1. మరియు హిజ్కియా ఇశ్రాయేలీయుల దేవుడైన యెహోవాకు పస్కాపండుగ ఆచరించుటకై యెరూషలేములోనున్న యెహోవా మందిరమునకు రావలసినదని ఇశ్రాయేలువారికందరికిని యూదావారికందరికిని వర్తమాన ములను, ఎఫ్రాయిమీయులకును మనష్షేవారికిని పత్రికలను పంపెను.

“పస్కా”– నిర్గమ 12 వ అధ్యాయం; లేవీయకాండము 23:5. “ఎఫ్రాయిం, మనష్షే”– అష్షూరువారు ఉత్తర రాజ్యాన్ని జయించి కొందర్ని బందీలుగా పట్టుకుపోయిన తరువాత కూడా అక్కడ కొందరు ఇస్రాయేల్‌వారు మిగిలి ఉన్నారని దీనివల్ల తెలుస్తున్నది. ఉత్తర రాజ్యం చెర ఆహాజు మరణానికి చాలా సంవత్సరాల ముందు జరిగింది.

2. సేవకు చాలినంతమంది యాజకులు తమ్మును తాము ప్రతిష్ఠించుకొనకుండుటచేతను, జనులు యెరూష లేములో కూడుకొనకుండుట చేతను, మొదటినెలయందు పస్కాపండుగ జరుగకపోగా

3. రాజును అతని అధిపతులును యెరూషలేములోనున్న సమాజపువారందరును దానిని రెండవ నెలలో ఆచరింపవలెనని యోచనచేసిరి.

“రెండో నెలలో”– లేవీయకాండము 23:5; సంఖ్యాకాండము 9:10-11.

4. ఈ సంగతి రాజుకును సమాజపువారికందరికిని అనుకూల మాయెను.

5. కావున బహుకాలమునుండి వారు వ్రాయ బడిన ప్రకారము ఇంత ఘనముగా నాచరింపకుండుట చూచి, ఇశ్రాయేలీయుల దేవుడైన యెహోవాకు యెరూషలేములో పస్కాపండుగ ఆచరించుటకై రావలసినదని బెయేర్షెబా మొదలుకొని దాను వరకు ఇశ్రా యేలీయులుండు దేశమంతటను చాటింపవలెనని వారు నిర్ణయముచేసిరి.

“బేర్‌షెబా...వరకు”– మొదట్లో యెహోషువ రోజుల్లో ఇస్రాయేల్ గోత్రాలన్నీ ఆక్రమించుకొన్న ప్రాంతం ఉత్తర సరిహద్దుల నుండి దక్షిణ సరిహద్దుల వరకు.

6. కావున అంచెవాండ్రు రాజునొద్దను అతని అధిపతులయొద్దను తాకీదులు తీసికొని, యూదా ఇశ్రాయేలు దేశములందంతట సంచరించి రాజాజ్ఞను ఈలాగు ప్రచురము చేసిరిఇశ్రాయేలువారలారా, అబ్రా హాము ఇస్సాకు ఇశ్రాయేలుల దేవుడైన యెహోవావైపు తిరుగుడి; మీరు తిరిగినయెడల మీలో అష్షూరురాజుల చేతిలోనుండి తప్పించుకొని శేషించినవారివైపు ఆయన తిరుగును.

“అష్షూరు”– 2 రాజులు 17:3-23; ద్వితీయోపదేశకాండము 28:25 కొద్ది సంవత్సరాల క్రితమే వారి కళ్ళెదుటే నెరవేరింది. వ 7 చూడండి. “తిరగండి”– 2 దినవృత్తాంతములు 7:14; యిర్మియా 3:12-13; హోషేయ 14:1-4; యాకోబు 4:8.

7. తమ పితరుల దేవుడైన యెహోవాయెడల ద్రోహముగా ప్రవర్తించిన మీ పితరులవలెను మీ సహో దరులవలెను మీరు ప్రవర్తింపకుడి. వారి ప్రవర్తన ఎట్టిదొమీకు అగపరచవలెనని ఆయన వారిని వినాశమునకు అప్పగించెను.

8. మీ పితరులవలె మీరు అవిధేయులుగాక యెహోవాకు లోబడి, ఆయన శాశ్వతముగా పరిశుద్ధ పరచిన ఆయన పరిశుద్ధమందిరములో ప్రవేశించి, మీ దేవుడైన యెహోవా మహోగ్రత మీ మీదినుండి తొలగి పోవునట్లు ఆయనను సేవించుడి.

“తలబిరుసుగా”– నిర్గమకాండము 32:9; ద్వితీయోపదేశకాండము 9:24; అపో. కార్యములు 7:51. “తీవ్ర కోపం”– సంఖ్యాకాండము 25:3; కీర్తనల గ్రంథము 90:7-11 నోట్స్.

9. మీరు యెహోవావైపు తిరిగినయెడల మీ సహోదరులయెడలను మీ పిల్లల యెడలను చెరతీసికొని పోయిన వారికి కనికరము పుట్టును, వారు ఈ దేశమునకు తిరిగి వచ్చెదరు. మీ దేవుడైన యెహోవా కరుణాకటాక్షములు గలవాడు గనుక మీరు ఆయనవైపు తిరిగినయెడల ఆయన మీయందు ప్రసన్నుడగును.

నిర్గమకాండము 34:6-7; ద్వితీయోపదేశకాండము 30:2-3; 1 రాజులు 8:50; కీర్తనల గ్రంథము 106:46; యెషయా 55:7; మీకా 7:18.

10. అంచెవాండ్రు జెబూలూను దేశమువరకును, ఎఫ్రా యిము మనష్షేల దేశములలోనున్న ప్రతి పట్టణమునకును పోయిరి గాని అచ్చటివారు ఎగతాళిచేసి వారిని అపహ సించిరి.

“నవ్వులపాలు చేశారు”– 2 దినవృత్తాంతములు 36:16; యెషయా 28:22; మత్తయి 27:39-43; 2 పేతురు 3:3-4. దేవుని ఘన సత్యాన్నీ, గంబీరమైన ఆహ్వానాన్నీ నవ్వులాటలుగా జమకట్టి కొట్టిపారేసే మనుషులు చాలమంది ఉన్నారు.

11. అయినను ఆషేరు మనష్షే జెబూలూను దేశముల వారిలోనుండి కొందరు కృంగిన మనస్సుతో యెరూషలేమునకు వచ్చిరి.

తనపట్ల నమ్మకస్థులైన ప్రజలు కొంతమందిని దేవుడెప్పుడు మిగుల్చుకుంటాడు. 1 రాజులు 19:18 పోల్చిచూడండి.

12. యెహోవా ఆజ్ఞనుబట్టి రాజును అధిపతులును చేసిన నిర్ణయమును నెరవేర్చునట్లు యూదాలోనివారికి మనస్సు ఏకముచేయుటకై దేవుని హస్తము వారికి తోడ్పడెను.

“ఏక మనస్సు”– కీర్తనల గ్రంథము 133:1-9; యిర్మియా 32:39; యెహెఙ్కేలు 11:19; ఎఫెసీయులకు 4:3.

13. కావున రెండవ నెలయందు పులియని రొట్టెలపండుగ ఆచరించుటకై అతివిస్తారమైన సమాజముగా బహు జనులు యెరూషలేములో కూడిరి.

“రొట్టెల పండుగ”– లేవీయకాండము 23:6-8.

14. వారు దాని చేపట్టి యెరూషలేములోనున్న బలిపీఠములను ధూపపీఠములను తీసివేసి, కిద్రోను వాగులో వాటిని పారవేసిరి.

“బలిపీఠాలను”– ఇవి అబద్ధ దేవుళ్ళకు కట్టినవి (2 దినవృత్తాంతములు 28:24-25).

15. రెండవ నెల పదునాల్గవ దినమున వారు పస్కాపశువును వధించిరి; యాజకులును లేవీయులును సిగ్గునొంది, తమ్మును ప్రతిష్ఠించుకొని దహనబలి పశువులను యెహోవా మందిరములోనికి తీసికొని వచ్చిరి.

“గొర్రెపిల్ల”– నిర్గమకాండము 12:3.

16. దైవజనుడైన మోషే నియమించిన ధర్మశాస్త్రములోని విధినిబట్టి వారు తమ స్థలమందు నిలువబడగా, యాజకులు లేవీయుల చేతిలోనుండి రక్తమును తీసికొని దానిని ప్రోక్షించిరి.

2 దినవృత్తాంతములు 35:10 2 దినవృత్తాంతములు 35:15.

17. సమాజకులలో తమ్మును ప్రతిష్ఠించుకొనని వారనేకు లుండుటచేత యెహోవాకు వాటిని ప్రతిష్ఠించుటకై ప్రతిష్ఠించుకొనని ప్రతివాని నిమిత్తము పస్కాపశువులను వధించుపని లేవీయుల కప్పగింపబడెను.
యోహాను 11:55

నిర్గమకాండము 12:6; ద్వితీయోపదేశకాండము 16:6.

18. ఎఫ్రాయిము మనష్షే ఇశ్శాఖారు జెబూలూను దేశములనుండి వచ్చిన జనులలో చాలామంది తమ్మును తాము ప్రతిష్ఠించు కొనకయే విధివిరుద్ధముగా పస్కాను భుజింపగా హిజ్కియా

2 దినవృత్తాంతములు 30:11; నిర్గమకాండము 12:43-49; సంఖ్యాకాండము 9:10.

19. పరిశుద్ధస్థలముయొక్క శుద్ధీకరణముచొప్పున తన్ను పవిత్రపరచుకొనకయే తన పితరుల దేవుడైన యెహోవాను ఆశ్రయింప మనస్సు నిలుపుకొనిన ప్రతి వాని నిమిత్తము దయగల యెహోవా ప్రాయశ్చిత్తము చేయునుగాక అని ప్రార్థింపగా

వీరు ఉత్తరాన తమ సాటి ఇస్రాయేల్‌వారి హేళనలకు గురై (వ 10) జెరుసలంకు వచ్చారు. వారు “శుద్ధంగా” లేరు (యాజులనూ, లేవీవారినీ అశుద్ధంగా చేసే కారణాలు కొన్నింటిని లేవీయకాండము 5:2-3; లేవీయకాండము 11:24 మొ।। చోట్ల చూడండి). అయితే పస్కా ఆచరించే అవకాశం లేకుండా చేయడం హిజ్కియాకు ఇష్టం లేదు. దేవుణ్ణి వెతకడం, దేవుని ఎదుట యథార్థ హృదయం కలిగి ఉండడం అనేవి ఆచారాలను నిష్ఠగా పాటించడం కంటే ముఖ్యమని హిజ్కియా భావించాడు. ఇది సత్యమే. యెషయా 1:12-17; మత్తయి 23:25-28 పోల్చిచూడండి.

20. యెహోవా హిజ్కియా చేసిన ప్రార్థన అంగీకరించి జనులను స్వస్థపరచెను.

21. యెరూషలేములోనున్న ఇశ్రాయేలువారు బహు సంతోష భరితులై పులియని రొట్టెల పండుగను ఏడు దినములుఆచరించిరి. లేవీయులును యాజకులును యెహోవాను ఘనపరచుచు గొప్ప నాదముగల వాద్యములతో ప్రతి దినము ఆయనను స్తుతించుచు ఉండిరి.

22. యెహోవా సేవ యందు మంచి నేర్పరులైన లేవీయులందరితో హిజ్కియా ప్రీతిగా మాటలాడెను; వారు సమాధానబలులు అర్పించుచు, తమ పితరుల దేవుడైన యెహోవా దేవుడని యొప్పుకొనుచు ఏడు దినములు పండుగ ఆచరించిరి.

“శాంతి బలులు”– లేవీ 3 వ అధ్యాయం నోట్స్.

23. యూదా రాజైన హిజ్కియా సమాజపువారికి బలియర్పణల నిమిత్తము వెయ్యి కోడెలను ఏడువేల గొఱ్ఱెల నిచ్చుటయు, అధిపతులు వెయ్యి కోడెలను పదివేల గొఱ్ఱెల నిచ్చు టయు, బహుమంది యాజకులు తమ్మును తాము ప్రతిష్ఠించుకొనుటయు

2 దినవృత్తాంతములు 7:8-9 చూడండి.

24. సమాజపు వారందరును చూచి నప్పుడు, మరి ఏడు దినములు పండుగ ఆచరింపవలెనని యోచనచేసికొని మరి ఏడు దినములు సంతోషముగా దాని ఆచరించిరి.

25. అప్పుడు యాజకులును లేవీయులును యూదావారిలోనుండియు ఇశ్రాయేలువారిలోనుండియు వచ్చిన సమాజపువారందరును, ఇశ్రాయేలు దేశములోనుండి వచ్చి యూదాలో కాపురమున్న అన్యులును సంతో షించిరి.

26. యెరూషలేము కాపురస్థులకు మిక్కిలి ఆనందము కలిగెను. ఇశ్రాయేలురాజును దావీదు కుమారుడునైన సొలొమోను కాలమునకు తరువాత ఈలాగున జరిగి యుండలేదు.

27. అప్పుడు లేవీయులైన యాజకులు లేచి జనులను దీవింపగా వారిమాటలు వినబడెను; వారి ప్రార్థన ఆకాశముననున్న పరిశుద్ధ నివాసమునకు చేరెను.

“దీవించారు”– సంఖ్యాకాండము 6:22-27 నోట్స్. ఆదికాండము 12:3; ద్వితీయోపదేశకాండము 28:3-14; కీర్తనల గ్రంథము 1:1-2 కూడా చూడండి.