1. నేను కృపనుగూర్చియు న్యాయమునుగూర్చియు పాడెదను యెహోవా, నిన్ను కీర్తించెదను.

దావీదు ఈ కీర్తనను ఒక వ్యక్తిగా కాక రాజుగా రచించాడు. యెహోవాలో అతడు పరిపూర్ణ కృపను, న్యాయాన్ని చూశాడు. ఎవరికి ఎప్పుడు కరుణ చూపాలో, ఎవరిని ఎప్పుడు తీర్పు తీర్చి శిక్షించాలో దేవునికి తెలుసు. ఆ కారణం వల్ల దావీదు పరలోకానికీ భూలోకానికీ రాజును అనుసరించడానికి పాటుపడాలనీ, రాజ్య పరిపాలనలో తన ప్రజల నాయకుడుగా తన ప్రవర్తన విషయంలో నిర్దోషంగా ఉండేందుకు తీవ్ర ప్రయత్నం చెయ్యాలనీ తీర్మానించుకున్నాడు. ఇది గొప్ప తీర్మానం. క్రైస్తవ సంస్థల, సంఘాల ప్రతి నాయకుడూ దేవుని ఎదుట ఇలాంటి తీర్మానం చేసుకోవాలి. దావీదు లోపం లేని స్థితిని ఎన్నడూ చేరుకోలేదు గాని దాన్ని లక్ష్యంగా పెట్టుకుని ప్రయత్నించాడు. లోపాలతో కూడిన స్థితిని గురిగా పెట్టుకొని సాధించగలగడం కన్నా లోపం లేని స్థితిని గురిగా పెట్టుకుని సాధించలేకపోవడమే మంచిది. ఈ తీర్మానం మధ్యలోని ప్రార్థనను చూడండి. తన తీర్మానం నిలిచి ఉండాలంటే ఫలించాలంటే తనతో దేవుని సన్నిధి, శక్తి ఉండాలని దావీదుకు తెలుసు.

2. నిర్దోష మార్గమున వివేకముతో ప్రవర్తించెదను. నీవు ఎప్పుడు నాయొద్దకు వచ్చెదవు? నా యింట యథార్థహృదయముతో నడుచుకొందును

3. నా కన్నులయెదుట నేను ఏ దుష్కార్యమును ఉంచు కొనను భక్తిమార్గము తొలగినవారి క్రియలు నాకు అసహ్యములు అవి నాకు అంటనియ్యను

తాను చెడుతనానికి దూరంగా ఉండాలనీ, చెడ్డవారినీ తన భవనంలో గానీ రాజ్యపాలనా వ్యవహారాల్లో గానీ పని చేయనివ్వకూడదనీ దావీదు తీర్మానించుకున్నాడు. దేవునికి విశ్వాస పాత్రులైన వారినే, యథార్థ హృదయం గలవారినే ఎన్నుకున్నాడు. కేవలం బంధువులనీ, స్నేహితులనీ, లేక తన వంశానికీ గుంపుకూ చెందినవారనీ ఎవరినీ పనివారుగా మంత్రులుగా ఉద్యోగులుగా తీసుకునేందుకు అతడు ఒప్పుకోలేదు. ఇలాంటి బంధుప్రీతి ఎంతటి నాశన కారణమో, అవినీతికీ అధికార దుర్వినియోగానికీ అది ఎంతగా దారి తీస్తుందో అతనికి తెలిసి ఉంటుంది. చెడ్డవారు, కొండేలు చెప్పేవారు, గర్విష్ఠులు, మోసగాళ్ళు, అబద్ధికులు మొదలైనవారు, వారు ఎవరైనా సరే, తన పనిలో, తన రాజ్యంలో వారికి స్థానం లేదు. ఈ రోజుల్లో మనకు కూడా ఇలాంటి జ్ఞానం, పవిత్రత, దృఢ నిశ్చయం ఉన్న నాయకులు ఎంతో అవసరం. వ్యర్థమైన విషయం, చెడ్డ విషయం దేన్నీ అతడు ఆదర్శంగా తీసుకోడు. అలాంటివాటిని గురించి ఆలోచించడానికి కూడా అతనికి ఇష్టం లేదు. మనం దుష్టత్వాన్ని ముట్టుకుంటే అది మనకు అంటుకుపోవచ్చునని అతనికి తెలుసు (1 కోరింథీయులకు 15:33 పోల్చిచూడండి). అందువల్ల చెడుతనానికీ చెడ్డవారికీ దూరంగా ఉండిపోయాడు.

4. మూర్ఖచిత్తుడు నా యొద్దనుండి తొలగిపోవలెను దౌష్ట్యమును నేననుసరింపను.

సామెతలు 11:20.

5. తమ పొరుగువారిని చాటున దూషించువారిని నేను సంహరించెదను అహంకార దృష్టిగలవారిని గర్వించిన హృదయము గలవారిని నేను సహింపను

కీర్తనల గ్రంథము 15:3; కీర్తనల గ్రంథము 50:20; సామెతలు 10:18; యిర్మియా 6:28. దేవుని ప్రజల నాయకుడుగా దావీదు ఒకటి నిర్ణయించాడు. ఎదుటివాణ్ణి అపనిందలకు గురి చేసేవాడికి, మిడిసిపడేవాడికి దేవుని పనిలో తావు లేదు – కీర్తనల గ్రంథము 10:4; కీర్తనల గ్రంథము 18:27; సామెతలు 6:17; సామెతలు 21:4; సామెతలు 30:13; యెషయా 2:11.

6. నాయొద్ద నివసించునట్లు దేశములో నమ్మకస్థులైన వారిని నేను కనిపెట్టుచున్నాను నిర్దోషమార్గమందు నడచువారు నాకు పరిచారకులగుదురు.

దేవునిపట్ల స్వామిభక్తి, విశ్వసనీయత, నిర్ధోషమైన బ్రతుకు ఈ రెండు లక్షణాలు పనివారిలోను ఉద్యోగుల్లోనూ ఉండాలని దావీదు నిర్ణయించాడు. అతనికి సామర్థ్యం, తెలివి, బలం, ధైర్యం లేక మరే ఇతర లక్షణం కన్నా ఈ రెండే ప్రాముఖ్యం. ఒక వ్యక్తిలో యథార్థత లేకపోతే దావీదుతో కలిసి పనిచేసే అర్హత అతనికి లేదు.

7. మోసము చేయువాడు నా యింట నివసింపరాదు అబద్ధములాడువాడు నా కన్నులయెదుట నిలువడు.

కీర్తనల గ్రంథము 5:6; కీర్తనల గ్రంథము 52:2-5; సామెతలు 6:16-19 చూడండి. దావీదు భవనంలోనే అబద్ధికులకూ మోసగాళ్ళకూ తావు లేకపోతే, పరలోక రాజు సౌధంలో అలాంటి వారికి ఇక చోటెక్కడుంటుంది? దావీదే ఇలాంటివారిని దరి చేరనియ్యకపోతే దేవుడు తన దగ్గర వారిని ఉండనిస్తాడని అనుకోవడం వ్యర్థమే గదా. కీర్తనల గ్రంథము 15:1-3; కీర్తనల గ్రంథము 24:3-4; ప్రకటన గ్రంథం 21:8 ప్రకటన గ్రంథం 21:23-27; ప్రకటన గ్రంథం 22:14-15 చూడండి.

8. యెహోవా పట్టణములోనుండి పాపము చేయువారినందరిని నిర్మూలము చేయుటకై దేశమందలి భక్తిహీనులందరిని ప్రతి ఉదయమున నేను సంహరించెదను.

రాజ దర్భారులో తీర్పులు ఇచ్చినది ఉదయకాలం. దేశంలో దుష్టులెవరూ ఉండరాదని దావీదు దృఢంగా నిశ్చయించుకొన్నాడు. ధర్మశాస్త్రం ప్రకారం మరణశిక్ష విధించదగిన పాపాల గురించి నిర్గమకాండము 21:36 నోట్ చూడండి. ధర్మశాస్త్రం ప్రకారం మరణపాత్రమైన పాపాలు నేడు కొందరు క్రైస్తవుల్లో, కొన్ని క్రైస్తవ సంఘాల్లో సంస్థల్లో మామూలు సంగతులుగా ఎంచడం జరుగుతున్నది! ఎంత విచారం! అలాంటి పాపాల గురించి ఎవరూ ఏమీ చేయడం లేదు. ఇందుకు కారణం క్రైస్తవ నాయకులు దేవుని కృపను చూపదలుచుకోవడం కాదు గాని వారు ఆ కృపను దుర్వినియోగం చేయడమే. దేవుని శాసనాలకు విరుద్ధంగా పాపాలు చేసినవారికి మరణ శిక్షలు విధించడం క్రైస్తవ సంఘం పని కాదు నిజమే గాని సంఘం తనను తాను శుద్ధంగా పవిత్రంగా ఉంచుకోవడానికీ యథార్థతనూ నిజాయితీనీ నిలబెట్టడానికీ ప్రయత్నించాలి (1 కోరింథీయులకు 5:13; 2 థెస్సలొనీకయులకు 3:6 2 థెస్సలొనీకయులకు 3:14 చూడండి). దేవుని పరలోక నగరం పవిత్ర ప్రజకోసం తయారైన పవిత్ర స్థలం. భూమిపై ఉన్న జెరుసలం విషయంలో కూడా దావీదు కోరిక ఇదే.