1. ఆదియందు దేవుడు భూమ్యాకాశములను సృజించెను.
హెబ్రీయులకు 1:10, హెబ్రీయులకు 11:3

కీర్తనల గ్రంథము 33:6 కీర్తనల గ్రంథము 33:9 కీర్తనల గ్రంథము 102:25 యెషయా 42:5 యెషయా 45:18 యోహాను 1:2-3 కొలొస్సయులకు 1:16 హెబ్రీయులకు 1:2 ప్రకటన గ్రంథం 4:11 సృష్టి ఆరంభం ఎప్పుడో మనకు తెలియదు. కొన్ని వందల కోట్ల సంవత్సరాల క్రితమని కొందరంటారు. కొన్ని వేల సంవత్సరాలే అని మరి కొందరంటారు. బైబిలులో సృష్టి ఆరంభమైన సమయం ముఖ్యం కాదు గాని సృష్టి జరిగిందన్న సత్యమే ప్రధానం. ఈ జగత్తు శాశ్వతం కాదు. దేవుడొక్కడే శాశ్వతుడు (కీర్తనల గ్రంథము 90:2). జగత్తు ఉనికిలోకి రాకముందే దేవుడున్నాడు. ఆయన ఈ విశ్వాన్ని శూన్యంలోనుంచి తన వాక్కు ద్వారా, అపరిమితమైన తన శక్తిద్వారా చేశాడు. ఈ మహా సృష్టికర్త ఈ మొదటి వచనంలో కనిపిస్తున్నాడు. ఈ అధ్యాయంలో ఆయన గురించి 30 సార్లు రాసివుంది. బైబిలు గ్రంథమంతా ఆయనను గురించిన వృత్తాంతమే. ఆయన మహాకార్యాలూ, అద్భుత వాక్కుల గురించి ఈ గ్రంథం మనకు చెప్తున్నది. ముఖ్యంగా మానవజాతి పట్ల ఆయన వ్యవహారాలనూ తన గురించిన సత్యాన్నీ ఆయన వారికిలా వెల్లడి చేసినవాటినీ ఇది మనకు తెలియజేస్తుంది. ఆయన్నెలా చేరుకోవాలో, ఎలా ఆరాధించాలో ఆయన మనకు ఉపదేశిస్తున్నాడు. దేవుని ఉనికిని గురించిన రుజువులతో బైబిలు ఆరంభం కావడం లేదు. ఆయన జరిగిస్తున్న చర్యలతోనే ఇది మొదలైంది. ఆయన చర్యలు ఆయన ఉనికిని తెలియజేస్తున్నాయి. ఆయన చేసిన పనులను బట్టి ఆయనెలాటివాడో మనం కొంత నేర్చుకోవచ్చు. కీర్తనల గ్రంథము 19:1-2 యెషయా 40:25-26 రోమీయులకు 1:20 చూడండి.

2. భూమి నిరాకారముగాను శూన్యముగాను ఉండెను; చీకటి అగాధ జలము పైన కమ్మియుండెను; దేవుని ఆత్మ జలములపైన అల్లాడుచుండెను.

“శూన్యంగా రూపం లేకుండా”- కీర్తనల గ్రంథము 104:30 యెషయా 45:18 యిర్మియా 4:23 అంటే ఆరంభంలో భూమి మానవ నివాసానికి యోగ్యంగా లేదని దీనిభావం అనుకోవచ్చు. అలా దానిని నివాసయోగ్యంగా చేసేందుకు దేవుని ఆత్మ అక్కడ నెలకొన్నాడు. కీర్తనల గ్రంథము 104:30 పోల్చిచూడండి. “దేవుని ఆత్మ”– బైబిలంతటిలో దేవుని ఆత్మ దేవుని కార్యాలు జరిగించడం చూడగలం (ఆదికాండము 6:3 ఆదికాండము 41:38 నిర్గమకాండము 31:3 సంఖ్యాకాండము 24:2 1 సమూయేలు 16:13 2 సమూయేలు 23:2 కీర్తనల గ్రంథము 51:11 కీర్తనల గ్రంథము 104:30 కీర్తనల గ్రంథము 143:10 యెషయా 11:2 యెషయా 61:1 మత్తయి 1:18 మత్తయి 3:16 మత్తయి 12:28 లూకా 11:13 యోహాను 3:5-6 యోహాను 14:17 యోహాను 15:26 యోహాను 16:7-15 అపో. కార్యములు 2:4 రోమీయులకు 8:9 1 కోరింథీయులకు 2:10 1 కోరింథీయులకు 6:19 గలతియులకు 3:2 ఎఫెసీయులకు 1:13 ఎఫెసీయులకు 2:22 2 పేతురు 1:19 ప్రకటన గ్రంథం 22:17 యోహాను 14:16-17 నోట్స్ చూడండి.

3. దేవుడు వెలుగు కమ్మని పలుకగా వెలుగు కలిగెను.
2 కోరింథీయులకు 4:9

“వెలుగు”– 2 కోరింథీయులకు 4:6 ఈ వెలుగు ఎక్కడినుంచి ప్రసరించిందో చెప్పలేదు. 14వ వచనం పోల్చిచూడండి. తన వాక్కు మహాత్యం వల్లే దేవుడు సృష్టిని చేశాడు (వ ఆదికాండము 1:6 ఆదికాండము 1:9 ఆదికాండము 1:11 ఆదికాండము 1:14 ఆదికాండము 1:20 ఆదికాండము 1:24 కీర్తనల గ్రంథము 33:6-9 హెబ్రీయులకు 11:3.

4. వెలుగు మంచిదైనట్టు దేవుడుచూచెను; దేవుడు వెలుగును చీకటిని వేరుపరచెను.

యెషయా 45:7

5. దేవుడు వెలుగునకు పగలనియు, చీకటికి రాత్రి అనియు పేరు పెట్టెను. అస్తమయమును ఉదయమును కలుగగా ఒక దినమాయెను.

యోబు 38:19-20 కీర్తనల గ్రంథము 74:16. “సాయంకాలం...ఉదయం”– 3వ వచనంలోని వెలుగు సూర్యునినుంచి రాకపోతే ఈ ఉదయ సాయంకాలాలు ఇప్పటి అనుదిన ఉదయ సాయంత్రాలకు భిన్నమైనవై ఉండవచ్చు. “రోజు”– ఆదికాండము 2:2 ఆదికాండము 5:2 దగ్గర చూడండి.

6. మరియు దేవుడుజలముల మధ్య నొక విశాలము కలిగి ఆ జలములను ఈ జలములను వేరుపరచును గాకని పలికెను.
2 పేతురు 3:5

కీర్తనల గ్రంథము 104:1-2 యిర్మియా 10:12.

7. దేవుడు ఆ విశాలము చేసి విశాలము క్రింది జలములను విశాలము మీది జలములను వేరుపరపగా ఆ ప్రకారమాయెను.

8. దేవుడు ఆ విశాలమునకు ఆకాశమని పేరు పెట్టెను. అస్తమయమును ఉదయమును కలుగగా రెండవ దినమాయెను.

9. దేవుడు ఆకాశము క్రిందనున్న జలము లొకచోటనే కూర్చబడి ఆరిన నేల కనబడును గాకని పలుకగా ఆ ప్రకారమాయెను.

యోబు 38:8-11 కీర్తనల గ్రంథము 33:7 కీర్తనల గ్రంథము 95:5.

10. దేవుడు ఆరిన నేలకు భూమి అని పేరు పెట్టెను, జలరాశికి ఆయన సముద్రములని పేరు పెట్టెను, అది మంచిదని దేవుడు చూచెను.

11. దేవుడుగడ్డిని విత్తనములిచ్చు చెట్లను భూమిమీద తమ తమ జాతి ప్రకారము తమలో విత్తనములుగల ఫలమిచ్చు ఫలవృక్షములను భూమి మొలిపించుగాకని పలుకగా ఆ ప్రకార మాయెను.
1 కోరింథీయులకు 15:38

జంతు సృష్టికి ముందే దేవుడు వృక్ష జాలాన్ని సృష్టించాడు. కీర్తనల గ్రంథము 104:14.

12. భూమి గడ్డిని తమ తమ జాతి ప్రకారము విత్తనములిచ్చు చెట్లను, తమ తమ జాతి ప్రకారము తమలో విత్తనములుగల ఫలవృక్షములను మొలిపింపగా అది మంచిదని దేవుడు చూచెను

13. అస్తమయమును ఉదయమును కలుగగా మూడవ దినమాయెను.

14. దేవుడు పగటిని రాత్రిని వేరుపరచునట్లు ఆకాశవిశాల మందు జ్యోతులు కలుగును గాకనియు, అవి సూచనలను కాలములను దిన సంవత్సరములను సూచించుటకై యుండు గాకనియు,

యెషయా 40:26 కీర్తనల గ్రంథము 74:16 కీర్తనల గ్రంథము 136:7-9. సూర్యుడు కాకుండా వెలుగుకు ఉత్పత్తిస్థానాలు ఇంకా ఉన్నాయి. 3వ వచనంలోని వెలుగు వేరొక ఉత్పత్తిస్థానం నుంచి వచ్చినదై ఉండవచ్చు. లేక కొంతమంది భావించినట్లు మొదట్లో దట్టమైన మేఘాలు, లేదా నీటియావిరి భూమిని కప్పడంవల్ల సూర్యకాంతి కొంతవరకే భూమిని చేరేదనీ, సూర్యబింబం మాత్రం కనిపించేది కాదనీ భావించవచ్చు. కాబట్టి ఇక్కడి అర్థం బహుశా సూర్యచంద్రులు భూమి పైనుండి మొదటిసారి కనిపించాయి అనుకోవచ్చు. ఇక్కడ “చేశాడు” (వ 16) అనే పదం మొదటి వచనంలో ఉన్న “సృజించాడు” అనే పదంవంటిది కాదు (హీబ్రూభాషలో). హీబ్రూ పదం వేరువేరు అర్థాలు గలది – “వస్తువు మీద పని చేయడం”, “సిద్ధం చేయడం”, “నియమించడం”, మొదలైనవి. ఈ సమయంలో దేవుడు వీటిని వాటి ప్రస్తుత స్థానాల్లో ఉంచాడని అర్థం చేసుకోవచ్చు. రాత్రినీ పగటినీ ఏలేందుకూ, రుతువులను వేరు చేసేందుకూ సూర్యచంద్రులను సృష్టించాడు దేవుడు. మనుషులు వాటిని పూజించాలని కాదు (ద్వితీయోపదేశకాండము 4:19 ద్వితీయోపదేశకాండము 17:3-5 యెహోషువ 8:16-18). వాటిని చేసిన సృష్టికర్తను మాత్రమే ఆరాధించాలి (నిర్గమకాండము 20:3 మత్తయి 4:10). మానవ జీవితాల్లో వాటికి ఎలాంటి ఆధ్యాత్మిక ప్రభావమూ లేదు. ఇవి మనుషులను పరిపాలించవు. అవి ఉండడం మూలంగా లేదా, లేకపోవడం మూలంగా ఈ భూమిపైని భౌతిక పరిస్థితులను క్రమబద్ధం చేయడం ద్వారా రాత్రింబవళ్ళను పరిపాలిస్తాయి. సూర్యచంద్ర నక్షత్రాదులను చూడడం ద్వారా దేవుని గొప్పతనాన్ని తెలుసుకోవాలి, మనుషులపైనా, తన సృష్టి అంతటిపైనా ఆయన ఎంత ఉన్నతంగా ఉన్నాడో కొంతవరకు అర్థం చేసుకోవాలి – కీర్తనల గ్రంథము 8:3-4 కీర్తనల గ్రంథము 102:25-27 యెషయా 40:12-17 యెషయా 40:25-26 యెషయా 44:24.

15. భూమిమీద వెలుగిచ్చుటకు అవి ఆకాశ విశాలమందు జ్యోతులై యుండు గాకనియు పలికెను; ఆ ప్రకారమాయెను.

16. దేవుడు ఆ రెండు గొప్ప జ్యోతులను, అనగా పగటిని ఏలుటకు పెద్ద జ్యోతిని రాత్రిని ఏలుటకు చిన్న జ్యోతిని నక్షత్రములను చేసెను.

17. భూమిమీద వెలుగిచ్చుటకును

18. పగటిని రాత్రిని ఏలుటకును వెలుగును చీకటిని వేరుపరచుటకును దేవుడు ఆకాశ విశాలమందు వాటి నుంచెను; అది మంచిదని దేవుడు చూచెను.

19. అస్తమయమును ఉదయమును కలుగగా నాలుగవ దినమాయెను.

భూమిపై తిరుగాడే జంతుజాలం కంటే జలచరాలు ముందు వచ్చాయి.

20. దేవుడు జీవముకలిగి చలించువాటిని జలములు సమృద్ధిగా పుట్టించును గాకనియు, పక్షులు భూమిపైని ఆకాశ విశాలములో ఎగురును గాకనియు పలికెను.

21. దేవుడు జల ములలో వాటి వాటి జాతి ప్రకారము జలములు సమృద్ధిగా పుట్టించిన మహా మత్స్యములను, జీవముకలిగి చలించు వాటినన్నిటిని, దాని దాని జాతి ప్రకారము రెక్కలుగల ప్రతి పక్షిని సృజించెను. అది మంచిదని దేవుడు చూచెను.

22. దేవుడు మీరు ఫలించి అభివృద్ధి పొంది సముద్ర జలములలో నిండి యుండుడనియు, పక్షులు భూమిమీద విస్తరించును గాకనియు, వాటిని ఆశీర్వదించెను.

23. అస్తమయమును ఉదయమును కలుగగా అయిదవ దినమాయెను.

24. దేవుడు వాటి వాటి జాతి ప్రకారము జీవముగల వాటిని, అనగా వాటి వాటి జాతి ప్రకారము పశువులను పురుగులను అడవి జంతువులను భూమి పుట్టించుగాకని పలికెను; ఆప్రకారమాయెను.

భూమిపై జీవం నిర్జీవ పదార్థాలనుంచి మానవుడిదాకా పరిణామం చెందిందని ప్రతిపాదించే సిద్ధాంతం ఒక దాన్ని మానవులు సృష్టించారు. ఇందులో దేవునికి బొత్తిగా స్థానం లేదు. ఇది నాస్తిక జీవపరిణామ వాదం. దీన్ని ఇంతవరకు ఎవరూ నిరూపించలేదు. దీనిలో విజ్ఞానశాస్త్ర సంబంధమైన సమస్యలెన్నో ఉన్నాయి. ఉదాహరణకు నిర్జీవ పదార్థం నుంచి ఎవరి ప్రమేయం లేకుండా జీవం మొదట్లో ఎలా ఉద్భవించింది? అసలు ఆ నిర్జీవ పదార్థం ఎక్కడినుంచి వచ్చింది? మనస్సు, వ్యక్తిత్వం, నైతిక విలువలు, ఆధ్యాత్మికత ఇవేవీ లేని నిర్జీవ పదార్థం నుంచి ఇవన్నీ ఉన్న మానవుడు ఎలా రాగలిగాడు? మూర్ఖత్వం, భ్రష్టత్వం కరడు గట్టిన హృదయంలో నుండి నాస్తికవాదం వస్తుందని బైబిలు చెప్తున్నది (కీర్తనల గ్రంథము 14:1). ఇప్పుడున్న జీవులన్నిటినీ ఉనికిలోకి తెచ్చేందుకు దేవుడు ఈ జీవపరిణామం అనే పద్ధతిని ఉపయోగించాడని దేవుడంటే నమ్మకం ఉన్న కొందరంటారు. ఈ సిద్ధాంతాన్ని కూడా ఎవరూ రుజువు చేయలేదు. దేవుడు ఇలా చేశాడని బైబిలు కూడా ఏమీ చెప్పడం లేదు.

25. దేవుడు ఆ యా జాతుల ప్రకారము అడవి జంతువులను, ఆ యా జాతుల ప్రకారము పశువులను, ఆ యా జాతుల ప్రకారము నేలను ప్రాకు ప్రతి పురుగును చేసెను. అదిమంచిదని దేవుడు చూచెను.

26. దేవుడు మన స్వరూపమందు మన పోలికె చొప్పున నరులను చేయుదము; వారుసముద్రపు చేపలను ఆకాశ పక్షులను పశువులను సమస్త భూమిని భూమిమీద ప్రాకు ప్రతి జంతువును ఏలుదురుగాకనియు పలికెను.
ఎఫెసీయులకు 4:24, యాకోబు 3:9

ఈ వచనం ధోరణిని బట్టి చూస్తే మానవుడు జీవ పరిణామం వల్ల వచ్చినవాడు గాక ప్రత్యేక సృష్టి అనీ, ఇంతకు ముందు దేవుడు సృష్టించినవాటన్నిటి కంటే ప్రత్యేకమైనవాడనీ అర్థమౌతున్నది. బైబిలు ప్రకారం మానవుడు కేవలం జంతు ప్రపంచంలో చేరినవాడు కాదు. అతడు దేవుడూ కాదు, దేవునిలో ఒక భాగమూ కాదు. జంతువులన్నిటికంటే పైవాడు. జంతువులను దేవుని పిల్లలని ఎవరూ పిలవకూడదు. దేవుడు జంతువులను తన పోలికలో చేశాడని బైబిలు చెప్పడం లేదు. అయితే మానవుడు జంతువులకంటే ఎంతో ఎక్కువవాడైనప్పటికీ దేవుని కంటే బహు అల్పుడు. దేవుడు సృష్టికర్త. మనిషి సృష్టి. అయితే కొన్ని విషయాల్లో దేవుని పోలిక మనిషికి ఉంది. అతడికి వ్యక్తిత్వం ఉంది. ఇది ఒక ప్రధాన సత్యాన్ని వెల్లడిస్తుంది. అదేమంటే, మనిషిని చేసిన సృష్టికర్తకు కూడా వ్యక్తిత్వం ఉందన్నమాట. దేవుడొక వ్యక్తిత్వం లేని శక్తిరూపం కాదు. దేవుడు వెల్లడి చేసిన సత్యాలగురించి తలపోసేందుకు మనిషికి మనసుంది. మంచి చెడుల్లో ఏదో ఒకటి ఎంచుకునేందుకు సంకల్పబలం ఉంది. దేవుణ్ణి ప్రేమించి ఆరాధించ గలిగే సామర్థ్యం ఉంది. అతడు దేవుని పోలికలో తయారయ్యాడు (ఆదికాండము 5:1 ఆదికాండము 9:6 1 కోరింథీయులకు 11:7 ఎఫెసీయులకు 4:24). అంటే మనిషికి లాగా దేవునికి కూడా శరీరం ఉందని కాదు. దేవుడు ఆత్మ. యోహాను 4:24. ఈ వచనంలో “మనం”, “మన” అనే పదాలను గమనించండి. ఆదికాండము 3:22. “త్రిత్వం” అనే నిగూఢ సిద్ధాంతం తాలూకు ఛాయలు ఇక్కడ కనిపిస్తున్నట్టున్నాయి. ఈ సిద్ధాంతం బైబిల్లో క్రమేపీ వెల్లడి అయింది. ఈ వచనంలో దేవుడు ఎవరితో మాట్లాడుతున్నాడు? దేవదూతలతోనా? కాదు. మానవుణ్ణి చేసినది దేవదూతల పోలికలో అని గానీ, మానవుణ్ణి చేయడంలో దేవదూతలు దేవునితో సహకరించారని గానీ బైబిల్లో ఎక్కడా రాసిలేదు. మరి, ఇక్కడ దేవుడు ఎవరితో మాట్లాడుతున్నట్టు? దేవుడు ఒక్కడే. అనేక మంది లేరు. బైబిల్లో ప్రతి చోటా ఈ సత్యం ఉంది – ద్వితీయోపదేశకాండము 4:35 ద్వితీయోపదేశకాండము 4:39 యెషయా 43:10-12 యెషయా 44:4-8 యెషయా 45:5-7 రోమీయులకు 3:29-30 1 కోరింథీయులకు 8:4 1 తిమోతికి 1:17 1 తిమోతికి 6:15-16 యూదా 1:25. కాబట్టి ఇక్కడ దేవుడు మరొక దేవునితో మాట్లాడలేదు. బైబిలు ప్రకారం ఒకే దేవుడు తండ్రి, కుమారుడు, పవిత్రాత్మ అనే ముగ్గురు వ్యక్తులుగా ఉన్నాడు. ఒకే దేవుడు, ముగ్గురు వ్యక్తులు, ఒకే సంకల్పం, ఒకే మనస్సు, ఒకే స్వభావంతో సంపూర్ణ ఐక్యత కలిగి ఉన్నారు. ఈ ముగ్గురు కూడా సృష్టి కార్యంలో తమ పాత్రను నిర్వహించారు. 1వ వచనంలో తండ్రి, 2వ వచనంలో ఆత్మ కనిపిస్తున్నారు. సృష్టి కార్యమందంతటిలో కుమారుడు తండ్రితో ఉన్నాడు (యోహాను 1:1-3 కొలొస్సయులకు 1:16-17 హెబ్రీయులకు 1:10-12). త్రిత్వం గురించి మత్తయి 3:16. ఈ వచనంలో తండ్రి త్రిత్వంలోని మిగతా ఇద్దరు వ్యక్తులతో మాట్లాడుతున్నట్టు ఉంది.

27. దేవుడు తన స్వరూపమందు నరుని సృజించెను; దేవుని స్వరూపమందు వాని సృజించెను; స్త్రీనిగాను పురు షునిగాను వారిని సృజించెను.
మత్తయి 19:4, మార్కు 10:6, అపో. కార్యములు 17:29, 1 కోరింథీయులకు 11:7, కొలొస్సయులకు 3:10, 1 తిమోతికి 2:13

మత్తయి 19:4-6

28. దేవుడు వారిని ఆశీర్వ దించెను; ఎట్లనగామీరు ఫలించి అభివృద్ధిపొంది విస్తరించి భూమిని నిండించి దానిని లోపరచుకొనుడి; సముద్రపు చేపలను ఆకాశ పక్షులను భూమిమీద ప్రాకు ప్రతి జీవిని ఏలుడని దేవుడు వారితో చెప్పెను.

కీర్తనల గ్రంథము 8:6-8 యిర్మియా 27:5 “దీవించి”– ఆదికాండము 12:1-3. సంఖ్యాకాండము 6:22-27 ద్వితీయోపదేశకాండము 28:1 కీర్తనల గ్రంథము 1:1 మత్తయి 5:3-12. మొదలైన చోట్ల దీనిపై నోట్స్ చూడండి.

29. దేవుడు ఇదిగో భూమిమీదనున్న విత్తనములిచ్చు ప్రతి చెట్టును విత్తనములిచ్చు వృక్షఫలముగల ప్రతి వృక్ష మును మీ కిచ్చి యున్నాను; అవి మీ కాహారమగును.
రోమీయులకు 14:2

ఆదికాండము 7 ఆదికాండము 8 అధ్యాయాల్లో కనిపిస్తున్న జలప్రళయం తరువాత దేవుడు కొత్త ఆదేశాలు ఇచ్చాడు. ఆదికాండము 9:3-4. చూడండి.

30. భూమి మీదనుండు జంతువులన్నిటికిని ఆకాశ పక్షులన్నిటికిని భూమిమీద ప్రాకు సమస్త జీవులకును పచ్చని చెట్లన్నియు ఆహారమగునని పలికెను. ఆ ప్రకారమాయెను.

31. దేవుడు తాను చేసినది యావత్తును చూచినప్పుడు అది చాల మంచిదిగ నుండెను. అస్తమయమును ఉదయమును కలుగగా ఆరవ దినమాయెను.
1 తిమోతికి 4:4

దేవుడు చేసినదంతా మనిషితో సహా చాలా బాగుంది. మనిషి పాపం లేనివాడు, పాపం చేయనివాడు. దేవునితో సహవాసం చేయగలిగినవాడు. ఆత్మతో సత్యంతో ఆయన్ను ప్రేమించి ఆరాధించగలిగినవాడు. ప్రత్యేకమైన నోట్ బైబిల్లోని సృష్టి సత్యం, విజ్ఞానశాస్త్రం గురించి ఒక మాట – ఈ అధ్యాయంలో కనిపిస్తున్న సృష్టి విధానానికీ ఆధునిక విజ్ఞానశాస్త్రం కనుగొన్న సత్యాలకూ విభేదమేదన్నా ఉందా? ఎంతమాత్రం లేదు. ఈ మొదటి అధ్యాయం (బైబిలు అంతా కూడా) సాక్షాత్తూ దేవుని నుంచి వెల్లడైన సత్యం. అందువల్ల ఇది కేవలం వాస్తవం. 2 తిమోతికి 3:16 2 పేతురు 1:21 మొ।। చూడండి. ఇక్కడ ఇవ్వబడిన సృష్టిక్రమం ఇలా ఉంది: ఆకాశాలు, నిరాకారమై ఉన్న భూమి, భూమిపై వెలుగు ప్రసరించడం, వృక్షజాలం తరువాత నీటిలో జలచరాలు, ఆ పైన భూచరాలు, చివరిగా మానవుడు. ఈ సృష్టిక్రమం సక్రమమేనని ఆధునిక విజ్ఞానశాస్త్రం అంగీకరిస్తున్నది. సృష్టి వాస్తవమని కూడా విజ్ఞానశాస్త్రం అంగీకరిస్తున్నది. అయితే దేవునితో ప్రమేయం లేకుండా ఈ సృష్టి ఉనికిలోకి వచ్చిందన్న సిద్ధాంతానికీ అలాంటి ఊహాగానాలకూ దేవుని వాక్కు వ్యతిరేకం. అయితే సైన్సు పేరుతో చేసే ఊహాగానాలు సైన్సు ధర్మాలు, సత్యాలు కావు. ఈ తేడా తెలియకుండా మనం అపార్థం చేసుకోరాదు. ఈ విశ్వం తనకు తానే ఉనికిలోకి వచ్చిందని చెప్పడం సరైన విజ్ఞానశాస్త్ర సమ్మతం కాదు. అప్పట్లో ఏమి జరిగిందో పరిశీలించేందుకు ఏ శాస్త్రజ్ఞుడూ అక్కడ లేడు. అలాంటివి జరుగుతాయని ప్రయోగ పూర్వకమైన ఏ సాక్ష్యాధారాలు లేవు. విశ్వానికి మూలమేదో చెప్పవలసి వస్తే శాస్త్రజ్ఞులు సామాన్యుల్లాగానే ఊహాగానాలన్నా చెయ్యాలి. లేదా, ఇక్కడ తన వాక్కులో దేవుడు ఇచ్చిన వివరణను నమ్మాలి. అన్నిటి ఆరంభం, మూలం గురించి బైబిల్‌లోని ఈ మొదటి అధ్యాయం హేతుబద్ధమయిన, సక్రమమైన, సమంజసమైన వివరణ ఇస్తున్నది. సైన్సు దీన్ని తప్పని ఇంతవరకు నిరూపించలేదు. అనేకమంది నేర్పరులైన విజ్ఞానవేత్తలు ఈ వివరణను దేవుడు వెల్లడించాడని స్వీకరించి నమ్ముతున్నారు.