1. యెహోవా, నీ వెందుకు దూరముగా నిలుచుచున్నావు? ఆపత్కాలములలో నీ వెందుకు దాగి యున్నావు?

దేశంలో దుర్మార్గత వర్ధిల్లుతూ ఉన్న కాలంలో బహుశా ఈ కీర్తన వ్రాయబడింది. కానీ దేవుడు మాత్రం ఎక్కడో దూరాన నిలుచుండి దాని విషయం ఏమీ చర్య తీసుకోకుండా ఉన్నట్టున్నాడు. దేవుడు వెంటనే దుర్మార్గతను అణిచి నీతిన్యాయాలకు ప్రతిఫలం ఇవ్వడేమిటి? దేవుని ప్రజలను తరచుగా కలవరపెట్టేది ఈ ప్రశ్నే (యోబు 9:24; యోబు 21:4-34; హబక్కూకు 1:2-4). ఈ ప్రశ్నకు జవాబు కొంతమట్టుకు కీర్తనల గ్రంథము 103:8; 2 పేతురు 3:9 మొదలైన వచనాల్లో కనిపిస్తుంది. దేవుడు తక్షణమే దుర్మార్గుల నందరినీ నాశనం చేస్తూ వెళ్తే దుర్మార్గుడైన సౌలు క్రీస్తు రాయబారి పౌలుగా మారేవాడు కాదు. పైగా దేవుడు అలా చేస్తే మనందరి గతి ఏమిటి? మనం క్రీస్తును స్వీకరించకముందు దుర్మార్గులమే గదా. అంతే గాక దేవుడు తన జ్ఞానం చొప్పున మనుషుల దుర్మార్గతను పూర్తిగా పెరగనిచ్చి అప్పుడు దాన్ని తుదముట్టిస్తాడు అని మనం గ్రహించాలి (ఆదికాండము 15:16).

2. దుష్టుడు గర్వించి, దీనుని వడిగా తరుముచున్నాడు వారు యోచించిన మోసక్రియలలో తామే చిక్కుకొందురు గాక

దేవుని తీర్పుకు పాత్రమైన దుర్మార్గుల లక్షణాలు కొన్నిటిని రచయిత దేవునికి ఏకరువు పెడుతున్నాడు. ప్రత్యేకంగా కొన్ని పాపాల గురించి నొక్కి చూపుతున్నాడు – గర్వం (2,4,5 వ), బలహీనులనూ నిస్సహాయులనూ పీడించడం (వ 2,8-10), వదరుబోతుదనం, దేవుడంటే, ఆయన ఆజ్ఞలంటే లెక్క చెయ్యకపోవడం (3-7 వ). తమ దురాశల గురించి వారు సిగ్గుపడరు, పైగా వాటి విషయం గొప్పలు చెప్పుకొంటారు (3 వ; ఫిలిప్పీయులకు 3:19).

3. దుష్టులు తమ మనోభిలాషనుబట్టి అతిశయపడుదురు లోభులు యెహోవాను తిరస్కరింతురు

4. దుష్టులు పొగరెక్కి యెహోవా విచారణ చేయడనుకొందురు దేవుడు లేడని వారెల్లప్పుడు యోచించుదురు

5. వారెల్లప్పడు భయము మానుకొని ప్రవర్తింతురు నీ న్యాయవిధులు ఉన్నతమైనవై వారి దృష్టికి అందకుండును. వారు తమ శత్రువులనందరిని చూచి తిరస్కరింతురు.

6. మేము కదల్చబడము, తరతరములవరకు ఆపదచూడము అని వారు తమ హృదయములలో అనుకొందురు

7. వారి నోరు శాపముతోను కపటముతోను వంచనతోను నిండియున్నది వారి నాలుకక్రింద చేటును పాపమును ఉన్నవి.
రోమీయులకు 3:14

8. తామున్న పల్లెలయందలి మాటు చోటులలో పొంచియుందురు చాటైన స్థలములలో నిరపరాధులను చంపుదురు వారి కన్నులు నిరాధారులను పట్టుకొనవలెనని పొంచి చూచును.

9. గుహలోని సింహమువలె వారు చాటైన స్థలములలో పొంచి యుందురు బాధపడువారిని పట్టుకొన పొంచి యుందురు బాధపడువారిని తమ వలలోనికి లాగి పట్టుకొందురు.

10. కాగా నిరాధారులు నలిగి వంగుదురు వారి బలాత్కారమువలన నిరాధారులు కూలుదురు.

11. దేెెవుడు మరచిపోయెను ఆయన విముఖుడై యెప్పుడును చూడకుండును అని వారు తమ హృదయములలో అనుకొందురు.

12. యెహోవా లెమ్ము, దేవా బాధపడువారిని మరువక నీ చెయ్యి యెత్తుము

13. దుష్టులు దేవుని తృణీకరించుట యేల? నీవు విచారణ చేయవని వారు తమ హృదయములలో అను కొనుటయేల?

14. నీవు దీనిని చూచి యున్నావు గదా, వారికి ప్రతికారము చేయుటకై నీవు చేటును పగను కనిపెట్టి చూచుచున్నావు నిరాధారులు తమ్మును నీకు అప్పగించుకొందురు తండ్రి లేనివారికి నీవే సహాయుడవై యున్నావు

తమను తాము దేవునికి అప్పగించుకునే నిస్సహాయులను దేవుడు చివరికి ఆదుకొంటాడన్న నమ్మకం ఇతనికి ఉంది (16-18 వ).

15. దుష్టుల భుజమును విరుగగొట్టుము చెడ్డవారి దుష్టత్వము ఏమియు కనబడకపోవువరకు దానిని గూర్చి విచారణ చేయుము.

కీర్తనల గ్రంథము 35:8 నోట్.

16. యెహోవా నిరంతరము రాజై యున్నాడు ఆయన దేశములోనుండి అన్యజనులు నశించిపోయిరి.
ప్రకటన గ్రంథం 11:15

“రాజు”– కీర్తనల గ్రంథము 47:2 దగ్గర నోట్.

17. యెహోవా, లోకులు ఇకను భయకారకులు కాకుండునట్లు బాధపడు వారి కోరికను నీవు విని యున్నావు

18. తండ్రి లేనివారికిని నలిగిన వారికిని న్యాయము తీర్చుటకై నీవు వారి హృదయము స్థిరపరచితివి, చెవియొగ్గి ఆల కించితివి.

దుర్మార్గులు “లోక సంబంధులు”. వారి కోరికలూ ఉద్దేశాలూ తలంపులూ చర్యలూ అన్నీ ఈ లోకంలో తాము ఏం పొందగలం, ఎలా సుఖించగలం అన్నదాని గురించే ఉంటాయి. వారి వంతు అంతా ఇక్కడే ఉంది (కీర్తనల గ్రంథము 17:14). ఇకపై వారు శాశ్వత శిక్షలో ప్రవేశిస్తారు (మత్తయి 25:46). దేవుని విశ్వాసులు పరలోక సంబంధులు. లోకంలో జీవించేటప్పుడు ఆ సత్యం మీద దృష్టి ఉంచి ప్రవర్తించాలి (యోహాను 17:14 యోహాను 17:16; ఎఫెసీయులకు 2:6-7; ఫిలిప్పీయులకు 3:20; కొలొస్సయులకు 3:1-4).