1. అహరోను కుమారులైన నాదాబు అబీహులు తమ తమ ధూపార్తులను తీసికొని వాటిలో నిప్పులుంచి వాటి మీద ధూపద్రవ్యమువేసి, యెహోవా తమ కాజ్ఞాపింపని వేరొక అగ్నిని ఆయన సన్నిధికి తేగా

వీటిని బట్టీ ఇంకా ఈ అధ్యాయంలోని మరి కొన్ని వచనాలను బట్టీ చూస్తే 9వ అధ్యాయంలో చెప్పినట్టు అహరోను, అతని కుమారులు తమ ధర్మవిధులను ఆరంభించిన ఆ పవిత్ర దినానే ఈ సంఘటన జరిగింది అనవచ్చు. నాదాబు, అబీహులు చేసిన పాపం ఏమిటో పూర్తిగా వివరించలేదు. వాళ్ళు తమ ధూపార్తుల్లో చట్ట విరుద్ధమైన నిప్పును ఉంచుకొని ధూపద్రవ్యాన్ని వేశారని మాత్రం ఉంది. లేవీయకాండము 16:12 ప్రకారం ధూపం వెయ్యడానికి ఉపయోగించవలసిన నిప్పు యెహోవా సన్నిధానంలో ఉన్న ఇత్తడి బలిపీఠం మీది నుంచే తీసుకోవాలి. (దీని అంతరార్థం ఏమంటే నిజమైన ప్రార్థన, ఆరాధనలకు యేసు క్రీస్తు సిలువ, ఆయన చేసిన బలి అర్పణలే మూలాధారం కావాలి.) మరి ఇక ఏ ఇతర నిప్పునూ ధూపం వెయ్యడానికి ఉపయోగించకూడదు. మనుషులు తమ పనులకోసం వాడుకొనే నిప్పును దేవుని సన్నిధిలో వాడకూడదు. ఈ విషయాన్ని లెక్కచేయక నాదాబు, అబీహులు తమ స్వంత ఉపయోగం కోసం వాడుకొనే నిప్పును ధూపం వెయ్యడం కోసం వాడారు. అంతేగాక ధూపం వెయ్యడం సాధారణంగా ప్రముఖయాజి పని (నిర్గమకాండము 30:7-9) గాని అతని కొడుకుల పని కాదు. ధూపం క్రీస్తు ప్రార్థనలకు గుర్తు (నిర్గమకాండము 30:6-9). నాదాబు అబీహులు ఎవరి ఆజ్ఞనూ పొందకుండా తమకు తాము కల్పించుకుని తమ తండ్రి హక్కును త్రోసిపుచ్చి ధూపం వెయ్యడానికి పూనుకున్నారు. తమ దుడుకుతనానికి తామే శిక్ష అనుభవించారు. ఈ సంఘటనలో మనం నేర్చుకోవలసిన కొన్ని ముఖ్య పాఠాలున్నాయి. ధూపం ప్రార్థనకు, ఆరాధనకు గుర్తు (కీర్తనల గ్రంథము 141:2 ప్రకటన గ్రంథం 8:3). దేవుణ్ణి ఆయన నియమించిన పద్ధతిప్రకారమే ఆరాధించాలి. మనిషికి ఎలా మంచిదని తోస్తే అలా ఆరాధించకూడదు (యోహాను 4:24 హెబ్రీయులకు 10:19-22). ఆరాధించవలసిన విధానాన్ని త్రొసిపుచ్చి వేరే రీతిగా ఆరాధించడం ఎంత ఘోర పాపమో దేవుడిక్కడ మనకు చూపిస్తున్నాడు. పాపమంతటికీ వ్యతిరేకంగా దేవుని పవిత్ర కోపం దహించివేసే అగ్నిలాగా మండుతూ ఉంది (2 థెస్సలొనీకయులకు 1:4-10 హెబ్రీయులకు 12:28-29 2 పేతురు 2:1-3 ప్రకటన గ్రంథం 20:15 సంఖ్యాకాండము 25:3).

2. యెహోవా సన్నిధి నుండి అగ్ని బయలుదేరి వారిని కాల్చివేసెను; వారు యెహోవా సన్నిధిని మృతి బొందిరి.

3. అప్పుడు మోషే అహరోనుతో ఇట్లనెనుఇది యెహోవా చెప్పిన మాటనాయొద్దనుండు వారి యందు నేను నన్ను పరిశుద్ధపరచు కొందును; ప్రజలందరియెదుట నన్ను మహిమపరచు కొందును;

నాదాబు, అబీహుల చావుకు ఇక్కడ వివరణ కనిపిస్తున్నది. వారు దేవుని పవిత్రతనూ, ఆయన సన్నిధి పరిశుద్ధతనూ లెక్కచేయలేదు. ఆయన్ను సమీపించడానికి సరైన మార్గమేదో, ఆయన్నెలా సన్మానించాలో వారు ఆలోచించలేదు, అహరోనుకు ఈ సంగతులన్నీ తెలుసు గనుక అతను నోరు విప్పలేదు.

4. అహరోను మౌనముగానుండగా మోషే అహరోను పిన తండ్రియైన ఉజ్జీయేలు కుమారులైన మీషా యేలును ఎల్సాఫానును పిలిపించిమీరు సమీపించి పరి శుద్ధ స్థలము నెదుటనుండి పాళెము వెలుపలికి మీ సహోదరుల శవములను మోసికొని పోవుడని వారితో చెప్పెను.

5. మోషే చెప్పినట్లు వారు సమీపించి చొక్కాయిలను తీయకయే పాళెము వెలుపలికి వారిని మోసికొని పోయిరి.

6. అప్పుడు మోషే అహరోనును అతని కుమారులైన ఎలియా జరు ఈతామారును వారితోమీరు చావకుండునట్లును యెహోవా ఈ సర్వసమాజముమీద ఆగ్రహపడకుండు నట్లును, మీరు తల విరియబోసికొనకూడదు; బట్టలను చింపుకొనకూడదు కాని, యెహోవా వారిని కాల్చినందుకు మీ సహోదరు లైన ఇశ్రాయేలీయుల యింటివారందరు ఏడవ వచ్చును.

ఇదంతా అహరోనుకూ అతని కొడుకులకూ అభిషేకం, ప్రతిష్ఠ జరిగిన రోజునే సంభవించింది. దేవుని సన్నిధి గుడారాన్ని ఏడు రోజులదాకా విడిచిపోకూడదని ఆ సమయాన ఆజ్ఞ అయింది (లేవీయకాండము 8:34-35). వారు పవిత్రమైన తలపాగాలను ధరించారు. వాటిని తీసెయ్యకూడదు. పవిత్రమైన యాజి వస్త్రాలను తొడిగారు. వాటిని తీసివేయకూడదు.

7. యెహోవా అభిషేకతైలము మీ మీద నున్నది గనుక మీరు చావకుండునట్లు మీరు ప్రత్యక్షపు గుడారముయొక్క ద్వారములోనుండి బయలు వెళ్ల కూడ దనెను. వారు మోషే చెప్పిన మాట చొప్పున చేసిరి.

8. మరియు యెహోవా అహరోనుతో ఇట్లనెనుమీరు ప్రత్యక్షపు గుడారములోనికి వచ్చునప్పుడు

9. మీరు చావ కుండునట్లు నీవును నీ కుమారులును ద్రాక్షారసమునేగాని మద్యమునేగాని త్రాగకూడదు.

ఇక్కడ ఈ ఆదేశాలు చెప్పడం బట్టి నాదాబు, అబీహులు పాపం చేసిన సమయంలో తాగి ఉండవచ్చునని అర్థమౌతున్నది. మద్యపానం గురించి – సామెతలు 20:1 సామెతలు 31:5 యెషయా 28:7 యెహోషువ 44:21 హోషేయ 4:11 లూకా 1:15 ఎఫెసీయులకు 5:18 1 తిమోతికి 3:3 తీతుకు 1:7 చూడండి.

10. మీరు ప్రతిష్ఠింపబడిన దానినుండి లౌకికమైనదానిని, అపవిత్రమైనదానినుండి పవిత్రమైనదానిని వేరుచేయుటకును,

11. యెహోవా మోషేచేత ఇశ్రాయేలీయులకు ఆజ్ఞాపించిన సమస్త విధు లను మీరు వారికి బోధించుటకును ఇది మీ తరతరములకు నిత్యమైనకట్టడ.

12. అప్పుడు మోషే అహరోనుతోను మిగిలిన అతని కుమారులైన ఎలియాజరు ఈతామారులతోను ఇట్ల నెనుమీరు యెహోవా హోమద్రవ్యములలో మిగిలిన నైవేద్య మును తీసికొని అది పొంగకుండ బలిపీఠము దగ్గర తినుడి; అది అతిపరిశుద్ధము. యెహోవా హోమద్రవ్యములో నుండి అది నీకును నీ కుమారులకును నియమింపబడినవంతు.

లేవీయకాండము 6:14-18.

13. కావున మీరు పరిశుద్ధ స్థలములో దానిని తినవలెను; నేను అట్టి ఆజ్ఞను పొందితిని.

14. మరియు అల్లాడించు బోరను ప్రతిష్ఠిత మైన జబ్బను మీరు, అనగా నీవును నీతోపాటు నీ కుమారులును నీ కుమార్తెలును పవిత్రస్థలములో తిన వలెను. ఏలయనగా అవి ఇశ్రాయేలీయులు అర్పించు సమాధానబలులలోనుండి నీకును నీ కుమారులకును నియ మింపబడిన వంతులు.

లేవీయకాండము 7:30-34 సంఖ్యాకాండము 18:11.

15. హోమద్రవ్య రూపమైన క్రొవ్వును గాక యెహోవా సన్నిధిని అల్లాడింపబడిన దానిగా దానిని అల్లాడించునట్లు ప్రతిష్ఠితమైన జబ్బను అల్లాడించు బోరను తీసికొని రావలెను. నిత్యమైన కట్టడచొప్పున అవి నీకును నీ కుమారులకును చెందును. అట్లు యెహోవా ఆజ్ఞాపించెను.

16. అప్పుడు మోషే పాపపరిహారార్థబలియగు మేకను కనుగొనవలెనని జాగ్రత్తగా వెదకినప్పుడు అది కాలిపోయి యుండెను. అతడు అహరోను కుమారులలో మిగిలిన ఎలియాజరు ఈతామారను వారిమీద ఆగ్రహపడి

లేవీయకాండము 9:3 లేవీయకాండము 9:13 లేవీయకాండము 6:24-30.

17. మీరు పరిశుద్ధస్థలములో ఆ పాపపరిహారార్థబలిపశువును ఏల తినలేదు? అది అతిపరిశుద్ధముగదా. సమాజము యొక్క దోషశిక్షను భరించి యెహోవా సన్నిధిని వారి నిమిత్తము ప్రాయశ్చిత్తము చేయుటకై ఆయన దానిని మీకిచ్చెను గదా.

18. ఇదిగో దాని రక్తమును పరిశుద్ధస్థలము లోనికి తేవలెను గదా. నేను ఆజ్ఞాపించినట్లు నిశ్చయ ముగా పరిశుద్ధస్థలములో దానిని తినవలెనని చెప్పెను.

19. అందుకు అహరోను మోషేతోఇదిగో నేడు పాప పరిహారార్థ బలిపశువును దహనబలిద్రవ్యమును యెహోవా సన్నిధికి వారు తేగా ఇట్టి ఆపదలు నాకు సంభవించెను. నేను పాపపరిహారార్థమైన బలిద్రవ్యమును నేడు తినిన యెడల అది యెహోవా దృష్టికి మంచిదగునా అనెను.

20. మోషే ఆ మాట విని ఒప్పుకొనెను.