1. దేవోక్తి ఇశ్రాయేలీయులనుగూర్చి వచ్చిన యెహోవా వాక్కు. ఆకాశమండలమును విశాలపరచి భూమికి పునాదివేసి మనుష్యుల అంతరంగములో జీవాత్మను సృజించు యెహోవా సెలవిచ్చునదేమనగా

“దేవోక్తి”– జెకర్యా 9:1. ఈ భవిష్యద్వాక్కులను ఇచ్చినవాడు, రాబోయే సంగతులను వీటి ద్వారా వెల్లడించినవాడు ఈ విశ్వానికంతటికీ మహా సృష్టికర్త, మనిషిని చేసినవాడు – ఆదికాండము 1:1; ఆదికాండము 2:7; కీర్తనల గ్రంథము 104:1-5; కీర్తనల గ్రంథము 139:13-16; యెషయా 42:5. తాను చేస్తానని చెప్పినదాన్ని చక్కగా చేయగల సామర్థ్యం ఉన్నవాడు.

2. నేను యెరూషలేము చుట్టునున్న జనులకందరికి మత్తు పుట్టించు పాత్రగా చేయబోవుచున్నాను; శత్రువులు యెరూషలేమునకు ముట్టడివేయగా అది యూదా మీదికిని వచ్చును.

“పాత్ర”– బైబిల్లో ఈ మాట కొన్ని సార్లు దేవుని తీర్పును, లేక తీర్పుకు సిద్ధబాటును సూచిస్తుంది. కీర్తనల గ్రంథము 75:8; యెషయా 51:17; యిర్మియా 25:15; యిర్మియా 49:12; యిర్మియా 51:7 మొ।। చూడండి. ప్రపంచ దేశాలను పోగు చేసి తీర్పుకు గురి చేసే సాధనంగా జెరుసలంను ఉపయోగిస్తానని యెహోవా అంటున్నాడు. జెకర్యా 14:2-3; యోవేలు 3:9-16; ప్రకటన గ్రంథం 16:12-14 పోల్చి చూడండి.

3. ఆ దినమందు నేను యెరూషలేమును సమస్తమైన జనులకు బరువైన రాయిగా చేతును, దానిని ఎత్తి మోయువారందరు మిక్కిలి గాయ పడుదురు, భూజనులందరును దానికి విరోధులై కూడు దురు.
లూకా 21:24, ప్రకటన గ్రంథం 11:2

“ఆ కాలంలో”– ఇందులోను, తరువాత రెండు అధ్యాయాల్లోను ఈ మాట తరచుగా కనిపిస్తుంది. ఇది ఈ మూడు అధ్యాయాలు కలిసికట్టుగా చేసి ఇంకా భవిష్యత్తులో రాబోయే ఒక కాలాన్ని సూచిస్తున్నది – వ 4,6,8,9,11; జెకర్యా 13:1-2, జెకర్యా 13:4; జెకర్యా 14:4, జెకర్యా 14:6, జెకర్యా 14:8-9, జెకర్యా 14:13, జెకర్యా 14:20-21. ఆయా కాలాల్లో వివిధ దేశాలు జెరుసలంను ముట్టడించి ఓడించాయి. అయితే ఈ వచనం ఇంకా నెరవేరలేదు. దేశాలన్నీ కలిసి జెరుసలంపై ఇంకా దండెత్తి రాలేదు. ఆ నగరం వాటికి “బరువైన రాయిగా” ఇంత వరకు ఎప్పుడూ లేదు. ఉదాహరణకు క్రీ.శ. 70లో రోమ్‌వారు దాన్ని ముట్టడించి సమూలంగా నాశనం చేశారు.

4. ఇదే యెహోవా వాక్కుఆ దినమందు నేను గుఱ్ఱములన్నిటికిని బెదరును, వాటిని ఎక్కువారికి వెఱ్ఱిని పుట్టింతును, యూదావారిమీద నా దృష్టియుంచి జనముల గుఱ్ఱములన్నిటికిని అంధత్వము కలుగజేతును.

జెరుసలంను నాశనం చేసేందుకు వచ్చిన సైన్యాలతో దాని పక్షంగా దేవుడే పోరాడతాడు. “గుర్రాలు”– యెహెఙ్కేలు 39:3, అక్కడి నోట్స్ చూడండి.

5. అప్పుడు యెరూషలేములోని అధికారులుయెరూషలేము నివా సులు తమ దేవుడైన యెహోవాను నమ్ముకొనుటవలన మాకు బలము కలుగుచున్నదని తమ హృదయమందు చెప్పు కొందురు.

ఆ రోజున యూదా నాయకులు తమ బలం తమలో గానీ తమ యుద్ధాయుధాల్లో గానీ లేదని చివరికి గ్రహిస్తారు. తమ దేవునివైపుకు వారు తిరగడానికి ఇది ఆరంభం కావచ్చు.

6. ఆ దినమున నేను యూదా అధికారులను కట్టెల క్రింది నిప్పులుగాను పనల క్రింది దివిటీగాను చేతును, వారు నలుదిక్కులనున్న జనములనందరిని దహించుదురు. యెరూషలేమువారు ఇంకను తమ స్వస్థలమగు యెరూషలేములో నివసించుదురు.

“కట్టె క్రింద...పనలలో”– అంటే ఇస్రాయేల్‌ను చుట్టుముట్టిన శత్రువులు.

7. మరియు దావీదు ఇంటి వారును యెరూషలేము నివాసులును, తమకు కలిగిన ఘనతనుబట్టి యూదావారిమీద అతిశయపడకుండునట్లు యెహోవా యూదావారిని మొదట రక్షించును.

“యూదావారి నివాస స్థలాలను”– అంటే జెరుసలం బయట పల్లె ప్రాంతాల్లో ఉంటున్న ప్రజలు. “దావీదు వంశంవారికీ”– అంటే జెరుసలం పాలకులు.

8. ఆ కాలమున యెహోవా యెరూషలేము నివాసులకు సంరక్ష కుడుగా నుండును; ఆ కాలమున వారిలో శక్తిహీనులు దావీదువంటివారుగాను, దావీదు సంతతి వారు దేవునివంటి వారుగాను జనుల దృష్టికి యెహోవా దూతలవంటి వారుగాను ఉందురు.

“దావీదులాగా”– 1 సమూయేలు 17:50; 1 సమూయేలు 18:7. “దేవునిలాగా”– దేవుడు వారితో ఉంటాడు గనుక వారి బలం ఎవరూ ఆపలేని దేవుని బలంగా ఉంటుంది (వ 5). “వారి ముందు”– నిర్గమకాండము 14:19; నిర్గమకాండము 23:20 పోల్చి చూడండి. “యెహోవా దూత”– ఆదికాండము 16:7 నోట్.

9. ఆ కాలమున యెరూషలేముమీదికి వచ్చు అన్యజనులనందరిని నేను నశింపజేయ పూనుకొనె దను.

జెకర్యా 1:21; జెకర్యా 14:3; యెషయా 29:5-8.

10. దావీదు సంతతివారిమీదను యెరూషలేము నివా సులమీదను కరుణ నొందించు ఆత్మను విజ్ఞాపనచేయు ఆత్మను నేను కుమ్మరింపగా వారు తాము పొడిచిన నామీద దృష్టియుంచి, యొకడు తన యేక కుమారుని విషయమై దుఃఖించునట్లు,తన జ్యేష్ఠపుత్రుని విషయమై యొకడు ప్రలా పించునట్లు అతని విషయమై దుఃఖించుచు ప్రలాపింతురు.
యోహాను 19:37, మత్తయి 24:30, ప్రకటన గ్రంథం 1:7

యూదులు ఒక జాతిగా ఈ కృప యుగమంతట్లోనూ క్రీస్తును నిరాకరిస్తూ ఉన్నారు. అయితే వారు దీని గురించి పశ్చాత్తాపపడి హృదయపూర్వకంగా మనసారా దేవునివైపు తిరుగుతారు. యెషయా 59:20-21; యిర్మియా 23:5-8; యిర్మియా 31:31-34; యిర్మియా 32:37-40; యెహెఙ్కేలు 20:40-44; యెహెఙ్కేలు 37:21-28; దానియేలు 12:1; హోషేయ 3:4-5; హోషేయ 14:1-4 చూడండి. రోమీయులకు 11:25-29; ప్రకటన గ్రంథం 7:3-8 నోట్స్ చూడండి. “ఆత్మ”– ఇక్కడ దీని అర్థం పశ్చాత్తాపపడి క్రీస్తు వైపుకు తిరిగే మనసు కావచ్చు. లేదా, దేవుని “పవిత్రాత్మ” అనడానికి ఎక్కువ అవకాశం ఉంది. యోవేలు 2:28-32 పోల్చి చూడండి. “నన్ను”– యెహోవా దేవుడు మాట్లాడుతున్నాడు. “తాము పొడిచిన నన్ను”– అంటే యేసుక్రీస్తు (కీర్తనల గ్రంథము 22:16; యెషయా 53:5; యోహాను 19:34, యోహాను 19:37). అంటే యేసు యెహోవాదేవుని అవతారం. ఆదికాండము 16:7; నిర్గమకాండము 3:14; కీర్తనల గ్రంథము 23:1; కీర్తనల గ్రంథము 24:7-10; కీర్తనల గ్రంథము 96:10-13; యెషయా 6:1; లూకా 2:11 నోట్ చూడండి. ఇక్కడ (జెకర్యా 12:10 లో) త్రిత్వంగా ఉన్న దేవుడు కనబడుతున్నాడు. త్రిత్వం గురించిన నోట్స్ మత్తయి 3:16-17, మొ।।. “నొచ్చుకొని...ఏడుస్తారు”– చివరికి యూదుల గర్విష్ఠి మొండి హృదయాలు పగిలి తమ అభిషిక్తుడూ రక్షకుడూ అయిన యేసుక్రీస్తును తిరస్కరించిన ఘోర పాపానికి దుఃఖిస్తారు.

11. మెగిద్దోను లోయలో హదదిమ్మోనుదగ్గర జరిగిన ప్రలాపమువలెనే ఆ దినమున యెరూషలేములో బహుగా ప్రలాపము జరుగును.
ప్రకటన గ్రంథం 16:16

12. దేశనివాసులందరు ఏ కుటుంబమునకు ఆ కుటుంబముగా ప్రలాపింతురు, దావీదు కుటుంబి కులు ప్రత్యేకముగాను, వారి భార్యలు ప్రత్యేకముగాను, నాతాను కుటుంబికులు ప్రత్యేకముగాను, వారి భార్యలు ప్రత్యేకముగాను,
మత్తయి 24:30, ప్రకటన గ్రంథం 1:7

“దేశ నివాసులంతా”– అంటే ఇస్రాయేల్ వారంతా. “వంశం”– ఇక్కడ చెప్పిన వంశాలు ఇస్రాయేల్‌వారివే. దావీదు అంటే రాజుల వంశం (నాతాను దావీదు కొడుకు – 2 సమూయేలు 5:14). లేవీ అంటే యాజుల వంశం (షిమీ లేవి మనుమడు – సంఖ్యాకాండము 3:17-18). ఈ వంశాలను లేక కుటుంబాలను ప్రత్యేకంగా ప్రస్తావించడం చూస్తుంటే యెహోవా అక్షరాలా యూదుల గురించి తప్ప వేరెవరి గురించీ మాట్లాడ్డం లేదని స్పష్టం కాదా?

13. లేవి కుటుంబికులు ప్రత్యేకముగాను, వారి భార్యలు ప్రత్యేకముగాను, షిమీ కుటుంబికులు ప్రత్యేకముగాను, వారి భార్యలు ప్రత్యేకముగాను,

14. మిగిలిన వారిలో ప్రతి కుటుంబపువారు ప్రత్యేకముగాను, వారి భార్యలు ప్రత్యేకముగాను, ప్రలాపింతురు.