1. అబ్రాము తనకు కలిగిన సమస్తమును తన భార్యను తనతో కూడనున్న లోతును వెంటబెట్టుకొని ఐగుప్తులో నుండి నెగెబునకు వెళ్లెను.

“నెగెవ్”– ఆదికాండము 12:9

2. అబ్రాము వెండి బంగారము పశువులు కలిగి బహు ధనవంతుడై యుండెను.

3. అతడు ప్రయాణము చేయుచు దక్షిణమునుండి బేతేలువరకు, అనగా బేతేలుకును హాయికిని మధ్య తన గుడారము మొదట ఉండిన స్థలమువరకు వెళ్లి

4. తాను మొదట బలిపీఠమును కట్టినచోట చేరెను. అక్కడ అబ్రాము యెహోవా నామమున ప్రార్థన చేసెను.

“యెహోవా పేర...చేశాడు”– ఆదికాండము 4:26 ఆదికాండము 12:8.

5. అబ్రాముతో కూడ వెళ్లిన లోతుకును గొఱ్ఱెలు గొడ్లు గుడారములు ఉండెను గనుక

“లోత్”– ఆదికాండము 12:5.

6. వారు కలిసి నివసించుటకు ఆ ప్రదేశము చాలక పోయెను; ఎందుకనగా వారి ఆస్తి వారు కలిసి నివసించలేనంత విస్తారమైయుండెను.

7. అప్పుడు అబ్రాము పశువుల కాపరులకును లోతు పశువుల కాపరులకును కలహము పుట్టెను. ఆ కాలమందు కనానీయులు పెరిజ్జీ యులు ఆ దేశములో కాపురముండిరి.

“కనానువాళ్ళు, పెరిజ్జివాళ్ళు”– ఆదికాండము 10:18 ఆదికాండము 15:20 ఆదికాండము 4:30.

8. కాబట్టి అబ్రాము మనము బంధువులము గనుక నాకు నీకును, నా పశువుల కాపరులకు నీ పశువుల కాపరులకును కలహ ముండకూడదు.

“జగడం”– సామెతలు 15:18 సామెతలు 20:3 మత్తయి 5:40 రోమీయులకు 12:18 1 కోరింథీయులకు 6:7. భూమి కోసం, ఆస్తుల కోసం పోట్లాడుకోవడం బుద్ధిహీనత, దుర్మార్గం. ఎంత చేసినా మనుషులంతా చనిపోయి అంతటినీ విడిచి వెళ్ళిపోవలసిందే – కీర్తనల గ్రంథము 49:10-12 లూకా 12:13-21.

9. ఈ దేశమంతయు నీ యెదుట నున్నదిగదా, దయచేసి నన్ను విడిచి వేరుగానుండుము. నీవు ఎడమతట్టునకు వెళ్లిన యెడల నేను కుడితట్టుకును, నీవు కుడితట్టునకు వెళ్లినయెడల నేను యెడమ తట్టునకును వెళ్లుదునని లోతుతో చెప్పగా

ఆ దేశమంతా దేవుడు అబ్రాహాముకు ఇచ్చాడు. అయితే ఘర్షణ లేకుండా ఉండేందుకు అతడు అందులోని మంచి భాగాలను లోత్‌కు ఇచ్చెయ్యడానికి ఇష్టపడ్డాడు. స్వార్థం లేని మనసు, ప్రవర్తన విషయంలో అబ్రాహాము మనకు ఆదర్శం. ఆదికాండము 26:19-22 కూడా చూడండి.

10. లోతు తన కన్నులెత్తి యొర్దాను ప్రాంతమంతటిని చూచెను. యెహోవా సొదొమ గొమొఱ్ఱా అను పట్టణములను నాశనము చేయకమునుపు సోయరుకు వచ్చువరకు అదంతయు యెహోవా తోటవలెను ఐగుప్తు దేశమువలెను నీళ్లు పారు దేశమైయుండెను.

ఈ నిర్ణయం తీసుకోవడంలో లోత్ అత్యాశ, స్వార్థం కనపరిచాడు. అతడు కోరుకున్నది అతడికి దక్కింది గాని 19వ అధ్యాయంలో ఉన్న రీతిగా ఇది ఆఖరికి అతనికెంతో నష్టాన్ని తెచ్చిపెట్టింది. దేవుడు ధ్వంసం చెయ్యదలచుకున్న నగరాలకు లోత్ చేరువగా వచ్చేలా చేసింది ఈ నిర్ణయం (వ 12,13). ద

11. కాబట్టి లోతు తనకు యొర్దాను ప్రాంతమంతటిని ఏర్పరచుకొని తూర్పుగా ప్రయాణముచేసెను. అట్లు వారు ఒకరి కొకరు వేరై పోయిరి.

12. అబ్రాము కనానులో నివసించెను. లోతు ఆ మైదానమందున్న పట్టణముల ప్రదేశములలో కాపుర ముండి సొదొమదగ్గర తన గుడారము వేసికొనెను.

13. సొదొమ మనుష్యులు దుష్టులును, యెహోవా దృష్టికి బహు పాపులునై యుండిరి.

“యెహోవాకు విరోధంగా”– పాపమంతా దేవునికి విరోధమే – కీర్తనల గ్రంథము 51:4.

14. లోతు అబ్రామును విడిచి పోయిన తరువాత యెహోవా ఇదిగో నీ కన్నులెత్తి నీవు ఉన్నచోట నుండి ఉత్తరపుతట్టు దక్షిణపుతట్టు తూర్పు తట్టు పడమరతట్టును చూడుము;

కనాను గురించిన ఈ వాగ్దానాన్ని దేవుడు చాలా సార్లు పదేపదే చేశాడు (ఆదికాండము 12:7 ఆదికాండము 15:18 ఆదికాండము 17:8). కనాను అబ్రాహాము సంతానానికి శాశ్వత బహుమానం (వ 15).

15. ఎందుకనగా నీవు చూచుచున్న యీ దేశమంతటిని నీకును నీ సంతానమునకును సదాకాలము ఇచ్చెదను.
అపో. కార్యములు 7:5, గలతియులకు 3:16

16. మరియు నీ సంతానమును భూమి మీద నుండు రేణువులవలె విస్తరింపచేసెదను; ఎట్లనగా ఒకడు భూమిమీదనుండు రేణువులను లెక్కింప గలిగినయెడల నీ సంతానమును కూడ లెక్కింపవచ్చును.

17. నీవు లేచి యీ దేశముయొక్క పొడుగున వెడల్పున దానిలో సంచరించుము; అది నీకిచ్చెదనని అబ్రాముతో చెప్పెను.

18. అప్పుడు అబ్రాము తన గుడారము తీసి హెబ్రోను లోని మమ్రే దగ్గరనున్న సింధూర వృక్షవనములోదిగి అక్కడ యెహోవాకు బలిపీఠమును కట్టెను.

“హెబ్రోను”– జెరుసలంకు సుమారు 35 కిలోమీటర్లు దక్షిణాన ఉన్న ఊరు.