1. అహరోను ఇద్దరు కుమారులు యెహోవా సన్నిధికి సమీపించి చనిపోయిన తరువాత యెహోవా మోషేతో మాటలాడి ఇట్లనెను

ఇది మోషే రాసిన పుస్తకాలలో ముఖ్యమైన అధ్యాయాల్లో ఒకటి. ఇందులో చెప్పిన రోజు యూదులకు అతి పవిత్రమైన రోజు. ఇక్కడ చెప్పిన విషయాల అంతరార్థాన్ని గ్రహించాలంటే ముందుగా హెబ్రీయులకు 5:1-5 హెబ్రీయులకు 7:18-28 హెబ్రీయులకు 8:1-6 హెబ్రీయులకు 9:1-10 హెబ్రీయులకు 9:22 చదవాలి. “అహరోను కొడుకులు”– లేవీయకాండము 10:1-3. అధ్యాయాల ప్రారంభంలోనే దేవుణ్ణి సమీపించేవారు ఆయన నేర్పిన మార్గం గుండా మాత్రమే సమీపించాలని హెచ్చరిక ఉంది.

2. నేను కరుణాపీఠము మీద మేఘములో కనబడుదును గనుక నీ సహోదరుడైన అహరోను చావకయుండునట్లు అతడు మందసము మీది కరుణాపీఠము ఎదుటనున్న అడ్డతెరలోపలికి ఎల్లప్పుడును రాకూడదని అతనితో చెప్పుము.
హెబ్రీయులకు 6:19, హెబ్రీయులకు 9:7

“చావకుండేలా”– నిర్గమకాండము 28:43 నిర్గమకాండము 30:20-21 లేవీయకాండము 8:35. దేవుని సన్నిధిలోకి పాపాత్ముడెవరూ ప్రవేశించకుండా మండుతున్న మంటల్లాంటి దేవుని పవిత్రత అడ్డుపడుతూ ఉంటుంది. మరణ శిక్ష తెచ్చి పెట్టిన ఇతర అతిక్రమాలు నిర్గమకాండము 28:35 నోట్‌లో కనిపిస్తున్నాయి. ఇప్పుడైతే యేసు తనను తాను బలిగా సమర్పించుకోవడం ద్వారా ఒక సజీవమైన కొత్త దారిని ఏర్పరచి దాని ద్వారా తన ప్రజలు ఎప్పుడైనా దేవుణ్ణి సమీపించేందుకు అవకాశం కలిగించాడు (హెబ్రీయులకు 10:19-22 1 పేతురు 3:18). “అతి పవిత్ర స్థలంలో ప్రవేశించడానికి మనకు ధైర్యం ఉంది. ఈ కారణాల చేత...దేవుని సన్నిధానంలోకి ప్రవేశిద్దాం” అని ఆ నాటి ఇస్రాయేల్‌వారిలో సామాన్య ప్రజలతో చెప్పడం ఎప్పుడూ జరగలేదు. ఎందుకంటే ఈ దారి అప్పటికింకా స్పష్టం కాలేదు. సాధారణ యాజులకు కూడా ఈ అతి పవిత్ర స్థలంలోకి ప్రవేశించడానికి అనుమతి లేదు. యాజి కాని ఇస్రాయేల్ మనిషి ఎవడూ అతి పవిత్రస్థలం ఎలా ఉంటుందో ఒక్కసారి కూడా చూడలేదు. అతడు ఆవరణ ద్వారం వరకు మాత్రం రావచ్చు (నిర్గమకాండము 27:9-19 నోట్ చూడండి). దీనంతటిలో ఒక దివ్యమైన అంతరార్థం ఉంది. పాత ఒడంబడిక, సన్నిధి గుడారం, అర్పణలు ఇవన్నీ ముందు రాబోయే శ్రేష్ఠమైన సంగతుల నీడలు మాత్రమే. ఇవి ఆ శ్రేష్ఠమైనవి కావు (హెబ్రీయులకు 8:5 హెబ్రీయులకు 10:1). “అన్ని సమయాల్లో”– నిర్గమకాండము 30:10 హెబ్రీయులకు 9:7 హెబ్రీయులకు 9:25.

3. అతడు పాపపరిహారార్థబలిగా ఒక కోడెదూడను దహనబలిగా ఒక పొట్టేలును తీసికొని, వీటితో పరిశుద్ధస్థలములోనికి రావలెను.
హెబ్రీయులకు 9:13

“పాపాలకోసం బలి”– లేవీయకాండము 4:1-12 హెబ్రీయులకు 9:7. “హోమబలి”– లేవీయకాండము 1:10-13.

4. అతడు ప్రతిష్ఠిత మైన చొక్కాయి తొడుగుకొని తన మానమునకు సన్న నార లాగులు తొడుగుకొని, సన్ననార దట్టికట్టుకొని సన్ననారపాగా పెట్టుకొనవలెను. అవి ప్రతిష్ఠవస్త్రములు గనుక అతడు నీళ్లతో దేహము కడుగుకొని వాటిని వేసికొనవలెను.

నిర్గమకాండము 28:29 నిర్గమకాండము 28:42 నిర్గమకాండము 30:20 హెబ్రీయులకు 10:22.

5. మరియు అతడు ఇశ్రాయేలీయుల సమాజము నొద్దనుండి పాపపరిహారార్థబలిగా రెండు మేక పిల్లలను దహనబలిగా ఒక పొట్టేలును తీసికొని రావలెను.

లేవీయకాండము 4:13-21.

6. అహరోను తన కొరకు పాపపరిహారార్థబలిగా ఒక కోడెను అర్పించి తన నిమిత్తమును తన యింటివారి నిమిత్తమును ప్రాయశ్చిత్తము చేసి
హెబ్రీయులకు 5:3, హెబ్రీయులకు 7:27

హెబ్రీయులకు 5:3.

7. ఆ రెండు మేకపిల్లలను తీసికొని వచ్చి, ప్రత్యక్షపు గుడారముయొక్క ద్వారమునొద్ద యెహోవా సన్నిధిని వాటిని ఉంచవలెను.

మేకలు రెండూ క్రీస్తుకే గుర్తు. పాపాలకోసమైన బలిగా అర్పితమైన మేక పాపులకు బదులుగా చనిపోయిన క్రీస్తును సూచిస్తుంది (లేవీయకాండము 4:3). అరణ్యంలో విడిచిపెట్టిన మేక మనుషుల పాపాలను తిరిగి కనిపించని చోటుకు తీసుకుపోయే క్రీస్తుకు గుర్తు (యోహాను 1:29). మనుషుల పాపాలను భరించేందుకు దేవుడు నియమించిన ఒకే ఒక వ్యక్తి క్రీస్తు. క్రీస్తు పాపుల పక్షంగా చేసిన పనిలోని రెండు విశేషాలను సూచించడానికి రెండు మేకలు అవసరం (లేవీయకాండము 14:4-7 పోల్చి చూడండి). ఇస్రాయేల్‌ప్రజల పాపాలన్నిటినీ బ్రతికి ఉన్న మేకమీద చేతులుంచి ఒప్పుకొన్నారు. అటు తరువాత దాన్ని నిర్జన ప్రదేశానికి పంపించారు (వ 21,22). ప్రభువైన యేసు సిలువమీద మన పాపాలన్నిటినీ భరించాడు (1 పేతురు 2:24). అది ఆధ్యాత్మికంగా అరణ్యం, నిర్జన ప్రదేశమే గదా (మత్తయి 27:45-46). ఆయన మరణ దేశానికి తరలిపోయాడు అయితే తిరిగి ఎవరికీ కనిపించని మేకలాగా గాక యేసు మాత్రం మూడో రోజున మళ్ళీ కనిపించాడు. కానీ తాను మోసుకువెళ్ళిన పాపాలేవీ ఆయనమీద లేకుండా పొయ్యాయి. ఆయన వాటిని అక్కడే, ఆ అరణ్యంలోనే వదిలేశాడు. తూర్పు, పశ్చిమ దిక్కుల మధ్య ఎంత దూరం ఉందో విశ్వాసులకూ వారి పాపాలకూ అంత దూరం ఉండేలా చేశాడు కీర్తనల గ్రంథము 103:12), సముద్రం అగాధంలో వాటిని పాతి పెట్టాడు (మీకా 7:19). మరణం నుంచి లేచిన తరువాత ఆయన తన శిష్యులలో కొద్దిమందికి మాత్రమే కనిపించాడు. అయితే తనవారందరికీ కనిపించే రోజు రాబోతుంది (హెబ్రీయులకు 9:28).

8. అప్పుడు అహరోను యెహోవా పేరట ఒక చీటిని, విడిచిపెట్టే మేక పేరట ఒక చీటిని ఆ రెండు మేకలమీద రెండు చీట్లను వేయవలెను.

9. ఏ మేకమీద యెహోవాపేరట చీటి పడునో, ఆ మేకను అహరోను తీసికొని వచ్చి పాపపరిహారార్థబలిగా అర్పింపవలెను.

10. ఏ మేకమీద విడిచిపెట్టుట అనే చీటి పడునో దానివలన ప్రాయశ్చిత్తము కలుగునట్లు, దానిని అరణ్యములో విడిచిపెట్టుటకై యెహోవా సన్నిధిని దానిని ప్రాణముతోనే ఉంచవలెను.

11. అప్పుడు అహరోను పాపపరిహారార్థబలియగు ఆ కోడెను తీసికొని వచ్చి తన నిమిత్తమును తన యింటివారి నిమిత్తమును ప్రాయశ్చిత్తము చేసికొనవలెను. తరువాత అతడు తనకొరకు తానర్పించు పాపపరిహారార్థబలియగు కోడెను వధించి

12. యెహోవా సన్నిధినున్న ధూపపీఠము మీదనుండి ధూపార్తెడు నిప్పులను, తన పిడికెళ్లతో పరిమళ ధూపచూర్ణమును తీసికొని అడ్డతెరలోపలికి వాటిని తెచ్చి తాను చావకుండునట్లు
హెబ్రీయులకు 6:19, ప్రకటన గ్రంథం 8:5

నిర్గమకాండము 30:34-38.

13. ఆ ధూపము మేఘము వలె శాసనముల మీదనున్న కరుణాపీఠమును కమ్ముటకు, యెహోవా సన్నిధిని ఆ అగ్నిమీద ఆ ధూప ద్రవ్యమును వేయవలెను.

నిర్గమకాండము 25:21.

14. అప్పుడతడు ఆ కోడెరక్తములో కొంచెము తీసికొని తూర్పుప్రక్కను కరుణాపీఠముమీద తన వ్రేలితో ప్రోక్షించి, కరుణాపీఠము ఎదుట తన వ్రేలితో ఆ రక్తములో కొంచెము ఏడుమారులు ప్రోక్షింపవలెను.
హెబ్రీయులకు 9:7-13

హెబ్రీయులకు 9:25.

15. అప్పుడతడు ప్రజలర్పించు పాపపరిహారార్ధబలియగు మేకను వధించి అడ్డ తెరలోపలికి దాని రక్తము తెచ్చి ఆ కోడెరక్తముతో చేసినట్లు దీని రక్తముతోను చేసి, కరుణాపీఠము మీదను కరుణాపీఠము ఎదుటను దాని ప్రోక్షింపవలెను.
హెబ్రీయులకు 6:19, హెబ్రీయులకు 7:27, హెబ్రీయులకు 9:7-13, హెబ్రీయులకు 10:4

హెబ్రీయులకు 7:27 హెబ్రీయులకు 9:7 హెబ్రీయులకు 9:12.

16. అట్లు అతడు ఇశ్రాయేలీయుల సమస్త పాపములను బట్టియు, అనగా వారి అపవిత్రతను బట్టియు, వారి అతి క్రమములనుబట్టియు పరిశుద్ధ స్థలమునకు ప్రాయశ్చిత్తము చేయవలెను. ప్రత్యక్షపు గుడారము వారిమధ్య ఉండుట వలన వారి అపవిత్రతను బట్టి అది అపవిత్ర మగుచుండును గనుక అతడు దానికి ప్రాయశ్చిత్తము చేయవలెను.

నిర్గమకాండము 29:36-37 నిర్గమకాండము 30:10 హెబ్రీయులకు 2:17 హెబ్రీయులకు 9:23. ఇస్రాయేల్‌వారు సన్నిధి గుడారం చుట్టూ నివసిస్తూ ఉన్నందువల్లనూ, యాజులు దానిలో తిరుగుతూ ఉన్నందువల్లనూ ఆ సన్నిధి గుడారం, దాని అతి పవిత్ర స్థలం సహా, అశుద్ధమైపోయిందని దీనివల్ల అర్థమౌతున్నది. ఎందుకంటే వారంతా పాపులే కదా. ఈ అశుద్ధతను బలి అర్పించడం వల్ల తొలగించవలసివచ్చింది. “ప్రాయశ్చిత్తం”– నిర్గమకాండము 29:33 నోట్.

17. పరిశుద్ధస్థలములో ప్రాయశ్చిత్తము చేయుటకు అతడు లోపలికి పోవునప్పుడు అతడు తన నిమిత్తమును తన యింటి వారి నిమిత్తమును ఇశ్రాయేలీయుల సమస్త సమాజము నిమిత్తమును ప్రాయశ్చిత్తముచేసి బయటికి వచ్చువరకు ఏ మనుష్యుడును ప్రత్యక్షపు గుడారములో ఉండరాదు.

ఈ ప్రాయశ్చిత్తాన్ని ఇస్రాయేల్‌వారి ప్రముఖ యాజి అహరోను తానొక్కడే ఒంటరిగా చెయ్యాలి. ఎవరూ అతనికి సహాయపడకూడదు. అతనితోబాటు సన్నిధి గుడారంలో ఆ సమయంలో ఎవరూ ఉండకూడదు. అలాగే యేసుప్రభువు కూడా తన ప్రజలకోసం తానే ఒంటరిగా ప్రాయశ్చిత్తాన్ని చేశాడు.

18. మరియు అతడు యెహోవా సన్నిధినున్న బలిపీఠము నొద్దకు పోయి దానికి ప్రాయశ్చిత్తము చేయవలెను. అతడు ఆ కోడెరక్తములో కొంచెమును ఆ మేకరక్తములో కొంచెమును తీసికొని బలిపీఠపు కొమ్ములమీద చమిరి

19. యేడుమారులు తన వ్రేలితో ఆ రక్తములో కొంచెము దానిమీద ప్రోక్షించి దాని పవిత్రపరచి ఇశ్రాయేలీయుల అపవిత్రతను పోగొట్టి దానిని పరిశుద్ధపరచవలెను.

20. అతడు పరిశుద్ధస్థలమునకును ప్రత్యక్షపు గుడారమునకును బలిపీఠమునకును ప్రాయశ్చిత్తము చేసి చాలించిన తరువాత ఆ సజీవమైన మేకను దగ్గరకు తీసికొని రావలెను.

21. అప్పుడు అహరోను సజీవమైన ఆ మేక తలమీద తన రెండు చేతులు ఉంచి, ఇశ్రాయేలీయుల పాపములన్నియు, అనగా వారి దోషములన్నియు వారి అతిక్రమములన్నియు దానిమీద ఒప్పుకొని, ఆ మేకతలమీద వాటిని మోపి, తగిన మనుష్యునిచేత అరణ్యములోనికి దాని పంపవలెను.
హెబ్రీయులకు 10:4

దేవుని ప్రజల పాపాలు మరెన్నటికీ కనిపించ కుండా ఎటో వెళ్ళిపోయాయి.

22. ఆ మేక వారి దోషములన్నిటిని ఎడారి దేశమునకు భరించి పోవును. అతడు అరణ్యములో ఆ మేకను విడిచిపెట్టవలెను.

23. అప్పుడు అహరోను ప్రత్యక్షపు గుడారము లోనికి వచ్చి, తాను పరిశుద్ధస్థలములోనికి వెళ్లినప్పుడు తాను వేసికొనిన నారబట్టలను తీసి అక్కడ వాటిని ఉంచి

24. పరిశుద్ధ స్థలములో దేహమును నీళ్లతో కడుగుకొని బట్టలు తిరిగి ధరించుకొని బయటికి వచ్చి తనకొరకు దహన బలిని ప్రజలకొరకు దహనబలిని అర్పించి, తన నిమిత్తమును ప్రజల నిమిత్తమును ప్రాయశ్చిత్తము చేయవలెను

25. పాప పరిహారార్థబలి పశువుయొక్క క్రొవ్వును బలిపీఠముమీద దహింపవలెను.

26. విడిచిపెట్టే మేకను వదలినవాడు తన బట్టలు ఉదుకుకొని నీళ్లతో దేహము కడుగుకొని తరువాత పాళెములోనికి రావలెను.

27. పరిశుద్ధస్థలములో ప్రాయశ్చిత్తము చేయుటకు వేటి రక్తము దాని లోపలికి తేబడెనో పాపపరిహారార్థ బలియగు ఆ కోడెను ఆ మేకను ఒకడు పాళెము వెలుపలికి తీసికొనిపోవలెను. వాటి చర్మములను వాటి మాంసమును వాటి మలమును అగ్నితో కాల్చివేయ వలెను.
హెబ్రీయులకు 13:11-13

లేవీయకాండము 4:11-12 నోట్.

28. వాటిని కాల్చివేసినవాడు తన బట్టలు ఉదుకు కొని నీళ్లతో దేహము కడుగుకొని తరువాత పాళెము లోనికి రావలెను.

29. ఇది మీకు నిత్యమైన కట్టడ. స్వదేశులుగాని మీ మధ్యనుండు పరదేశులుగాని మీరందరు ఏడవనెల పదియవ నాడు ఏ పనియైనను చేయక మిమ్మును మీరు దుఃఖపరచు కొనవలెను.
అపో. కార్యములు 27:9

అదుపు చేసుకోవాలి లేక ఉపవాసముండాలి అని అనువదించబడ్డ హీబ్రూ మాటకు బాధ అనుభవించడం, పీడించబడడం, క్రుంగిపోవడం, అణచుకోవడం అనే అర్థాలు కూడా ఉన్నాయి. ప్రాయశ్చిత్త దినాన ఇలా చెయ్యడం యూదుల అతి ప్రాముఖ్యమైన విధి. అలా చెయ్యని వాళ్ళను ప్రజల్లోనుంచి లేకుండా చెయ్యాలి (లేవీయకాండము 23:28-30). అది విశ్రాంతి దినం. ఆ రోజు ఎవరూ ఏ పనీ చెయ్యకూడదు. ఆ రోజు ఉపవాసం ఉండి దుఃఖపడుతూ ఎవరికి వారు తగ్గించుకుని ఉండాలి. ఇదంతా దేనిని సూచించేదంటే రక్షణ, పాపవిముక్తి కోసం మనం స్వంత ప్రయత్నాలు మానాలి, పశ్చాత్తాపపడాలి, క్రీస్తు చేసిన ప్రాయశ్చిత్తం మీదే నమ్మకం ఉంచాలి. ఒక వ్యక్తికి పశ్చాత్తాపం, నమ్మకం లేకుండా ఉంటే క్రీస్తు చేసిన ప్రాయశ్చిత్తం వల్ల ఆ వ్యక్తికి ఏమీ లాభం ఉండదు. మనుషులు పశ్చాత్తాపపడాలని దేవుడు ఆజ్ఞాపిస్తున్నాడు (లూకా 24:46 అపో. కార్యములు 2:38 అపో. కార్యములు 3:19 అపో. కార్యములు 17:30 అపో. కార్యములు 26:20 యాకోబు 4:8-10 యెషయా 55:7). పశ్చాత్తాపం, నమ్మకం ద్వారా ఆనందం, శాంతి, దేవునితో సహవాసం కలుగుతాయి. ఈ వచనాల అర్థం గురించి మరికొన్ని అభిప్రాయాలకోసం లేవీయకాండము 23:26-32 నోట్ చూడండి.

30. ఏలయనగా మీరు యెహోవా సన్నిధిని మీ సమస్త పాపములనుండి పవిత్రులగునట్లు ఆ దినమున మిమ్ము పవిత్రపరచునట్లు మీ నిమిత్తము ప్రాయశ్చిత్తము చేయబడెను.
హెబ్రీయులకు 9:7-12-28

“తప్పిదాలన్నిటి నుంచి”అనే మాట గమనించండి. అంటే తెలిసిగానీ తెలియకగానీ చేసిన పాపాలన్నమాట. అపో. కార్యములు 13:38-39 కొలొస్సయులకు 2:13 పోల్చి చూడండి.

31. అది మీకు మహా విశ్రాంతి దినము. మిమ్మును మీరు దుఃఖపరచుకొనవలెను; ఇది నిత్యమైన కట్టడ.

32. ఎవరు తన తండ్రికి మారుగా యాజకుడగుటకై అభి షేకముపొంది తన్ను ప్రతిష్ఠించుకొనునో ఆ యాజకుడు ప్రాయశ్చిత్తము చేసికొని నారవస్త్రములైన ప్రతిష్ఠిత వస్త్రములను ధరించుకొనవలెను.

33. మరియు అతడు అతి పరిశుద్ధముగానున్న మందిరమునకును ప్రత్యక్షపు గుడారమునకును బలిపీఠమునకును ప్రాయశ్చిత్తము చేయవలెను. మరియు అతడు యాజకుల నిమిత్తమును సమాజము నిమిత్తమును ప్రాయశ్చిత్తము చేయవలెను.

34. సంవత్సరమునకు ఒకసారి ఇశ్రాయేలీయుల సమస్త పాపములనుబట్టి వారి నిమిత్తము ప్రాయశ్చిత్తము చేయుటకు ఇది మీకు నిత్యమైన కట్టడ. యెహోవా మోషేకు ఆజ్ఞాపించినట్లు అతడు చేసెను.
హెబ్రీయులకు 9:7-12-28

హెబ్రీయులకు 9:7 హెబ్రీయులకు 10:10 హెబ్రీయులకు 10:14.