1. నాకు ఆశ్రయదుర్గమగు యెహోవా సన్నుతింపబడును గాక ఆయన నా చేతులకు యుద్ధమును నా వ్రేళ్లకు పోరాటమును నేర్పువాడైయున్నాడు.

“ఆధారశిల”– ద్వితీయోపదేశకాండము 32:4 నోట్. దీనికి 18వ కీర్తనకు చాలా పోలికలున్నాయి. దేవుని ప్రజలు తమ శత్రువులతో కత్తి పట్టి యుద్ధాలు చేసిన కాలంలో దావీదు జీవించాడు. యుద్ధరంగంలో ప్రవీణత చాలా కోరదగిన లక్షణం. దావీదుకు నిస్సందేహంగా స్వతహాగా సామర్థ్యం ఉంది, అంతేగాక ఖడ్గంతోను, విల్లుతోను అతడు బాగా సాధన చేసి ఉంటాడు. అయితే తన నైపుణ్యం, సామర్థ్యం తన స్వంతం కాదనీ, దేవుడు ఇచ్చినదేననీ అతడు ఒప్పుకుంటున్నాడు. ఈ కొత్త ఒడంబడిక కాలంలో దేవుని ప్రజల మహా యుద్ధాలు ఆధ్యాత్మికం (ఎఫెసీయులకు 6:10-18). దావీదుకు నేర్పించిన దేవుడే ఆయనకు మనం కూడా లోబడి సిద్ధపడితే ఈ యుద్ధాలెలా చేయాలో నేర్పిస్తాడు. మనకు కొంత విజయం చేకూరితే అది దేవుని మూలంగానే అనుకోవాలి గాని మన స్వంత సామర్థ్యం గానీ మంచితనం గానీ మనకు విజయం సాధించిపెట్టిందని వ్యర్థంగా అనుకోకూడదు (1 కోరింథీయులకు 4:7).

2. ఆయన నాకు కృపానిధి నా కోట నా దుర్గము నన్ను తప్పించువాడు నా కేడెము నే నాశ్రయించువాడు ఆయన నా జనులను నాకు లోబరచువాడైయున్నాడు.

“కోట”– కీర్తనల గ్రంథము 18:2. “లోపరచేవాడు”– 2 సమూయేలు 2:1-4; 2 సమూయేలు 3:1; 2 సమూయేలు 5:1-3.

3. యెహోవా, నీవు నరులను లక్ష్యపెట్టుటకు వారు ఏపాటివారు? నీవు వారిని ఎన్నికచేయుటకు మనష్యులు ఏపాటి వారు?

కీర్తనల గ్రంథము 8:4; యోబు 14:1-2; హెబ్రీయులకు 2:6; యెషయా 2:22. మనుషుల గురించిన ఈ వర్ణనలో దావీదు తనను తాను చేర్చుకున్నాడు. తనను బలవంతుణ్ణిగా, ఆరితేరినవాణ్ణిగా, విజయవంతుణ్ణిగా చేసినది దేవుడు మాత్రమేనని అతనికి తెలుసు. అంత గొప్ప దేవుడు అల్పుడైన ఒక మనిషిని ఇంతగా పట్టించుకోవడం అనే తలంపు అతణ్ణి స్తుతులతో నింపింది.

4. నరులు వట్టి ఊపిరిని పోలియున్నారు వారి దినములు దాటిపోవు నీడవలె నున్నవి.

5. యెహోవా, నీ ఆకాశమును వంచి దిగి రమ్ము పర్వతములు పొగ రాజునట్లు నీవు వాటిని ముట్టుము

తన ప్రమాద పరిస్థితిలో సంరక్షణ, విడుదల దేవునిపై మాత్రమే ఆధారపడి ఉందని దావీదుకు తెలుసు. కీర్తనల గ్రంథము 18:7-15 పోల్చి చూడండి. దేవుడు అంతకుముందు చేసినట్టుగానే ఇప్పుడూ చెయ్యాలని ప్రార్థిస్తున్నాడు దావీదు. కీర్తనల గ్రంథము 18:8; కీర్తనల గ్రంథము 104:32; యెషయా 64:1.

6. మెరుపులు మెరిపించి వారిని చెదరగొట్టుము నీ బాణములు వేసి వారిని ఓడగొట్టుము.

కీర్తనల గ్రంథము 68:1; కీర్తనల గ్రంథము 18:14; కీర్తనల గ్రంథము 7:12-13; హబక్కూకు 3:11; జెకర్యా 9:14.

7. పైనుండి నీ చెయ్యి చాచి నన్ను తప్పింపుము మహా జలములలోనుండి అన్యులచేతిలోనుండి నన్ను విడిపింపుము.

కీర్తనల గ్రంథము 18:16-17.

8. వారి నోరు వట్టి మాటలాడుచున్నది వారి కుడిచేయి అబద్ధముతో కూడియున్నది.

కీర్తనల గ్రంథము 12:2; కీర్తనల గ్రంథము 36:3; కీర్తనల గ్రంథము 41:4.

9. దేవా, నిన్నుగూర్చి నేనొక క్రొత్త కీర్తన పాడెదను పదితంతుల సితారాతో నిన్ను కీర్తించెదను.
ప్రకటన గ్రంథం 5:9, ప్రకటన గ్రంథం 14:3

కీర్తనల గ్రంథము 33:3; కీర్తనల గ్రంథము 40:3; కీర్తనల గ్రంథము 96:1; కీర్తనల గ్రంథము 98:1; కీర్తనల గ్రంథము 149:1. కొత్తగా లభించిన విడుదలకోసం కొత్త పాట పాడాలి. ప్రార్థనకు లభించిన ప్రతి జవాబు కొత్తగా కృతజ్ఞతలు చెల్లించేలా చేయాలి.

10. నీవే రాజులకు విజయము దయచేయువాడవు దుష్టుల ఖడ్గమునుండి నీవు నీ సేవకుడైన దావీదును తప్పించువాడవు

కీర్తనల గ్రంథము 18:50; 2 సమూయేలు 8:14.

11. నన్ను తప్పింపుము అన్యుల చేతిలోనుండి నన్నువిడి పింపుము వారి నోరు వట్టి మాటలాడుచున్నది వారి కుడిచేయి అబద్ధముతో కూడియున్నది.

12. మా కుమారులు తమ ¸యౌవన కాలమందు ఎదిగిన మొక్కలవలె ఉన్నారు మా కుమార్తెలు నగరునకై చెక్కిన మూలకంబములవలె ఉన్నారు.

దావీదు తనకు విజయం కలగాలని ప్రార్థించడం కేవలం తనకోసం మాత్రమే కాదు. దేవుని ప్రజలందరినీ దృష్టిలో ఉంచుకుని, వారి సౌభాగ్యం, నెమ్మది కోరి ఇలా ప్రార్థించాడు. “మొక్కలు”– కీర్తనల గ్రంథము 92:12-14; కీర్తనల గ్రంథము 128:3. “మూలస్థంభాలు”– ఈ పదం స్థిరత్వం, ఉపయోగం, సౌందర్యాలను సూచిస్తున్నది.

13. మా కొట్లు నింపబడి పలువిధములైన ద్రవ్యములకు నిధులుగా ఉన్నవి మా గొఱ్ఱెలు వేలకొలదిగాను పదివేలకొలదిగాను మా గడ్డి బీళ్లలో పిల్లలు వేయుచున్నవి.

14. మా యెడ్లు గొప్ప బరువులు మోయగలవి మా వీధులలో చొరబడుటయైనను ఉరుకులెత్తుట యైనను లేదు వాటిలో శ్రమగలవారి మొఱ్ఱ వినబడుటయైనను లేదు

15. ఇట్టి స్థితిగలవారు ధన్యులు. యెహోవా తమకు దేవుడుగాగల జనులు ధన్యులు.

ద్వితీయోపదేశకాండము 28:3. ధన్యత, దీవెనల గురించి నోట్స్ కీర్తనల గ్రంథము 1:1; ఆదికాండము 12:1-3; సంఖ్యాకాండము 6:22-27. ఏకైక నిజ దేవుడు తన దేవుడుగా ఉన్నవారు నిజంగా ధన్యులు. ఇంతకన్నా ఎక్కువ ధన్యత ఏదీ లేదు. మనం పేదరికంలో, భయంకరమైన అపాయ స్థితిలో బ్రతుకుతూ ఉన్నా ఈ దేవుడు మన దేవుడైతే మనం ధన్యులమే.