున్న ఆశయాలకు దైవిక నిర్ణయం తోడైంది, గమ్యం తెలియని ప్రతి అడుగులో సమాజసేవకు తన్ను తాను అర్ర్పించుకుంది. క్రీస్తు ప్రేమ అంటే ఏంటో చెప్పడం కాదు, చేసి చూపించింది.

మానవ జాతికే వన్నె తెచ్చిన ఈ స్త్రీ "మదర్ థెరెస్సా". ఇరుకు, ఇబ్బంది, కష్టం, శ్రమ అనే ఆలోచన లేకుండా క్రీస్తుతో శ్రమ అనే అనుభవంతో సేవ చేసిన ఈ తల్లి గురించి ఎంత చెప్పినా తక్కువే. కన్న ప్రేమను మించి అమ్మ ప్రేమను పంచిన ధన్యమూర్తి "మదర్ థెరెస్సా".

ఆడపిల్లని యోకెబెదు మిర్యామును చంపేస్తే మోషే మనకు లేడు, ధర్మశాస్త్రము ఉండేది కాదేమో! హెబ్రి బాలిక లేకుంటే దేవుని ఘనత సిరియనులకెలా తెలుస్తుంది? కన్య మరియ లేకుంటే యేసయ్య లోకానికి ఎలా వచ్చేవాడు? యేసయ్యరాకుంటే మన జీవితాలు ఎలా బాగుపడేవి? లుదియా లేకుంటే తుయతైరా సంఘం ఉండేదా!

ప్రార్ధనలో పట్టుదల కలిగిన మహిళలు అనేకులు. వారి ప్రార్ధనా ఫలితం గొప్ప ప్రవక్తలు, యాజకులు, రాజులు, నాయకులు.

తాను ఒదిగిపోతూ తన బలమంతా వెచ్చించి కుటుంబాన్ని ముందుకు నడిపించే తల్లులకు, ప్రేమను పంచియిచ్ఛే అక్క-చెల్లెళ్లకు, అహంకారాన్నంతా భరించగలిగే జీవిత భాగస్వాములకు,

ప్రత్యేకంగా - క్రీస్తు కొరకైన నా ఈ పట్టుదల క్రీస్తు శ్రమానుభవమును చిన్ననాటినుండే నాకు నేర్పించిన నా తల్లికి శిరమువంచి నమస్కరిస్తూ...

ప్రపంచ మహిళా దినోత్సవ శుభాకాంక్షలు.

అనుభవం:
క్రీస్తుతో శ్రమ అనుభవించిన వారికే ఆ ప్రేమ ఎలా వివరించాలో అర్ధమవుతుంది.