1. ఆదాము వంశావళి గ్రంథము ఇదే. దేవుడు ఆదామును సృజించిన దినమున దేవుని పోలికెగా అతని చేసెను;
మత్తయి 1:1, 1 కోరింథీయులకు 11:7

ఆదికాండము 1:26-28

2. మగవానిగాను ఆడుదానిగాను వారిని సృజించి వారు సృజించబడిన దినమున వారిని ఆశీర్వదించి వారికి నరులని పేరు పెట్టెను.
మత్తయి 19:4, మార్కు 10:6

“సృజించిన రోజు”– ఇక్కడ “రోజు” అంటే 24 గంటల సమయం కంటే ఎక్కువ కాలం సూచించవచ్చు. ఎందుకంటే ఆదాము హవలను వేరు వేరు సమయాల్లో సృజించడం జరిగింది (ఆదికాండము 2:7 ఆదికాండము 2:15-22).

3. ఆదాము నూట ముప్పది యేండ్లు బ్రదికి తన పోలికెగా తన స్వరూపమున కుమారుని కని అతనికి షేతు అను పేరు పెట్టెను.
1 కోరింథీయులకు 15:49

ఇప్పుడు ఆదాము పతనమైన పాపి. అతడి స్వభావం అతడి సంతానానికి, ఆ విధంగా మనకూ సంక్రమించింది (యోబు 14:4 కీర్తనల గ్రంథము 51:5). మనమంతా పుట్టుకతోనే పాపులం. అనేక శతాబ్దాలుగా హిందువులు చేస్తున్న ఒక ప్రార్థన ఇందుకు అనుగుణంగా ఉంది. ఈ శ్లోకం అందరూ ఎరిగినదే. “పాపోహం, పాపకర్మాణాం, పాపాత్మా, పాప సంభవాం. పాహిమాం, కృపయా దేవా, శరణాగత వత్సలా!” (నేను నా పుట్టుకను బట్టీ, చేసిన క్రియలను బట్టీ పాపాత్ముణ్ణి. నా ఆత్మ పాపంతో భ్రష్టంగా ఉంది. పాపంలోనే నేను పుట్టాను. ప్రభూ, పాపినైన నన్ను కరుణించి రక్షించు). దైవభక్తి కలిగిన షేతు సంతానం కూడా పాపాత్ములే.

4. షేతును కనిన తరువాత ఆదాము బ్రదికిన దినములు ఎనిమిదివందల ఏండ్లు; అతడు కుమారులను కుమార్తెలను కనెను.

నోవహు కాలంలో వచ్చిన జలప్రళయానికి ముందు మనుషులు చాలా కాలం జీవించేవారు. అటు తరువాత మనిషి ఆయుష్షు క్రమేణ తగ్గుతూవచ్చింది – ఆదికాండము 50:26.

5. ఆదాము బ్రదికిన దినములన్నియు తొమ్మిదివందల ముప్పది యేండ్లు; అప్పుడతడు మృతిబొందెను.

ఇది దైవభక్తి కలిగిన షేతు సంతతివారి జాబితాను, అంటే జలప్రళయానికి ముందు ఆఖరు న్యాయవంతుడైన నోవహు వరకు జాబితాను తెలియజేస్తున్నది. ఈ జాబితాలో ఆదామునుంచి నోవహుదాకా ఉన్న వరుసలోని ప్రతి ఒక్కరి పేరూ కనిపిస్తున్నదని ఖచ్చితంగా చెప్పలేము. బైబిల్లోని హీబ్రూ గ్రీకు భాషల్లో ఒక వ్యక్తి ఫలానావారిని “కన్నాడు” లేదా ఒక వ్యక్తికి వీరు “జన్మించారు” అంటే ఆ వ్యక్తి వారికి పూర్వీకుడు అనే అర్థం కూడా రావచ్చు. ఆ వ్యక్తికీ వారికీ మధ్యలో అనేక తరాలుండవచ్చు. ఫలానా వ్యక్తి “కుమారుడు” అంటే అర్థం ఆ వ్యక్తి సంతతిలోనివాడు (అంటే మధ్యలో చాలా తరాలు గడిచి ఉండవచ్చు) అనే అర్థం కూడా వస్తుంది. 1 దినవృత్తాంతములు 26:24 లో మూలభాషలో “మోషే కొడుకైన గెర్షోం కొడుకు షెబూయేలు” అని ఉంది. గెర్షోం మోషే కొడుకు అన్నది నిజమే గానీ షెబూయేలు మాత్రం 400 సంవత్సరాల తరువాత పుట్టాడు. మత్తయి 1:1 లో “ఇది యేసుక్రీస్తు వంశావళి. ఆయన దావీదు కుమారుడు. దావీదు అబ్రాహాము కుమారుడు” అని రాసి ఉంది. దావీదు తరువాత సుమారు 1000 సంవత్సరాలకు యేసు జన్మించాడు. అలానే దావీదు కంటే అనేక శతాబ్దాలకు ముందు అబ్రాహాము జీవించాడు. ఈ వంశవృక్షాల్లో ఒక్కోసారి కావాలనే కొన్ని పేర్లు చెప్పకుండా వదిలెయ్యడం జరుగుతూ ఉంటుంది. 1 దినవృత్తాంతములు 6:7-11 లో ఇచ్చిన కొన్ని పేర్లు ఎజ్రా 7:3 లో కనిపించవు. పైగా ఎజ్రా ఇక్కడ తన స్వంత వంశావళినే ఇస్తున్నాడు. మత్తయి 1:1-17 లో యేసు క్రీస్తు వంశావళిలోని ముగ్గురు రాజుల పేర్లు కనిపించవు. అక్కడ నోట్ చూడండి. మానవజాతి ఈ భూమిపై ఎన్నాళ్ళనుంచి ఉన్నదనే సంగతి బైబిలు వెల్లడి చేయడం లేదు. ఎందుకంటే తద్వారా మనకు ఏవిధమైన ఆధ్యాత్మిక మేలూ చేకూరదు. ఈ వంశావళుల ద్వారా ఆ కాలాన్ని మనం లెక్కించలేం. దేవుడు మన కుతూహలాన్ని తీర్చడానికి బైబిలును ఇవ్వలేదు గానీ మన సృష్టికర్త, ముక్తిదాత అయిన దేవుని చెంతకు మనల్ని నడిపించడానికే.

6. షేతు నూట అయిదేండ్లు బ్రదికి ఎనోషును కనెను.

7. ఎనోషును కనిన తరువాత షేతు ఎనిమిదివందల ఏడేండ్లు బ్రదికి కుమారులను కుమార్తెలను కనెను.

8. షేతు బ్రదికిన దిన ములన్నియు తొమ్మిదివందల పండ్రెండేండ్లు; అప్పుడతడు మృతిబొందెను.

9. ఎనోషు తొంబది సంవత్సరములు బ్రదికి, కేయినానును కనెను.

10. కేయినానును కనిన తరువాత ఎనోషు ఎనిమిది వందల పదునైదేండ్లు బ్రదికి కుమారులను కుమార్తెలను కనెను.

11. ఎనోషు దినములన్నియు తొమ్మిదివందల అయి దేండ్లు; అప్పుడతడు మృతిబొందెను.

12. కేయినాను డెబ్బది యేండ్లు బ్రదికి మహలలేలును కనెను.

13. మహలలేలును కనినతరువాత కేయినాను ఎనిమిది వందల నలువది యేండ్లు బ్రదికి కుమారులను కుమార్తెలను కనెను.

14. కేయినాను దినములన్నియు తొమ్మిదివందల పది యేండ్లు; అప్పుడతడు మృతిబొందెను.

15. మహలలేలు అరువది యైదేండ్లు బ్రదికి యెరెదును కనెను.

16. యెరెదును కనినతరువాత మహలలేలు ఎనిమిది వందల ముప్పదియేండ్లు బ్రదికి కుమారులను కుమార్తెలను కనెను.

17. మహలలేలు దినములన్నియు ఎనిమిదివందల తొంబదియైదేండ్లు; అప్పుడతడు మృతిబొందెను.

18. యెరెదు నూట అరువది రెండేండ్లు బ్రదికి హనోకును కనెను.

19. హనోకును కనిన తరువాత యెరెదు ఎనిమిది వందలయేండ్లు బ్రదికి కుమారులను కుమార్తెలను కనెను.

20. యెరెదు దినములన్నియు తొమ్మిదివందల అరువదిరెండేండ్లు; అప్పుడతడు మృతిబొందెను.

21. హనోకు అరువది యైదేండ్లు బ్రదికి మెతూషెలను కనెను.

22. హనోకు మెతూషెలను కనిన తరువాత మూడు వందలయేండ్లు దేవునితో నడుచుచు కుమారులను కుమార్తెలను కనెను.

“దేవుని సహవాసంలో నడిచాడు”– ఆదికాండము 6:9 ఆదికాండము 17:1 ఆదికాండము 24:40 ఆదికాండము 48:15 మీకా 6:8 మలాకీ 2:6 1 థెస్సలొనీకయులకు 2:12 ఆమోసు 3:3 లేవీయకాండము 26:23-24. హనోకు ప్రవక్త అని తెలుస్తున్నది (యూదా 1:14). దేవుడు అతనికి మరణం ఉండదని మాట ఇచ్చి ఉండాలి. ఎందుకంటే నమ్మకంవల్లే హనోకు మరణం చూడకుండా దేవుని దగ్గరికి వెళ్ళిపోయాడని హెబ్రీయులకు 11:5 లో రాసి ఉంది. బైబిలు ప్రకారం నమ్మకం అంటే దేవుడు వెల్లడి చేసినదానిని నమ్మడం. శరీరంతో సహా ఈ లోకంలో నుంచి వెళ్ళిపోయినవారు బైబిల్లో ముగ్గురే కనిపిస్తారు – హనోకు, ఏలీయా (2 రాజులు 2:11), యేసు ప్రభువు (లూకా 24:51). హనోకు, ఏలీయా చనిపోలేదు. యేసు చనిపోయాడు.

23. హనోకు దినములన్నియు మూడువందల అరువదియైదేండ్లు.

24. హనోకు దేవునితో నడిచిన తరువాత దేవుడతని తీసికొనిపోయెను గనుక అతడు లేకపోయెను.
హెబ్రీయులకు 11:5

25. మెతూషెల నూట ఎనుబదియేడేండ్లు బ్రదికి లెమెకును కనెను.

26. మెతూషెల లెమెకును కనిన తరువాత ఏడు వందల ఎనుబది రెండేండ్లు బ్రదికి కుమారులను కుమార్తెలను కనెను.

27. మెతూషెల దినములన్నియు తొమ్మిదివందల అరువది తొమ్మిదియేండ్లు; అప్పుడతడు మృతిబొందెను.

28. లెమెకు నూట ఎనుబది రెండేండ్లు బ్రదికి ఒక కుమారుని కని

29. భూమిని యెహోవా శపించినందువలన కలిగిన మన చేతుల కష్టము విషయములోను మన పని విషయము లోను ఇతడు మనకు నెమ్మది కలుగజేయుననుకొని అతనికి నోవహు అని పేరు పెట్టెను.
రోమీయులకు 8:20

30. లెమెకు నోవహును కనిన తరువాత ఏనూట తొంబదియైదేండ్లు బ్రదికి కుమారులను కుమార్తెలను కనెను.

31. లెమెకు దినములన్నియు ఏడువందల డెబ్బది యేడేండ్లు; అప్పుడతడు మృతిబొందెను.

32. నోవహు ఐదువందల యేండ్లు గలవాడై షేమును హామును యాపెతును కనెను.