1. అప్పుడు యెహోవా వాక్కు నాకు ప్రత్యక్షమై యీలాగు సెలవిచ్చెను

2. నరపుత్రుడా, యెరూషలేము తట్టు నీ ముఖము త్రిప్పుకొని, పరిశుద్ధ స్థలములనుబట్టి ఇశ్రాయేలీయులదేశమును గూర్చి ప్రవచించి ఇట్లనుము

“పవిత్రాలయం”– యెహెఙ్కేలు 9:6.

3. యెహోవా సెలవిచ్చునదేమనగా నేను నీకు విరోధినై తిని. నీతిపరులనేమి దుష్టులనేమి నీలో ఎవరు నుండకుండ అందరిని నిర్మూలము చేయుటకై నా ఖడ్గము ఒరదూసి యున్నాను.

“ఖడ్గం”– యెషయా 31:8; యెషయా 34:6; యెషయా 66:16. దండెత్తి వచ్చే సైన్యాలను దేవుడు తన “ఖడ్గం” అంటున్నాడు. అవి ఆయన తీర్పులను అమలుపరుస్తాయి. ఇక్కడ సైన్యాలు అంటే బబులోను సైన్యాలు. “సన్మార్గులను”– తీర్పు, విపత్తు సమయాల్లో దేవుడు ఎప్పుడూ న్యాయవంతులను బాధలనుంచీ భౌతిక మరణంనుంచీ కాపాడడని గమనించండి.

4. నీతిపరులేమి దుష్టులేమి యెవరును మీలో ఉండకుండ దక్షిణదిక్కు మొదలుకొని ఉత్తరదిక్కువరకు అందరిని నిర్మూలము చేయుటకై నా ఖడ్గము దాని ఒరలో నుండి బయలుదేరియున్నది.

5. యెహోవానైన నేను నా ఖడ్గము మరల ఒరలోపడకుండ దాని దూసియున్నానని జనులందరు తెలిసికొందురు.

దేవుడు తన ప్రవక్తల మూలంగా దీన్ని పదేపదే ప్రకటించాడు కాబట్టి మనుషులకు ఈ విషయం తెలుస్తుంది.

6. కావున నరపుత్రుడా, నిట్టూర్పు విడువుము, వారు చూచుచుండగా నీ నడుము బద్దలగునట్లు మనోదుఃఖముతో నిట్టూర్పు విడువుము.

దేవుడు తన సేవకులు తన మనసు ఎరిగి ఉండాలనీ, తాను ఆలోచించినట్టుగా వారూ ఆలోచించాలనీ, తాను బాధపడే విషయాల గురించి వారూ బాధపడాలనీ, తన మనసును ప్రజలకు విప్పిచెప్పాలనీ ఆశిస్తాడు. వ 12; యెషయా 22:4; యిర్మియా 8:21; యిర్మియా 9:1; యిర్మియా 48:36; విలాపవాక్యములు 1:16; యెహోషువ 18:23; లూకా 19:41 చూడండి.

7. నీవు నిట్టూర్పు విడిచెదవేమని వారు నిన్నడుగగా నీవుశ్రమదినము వచ్చుచున్నదను దుర్వార్త నాకు వినబడినది, అందరి గుండెలు కరిగిపోవును, అందరి చేతులు బల హీనమవును, అందరి మనస్సులు అధైర్యపడును, అందరి మోకాళ్లు నీరవును, ఇంతగా కీడు వచ్చుచున్నది; అది వచ్చేయున్నది అని చెప్పుము; ఇదే యెహోవా వాక్కు.

లేవీయకాండము 26:36; యిర్మియా 4:31.

8. మరియు యెహోవా వాక్కు నాకు ప్రత్యక్షమై యీలాగు సెలవిచ్చెను.

ఇది ఖడ్గగీతం. దేవుని ఖడ్గాన్ని పద్యరూపంలో వర్ణించడం ఇక్కడ చూడవచ్చు. ఇది దేవుని స్వంత ప్రజలను శిక్షించేందుకు దిగిరావడానికి సిద్ధంగా ఉంది (వ 12). ఆ జాతి దేవునికి కొడుకులాంటిది (వ 10), అయినప్పటికీ బబులోను సైన్యాల మూలంగా దేవుడు పంపబోయే శిక్షను అది తప్పించుకోవడం అసాధ్యం. బబులోను సైనికులు ఖడ్గాలు చేతపట్టుకుని వారిని చుట్టుముడతారు. గుమ్మాల దగ్గర నిలుచుండి ప్రజలను ఊచకోత కోస్తారు (వ 14-16). ఆ విధంగా, తాము చెప్పిన రీతిగా దేవుడు వారిపై తన కోపాన్ని తీర్చుకుంటాడు (వ 17; యెహెఙ్కేలు 5:12-13).

9. నరపుత్రుడా, నీవు ఈ మాటలు ప్రకటనచేసి ఇట్లనుము యెహోవా సెలవిచ్చునదేమనగా అదిగో ఖడ్గము ఖడ్గమే కనబడుచున్నది, అది పదునుగలదై మెరుగుపెట్టియున్నది.

10. అది గొప్ప వధ చేయుటకై పదును పెట్టియున్నది, తళతళలాడునట్లు అది మెరుగుపెట్టియున్నది; ఇట్లుండగా నా కుమారుని దండము ఇతర దండములన్నిటిని తృణీకరించునది అని చెప్పి మనము సంతోషించెదమా?

11. మరియు దూయుటకు సిద్ధమగునట్లు అది మెరుగుపెట్టువానియొద్ద నుంచ బడియుండెను, హతము చేయువాడు పట్టుకొనునట్లుగా అది పదునుగలదై మెరుగు పెట్టబడియున్నది.

12. నరపుత్రుడా అంగలార్చుము, కేకలువేయుము, అది నా జనులమీదికిని ఇశ్రాయేలీయుల ప్రధానులమీదికిని వచ్చుచున్నది, ఖడ్గభయము నా జనులకు తటస్థించినది గనుక నీ తొడను చరచుకొనుము.

13. శోధనకలిగెను, తృణీకరించు దండము రాకపోయిననేమి? ఇదే యెహోవా వాక్కు.

14. నరపుత్రుడా, చేతులు చరచుకొనుచు సమాచారము ప్రవచింపుము, ఖడ్గము ముమ్మారు రెట్టింపబడినదై జనులను హతముచేయునదై యున్నది, అది గొప్పవాని అంతఃపురము చొచ్చి వాని హతము చేయునది.

15. వారి గుండెలు కరిగిపోవునట్లును, పడద్రోయు అడ్డములు అధికములగునట్లును, వారి గుమ్మములలో నేను ఖడ్గము దూసెదను; అయ్యయ్యో అది తళతళలాడుచున్నది, హతము చేయుటకై అది దూయబడియున్నది.

16. ఖడ్గమా, సిద్ధపడియుండుము; కుడివైపు చూడుము, ఎడమవైపు తిరుగుము, ఎక్కడ నీకు పని యుండునో అక్కడికి తిరుగుము

17. నేనుకూడ నా చేతులు చరచుకొని నా క్రోధము తీర్చుకొందును; యెహోవా నగు నేనే మాట ఇచ్చి యున్నాను.

18. మరియు యెహోవా వాక్కు నాకు ప్రత్యక్షమై యీలాగు సెలవిచ్చెను.

19. నరపుత్రుడా, బబులోను రాజు ఖడ్గమువచ్చుటకు రెండు మార్గములను ఏర్పరచుము. ఆరెండును ఒక దేశములోనుండి వచ్చునట్లు సూచించుటకై యొక హస్తరూపము గీయుము, పట్టణపు వీధి కొనను దాని గీయుము.

20. ఖడ్గమునకు అమ్మోనీయుల పట్టణమగు రబ్బాకు ఒక మార్గమును, యూదాదేశమందున్న ప్రాకారములు గల పట్టణమగు యెరూషలేమునకు ఒక మార్గమును ఏర్పరచుము.

21. బాటలు చీలుచోట రెండు మార్గములు చీలు స్థలమున శకునము తెలిసికొనుటకు బబులోను రాజు నిలుచుచున్నాడు; అతడు బాణములను ఇటు అటు ఆడించుచు, విగ్రహములచేత విచారణ చేయుచు, కార్యమునుబట్టి శకునము చూచుచున్నాడు.

నెబుకద్‌నెజరు జెరుసలం పై దండెత్తి వస్తున్న విధానాన్ని బబులోను ప్రవాసంలో ఉన్న యెహెజ్కేలు ప్రజల ఎదుట నటించి చూపాలి. యెహెఙ్కేలు 4:1-3 పోల్చి చూడండి. నెబుకద్‌నెజరు మొదట జెరుసలం పైకి వెళ్దామా, లేక అమ్మోనువారి రాజధాని రబ్బా పైకి వెళ్దామా అన్న సందిగ్ధంలో పడతాడని ఈ వచనం ముందుగానే తెలియజేస్తున్నది. అప్పుడతడు శకునం సూచనలకోసం చూస్తాడు. ఆ పైన జెరుసలం పైకి దండెత్తాలని నిర్ణయించుకుంటాడు. “కారిజం”– పురాతన కాలంలో శకునగాళ్ళు పిల్లి మొదలైన జంతువు పొట్ట భాగాలను పరిశీలించి శకునాలు చెప్పేవారు.

22. యెరూషలేము ఎదుట గుమ్మములను పడగొట్టు యంత్ర ములు పెట్టుమనియు, హతముచేయుదమనియు, ధ్వని ఎత్తుమనియు, జయధ్వని బిగ్గరగా ఎత్తుమనియు, గుమ్మ ములకు ఎదురుగా పడగొట్టు యంత్రములు ఉంచు మనియు, దిబ్బలు వేయుమనియు, ముట్టడి దిబ్బలు కట్టు మనియు యెరూషలేమునుగూర్చి తన కుడితట్టున శకునము కనబడెను.

23. ప్రమాణములు చేసికొనిన వారికి ఈ శకునము వ్యర్థముగా కనబడును; అయితే వారు పట్టబడునట్లు వారు చేసికొనిన పాపమును అతడు వారి జ్ఞాపకమునకు తెప్పించును.

“శపథం”– జెరుసలం పాలకులు బబులోను రాజుకు లోబడి ఉంటామని శపథం చేసి సమ్మతించారు. కానీ ఇప్పుడు తిరగబడ్డారు (యెహెఙ్కేలు 17:11-15). ఆ విధంగా విశ్వాసఘాతకులై ద్రోహం చేయడంలో గర్వపడుతున్నారు.

24. కాబట్టి ప్రభువైన యెహోవా ఈలాగు సెలవిచ్చు చున్నాడుమీ అతిక్రమములు బయలుపడుటవలన మీ సమస్త క్రియలలోనుండి మీ పాపములు అగుపడునట్లు మీ దోషము మీరు మనస్సునకు తెచ్చుకొనినందునను, నేను మిమ్మును జ్ఞాపకము చేసికొనినందునను మీరు చెయ్యి చిక్కియున్నారు.

25. గాయపడినవాడా, దుష్టుడా, ఇశ్రాయేలీయులకు అధిపతీ, దోషసమాప్తికాలమున నీకు తీర్పువచ్చియున్నది.

అంటే సిద్కియా.

26. ప్రభువైన యెహోవా ఈలాగు సెలవిచ్చుచున్నాడుతలాటమును తీసివేయుము కిరీట మును ఎత్తుము, ఇది యికను ఇట్లుండదు. ఇకమీదట నీచుని ఘనునిగాను ఘనుని నీచునిగాను చేయుము.
మత్తయి 23:12

యెహెఙ్కేలు 17:24; 1 సమూయేలు 2:7-8; లూకా 1:52-53.

27. నేను దానిని పడద్రోయుదును పడద్రోయుదును పడ ద్రోయుదును; దాని స్వాస్థ్యకర్త వచ్చువరకు అదియు నిలువదు, అప్పుడు నేను దానిని అతనికిచ్చెదను.

ఆదికాండము 49:10 పోల్చి చూడండి. బహుశా ఈ హక్కుదారుడంటే మెస్సీయ అయిన యేసు క్రీస్తు (లూకా 1:32-33).

28. మరియు నరపుత్రుడా, నీవు ప్రవచించి ఇట్లనుము అమ్మోనీయులనుగూర్చియు, వారు చేయు నిందను గూర్చియు ప్రభువైన యెహోవా సెలవిచ్చునదేమనగాహతము చేయుటకు ఖడ్గము ఖడ్గమే దూయబడియున్నది, తళతళలాడుచు మెరుగుపెట్టిన ఖడ్గము వధచేయుటకు దూయబడియున్నది.

వ 20. జెరుసలంను నాశనం చేశాక దేవుడు బబులోను రాజును అమ్మోనువారి మీదికి పంపుతాడు. వీరిని గురించి ఇతర భవిష్యద్వాక్కులకు యెహెఙ్కేలు 25:1-7; యిర్మియా 49:1-6; ఆమోసు 1:13-15; జెఫన్యా 2:8-11 చూడండి.

29. శకునగాండ్రు నీకొరకు మాయా దర్శనములు చూచుచుండగను, వారు వ్యర్థమైన వాటిని మీకు చెప్పుచుండగను, దోషసమాప్తి కాలమున శిక్షనొంది హతులైన దుర్మార్గుల మెడల ప్రక్కన అది నిన్ను పడ వేయును.

30. ఖడ్గమును ఒరలోవేయుము; నీవు సృష్టింప బడిన స్థలములోనే నీవు పుట్టిన దేశములోనే నేను నీకు శిక్ష విధింతును.

31. అచ్చటనే నా రౌద్రమును నీమీద కుమ్మరించెదను, నా ఉగ్రతాగ్నిని నీమీద రగుల బెట్టెదను, నాశనము చేయుటయందు నేర్పరులైన క్రూరులకు నిన్ను అప్పగించెదను.

బబులోను సైన్యాలు దేవుడు ఉపయోగించే ఆయుధాలు అవుతాయి – యిర్మియా 4:7; యిర్మియా 51:20-23.

32. అగ్ని నిన్ను మింగును, నీ రక్తము దేశములో కారును, నీ వెన్నటికిని జ్ఞాపకమునకు రాకయుందువు; యెహోవానగు నేనే మాట ఇచ్చి యున్నాను.