1. దేవుడు లేచును గాక ఆయన శత్రువులు చెదరిపోవుదురు గాక ఆయనను ద్వేషించువారు ఆయన సన్నిధినుండి పారి పోవుదురు గాక.

దుర్మార్గులు సత్యానికీ, న్యాయానికీ, పవిత్రతకూ, మంచి అంతటికీ శత్రువులు. వారు దేవుణ్ణే ద్వేషిస్తారు. వారి నాశనానికి వారు తగినవారే. లోకంలో హానికరమైన ఆ మనుషులు లేకుండా చేయడంలో దేవుని ఉత్తమమైన న్యాయం వెల్లడి అవుతుంది. అప్పుడు ఆయన న్యాయవంతులను తనతో కూడా ఆనందించేలా చేయడా? ఈ ఉత్తమ కీర్తన ముఖ్యాంశం దేవుడు జెరుసలంలో తన పవిత్ర స్థలంలోకి ప్రవేశించడం. ఆయన ఎడారి దారిగుండా రావడం (78 వ), సీనాయి పర్వతం దగ్గర ఆగడం (8 వ), తన ప్రజలను కనాను దేశంలోకి విజయవంతంగా నడిపించడం (12,14 వ), సీయోను పర్వతాన్ని తన నివాసంగా ఎన్నుకోవడం (16 వ), దాని పైకి ఎక్కిపోవడం (18 వ), బలప్రభావాలతో, ఠీవితో పరిపాలించడం (18, 21, 31-35 వ) గురించి కవి దీన్లో వివరించాడు. 18వ వచనాన్ని పవిత్రాత్మ క్రొత్త ఒడంబడికలో యేసుప్రభువు పరలోకంలోని జెరుసలంకు ఆరోహణమైన సంగతికి సరిపోల్చాడు (ఎఫెసీయులకు 4:8). దీన్నిబట్టి ఈ కీర్తన కొంతవరకు భవిష్యత్తును గురించి కూడా రాసి ఉన్నట్టు తెలుస్తున్నది. ఇస్రాయేల్ చరిత్ర విషయాలకు మించిన అర్థం ఈ కీర్తనలో ఉంది. ఒబేద్ ఎదోం ఇంటినుంచి ఒడంబడిక మందసాన్ని సీయోను పర్వతానికి తీసుకువెళ్ళిన సందర్భంలో (2 సమూయేలు 6:1-19) పాడేందుకు ఈ కీర్తనను రాయడం జరిగిందని చాలామంది పండితుల అభిప్రాయం. మొదటి వచనం ఈ వివరణకు ఆధారంగా ఉంది. ఎడారి ప్రయాణాల్లో ఒడంబడిక మందసం బయలుదేరినప్పుడు ప్రముఖయాజి పలికే దీవెనపై ఆధారపడి రాసిన వచనం ఇది (సంఖ్యాకాండము 10:35). ఈ ఒడంబడిక పెట్టె దేవుని సన్నిధికి చిహ్నం. దేవుడు ఎక్కడికి వెళ్తే అక్కడ ఆయన శత్రువులు చెదిరిపోయారు. ఆయన్ను ద్వేషించేవారు పారిపోయారు. అసలు ఇంతకీ ఏకైక సత్య దేవుణ్ణి ద్వేషించేవారు కూడా ఉన్నారా? ఉన్నారు, చాలామంది (యోహాను 7:7; యోహాను 15:18 యోహాను 15:24-25; రోమీయులకు 1:30; రోమీయులకు 8:7)

2. పొగ చెదరగొట్టబడునట్లు నీవు వారిని చెదరగొట్టుము అగ్నికి మైనము కరుగునట్లు భక్తిహీనులు దేవుని సన్నిధికి కరగి నశించుదురు గాక.

3. నీతిమంతులు సంతోషించుదురు గాక వారు దేవుని సన్నిధిని ఉల్లసించుదురు గాక వారు మహదానందము పొందుదురు గాక

4. దేవునిగూర్చి పాడుడి ఆయన నామమునుబట్టి స్తోత్ర గానము చేయుడి వాహనమెక్కి అరణ్యములలో ప్రయాణముచేయు దేవునికొరకు ఒక రాజమార్గము చేయుడి యెహోవా అను ఆయన నామమునుబట్టి ఆయన సన్నిధిని ప్రహర్షించుడి.

5. తన పరిశుద్ధాలయమందుండు దేవుడు, తండ్రి లేని వారికి తండ్రియు విధవరాండ్రకు న్యాయకర్తయునై యున్నాడు

“తండ్రి”– దేవుడు దుర్మార్గులైన శత్రువులను హతమార్చి వైభవంతో విశ్వాన్ని ఏలే రాజు. దేవుడంటే అంతవరకేనా? కాదు, తండ్రి లేనివారినీ విధవరాళ్ళనూ ఒంటరివారినీ ఆదరించి, లాలించి ప్రేమించి సహాయం చేసేవాడు. దేవుడు తన ప్రజలపట్ల చూపినంత ప్రేమ, శ్రద్ధ ఏ భూరాజూ తాను ఏలిన వారి పట్ల ఎన్నడూ చూపలేదు (కీర్తనల గ్రంథము 10:14 కీర్తనల గ్రంథము 10:18; కీర్తనల గ్రంథము 82:3; కీర్తనల గ్రంథము 86:15; ద్వితీయోపదేశకాండము 10:18; ద్వితీయోపదేశకాండము 14:29; ద్వితీయోపదేశకాండము 24:17-21; యెషయా 1:17; యిర్మియా 7:6; మత్తయి 9:36). ఆయన ఖైదీల పట్ల సున్నితంగా వ్యవహరించి వారికి ఆహ్లాదం కలిగిస్తాడు – కీర్తనల గ్రంథము 69:33; కీర్తనల గ్రంథము 102:19-20; కీర్తనల గ్రంథము 107:10 కీర్తనల గ్రంథము 107:14; కీర్తనల గ్రంథము 146:7; యెషయా 61:1; లూకా 4:18. తిరుగుబాటు చేసేవారు మాత్రమే దేవుని ఆశీర్వాదాలను పొందకుండా ఉంటారు. అయితే వారు కూడా తన వైపుకు తిరిగి తన దయను చవిచూడాలని ఆయన అభిలాష (సామెతలు 1:23; యెషయా 55:7; యిర్మియా 3:14; యెహెఙ్కేలు 18:32).

6. దేవుడు ఏకాంగులను సంసారులుగా చేయువాడు. ఆయన బంధింపబడినవారిని విడిపించి వారిని వర్ధిల్ల జేయువాడు విశ్వాసఘాతకులు నిర్జలదేశమందు నివసించుదురు.

7. దేవా, నీవు నీ ప్రజలముందర బయలుదేరినప్పుడు అరణ్యములో నీవు ప్రయాణము చేసినప్పుడు (సెలా. )

నిర్గమకాండము 13:18 నిర్గమకాండము 13:21.

8. భూమి వణకెను దేవుని సన్నిధిని అంతరిక్షము దిగ జారెను ఇశ్రాయేలు దేవుడగు దేవుని సన్నిధిని ఆవలి సీనాయి కంపించెను.
హెబ్రీయులకు 12:26

నిర్గమకాండము 19:18.

9. దేవా, నీ స్వాస్థ్యముమీద నీవు వర్షము సమృద్ధిగా కురిపించితివి అది అలసియుండగా నీవు దానిని బలపరచితివి.

లేవీయకాండము 26:4; ద్వితీయోపదేశకాండము 11:11-12.

10. నీ సమూహము దానిలో నివసించును దేవా, నీ అనుగ్రహముచేత దీనులకు సదుపాయము కలుగజేసితివి.

“పేదలు”– కీర్తనల గ్రంథము 41:1 నోట్ చూడండి.

11. ప్రభువు మాట సెలవిచ్చుచున్నాడు దానిని ప్రకటించు స్త్రీలు గొప్ప సైన్యముగా ఉన్నారు.

ఇది మనలను తిరిగి ఈ కీర్తన మొదటి వచనం దగ్గరికి తీసుకుపోతుంది. దేవుడు తిరుగులేని తన ఆజ్ఞమూలంగా తన ప్రజలైన ఇస్రాయేల్‌వారికి కనానులోని వారి శత్రువుల పై విజయాన్ని సాధించిపెట్టాడని అర్థం. 12వ వచనంలోని స్త్రీలు దీని విషయంలోనే ఉత్సవం చేసుకుంటున్నారు. ఇదే రకమైన ఉదాహరణలు కొన్ని నిర్గమకాండము 15:20-21; యూదా 5:1 యూదా 5:29-30; 1 సమూయేలు 18:6-7 లో చూడండి.

12. సేనల రాజులు పారిపోయెదరు పారిపోయెదరు ఇంట నిలిచినది దోపుడుసొమ్ము పంచుకొనును.

13. గొఱ్ఱెల దొడ్లమధ్యను మీరు పండుకొనగా గువ్వల రెక్కలు వెండితో కప్పబడినట్లున్నది వాటి యీకెల రెక్కలు పచ్చని బంగారుతో కప్ప బడినట్టున్నది.

హీబ్రూలో ఇది అర్థం చేసుకునేందుకు చాలా కఠినమైన వచనం. బహుశా యుద్ధం తరువాత వచ్చే శాంతి, క్షేమం ఇది సూచిస్తూ ఉండవచ్చు.

14. సర్వశక్తుడు అక్కడ రాజులను చెదరగొట్టినప్పుడు సల్మోనుమీద హిమము కురిసినట్లాయెను.

కనాను మధ్య ప్రాంతంలో షెకెం దగ్గర ఉన్న కొండ ఈ సల్‌మన్. రాజులు చెదిరిపోవడం ఆ కొండ సానువుల పై గాలులకు మంచు, హిమం చెదిరిపోతున్నట్టుగా ఉంది.

15. బాషాను పర్వతము దేవపర్వతము బాషాను పర్వతము శిఖరములుగల పర్వతము.

కనాను ఈశాన్య దిశగా ఠీవిగా తలెత్తుకుని నిలిచి ఉంది బాషాను పర్వత పంక్తి. జెరుసలం పరిసరాల్లో ఉన్న కొండ శిఖరాలకంటే బాషాను పర్వత శిఖరాలు మరింత గంబీరంగా ఉన్నతంగా ఉన్నాయి. అయితే దేవుడు ప్రపంచంలోని ఉన్నతమైన పర్వతాలను ఎన్నుకోకుండా తన నివాసం నిమిత్తం సీయోను పర్వతాన్ని ఎన్నుకొన్నాడు (కీర్తనల గ్రంథము 2:8; కీర్తనల గ్రంథము 9:11; కీర్తనల గ్రంథము 76:2; కీర్తనల గ్రంథము 87:1-3; కీర్తనల గ్రంథము 132:13-14). లోకమంతటికీ దీవెనలిస్తానని దేవుడు అబ్రాహాముతో చేసిన ఒడంబడికను స్థిరపరచిన మోరియా పర్వత ప్రాంతాల్లో ఉన్న కొండ ఇది. పరలోకంలోని సీయోను పర్వతానికి, లేక అక్కడి జెరుసలంకు భూమి పై ఉన్న సీయోను పర్వతం చిహ్నంగా ఉంది (గలతియులకు 4:26; హెబ్రీయులకు 12:22; ప్రకటన గ్రంథం 3:12; ప్రకటన గ్రంథం 21:10).

16. శిఖరములుగల పర్వతములారా, దేవుడు నివాసముగా కోరుకొన్న కొండను మీరేల ఓరచూపులు చూచుచున్నారు? యెహోవా నిత్యము అందులోనే నివసించును.

17. దేవుని రథములు సహస్రములు సహస్రసహస్రములు ప్రభువు వాటిలో నున్నాడు సీనాయి పరిశుద్ధమైనట్టు ఆ కొండ పరిశుద్ధమాయెను.

ఇక్కడి హీబ్రూ పదాలకు అర్థం బహుశా “ప్రభువు సీనాయినుంచి తన పవిత్ర స్థలంలోకి వచ్చాడు” కావచ్చు (ద్వితీయోపదేశకాండము 33:2; 2 రాజులు 6:17; దానియేలు 7:10; హబక్కూకు 3:8; మత్తయి 26:53).

18. నీవు ఆరోహణమైతివి పట్టబడినవారిని చెరపట్టుకొని పోతివి మనుష్యులచేత నీవు కానుకలు తీసికొనియున్నావు. యెహోవా అను దేవుడు అక్కడ నివసించునట్లు విశ్వాసఘాతకులచేత సహితము నీవు కానుకలు తీసికొనియున్నావు.
ఎఫెసీయులకు 4:8-11

దీనికి రెండు అర్థాలు ఉన్నాయి. ఒకటి దేవుడు తన శత్రువులందరినీ ఓడించి తన ప్రజలైన ఇస్రాయేల్‌వారి మధ్య నివాసం ఉండేందుకు తన ఒడంబడిక మందసంతోపాటు సీయోను పర్వతం పైకి ఎక్కిపోతున్న వివరం. కానీ ఎఫెసీయులకు 4:8-11 ప్రకారం ఈ వచనం పాపాన్ని, మరణాన్ని, సైతానును, వాడి సేనలన్నిటినీ జయించిన యేసుప్రభువు పరలోకంలోని సీయోను పర్వతానికి ఆరోహణం కావడం అనే అర్థం వస్తూ ఉంది. ఒడంబడిక మందసం యేసుప్రభువుకు సూచన. నిర్గమకాండము 25:10-16 నోట్ చూడండి. ఎఫెసీయులకు 4:8 కీ ఈ వచనానికీ ఒక తేడా ఉంది. ఇక్కడ ప్రభువు “ఈవులు స్వీకరించినట్టు” ఉంది. ఎఫెసువారికి రాసిన లేఖలోనైతే ఆయన మనుషులకు ఈవులిచ్చాడు అని ఉంది. మనుషులనుంచి దేవుడు ఏమీ పొందనవసరం లేదు. ఆయన ముందుగా వారికి ఏమి ఇచ్చాడో దాని లోనుంచి వారిచ్చే వాటిని స్వీకరిస్తాడు. ఆ స్వీకరించడం ద్వారా వారికి మరెక్కువగా ఇవ్వాలని ఆయన ఉద్దేశం. ఆయన ఇచ్చినా స్వీకరించినా వైభవంతో బలప్రభావాలతో శాశ్వతంగా పరిపాలించే రాజు ఆయనే.

19. ప్రభువు స్తుతినొందును గాక అనుదినము ఆయన మా భారము భరించుచున్నాడు దేవుడే మాకు రక్షణకర్తయై యున్నాడు.

“ప్రతిరోజు”– అనే మాటను గమనించండి. మన జీవిత కాలమంతటిలో అనుదినం మనం చేయగలిగిన పని ఒకటి ఉంది. ప్రతి ఉదయం లేచి మన బరువులను మన ప్రభువూ, రాజూ అయిన దేవునిపై వేస్తూ ఉండగలం. “భారం”– ఈ గొప్ప రాజు ఎలాంటివాడో చూడండి. ఇతర భూరాజుల్లాగా ఆయన తన ప్రజలపై భారాలు మోపడు. వారి భారాలను తీసుకుని తానే మోస్తాడు (కీర్తనల గ్రంథము 55:22; యెషయా 46:4; యెషయా 53:4; 1 పేతురు 5:7).

20. దేవుడు మా పక్షమున పూర్ణరక్షణ కలుగజేయు దేవుడై యున్నాడు మరణము తప్పించుట ప్రభువైన యెహోవా వశము.

“మరణం”– వారి జీవన ప్రయాణం పూర్తి అయ్యే వరకు ఆయన తన ప్రజలను సజీవంగా ఉంచుతాడని దీనికి ఒక అర్థం. లోతైన మరొక అర్థం ఉంది. ఆధ్యాత్మిక మరణం నుంచి ఆయన వారిని తప్పించి తనతో శాశ్వత జీవాన్నిస్తాడు (యోహాను 5:24; యోహాను 11:25; రోమీయులకు 6:23; రోమీయులకు 8:2; 1 కోరింథీయులకు 15:21 1 కోరింథీయులకు 15:26 1 కోరింథీయులకు 15:54; 2 తిమోతికి 1:10; హెబ్రీయులకు 2:14; 1 యోహాను 3:14; ప్రకటన గ్రంథం 20:14; ప్రకటన గ్రంథం 21:4).

21. దేవుడు నిశ్చయముగా తన శత్రువుల తలలు పగుల గొట్టును. మానక దోషములు చేయువారి వెండ్రుకలుగల నడి నెత్తిని ఆయన పగులగొట్టును.

ఇవి చాలా భయానకమైన మాటలు. అయితే దాని కారణంగా ఇవి నిజం కాకపోయేవి కావు.

22. ప్రభువు సెలవిచ్చినదేమనగా నేను బాషానులోనుండి వారిని రప్పించెదను అగాధ సముద్రములలోనుండి వారిని రప్పించెదను.

23. వారి రక్తములో నీవు నీ పాదము ముంచుదువు నీ శత్రువులు నీ కుక్కల నాలుకలకు భాగమగుదురు.

24. దేవా, నీ గమనమును పరిశుద్ధ స్థలమునకు పోవు నా రాజగు దేవుని గమనమును వారు చూచి యున్నారు. చుట్టును కన్యకలు తంబురలు వాయించుచుండగా

జెరుసలం పవిత్ర స్థలానికి ఒడంబడిక మందసం విజయ ప్రవేశ వర్ణన కవి మళ్ళీ మొదలుపెట్టాడు.

25. కీర్తనలు పాడువారు ముందర నడచిరి. తంతివాద్యములు వాయించువారు వెనుక వచ్చెదరు.

26. సమాజములలో దేవుని స్తుతించుడి ఇశ్రాయేలులోనుండి ఉద్భవించినవారలారా, ప్రభువును స్తుతించుడి.

27. కనిష్ఠుడగు బెన్యామీను అను, వారి యేలిక అచ్చట నున్నాడు. యూదా అధిపతుల పరివారమచ్చట నున్నది జెబూలూను అధిపతులును నఫ్తాలి అధిపతులును ఉన్నారు.

28. నీ దేవుడు నీకు బలము కలుగ నియమించియున్నాడు. దేవా, నీవు మాకొరకు చేసినదానిని బలపరచుము

తన ప్రజలు, తన పవిత్ర స్థలం, తన నగరం పక్షంగా దేవుడు తనను తాను బలాఢ్యుడుగా కనపరచుకొంటాడు. జనాలను ఆయన అణచివేస్తాడు (యెషయా 43:3; యెషయా 45:14; యెషయా 60:5; ప్రకటన గ్రంథం 21:24-26). ఇక్కడ వాటిలో కొన్ని మృగాలుగా వర్ణించబడి ఉన్నాయి.

29. యెరూషలేములోని నీ ఆలయమునుబట్టి రాజులు నీ యొద్దకు కానుకలు తెచ్చెదరు.

30. రెల్లులోని మృగమును ఆబోతుల గుంపును దూడలవంటి జనములును లొంగి, వెండి కడ్డీలను తెచ్చునట్లుగా వాటిని గద్దింపుము కలహప్రియులను ఆయన చెదరగొట్టియున్నాడు.

31. ఐగుప్తులోనుండి ప్రధానులు వచ్చెదరు కూషీయులు దేవునితట్టు తమ చేతులు చాచుకొని పరుగెత్తివచ్చెదరు.

32. భూరాజ్యములారా, దేవునిగూర్చి పాడుడి ప్రభువును కీర్తించుడి. (సెలా. )

మహా శక్తివంతుడైన తేజోరూపుడైన ఉత్తముడైన ఈ దేవుణ్ణి స్తుతించవలసిందన్న యోగ్యమైన హెచ్చరికతో ఈ కీర్తన ముగుస్తున్నది. ఈ వచనాలు భవిష్యత్తు వైపు చూస్తున్నవి. ఏకైక నిజ దేవుణ్ణి జనాలన్నీ ఆరాధించే కాలం తప్పకుండా వస్తుంది.

33. అనాదిగానున్న ఆకాశాకాశవాహన మెక్కువానిని కీర్తించుడి ఆయన తన స్వరము వినబడజేయును అది బలమైన స్వరము.

34. దేవునికి బలాతిశయము నారోపించుడి మహిమోన్నతుడై ఆయన ఇశ్రాయేలుమీద ఏలు చున్నాడు అంతరిక్షమున ఆయన బలాతిశయమున్నది

35. తన పరిశుద్ధ స్థలములలో దేవుడు భీకరుడు ఇశ్రాయేలు దేవుడే తన ప్రజలకు బలపరాక్రమ ముల ననుగ్రహించుచున్నాడు దేవుడు స్తుతినొందును గాక.
2 థెస్సలొనీకయులకు 1:10