1. ధాన్యము ఐగుప్తులో నున్నదని యాకోబు తెలిసి కొనినప్పుడు మీరేల ఒకరి ముఖము ఒకరు చూచు చున్నారని తన కుమారులతో అనెను.

2. మరియు అతడు-చూడుడి, ఐగుప్తులో ధాన్యమున్నదని వింటిని, మనము చావక బ్రదుకునట్లు మీరు అక్కడికి వెళ్లి మనకొరకు అక్కడనుండి ధాన్యము కొనుక్కొని రండని చెప్పగా
అపో. కార్యములు 7:12

3. యోసేపు పదిమంది అన్నలు ఐగుప్తులో ధాన్యము కొన బోయిరి.

4. అయినను-ఇతనికి హాని సంభవించునేమో అని యాకోబు యోసేపు తమ్ముడగు బెన్యామీనును అతని అన్న లతో పంపిన వాడు కాడు.

యాకోబు ప్రేమను చూరగొన్న భార్య రాహేలు కన్న కొడుకుల్లో కనానులో మిగిలినది బెన్యామీను ఒక్కడే.

5. కరవు కనాను దేశములో ఉండెను గనుక ధాన్యము కొనవచ్చినవారితో కూడ ఇశ్రాయేలు కుమారులును వచ్చిరి.
అపో. కార్యములు 7:11

6. అప్పుడు యోసేపు ఆ దేశమంతటిమీద అధికారియై యుండెను. అతడే ఆ దేశ ప్రజలందరికిని ధాన్యమమ్మకము చేయువాడు గనుక యోసేపు సహోదరులు వచ్చి ముఖములు నేలను మోపి అతనికి వందనము చేసిరి.

ఆదికాండము 37:7-10.

7. యోసేపు తన సహోదరులను చూచి వారిని గురుతుపట్టి వారికి అన్యునివలె కనబడి వారితో కఠినముగా మాటలాడి-మీరెక్కడనుండి వచ్చితిరని అడిగెను. అందుకు వారు-ఆహారము కొనుటకు కనాను దేశమునుండి వచ్చితి మనిరి.

యోసేపు క్షమాగుణం లేనివాడు కాదు (ఆదికాండము 45:4-5). తనకు వ్యతిరేకంగా వారు చేసిన పాపం విషయంలో వారు పశ్చాత్తాపం చెందారో లేదో చూద్దామని అతని ఉద్దేశం కావచ్చు (ఆదికాండము 37:18 ఆదికాండము 37:28).

8. యోసేపు తన సహోదరులను గురుతు పట్టెను గాని వారతని గురుతు పట్టలేదు.

“అతణ్ణి”– కనీసం ఇరవై ఏళ్ళనుండి వాళ్ళు యోసేపును చూడలేదు (ఆదికాండము 37:2 ఆదికాండము 41:46 ఆదికాండము 41:53). అంతేగాక అతడు చనిపోయాడనుకున్నారు (వ 13; ఆదికాండము 44:20). ఏది ఏమైనా ఈజిప్ట్ పరిపాలకుడౌతాడని మాత్రం వారు ఊహించలేదు. అంతేగాక ఈజిప్ట్‌వారి తీరున యోసేపు క్షవరం చేసుకుని బట్టలు వేసుకొని ఉండేవాడు.

9. యోసేపు వారిని గూర్చి తాను కనిన కలలు జ్ఞాపకము చేసికొని-మీరు వేగులవారు ఈ దేశముగుట్టు తెలిసికొన వచ్చితిరని వారితో ననగా

“కలలను”– ఆదికాండము 37:5-9. తన కలల్లో దేవుడు తన సంకల్పాలను వెల్లడి చేసిన సంగతీ, అందుకు వారు తనను ద్వేషించిన సంగతీ అతనికి గుర్తుంది. అందుకనే ఇలా మాట్లాడాడు. మిగతా కథను బట్టి అతని మనస్సులో ఉన్నది పగ కాదని తెలుస్తుంది.

10. వారులేదు ప్రభువా, నీ దాసులమైన మేము ఆహారము కొనుటకే వచ్చితివిు;

“ప్రభూ”– ఆదికాండము 37:8.

11. మేమందరము ఒక్క మనుష్యుని కుమారులము; మేము యథార్థవంతులమేగాని నీ దాసులమైన మేము వేగులవారము కామని అతనితో చెప్పిరి.

12. అయితే అతడు-లేదు, ఈ దేశము గుట్టు తెలిసి కొనుటకై వచ్చితిరని వారితో అనెను.

13. అందుకు వారు-నీ దాసులమైన మేము పండ్రెండుమంది సహోదరులము, కనాను దేశములో నున్న ఒక్క మనుష్యుని కుమారులము; ఇదిగో కనిష్ఠుడు నేడు మా తండ్రియొద్ద ఉన్నాడు; ఒకడు లేడు అని ఉత్తరమిచ్చిరి.

14. అయితే యోసేపు-మీరు వేగులవారని నేను మీతో చెప్పినమాట నిజమే.

15. దీనివలన మీ నిజము తెలియబడును; ఫరో జీవము తోడు, మీ తమ్ముడు ఇక్కడికి వచ్చితేనే గాని మీరిక్కడనుండి వెళ్లకూడదు.

16. మీ తమ్ముని తీసికొని వచ్చుటకు మీలో ఒకని పంపుడి; అయితే మీరు బంధింపబడి యుందురు. అట్లు మీలో సత్యమున్నదో లేదో మీ మాటలు శోధింపబడును; లేనియెడల ఫరో జీవముతోడు, మీరు వేగుల వారని చెప్పి

17. వారిని మూడు దినములు చెరసాలలో వేయించెను.

18. మూడవ దినమున యోసేపు వారిని చూచి నేను దేవునికి భయపడువాడను; మీరు బ్రదుకునట్లు దీని చేయుడి.

“భయభక్తులున్నాయి”– యోసేపు యొక్క జ్ఞానయుక్తమైన పవిత్ర జీవితం వెనుక ఉన్న రహస్యం ఇదే. దైవభయం గురించి నోట్స్ ఆదికాండము 20:11 కీర్తనల గ్రంథము 34:11-14 కీర్తనల గ్రంథము 111:10 సామెతలు 1:7.

19. మీరు యథార్థవంతులైతిరా మీ సహోదరులలో ఒకడు ఈ చెరసాలలో బంధింపబడవలెను; మీరు వెళ్లి మీ కుటుంబముల కరవు తీరుటకు ధాన్యము తీసికొని పోవుడి.

20. మీ తమ్ముని నా యొద్దకు తీసికొని రండి; అట్లు మీ మాటలు సత్యమైనట్టు కనబడును గనుక మీరు చావరని చెప్పెను. వారట్లు చేసిరి.

21. అప్పుడు వారు నిశ్చ యముగా మన సహోదరుని యెడల మనము చేసిన అపరాధమునకు శిక్ష పొందుచున్నాము. అతడు మనలను బతిమాలు కొనినప్పుడు మనము అతని వేదన చూచియు వినకపోతిమి.;అందువలన ఈ వేదన మనకు వచ్చెదనని ఒకనితో ఒకడు మాటలాడుకొనిరి .

“యోసేపు”– ఆదికాండము 37:26-28. వారిలో పశ్చాత్తాపం ఆరంభమైంది. యోసేపు చూడాలని కోరినది ఇదే. అతనికి (దేవునికి కూడా) ఆ పశ్చాత్తాపం వారిలో కనబడడం చాలా ప్రాముఖ్యం. ఇస్రాయేల్ ప్రజతో (నాటినుంచి నిస్సందేహంగా యూదేతరులనేకులతో కూడా) దేవుడెలా ప్రవర్తిస్తున్నాడో పోల్చిచూడండి – హోషేయ 5:15 యిర్మియా 3:12-13. దేవుని దీవెనలు కలగాలంటే పాపాన్ని కప్పిపుచ్చి అలానే మర్చిపోరాదు. పశ్చాత్తాపం గురించి నోట్ మత్తయి 3:2 మొ।।.

22. మరియు రూబేను ఈ చిన్నవానియెడల పాపము చేయకుడని నేను మీతో చెప్పలేదా? అయినను మీరు వినరైతిరి గనుక అతని రక్తాప రాధము మనమీద మోపబడుచున్నదని వారి కుత్తర మిచ్చెను.

“ఆ అబ్బాయి”– ఆదికాండము 37:21-22.

23. అయితే ద్విభాషి వారి మధ్య నుండెను గనుక తన మాట యోసేపు గ్రహించెనని వారు తెలిసికొనలేదు.

24. అతడు వారియొద్దనుండి అవతలకు పోయి యేడ్చి, మరల వారియొద్దకు వచ్చి వారితో మాటలాడి, వారిలో షిమ్యోనును పట్టుకొని వారి కన్నుల ఎదుట అతని బంధించెను.

“కన్నీళ్ళు విడిచాడు”– ఆదికాండము 43:30 ఆదికాండము 45:14-15. వారిలో పశ్చాత్తాపం పొడసూపడం యోసేపును కలచివేసింది (నిజానికి పశ్చాత్తాపాన్ని చూచినప్పుడు దేవుడు కూడా ఇంతే – లూకా 15:7 లూకా 15:10). అయితే పశ్చాత్తాపం ఇంకా సంపూర్ణం కాలేదనీ, తానెవరో వారికి తెలియజేసే సమయం ఇంకా రాలేదనీ యోసేపుకు అనిపించింది.

25. మరియు యోసేపు వారి గోనెలను ధాన్యముతో నింపుట కును, ఎవరి రూకలు వారి గోనెలో తిరిగి ఉంచుటకును, ప్రయాణముకొరకు భోజనపదార్థములు వారికిచ్చుటకును ఆజ్ఞ ఇచ్చెను. అతడు వారియెడల నిట్లు జరిగించెను.

ఇందులో యోసేపు ఉద్దేశం తెలుసుకోవాలంటే వ 28; ఆదికాండము 43:18-22 చూడండి.

26. వారు తాము కొనిన ధాన్యమును తమ గాడిదలమీద ఎక్కించుకొని అక్కడనుండి వెళ్లిపోయిరి.

27. అయితే వారు దిగిన చోట ఒకడు తన గాడిదకు మేతపెట్టుటకై తన గోనె విప్పినప్పుడు అతని రూకలు కనబడెను, అవి అతని గోనెమూతిలో ఉండెను.

28. అప్పుడతడు-నా రూకలు తిరిగి యిచ్చివేసినారు. ఇదిగో ఇవి నా గోనె లోనే ఉన్నవని తన సహోదరులతో చెప్పెను. అంతట వారు గుండె చెదిరిపోయినవారై జడిసి-ఇదేమిటి? దేవుడు మనకిట్లు చేసెనని ఒకనితో ఒకడు చెప్పుకొనిరి.

“దేవుడు”– దేవుడు తమ విషయంలో విపరీతంగా వ్యవహరిస్తున్నాడని గ్రహించి తమపైకి శిక్ష తెస్తున్నాడేమోనని వాళ్ళు భయపడ్డారు.

29. వారు కనాను దేశమందున్న తమ తండ్రియైన యాకోబునొద్దకు వచ్చి తమకు సంభవించినది యావత్తును అతనికి తెలియ చేసిరి.

30. ఎట్లనగా-ఆ దేశమునకు ప్రభువైనవాడు మాతో కఠినముగా మాటలాడి, మేము ఆ దేశమును వేగుచూడ వచ్చినవారమని అనుకొనెను.

31. అప్పుడు మేము యథార్థవంతులము, వేగులవారము కాము.

32. పండ్రెండుమంది సహోదరులము, ఒక్కతండ్రి కుమారులము, ఒకడు లేడు, మా తమ్ముడు నేడు కనాను దేశమందు మా తండ్రియొద్ద ఉన్నాడని అతనితో చెప్పితివిు.

33. అందుకు ఆ దేశపు ప్రభువు మమ్మును చూచిమీరు యథార్థవంతులని దీనివలన నేను తెలిసికొందును. మీ సహోదరులలో ఒకనిని నాయొద్ద విడిచిపెట్టి మీ కుటుంబములకు కరవు తీరునట్లు

34. నాయొద్దకు ఆ చిన్నవాని తోడుకొనిరండి. అప్పుడు మీరు యథార్థవంతులే గాని వేగులవారు కారని నేను తెలిసికొని మీ సహోదరుని మీకప్పగించెదను; అప్పుడు మీరు ఈ దేశమందు వ్యాపారము చేసికొనవచ్చునని చెప్పెననిరి.

35. వారు తమ గోనెలను కుమ్మరించినప్పుడు ఎవరి రూకల మూట వారి గోనెలో ఉండెను. వారును వారి తండ్రియు ఆ రూకల మూటలు చూచి భయపడిరి.

36. అప్పుడు వారి తండ్రియైన యాకోబు వారిని చూచి మీరు నన్ను పుత్రహీనునిగా చేయుచున్నారు; యోసేపు లేడు; షిమ్యోను లేడు; మీరు బెన్యామీనును కూడ తీసికొనపోవుదురు; ఇవన్నియు నాకు ప్రతికూలముగా ఉన్నవని వారితో చెప్పెను.

యోసేపు అదృశ్యం కావడానికి అతడి అన్నలే బాధ్యులని యాకోబు ఎంచినట్టుంది. “నా మీదికే”– తన కొడుకు యోసేపు గ్రహించినదాన్ని యాకోబు ఇంకా గ్రహించలేదు (ఆదికాండము 45:5-7 ఆదికాండము 50:20). పౌలు కూడా తరువాత దీన్నే గ్రహించాడు (రోమీయులకు 8:31).

37. అందుకు రూబేను-నేనతని నీయొద్దకు తీసికొని రానియెడల నా యిద్దరు కుమారులను నీవు చంపవచ్చును; అతని నా చేతికప్పగించుము, అతని మరల నీయొద్దకు తీసికొని వచ్చి అప్పగించెదనని తన తండ్రితో చెప్పెను.

ఆదికాండము 37:21-22 చూడండి.

38. అయితే అతడునా కుమారుని మీతో వెళ్లనియ్యను; ఇతని అన్న చనిపోయెను, ఇతడు మాత్రమే మిగిలియున్నాడు. మీరు పోవు మార్గమున ఇతనికి హాని సంభవించినయెడల నెరసిన వెండ్రుకలు గల నన్ను మృతుల లోకములోనికి దుఃఖముతో దిగిపోవునట్లు చేయుదురని చెప్పెను.

“అతడు మాత్రమే మిగిలాడు”– రాహేలుకు పుట్టినది యోసేపు, బెన్యామీనే గనుక వీళ్ళనే అప్పుడప్పుడు యాకోబు తన కొడుకులుగా ఎంచుతున్నట్టున్నాడు (ఆదికాండము 33:2 ఆదికాండము 44:27). ఇలాంటి పక్షపాతం వివేకం అనిపించుకోదు (ఆదికాండము .25:28 ఆదికాండము 27:1).