1. ఆ కాలమందు యేసు విశ్రాంతిదినమున పంటచేలలో పడి వెళ్లుచుండగా ఆయన శిష్యులు ఆకలిగొని వెన్నులు త్రుంచి తినసాగిరి.
ద్వితీయోపదేశకాండము 23:24-25

ఇది ధాన్యం దొంగిలించడం లెక్కలోకి రాదు. దేవుడు ఇస్రాయేల్‌కు ఇచ్చిన ధర్మశాస్త్రం ప్రకారం ఇతరుల పొలంలోబడి వెళ్ళేటప్పుడు తమకు అవసరమైనదాన్ని తినేందుకు వారికి అనుమతి ఉంది. ద్వితీయోపదేశకాండము 23:24-25 చూడండి.

2. పరిసయ్యులది చూచి ఇదిగో, విశ్రాంతిదినమున చేయకూడనిది నీ శిష్యులు చేయుచున్నారని ఆయనతో చెప్పగా
నిర్గమకాండము 20:10, ద్వితీయోపదేశకాండము 5:14

విశ్రాంతి దినం గురించి నోట్స్ నిర్గమకాండము 20:8-11 చూడండి. పరిసయ్యులు ధర్మశాస్త్రాన్ని చాలా కఠినంగా వర్ణించి, విశ్రాంతి దినాన ఏమి చేయవచ్చో ఏమి చేయకూడదో బోలెడన్ని నియమాలను సృష్టించారు. ఇలా ఆహారం తీసుకోవడమంటే వారి దృష్టిలో పని. విశ్రాంతి దినాన ఎలాంటి పనీ చేయకూడదు. వారి దృష్టిలో రోగాలను నయం చేయడం కూడా పనే, అది కూడా నిషేధమే (వ 10).

3. ఆయన వారితో ఇట్లనెను తానును తనతో కూడ నున్నవారును ఆకలిగొని యుండగా దావీదు చేసిన దానిగూర్చి మీరు చదువ లేదా?

4. అతడు దేవుని మందిరములో ప్రవేశించి, యాజకులే తప్ప తానైనను తనతో కూడ ఉన్నవారైనను తినకూడని సముఖపు రొట్టెలు తినెను.
లేవీయకాండము 24:5-9, 1 సమూయేలు 21:6

5. మరియు యాజకులు విశ్రాంతిదినమున దేవాలయములో విశ్రాంతిదినమును ఉల్లంఘించియు నిర్దోషులై యున్నారని మీరు ధర్మశాస్త్రమందు చదువలేదా?
సంఖ్యాకాండము 28:9-10

విశ్రాంతి దిన సంబంధమైన అర్పణలను సిద్ధ పరిచేందుకు, అర్పించేందుకు యాజులు పని చేసేవారు. సంఖ్యాకాండము 28:9-10 చూడండి. పరిసయ్యులు పాత ఒడంబడిక గ్రంథాన్ని చదవడం ఎక్కువ, అర్థం చేసుకున్నది తక్కువ.

6. దేవాలయముకంటె గొప్ప వాడిక్కడ నున్నాడని మీతో చెప్పుచున్నాను.
యెషయా 63:1

క్రీస్తు ఇక్కడ తాను దేవుని ఆలయం కన్న గొప్ప అని అంటున్నాడు. ఆలయ సేవా విధులకోసమని యాజులు విశ్రాంతి దినం చట్టాలను మీరితే క్రీస్తు శిష్యులు కూడా ఆయన చూపిన దారిలో ఉండి ఆయన పనికోసం ఆ కట్టడలను మీరవచ్చు అని ఆయన భావం. ఈ సంఘటన జరిగినప్పుడు శిష్యులు క్రీస్తుతో కలిసి ఒక పనిమీద వెళ్తున్నారు.

7. మరియు కనికరమునే కోరుచున్నాను గాని బలిని నేను కోరను అను వాక్యభావము మీకు తెలిసియుంటే నిర్దోషులను దోషులని తీర్పు తీర్చకపోదురు.
హోషేయ 6:6

మత్తయి 9:13 నోట్ చూడండి.

8. కాగా మనుష్య కుమారుడు విశ్రాంతి దినమునకు ప్రభువైయున్నాడనెను.
ఆదికాండము 2:3

అంటే తానే అని యేసు ఉద్దేశం. “మానవ పుత్రుడు” గురించి నోట్ మత్తయి 8:20 చూడండి. ఇక్కడ మరో సారి యేసు తన దేవత్వం గురించి ఎరిగి ఉన్నాడని చూడవచ్చు. మానవ మాత్రుడు, లేదా ప్రవక్త ఎంత మహాత్ముడైనప్పటికీ తాను విశ్రాంతి దినానికి ప్రభువునని నిజంగా చెప్పగలడా? విశ్రాంతి దినం, దాని చట్టాలు సాక్షాత్తూ దేవుడే ఏర్పరచినవి (నిర్గమకాండము 20:1, నిర్గమకాండము 20:8), ఆ చట్టాలను మార్చే హక్కు, వాటిని పట్టించుకోనవసరం లేదని మనుషులకు అనుమతి ఇచ్చే హక్కు, లేదా వేరొక విధంగా వాటిని క్రమబద్ధం చేసే హక్కు ఆయనకు మాత్రమే ఉంది. “ప్రభువు” గురించి నోట్స్ లూకా 2:11; రోమీయులకు 10:9-10; ఫిలిప్పీయులకు 2:10-11 చూడండి.

9. ఆయన అక్కడనుండి వెళ్లి వారి సమాజమందిరములో ప్రవేశించినప్పుడు, ఇదిగో ఊచచెయ్యి గలవాడొకడు కనబడెను.

10. వారాయన మీద నేరము మోపవలెనని విశ్రాంతిదినమున స్వస్థపరచుట న్యాయమా? అని ఆయనను అడిగిరి.

ప్రాణాపాయం ఉంటే తప్ప ఎవరికైనా విశ్రాంతి దినాన వ్యాధి నయం చెయ్యడం చట్ట విరుద్ధమని నమ్మారు పరిసయ్యులు.

11. అందుకాయన మీలో ఏ మనుష్యునికైనను నొక గొఱ్ఱెయుండి అది విశ్రాంతిదినమున గుంటలో పడినయెడల దాని పట్టుకొని పైకి తీయడా?

ఈ వాదనకు తిరుగు జవాబు లేదు. పరిసయ్యులు మరి నోరెత్తలేదు.

12. గొఱ్ఱె కంటె మనుష్యుడెంతో శ్రేష్ఠుడు; కాబట్టి విశ్రాంతి దినమున మేలుచేయుట ధర్మమే అని చెప్పి

13. ఆ మనుష్యునితో నీ చెయ్యి చాపుమనెను. వాడు చెయ్యి చాపగా రెండవదానివలె అది బాగుపడెను.

యేసు అధికారానికీ, ప్రభావానికీ కూడా తిరుగు లేదు.

14. అంతట పరిసయ్యులు వెలుపలికి పోయి, ఆయనను ఏలాగు సంహరింతుమా అని ఆయనకు విరోధముగా ఆలోచన చేసిరి.

మత్తయి 26:4; మత్తయి 27:1; మార్కు 3:6; లూకా 6:1; యోహాను 5:18; యోహాను 7:10; యోహాను 11:53. సత్యాన్ని అంగీకరించడం కంటే దాన్ని నాశనం చెయ్యడమే వారికి ఇష్టం అయింది. స్వచ్ఛమైన తర్కానికీ, పరిపూర్ణమైన మంచితనానికీ వారు ఇవ్వగలిగిన జవాబు హత్యకు తలపెట్టడమే. మనుషుల హృదయం, మత సంబంధమైన మనుషుల హృదయం కూడా ఇలాంటిదే. మత్తయి 15:19; యిర్మియా 17:9 చూడండి.

15. యేసు ఆ సంగతి తెలిసికొని అచ్చటనుండి వెళ్లిపోయెను. బహు జనులాయనను వెంబడింపగా

16. ఆయన వారినందరిని స్వస్థ పరచి, తన్ను ప్రసిద్ధిచేయవద్దని వారికి ఆజ్ఞాపించెను.

మత్తయి 8:4; మత్తయి 9:30.

17. ప్రవక్తయైన యెషయాద్వారా చెప్పినది నెరవేరునట్లు (ఆలాగు జరిగెను) అదేమనగా

యెషయా 42:1-4 చూడండి. యేసుప్రభువు ధర్మశాస్త్రాన్నీ ప్రవక్తల గ్రంథాలనూ నెరవేర్చేందుకు వచ్చాడు (మత్తయి 5:17). యేసుప్రభువు పరిచర్య గోలగోలగా అందరికీ వినిపించే పరిచర్య కాదు. నెమ్మదిగా, నిలకడగా, ప్రశాంతంగా, జనాల దృష్టిని ఆకర్షించే ప్రయత్నం లేకుండా, ఎవరితో కుమ్ములాటలు పెట్టుకోకుండా, గొప్పగా ప్రదర్శించుకోకుండా పని చేసుకు పోవడం ఆయనకు ఇష్టం. పోరుకు పిలవడానికి బదులుగా ఆయన తన శత్రువులను విడిచివెళ్ళాడు. నిజమైన పోరాటాలు ఆత్మ సంబంధమైనవేనని ఆయనకు తెలుసు. అలాంటి పోరాటాల్లో అతి ప్రధానమైనదాన్లో తాను బలహీనుడుగా ఓడిపోయినట్టు కనిపించినప్పటికీ తాను సిలువపై దాన్ని గెలుస్తానని కూడా ఆయనకు తెలుసు. ఇదంతా కొన్ని వందల సంవత్సరాల క్రితం దేవుని ప్రవక్త పలికినట్టుగానే జరిగింది.

18. ఇదిగో ఈయన నా సేవకుడు ఈయనను నేను ఏర్పరచుకొంటిని ఈయన నా ప్రాణమున కిష్టుడైన నా ప్రియుడు ఈయనమీద నా ఆత్మ నుంచెదను ఈయన అన్యజనులకు న్యాయవిధిని ప్రచురము చేయును.
యెషయా 41:9, యెషయా 42:1-4

యేసుప్రభువు దేవుని అవతారం, అదే సమయంలో దేవుని సేవకుడు. మత్తయి 20:28; రోమీయులకు 15:8; అపో. కార్యములు 3:25-26; ఫిలిప్పీయులకు 2:6-7 చూడండి.

19. ఈయన జగడమాడడు, కేకలువేయడు వీధులలో ఈయన శబ్దమెవనికిని వినబడదు

20. విజయమొందుటకు న్యాయవిధిని ప్రబలము చేయువరకు ఈయన నలిగిన రెల్లును విరువడు మకమకలాడుచున్న అవిసెనారను ఆర్పడు

నీతిన్యాయాలు విజయం సాధించేవరకూ ఆయన తన నెమ్మదైన సాధువైన మార్గంలో కొనసాగాడు. యూదులు తమ అభిషిక్తుని ప్రవర్తన ఎలా ఉంటుందని భావించారో అలా యేసు ప్రవర్తించలేదు (తమ శత్రువులను తన పరాక్రమంవల్ల ఆయన ఓడిస్తాడని వారు తలంచేవారు). అయినప్పటికీ అంతిమ విజయం ఆయనదే.

21. ఈయన నామమందు అన్యజనులు నిరీక్షించెదరు అనునదియే

యూదుల మధ్య ఆయన చేసిన పరిచర్యకు ఇది పరిమితం అయిపోలేదు. ఇతర జనాలు కూడా ఆయన్ను నమ్మి స్వీకరిస్తారు.

22. అప్పుడు దయ్యముపట్టిన గ్రుడ్డివాడును మూగవాడునైన యొకడు ఆయనయొద్దకు తేబడెను. ఆయన వానిని స్వస్థపరచినందున ఆ మూగవాడు మాటలాడు శక్తియు చూపును గలవాడాయెను.

మత్తయి 9:32 నోట్ చూడండి.

23. అందుకు ప్రజలందరు విస్మయమొంది ఈయన దావీదు కుమారుడు కాడా, అని చెప్పుకొను చుండిరి.

“దావీదు కుమారుడు”– గురించి మత్తయి 1:1 నోట్.

24. పరిసయ్యులు ఆ మాట వినివీడు దయ్యములకు అధిపతియైన బయెల్జెబూలువలననే దయ్యములను వెళ్లగొట్టుచున్నాడు గాని మరియొకనివలన కాదనిరి.

బయల్‌జెబూల్ గురించి నోట్ మత్తయి 10:25.

25. ఆయన వారి తలంపుల నెరిగి వారితో ఇట్లనెను తనకు తానే విరోధముగా వేరుపడిన ప్రతి రాజ్యము పాడైపోవును. తనకుతానే విరోధముగా వేరుపడిన యే పట్టణమైనను ఏ యిల్లయినను నిలువదు.
1 సమూయేలు 16:7

మత్తయి 9:4.

26. సాతాను సాతానును వెళ్లగొట్టినయెడల తనకుతానే విరోధముగా వేరుపడును; అట్లయితే వాని రాజ్యమేలాగు నిలుచును?

27. నేను బయెల్జెబూలువలన దయ్యములను వెళ్లగొట్టుచున్న యెడల మీ కుమారులు ఎవరివలన వాటిని వెళ్లగొట్టు చున్నారు? కాబట్టి వారే మీకు తీర్పరులైయుందురు.

పరిసయ్యుల శిష్యులు కొందరు కూడా దయ్యాలను వెళ్ళగొట్టారు. లేదా కనీసం అలాగని చెప్పుకున్నారు. అపో. కార్యములు 19:13-16 చూడండి. దయ్యాల రాజు దయ్యాలను వెళ్ళగొట్టే శక్తిని ఎవరికీ ఇవ్వడని వారికి బాగా తెలుసు. అందువల్ల పరిసయ్యుల బూటకం మాటలను ఎవరైనా పసిగట్టగలరు.

28. దేవుని ఆత్మవలన నేను దయ్యములను వెళ్లగొట్టుచున్న యెడల నిశ్చయముగా దేవుని రాజ్యము మీ యొద్దకు వచ్చి యున్నది.

దేవుని రాజ్యం గురించి నోట్ మత్తయి 4:17. రాజు వచ్చాడు కాబట్టి రాజ్యం వచ్చింది. ఇందుకు దయ్యాలపై ఆయన చూపిన అధికారమే ఒక రుజువు.

29. ఒకడు మొదట బలవంతుని బంధింపని యెడల యేలాగు ఆ బలవంతుని యింటిలో చొచ్చి అతని సామగ్రి దోచుకొనగలడు? అట్లు బంధించినయెడల వాని యిల్లు దోచుకొనును.
యెషయా 49:24

ఈ చిన్న ఉదాహరణలో బలవంతుడు అంటే సైతాను. వాడి సామాను దోచుకునేది యేసుప్రభువు. వాడి సామాను అంటే సైతాను అదుపు కింద ఉన్న మనుషులు. యేసు సైతాను కోరల్లోనుంచి మనుషుల్ని రక్షిస్తున్నాడంటే పరిసయ్యులు చెప్పినట్టు ఆయన సైతానుతో రహస్యమైన సంధి చేసుకున్నాడని కాదు గానీ ఆయన సైతానును బంధించాడనే స్పష్టం అవుతున్నది. అలాగైతే యేసు దోపిడి దొంగ అనుకోవాలా? కాదు. మొదట్లో సైతాను దేవునినుంచి దొంగిలించిన దాన్నే ఆయన తిరిగి తీసుకుంటున్నాడు. పతనమై నశించిన స్థితిలో ఉన్న మనుషులను సైతాను రాజ్యంలోనుంచి తీసుకుపోయి తన మహిమ రాజ్యంలో ఉంచుతున్నాడు (అపో. కార్యములు 26:18).

30. నా పక్షమున నుండనివాడు నాకు విరోధి; నాతో కలిసి సమకూర్చనివాడు చెదర గొట్టువాడు.

మార్కు 9:40; లూకా 11:23. ఇది సైతానుకు, అతడి దయ్యాల సైన్యానికి, మనుషులకు కూడా సమానంగా వర్తిస్తుంది. క్రీస్తు విషయంలో తటస్థమైన విధానం అంటూ లేదు. అంటే ఆయన పక్షం వహించము అనే మనసున్న వారు ఆయనకు వ్యతిరేకులు అనేదానికి రుజువు.

31. కాబట్టి నేను మీతో చెప్పునదేమనగా మనుష్యులుచేయు ప్రతి పాపమును దూషణయు వారికి క్షమింపబడును గాని ఆత్మ విషయమైన దూషణకు పాప క్షమాపణ లేదు.

ఈ వచనం మొదటి భాగం బైబిల్లోని గొప్ప వాగ్దానాల్లో ఒకటి. రెండో భాగం భయంకరమైన హెచ్చరికల్లో ఒకటి. “క్షమాపణ దొరుకుతుంది” అంటే పశ్చాత్తాపపడి క్రీస్తులో నమ్మకం ఉంచినవారు క్షమాపణ పొందుతారని అర్థం తప్ప వేరు కాదు. అలాంటప్పుడు అతి హీనమైన నేరాలను, మనుషులు చేయగలిగే అతి నీచమైన పనులను కూడా దేవుడు క్షమిస్తాడు (లూకా 24:47; అపో. కార్యములు 13:38-39; ఎఫెసీయులకు 1:7; 1 యోహాను 1:9). క్షమాపణ గురించి మత్తయి 6:12, మత్తయి 6:14-15 నోట్స్; మత్తయి 9:5-7. “దూషణ”– మత్తయి 9:3 నోట్. ఇక్కడి సందర్భాన్ని బట్టి పవిత్రాత్మకు వ్యతిరేకంగా దూషణ, ఎన్నడూ క్షమించబడని పాపం అంటే ఇది కావచ్చు – పవిత్రాత్మ మూలంగా క్రీస్తు చేసిన కార్యాలు సైతాను పనులు అనడం. ఇలా అనాలంటే తెలిసి తెలిసి, నిర్మొహమాటంగా, పట్టుదలగా, కావాలని క్రీస్తును తృణీకరించగలగాలి. ఈ పాపం పశ్చాత్తాప పడేందుకు ఇష్టం లేని మనసునూ, పశ్చాత్తాపపడడం అసాధ్యమైన కఠిన హృదయాన్నీ వెల్లడి చేస్తుంది. పశ్చాత్తాపం లేకుండా క్షమాపణ అసాధ్యం – మత్తయి 3:2. హెబ్రీయులకు 6:4-6; 1 తిమోతికి 4:2; 1 యోహాను 5:16 పోల్చి చూడండి. హృదయం బండబారి పోయేలా చేసుకోవడం గురించిన హెచ్చరికను హెబ్రీయులకు 3:7-13 లో చూడండి.

32. మనుష్యకుమారునికి విరోధముగా మాటలాడువానికి పాపక్షమాపణ కలదుగాని పరిశుద్ధాత్మకు విరోధముగా మాటలాడువానికి ఈ యుగమందైనను రాబోవు యుగమందైనను పాపక్షమాపణ లేదు.

మనుషులను పశ్చాత్తాపపడేలా చేసేది దేవుడే (అపో. కార్యములు 5:31; అపో. కార్యములు 11:18; 2 తిమోతికి 2:25). పవిత్రాత్మ మనుషుల హృదయాల్లో పని చేయడం వల్లే వారు పశ్చాత్తాపానికి వస్తారు. మనుషులు ఆయనకు వ్యతిరేకంగా హృదయాన్ని కఠినం చేసుకుని ఆయన్ను దూషిస్తే, సాధారణంగా వారిలో ఆయన ఆ పని చెయ్యడు. అలాంటివారు ఎన్నటికీ పశ్చాత్తాపపడరు గనుక ఎన్నటికీ క్షమాపణ పొందరు.

33. చెట్టు మంచిదని యెంచి దాని పండును మంచిదే అని యెంచుడి; లేదా, చెట్టు చెడ్డదని యెంచి దాని పండును చెడ్డదే అని యెంచుడి. చెట్టు దాని పండువలన తెలియబడును.

మత్తయి 7:16 చూడండి. క్రీస్తు చేసే పనులు మంచివైతే ఆయన శీలం, స్వభావం మంచిదని పరిసయ్యులు అర్థం చేసుకోవాలి. ఆయన చేసిన పనులను బట్టి ఆయన్ను నమ్మాలి (యోహాను 5:36; యోహాను 10:37-38).

34. సర్పసంతానమా, మీరు చెడ్డవారైయుండి ఏలాగు మంచి మాటలు పలుకగలరు? హృదయమందు నిండియుండు దానినిబట్టి నోరు మాటలాడును గదా.

మత్తయి 3:7; మత్తయి 23:33 చూడండి. పవిత్రాత్మకు వ్యతిరేకంగా, ఎన్నడూ క్షమాపణకు నోచుకోని పాపం చేసే రకం మనుషులు వీరు. సత్యం పట్లా, వెలుగు పట్లా, క్రీస్తు పట్లా వారి ద్వేషం దేవుని ఆత్మకు వ్యతిరేకంగా వారు బండబారిపోయేలా చేసి వారినలా తయారు చేసింది. ఒక మనిషి హృదయంలో ఉన్నదే చివరికి బయటికి వచ్చి అతడెలాంటివాడో తెలియజేస్తుంది. సామెతలు 4:23 పోల్చి చూడండి. అరుదుగా పెదవి విప్పనివారు కూడా తమను గురించి తాము ఏమనుకుంటున్నారో తమ మాటల ద్వారా కొన్ని సార్లు బయట పెడుతుంటారు.

35. సజ్జనుడు తన మంచి ధననిధిలో నుండి సద్విషయములను తెచ్చును; దుర్జనుడు తన చెడ్డ ధననిధిలోనుండి దుర్విషయములను తెచ్చును.

36. నేను మీతో చెప్పునదేమనగా మనుష్యులు పలుకు వ్యర్థమైన ప్రతి మాటనుగూర్చియు విమర్శదినమున లెక్క చెప్పవలసియుండును.

జాగ్రత్తగా, తూచి తూచి పలికిన మాటల కంటే, అజాగ్రత్తగా పలికిన మాటలే ఒక వ్యక్తి మనసులో ఉన్నదాన్ని బయట పెడతాయి. నాలుక బహు శక్తివంతమైన పరికరం. అది పలికే మాటలకు శాశ్వత ఫలితాలు ఉంటాయి. సామెతలు 18:21; యాకోబు 3:5-6 పోల్చి చూడండి.

37. నీ మాటలనుబట్టి నీతి మంతుడవని తీర్పునొందుదువు, నీ మాటలనుబట్టియే అప రాధివని తీర్పునొందుదువు.

మన మాటలు జాగ్రత్తగా భద్రం చేయడం జరుగుతూ ఉంది. తీర్పు దినాన అవన్నీ తిరిగి మనకు వినిపించబడతాయి. మన మాటలే (వ 36లో చూడండి – “అజాగ్రత్తగా మాట్లాడే ప్రతి మాట” కూడా) మనకు లభించే తీర్పుకు గురౌతాయి. ఎందుకంటే మనం ఏమిటో ఖచ్చితంగా అవి బయట పెడతాయి.

38. అప్పుడు శాస్త్రులలోను పరిసయ్యులలోను కొందరుబోధకుడా, నీవలన ఒక సూచకక్రియ చూడగోరు చున్నామని ఆయనతో చెప్పగా ఆయన ఇట్లనెను.

మార్కు 8:11; లూకా 11:29-32 పోల్చి చూడండి. వినయం, నమ్మకం గల హృదయానికి క్రీస్తు చేసిన అద్భుతాలు ఆయన అభిషిక్తుడనడానికి రుజువులు (మత్తయి 8:1). నమ్మకూడదని పట్టుబట్టి కూర్చున్నవారిని కళ్ళు చెదరగొట్టే అద్భుతాలైనా సరే నమ్మించలేవు. లూకా 16:31 పోల్చి చూడండి.

39. వ్యభిచారులైన చెడ్డ తరమువారు సూచక క్రియను అడుగు చున్నారు. ప్రవక్తయైన యోనానుగూర్చిన సూచక క్రియయే గాని మరి ఏ సూచక క్రియయైనను వారికి అనుగ్రహింపబడదు.

వ్యభిచార సంబంధమైన తరం అంటే ఆధ్యాత్మికంగా దేవునికి ద్రోహం చేసిన తరం. యిర్మియా 2:2; యెహెఙ్కేలు 23:2-3; హోషేయ 1:2 నోట్స్ చూడండి. అలాంటి తరం దేవునిలో, ఆయన వాక్కులో, ఆయన కుమారునిలో నమ్మకం ఉంచడానికి సిద్ధంగా ఉండదు.

40. యోనా మూడు రాత్రింబగళ్లు తివిుంగిలము కడుపులో ఏలాగుండెనో ఆలాగు మనుష్య కుమారుడు మూడు రాత్రింబగళ్లు భూగర్బములో ఉండును.
యోనా 1:17

యూదులు రోజులో ఒక భాగాన్ని కూడా రోజుగా లెక్కించేవారు. యేసు తన మరణం తరువాత మూడో రోజున సజీవంగా లేచాడు (మత్తయి 16:21; మత్తయి 27:64; లూకా 24:7, లూకా 24:21; అపో. కార్యములు 10:40; 1 కోరింథీయులకు 15:4). ఆయన దేవుని కుమారుడు, అభిషిక్తుడు అనడానికి ఆయన సజీవంగా లేవడమే అన్నిటికన్నా గొప్ప సూచకమైన అద్భుతం. మత్తయి 28:6 నోట్ చూడండి. యోనా చరిత్ర పాత ఒడంబడిక గ్రంథంలో “యోనా” పుస్తకంలో ఉంది.

41. నీనెవెవారు యోనా ప్రకటన విని మారు మనస్సు పొందిరి గనుక విమర్శ సమయమున నీనెవెవారు ఈ తరమువారితో నిలువబడి వారిమీద నేరస్థాపన చేతురు. ఇదిగో యోనాకంటె గొప్పవాడు ఇక్కడ ఉన్నాడు.
యోనా 3:5, యోనా 3:8

ఇక్కడ యేసుప్రభువు తనను తాను యోనాకంటే ఘనుడుగా చెప్పుకుంటున్నాడు. యోనా ఎలాంటి అద్భుత క్రియా చెయ్యలేదు. అయినా నీనెవె నగరం పశ్చాత్తాప పడింది. ఇతర జనాలుండే ఆ నగరం దేవునికి తల వంచింది గానీ దేవుని స్వంత ప్రజలైన ఇస్రాయేల్‌వారు అనేకమైన మహత్తులు చూచి కూడా ఆయనకు వ్యతిరేకంగా తమ హృదయాలను కఠినం చేసుకున్నారు. యోనా 1:2 దగ్గర “నీనెవె” గురించి నోట్ చూడండి.

42. విమర్శ సమయమున దక్షిణదేశపురాణి యీ తరము వారితో నిలువబడి వారిమీద నేరస్థాపన చేయును; ఆమె సొలొమోను జ్ఞానము వినుటకు భూమ్యంత ములనుండివచ్చెను; ఇదిగో సొలొమోనుకంటె గొప్పవాడు ఇక్కడ ఉన్నాడు.
1 రాజులు 20:1-10, 2 దినవృత్తాంతములు 9:1-12

1 రాజులు 10:1. ఇస్రాయేల్‌కు దక్షిణాన చాలా దూరంలో ఉంది షేబదేశం. ఈ లోకంలో జీవించిన వారందరిలోకీ మహా జ్ఞాని సొలొమోను (1 రాజులు 3:10-12; 1 రాజులు 4:29-34). అయితే దేవుని కుమారుడైన యేసుప్రభువుతో పోల్చుకుంటే అతని జ్ఞానం ఎందుకూ కొరగానిది.

43. అపవిత్రాత్మ ఒక మనుష్యుని వదలిపోయిన తరువాత అది విశ్రాంతివెదకుచు నీరులేని చోట్ల తిరుగుచుండును.

“మలిన పిశాచం”– మత్తయి 4:24 నోట్ చూడండి. దయ్యాలు ఏదో ఒక దేహంలో చేరి విశ్రాంతి తీసుకోవాలనుకుంటాయి. మత్తయి 8:31 చూడండి.

44. విశ్రాంతి దొరకనందుననేను వదలివచ్చిన నా యింటికి తిరిగి వెళ్లుదుననుకొని వచ్చి, ఆ యింట ఎవరును లేక అది ఊడ్చి అమర్చియుండుటచూచి, వెళ్లి తనకంటె చెడ్డవైన మరి యేడు దయ్యములను వెంటబెట్టుకొని వచ్చును; అవి దానిలో ప్రవేశించి అక్కడనే కాపురముండును.

ఇల్లు అంటే ఆ దయ్యం విడిచిపెట్టి వచ్చిన మనిషి. “శుభ్రంగా ఊడ్చి సర్ది పెట్టి ఉండడం” అంటే దేవునితో నిమిత్తం లేకుండా దిద్దబడిన జీవితం. ఆ ఇంట్లో “ఎవరూ” లేరు. అందులో యేసుప్రభువు లేడు. దేవుని ఆత్మ అక్కడ నివసించడం లేదు.

45. అందుచేత ఆ మనుష్యుని కడపటిస్థితి మొదటిస్థితికంటె చెడ్డదగును. ఆలాగే యీ దుష్టతరమువారికిని సంభవించు ననెను.

దిద్దుబాటు, సంస్కరణ, మతం, స్వచ్ఛమైన నైతిక జీవనం ఇవి మాత్రమే మనిషి స్థితిని భద్రంగా క్షేమంగా చేయలేవు. దేవుని ఆత్మ వారిలో నివసించకపోతే వారు తమ స్వంత ప్రయత్నాల ద్వారా తమను సరిదిద్దుకోజూస్తే ముందున్న స్థితికంటే అధమమైన స్థితిలోకి సైతాను వారిని తీసుకువెళ్ళగలడు. మనలో క్రీస్తు ఉండడం ఒక్కటే మన రక్షణ, క్షేమస్థితికి ఆధారం (కొలొస్సయులకు 1:27; రోమీయులకు 8:9; ప్రకటన గ్రంథం 3:20). ఆ తరం ఇస్రాయేల్‌వారికి యేసు ఈ సత్యాన్ని వర్తింపజేశాడు (మత్తయి 23:35-36). మొత్తంమీద వారి తరాలన్నిటిలోకీ అప్పుడున్న తరమే చెడ్డది. ప్రజలు చాలా మతనిష్ఠ కనపరచుకున్నారు. అంతేగాక వారి పూర్వీకులు చేసిన విగ్రహపూజను వదిలిపెట్టారు. అయితే దేవుని కుమారుడంటే వారికి సైతాను సంబంధమైన ద్వేషం ఉంది. వారు ఆయన్ను నిరాకరించి సిలువ వేశారు. దేవుడు వారిలో లేడు గనుక, సైతానుకు వారి “ఇంటిలో” చొరబడే అవకాశం దొరికింది గనుక వారి స్థితి అలాంటిదయింది. సైతాను తనతోబాటు మరెన్నో పిశాచాలను వెంటబెట్టుకు వచ్చి దానిలో చొరబడ్డాడు.

46. ఆయన జనసమూహములతో ఇంక మాటలాడుచుండగా ఇదిగో ఆయన తల్లియు సహోదరులును ఆయనతో మాటలాడ గోరుచు వెలుపల నిలిచియుండిరి.

యేసుప్రభువును ఆయన పని మాన్పించి ఇంటికి తీసుకుపోవడం వాళ్ళ ఉద్దేశంలా ఉంది. మార్కు 3:21, మార్కు 3:31-32; మార్కు 6:3 చూడండి. ఆ సమయానికి ఆయన తమ్ముళ్ళకు ఆయనే అభిషిక్తుడన్న నమ్మకం కలగలేదు (యోహాను 7:5). ఆయన తల్లి మరియ కూడా తాత్కాలికంగా ఆయన్ను శంకించినట్టు ఇక్కడ కనిపిస్తున్నది.

47. అప్పుడొకడు ఇదిగో నీ తల్లియు నీ సహోదరులును నీతో మాటలాడ వలెనని వెలుపల నిలిచియున్నారని ఆయనతో చెప్పెను.

48. అందుకాయన తనతో ఈ సంగతి చెప్పినవానిచూచి నా తల్లి యెవరు? నా సహోదరు లెవరు? అని చెప్పి

49. తన శిష్యులవైపు చెయ్యి చాపి ఇదిగో నా తల్లియు నా సహోదరులును;

ఆధ్యాత్మిక సంబంధాలు కుటుంబ సంబంధాలకంటే ఎక్కువ ప్రియమైనవి, ప్రధానమైనవి అని ఆయన మాటల్లో భావం. తనను అనుసరించే వారి విషయంలో ఇది నిజం కావాలని ఆయన చెప్పాడు (మత్తయి 10:37 చూడండి). ఆయన జీవితంలో ఇది సంపూర్ణంగా నిజమైంది. మనం ఆయన ఇష్టప్రకారం చేసేవారమైతే ఆయన మనల్ని కూడా తన తల్లిగా తోబుట్టువులుగా ఎంచుతాడు. ఆయన శిష్యులే ఆయన కుటుంబం. హెబ్రీయులకు 2:11-12 చూడండి.

50. పరలోకమందున్న నా తండ్రి చిత్తము చొప్పున చేయువాడే నా సహోదరుడును, నా సహోదరియు, నాతల్లియు ననెను.