Ruth - రూతు 4 - గ్రంథ విశ్లేషణ

1. బోయజు పురద్వారమునొద్దకు పోయి అక్కడ కూర్చుండగా, బోయజు చెప్పిన బంధువుడు ఆ త్రోవను పోవుచుండెను గనుక బోయజుఓయి, యీ తట్టు తిరిగి ఇక్కడ కూర్చుండుమని అతని పిలువగా అతడు వచ్చి కూర్చుండెను.

2. బోయజు ఆ ఊరి పెద్దలలో పదిమందిని పిలిపించుకొని, ఇక్కడ కూర్చుండుడనిచెప్పగా వారును కూర్చుండిరి.

ఇది వ్యవహారాన్ని నలుగురిలో పరిష్కరించే పద్ధతి.

3. అతడుమోయాబు దేశమునుండి తిరిగి వచ్చిన నయోమి మన సహోదరుడైన ఎలీమెలెకునకు కలిగిన భూభాగమును అమ్మివేయుచున్నది గనుక నీవు చెవులార వినునట్లు నేనొకసంగతి తెలియజేయవలెనని యున్నాను.

“సోదరుడు”– అంటే ఇక్కడ బంధువు అని అర్థం. “అమ్మివేస్తుంది”– వారసత్వ భూమి కుటుంబానికే చెంది ఉండేలా, పరుల పాలు కాకుండేలా చూడవలసిన బాధ్యత సమీప బంధువుది. నయోమి ఆశించినది కేవలం భూమిని అమ్మడం మాత్రమే కాదు. రూతుకు మంచి భర్తను సంపాదించడం కూడా.

4. ఈ పుర నివాసులయెదుటను నా జనుల పెద్దలయెదుటను ఆ భూమిని సంపాదించుకొనుము; ఏమ నగా దాని విడిపించుటకు నీవు ఒప్పుకొనిన యెడల విడి పింపుము, దాని విడిపింపనొల్లని యెడల అది స్పష్టముగా నాతో చెప్పుము. నీవు గాక దాని విడిపింపవలసిన బంధువుడెవడును లేడు; నీ తరువాతి వాడను నేనే అని బంధువునితో చెప్పెను. అందుకతడునేను విడిపించెద ననెను.

5. బోయజునీవు నయోమి చేతినుండి ఆ పొలమును సంపాదించు దినమున చనిపోయినవానిపేరట అతని స్వాస్థ్యమును స్థిరపరచునట్లు చనిపోయినవాని భార్యయైన రూతు అను మోయాబీయురాలి యొద్ద నుండియు దాని సంపాదింపవలెనని చెప్పగా

6. ఆ బంధు వుడు నేను దానిని విడిపించుకొనలేను, నా స్వాస్థ్యమును పోగొట్టు కొందునేమో, నేను దాని విడిపింపలేను గనుక నీవే నాకు ప్రతిగా బంధువుని ధర్మము జరిగించుమని చెప్పెను.

“నా ఆస్తిని”– ఇతనికి నయోమి ఆస్తి కావాలి గాని రూతును మాత్రం పెళ్ళి చేసుకోవడం ఇష్టం లేదు. అతడామెను పెళ్ళి చేసుకున్నాక, వాళ్ళకు ఒక్కడే కొడుకు పుడితే అతడికి రూతు మొదటి భర్త పేరు వస్తుంది. ఆ పిల్లవాడు ఎలీమెలెకు, నయోమిలకు మాత్రమే గాక ఆ సమీప బంధువుడికి కూడా వారసుడౌతాడు. ఆ విధంగా అతడి ఆస్తి అంతా ఎలీమెలెకు కుటుంబంవారి కిందికి వస్తుంది – ద్వితియోపదేశకాండము 25:5-6 ఆదికాండము 38:9.

7. ఇశ్రాయేలీయులలో బంధు ధర్మమును గూర్చి గాని, క్రయవిక్రయములను గూర్చిగాని, ప్రతి సంగతిని స్థిరపరచుటకు పూర్వమున జరిగిన మర్యాద ఏదనగా, ఒకడు తన చెప్పు తీసి తన పొరుగువాని కిచ్చుటయే. ఈ పని ఇశ్రాయేలీయులలో ప్రమాణముగా ఎంచబడెను.

8. ఆ బంధువుడునీవు దానిని సంపాదించుకొను మని బోయజుతో చెప్పి తన చెప్పుతీయగా

9. బోయజుఎలీమెలెకునకు కలిగినది యావత్తును కిల్యోనుకును మహ్లో నుకును కలిగినది యావత్తును నయోమి చేతినుండి సంపా దించితినని నేనన్నందుకు మీరు ఈ దినమున సాక్షులై యున్నారు.

10. మరియు చనిపోయినవాని పేరట అతని స్వాస్థ్యమును స్థిరపరచునట్లును, చనిపోయినవాని పేరు అతని సహోదరులలోనుండియు, అతని స్థలముయొక్క ద్వారమునుండియు కొట్టివేయబడక యుండునట్లును, నేను మహ్లోను భార్యయైన రూతను మోయాబీయురాలిని సంపాదించుకొని పెండ్లిచేసికొనుచున్నాను. దీనికి మీరు ఈ దినమున సాక్షులైయున్నారని పెద్దలతోను ప్రజ లందరితోను చెప్పెను.

11. అందుకు పురద్వారముననుండిన ప్రజలందరును పెద్దలునుమేము సాక్షులము, యెహోవా నీ యింటికి వచ్చిన ఆ స్త్రీని ఇశ్రాయేలీయుల వంశమును వర్ధిల్లజేసిన రాహేలును పోలినదానిగాను లేయాను పోలిన దానిగాను చేయును గాక;

“రాహేలు”, “లేయా”– యాకోబు ఇద్దరు భార్యలు. వీళ్ళిద్దరికీ కలిసి పన్నెండుగురు కొడుకులు, ఒక కూతురు కలిగారు (ఆదికాండము 29:1-35 ఆదికాండము 30:1-43 ఆదికాండము 35:16-18). ఇలా పలుకుతూ ఆ పెద్దలు బోయజు రూతులకు అనేకమంది పిల్లలు కలగాలని దీవించారు.

12. ఎఫ్రాతాలో నీవు క్షేమాభివృద్ధి కలిగినవాడవై బేత్లెహేములో నీవు ఖ్యాతి నొందుదువు గాక; యెహోవా యీ ¸యవనురాలివలన నీకు దయచేయు సంతానమును నీ కుటుంబమును తామారు యూదాకు కనిన పెరెసు కుటుంబమువలె నుండునుగాక అనిరి.
మత్తయి 1:3

“యూదా”– ఆది 38వ అధ్యాయం. పెరెసు యూదా గోత్రానికి నాయకుడు, బోయజుకూ దావీదుకూ ప్రభువైన యేసుకూ కూడా పూర్వీకుడూ అయ్యాడు.

13. కాబట్టి బోయజు రూతును పెండ్లిచేసికొని ఆమె యొద్దకు పోయినప్పుడు యెహోవా ఆమె గర్భవతి యగునట్లు అనుగ్రహించెను గనుక ఆమె కుమారునికనెను.
మత్తయి 1:4-5

“గర్భవతి అయి”– బైబిల్లో మరికొందరు ముఖ్యమైన స్త్రీలలాగా రూతుకు కూడా అప్పటిదాకా పిల్లలు లేకుండా ఉండవచ్చు (ఆదికాండము 11:30 ఆదికాండము 29:31 1 సమూయేలు 1:2 1 సమూయేలు 1:5 లూకా 1:7).

14. అప్పుడు స్త్రీలుఈ దినమున నీకు బంధువుడు లేకుండ చేయని యెహోవా స్తుతినొందుగాక; ఆయన నామము ఇశ్రాయేలీయులలో ప్రకటింపబడునుగాక.

15. నిన్ను ప్రేమించి యేడుగురు కుమారులకంటె నీ కెక్కువగానున్న నీ కోడలు ఇతని కనెను; ఇతడు నీ ప్రాణము నోదార్చి ముసలితనమున నీకు పోషకుడగునని నయోమితో చెప్పిరి.

రూతు నయోమి పాలిట ఏడుగురు కొడుకులకంటే నయం అనడం ఆమెను గురించి వారు పలకగలిగిన గొప్ప ప్రశంస.

16. అప్పుడు నయోమిఆ బిడ్డను తీసికొని కౌగిట నుంచుకొని వానికి దాదిగా నుండెను.

17. ఆమె పొరుగు స్త్రీలునయోమికొరకు కుమారుడు పుట్టెనని చెప్పి అతనికి ఓబేదను పేరు పెట్టిరి. అతడు దావీదునకు తండ్రి యైన యెష్షయియొక్క తండ్రి.
మత్తయి 1:6, మత్తయి 1:4-5, లూకా 3:31-33

“ఓబేదు”– అంటే “సేవకుడు”. పిల్లవాడికి ఈ పేరు పెట్టడంలో అతడు దేవుని నిజమైన సేవకుడు కావాలన్న ఆ తల్లిదండ్రుల కోరిక వెల్లడౌతున్నది.

18. పెరెసు వంశావళి యేదనగాపెరెసు హెస్రోనును కనెను,

మత్తయి 1:3-6. తన అత్తపట్ల ఆమె చూపిన దయ, ఇస్రాయేల్‌వారి దేవునిపై ఉంచిన విశ్వాసం మూలంగా ఈ విదేశీ విధవరాలు దావీదురాజుకు గాక యేసుప్రభువుకు కూడా పూర్వీకురాలైంది. దేవుని మహా కృప ఇలాంటిది.

19. హెస్రోను రామును కనెను, రాము అమ్మినాదాబును కనెను, అమ్మినాదాబు నయస్సోనును కనెను,

20. నయస్సోను శల్మానును కనెను, శల్మాను బోయజును కనెను,

21. బోయజు ఓబేదును కనెను, ఓబేదు యెష్షయిని కనెను,

22. యెష్షయి దావీదును కనెను.
మత్తయి 1:6