1. యాసేపును ఐగుప్తునకు తీసికొని వచ్చినప్పుడు ఫరో యొక్క ఉద్యోగస్థుడును రాజసంరక్షక సేనాధిపతియు నైన పోతీఫరను నొక ఐగుప్తీయుడు, అక్కడికి అతని తీసికొని వచ్చిన ఇష్మాయేలీయులయొద్ద నతని కొనెను.

ఆదికాండము 37:25 ఆదికాండము 37:28 ఆదికాండము 37:36 చూడండి.

2. యెహోవా యోసేపునకు తోడైయుండెను గనుక అతడు వర్ధిల్లుచు తన యజమానుడగు ఆ ఐగుప్తీయుని యింట నుండెను.
అపో. కార్యములు 7:9

“తోడుగా”– వ 3,21,30; అపో. కార్యములు 7:9 ఆదికాండము 21:20 ఆదికాండము 26:3 ఆదికాండము 27:45 ఆదికాండము 31:3 ఆదికాండము 31:5 ఆదికాండము 32:9 ఆదికాండము 35:3. దేవుడు మనకు తోడుగా ఉండడమన్నది అన్నిటికన్నా మిన్న అయిన దీవెన.

3. యెహోవా అతనికి తోడై యుండెననియు, అతడు చేసినదంతయు అతని చేతిలో యెహోవా సఫలము చేసెననియు అతని యజమానుడు చూచినప్పుడు
అపో. కార్యములు 7:9

“చేసే పనులన్నీ”– యెహోషువ 1:8 కీర్తనల గ్రంథము 1:3.

4. యోసేపు మీద అతనికి కటాక్షము కలిగెను గనుక అతని యొద్ద పరిచర్య చేయువాడాయెను. మరియు అతడు తన యింటిమీద విచారణకర్తగా అతని నియమించి తనకు కలిగినదంతయు అతనిచేతి కప్పగించెను.

5. అతడు తన యింటిమీదను తనకు కలిగినదంతటి మీదను అతని విచారణ కర్తగా నియమించిన కాలము మొదలుకొని యెహోవా యోసేపు నిమిత్తము ఆ ఐగుప్తీయుని యింటిని ఆశీర్వదించెను. యెహోవా ఆశీర్వాదము యింటిలో నేమి అతనికి కలిగిన సమస్తము మీదను ఉండెను.

“యోసేపు”– దేవునితో నడిచే వ్యక్తి ఎక్కడికి వెళ్ళినా అందరికీ దీవెనకరంగానే ఉంటాడు (ఆదికాండము 12:2). దేవుని దీవెనలు పొందడానికీ, ఇతరులకు దీవెనగా ఉండడానికీ తన తండ్రి ఉపయోగించిన నక్కజిత్తులూ, మోసాలూ యోసేపు చెయ్యలేదు, చెయ్యనక్కరలేదని గ్రహించాడు కూడా.

6. అతడు తనకు కలిగినదంతయు యోసేపు చేతి కప్పగించి, తాను ఆహారము తినుట తప్ప తనకేమి ఉన్నదో ఏమి లేదో విచారించినవాడు కాడు. యోసేపు రూపవంతుడును సుందరుడునై యుండెను.

ఇతరులు తమకున్న దానంతటినీ యోసేపు చేతిలో పెట్టి నిశ్చింతగా ఉండగలిగేటంత నమ్మకమైనా వ్యక్తిగా యోసేపు ఎప్పుడూ ఋజువు చేస్తూ వచ్చాడు – వ 22,23; ఆదికాండము 41:41. అతడు మొదట చిన్న విషయాల్లో నమ్మకంగా ఉన్నాడు, ఆ తరువాత గొప్ప విషయాల్లో (లూకా 16:10 చూడండి). ఈనాడు భారత దేశంలోని క్రైస్తవ సంఘాలకు ఎలాంటి మనుషులు అవసరమో దానికి యోసేపు దేదీప్యమానమైన ఆదర్శం. కానీ యోసేపుకు వ్యతిరేక లక్షణాలున్న వారు ఇంతమంది ఉండడం ఎంత శోచనీయం! దేనినైనా వారి చేతుల్లో పెట్టడానికి గానీ వారిని ఏ విషయంలో కూడా నమ్మడానికి గానీ వీల్లేకపోవడం ఎంత విచారకరం!

7. అటు తరువాత అతని యజమానుని భార్య యోసేపు మీద కన్నువేసి - తనతో శయనించుమని చెప్పెను

8. అయితే అతడు ఒప్పక నా యజమానుడు తనకు కలిగిన దంతయు నా చేతి కప్పగించెనుగదా, నా వశమున తన యింటిలో ఏమి ఉన్నదో అతడెరుగడు; ఈ యింటిలో నాకంటె పైవాడు ఎవడును లేడు.

సామెతలు 5:3-4 సామెతలు 6:23-24 సామెతలు 7:4-5 సామెతలు 77:25-27. “పాపిష్ఠి కార్యం”– నిర్గమకాండము 20:14 లేవీయకాండము 20:10 సామెతలు 2:16-17 సామెతలు 5:3-23. “దేవునికి విరోధంగా”– ఆదికాండము 20:6 ఆదికాండము 42:18 2 సమూయేలు 12:13 కీర్తనల గ్రంథము 51:4. యోసేపు దేవునికి విరోధంగా పాపం చేయకుండా ఉండగలగడానికి కారణం ఆదికాండము 42:18లో ఉంది.

9. నీవు అతని భార్యవైనందున నిన్ను తప్ప మరి దేనిని నా కప్పగింపక యుండలేదు. కాబట్టి నేనెట్లు ఇంత ఘోరమైన దుష్కార్యము చేసి దేవునికి విరోధముగా పాపము కట్టుకొందునని తన యజమానుని భార్యతో అనెను.

10. దిన దినము ఆమె యోసేపుతో మాటలాడుచుండెను గాని అతడు ఆమెతో శయనించుటకైనను ఆమెతో నుండుటకైనను ఆమె మాట విన్నవాడుకాడు.

11. అట్లుండగా ఒక నాడు అతడు తన పనిమీద ఇంటిలోపలికి వెళ్లినప్పుడు ఇంటి మనుష్యులలో ఎవరును అక్కడ లేరు.

12. అప్పుడామె ఆతని వస్త్రము పట్టుకొని తనతో శయనింపుమని చెప్పగా అతడు తన వస్త్రమును ఆమె చేతిలో విడిచి పెట్టి తప్పించుకొని బయటికి పారిపోయెను.

“పారిపొయ్యాడు”– 2 తిమోతికి 2:22 సామెతలు 2:16 సామెతలు 5:8.

13. అతడు తన వస్త్రమును ఆమె చేతిలో విడిచి తప్పించుకొనిపోవుట ఆమె చూచినప్పుడు

14. తన యింటి మనుష్యులను పిలిచిచూడుడి, అతడు మనలను ఎగతాళి చేయుటకు ఒక హెబ్రీయుని మనయొద్దకు తెచ్చియున్నాడు. నాతో శయనింపవలెనని వీడు నా యొద్దకురాగా నేను పెద్దకేక వేసితిని.

కీర్తనల గ్రంథము 11:2 కీర్తనల గ్రంథము 37:12 కీర్తనల గ్రంథము 38:20 చూడండి. ఒక చెడు స్త్రీ వేసిన అపనింద కూడా చివరికి యోసేపు మేలుకే కారణం అయింది. ఆ మాటలవల్ల అతడు జైల్లో పడ్డాడు. అక్కడ అతడు రాజు దృష్టిలో పడ్డాడు. అక్కడినుంచి ఈజిప్ట్ ప్రధానమంత్రి అయ్యాడు. రోమీయులకు 8:28 చూడండి, నమ్మండి. “హీబ్రూ”– ఆదికాండము 11:16.

15. నేను బిగ్గరగా కేకవేయుట వాడు విని నా దగ్గర తన వస్త్రమును విడిచిపెట్టి తప్పించుకొని బయటికి పారిపోయెనని వారితో చెప్పి

16. అతని యజమానుడు ఇంటికి వచ్చువరకు అతని వస్త్రము తనదగ్గర ఉంచుకొనెను.

17. అప్పుడామె తన భర్తతో ఈ మాటల చొప్పున చెప్పెను నీవు మనయొద్దకు తెచ్చిన ఆ హెబ్రీదాసుడు నన్ను ఎగతాళి చేయుటకు నాయొద్దకు వచ్చెను.

18. నేను బిగ్గరగా కేక వేసినప్పుడు వాడు తన వస్త్రము నా దగ్గర విడిచిపెట్టి తప్పించుకొని బయటికి పారి పోయెననెను

19. కాబట్టి అతని యజమానుడు ఇట్లు నీ దాసుడు నన్ను చేసెనని తన భార్య తనతో చెప్పిన మాటలు విన్నప్పుడు కోపముతో మండిపడి

సామెతలు 6:34.

20. అతనిని పట్టుకొని రాజు ఖైదీలు బంధింపబడు చెరసాలలో వేయించెను. అతడక్కడ చెరసాలలో ఉండెను.
హెబ్రీయులకు 11:36

కీర్తనల గ్రంథము 105:17-19. యిర్మియా 37:15-16 నోట్ చూడండి. కష్టాల మూలంగా కలిగే మేలును గురించి యోబు 3:20 చూడండి.

21. అయితే యెహోవా యోసేపునకు తోడైయుండి, అతని యందు కనికరపడి అతనిమీద ఆ చెరసాలయొక్క అధిపతికి కటాక్షము కలుగునట్లుచేసెను.
అపో. కార్యములు 7:9-10

“తోడుగా ఉండి”– వ 2. “కటాక్షం”– దేవుడు మనతో ఉండి మనపట్ల కటాక్షం చూపితే మనం ఎక్కడ ఉన్నా ఫర్వాలేదు. అపో. కార్యములు 16:22-25 ఫిలిప్పీయులకు 4:11-13 పోల్చి చూడండి.

22. చెరసాల అధిపతి ఆ చెరసాలలోనున్న ఖైదీలనందరిని యోసేపు చేతి కప్పగించెను. వారక్కడ ఏమి చేసిరో అదంతయు అతడే చేయించువాడు.

వ 6.

23. యెహోవా అతనికి తోడైయుండెను గనుక ఆ చెరసాల అధిపతి అతని చేతికి అప్పగింపబడిన దేనిగూర్చియు విచారణ చేయక యుండెను. అతడు చేయునది యావత్తు యెహోవా సఫలమగునట్లు చేసెను.

వ 3.