1. తరువాత ఆయన దోనె యెక్కి సముద్రము దాటి తన పట్టణములో ప్రవేశింపగా

సొంత పట్టణం అంటే కపర్నెహూం. గలలీలో తన పరిచర్య నిమిత్తం ఆయన మకాం చేసిన ఊరు.

2. ఇదిగో జనులు పక్ష వాయువుతో మంచముపట్టియున్న యొకని ఆయన యొద్దకు తీసికొనివచ్చిరి. యేసు వారి విశ్వాసముచూచి కుమారుడా ధైర్యముగా ఉండుము, నీ పాపములు క్షమింపబడియున్నవని పక్షవాయువు గల వానితో చెప్పెను.

పక్షవాత రోగి విశ్వాసం మాత్రమే కాదు, అతణ్ణి తీసుకువచ్చిన వారి విశ్వాసాన్నీ యేసు చూచినట్టు రాసి ఉంది, గమనించండి. ఇతరులను క్రీస్తు చెంతకు తేవడంలో నమ్మకం ఎలా ఉపయోగపడుతుందో ఈ ఉదాహరణవల్ల తెలుస్తున్నది. ఈ మనిషి శారీరకంగా బాగుపడాలని కోరాడు. అంతకన్నా మరెంతో ఎక్కువ అతనికి లభించింది.

3. ఇదిగో శాస్త్రులలో కొందరు ఇతడు దేవ దూషణ చేయుచున్నాడని తమలోతాము అనుకొనగా

పాపాలను క్షమించగలిగేది దేవుడొక్కడే అని వారికి తెలుసు (యెషయా 43:25; యెషయా 44:22). ఏ ప్రవక్తకూ ఎన్నడూ ఈ అధికారం లేదు. అయితే ఆ ధర్మశాస్త్ర పండితులకు యేసు దేవుని అవతారమని తెలియదు. అందువల్ల ఆయన మాటలను దేవదూషణగా ఎంచారు. దేవదూషణ అంటే దేవునికి వ్యతిరేకంగా మాట్లాడ్డం, ఆయన పేరును వ్యర్థంగా పలకడం, ఆయన దుష్టత్వం జరిగించాడనడం లేక దేవునికి మాత్రమే చెందినవి (అంటే దేవుని స్వభావం, అధికారం, హక్కులు, ప్రభావం మొదలైనవి) తనవి అని చెప్పుకోవడం. లేవీయకాండము 24:14-16 చూడండి.

4. యేసు వారి తలంపులు గ్రహించి మీరెందుకు మీ హృదయములలో దురాలోచనలు చేయుచున్నారు?

యేసు శరీరిగా ఉన్న దేవుడు గనుక మనుషుల తలంపులు ఆయనకు తెలుసు. మత్తయి 12:25; లూకా 6:8; లూకా 9:47; యోహాను 2:25; కీర్తనల గ్రంథము 94:11; హెబ్రీయులకు 4:12-13; ప్రకటన గ్రంథం 2:23; 1 సమూయేలు 16:7; 1 రాజులు 8:39; 1 దినవృత్తాంతములు 28:9; 2 దినవృత్తాంతములు 6:30; యిర్మియా 17:10; యెహెఙ్కేలు 11:5; సామెతలు 15:11; అపో. కార్యములు 1:24 చూడండి.

5. నీ పాపములు క్షమింపబడియున్నవని చెప్పుట సులభమా, లేచి నడువుమని చెప్పుట సులభమా?

వ్యాధుల్ని పూర్తిగా నయం చేయడానికి దేవునికి ఉన్న శక్తిని తాను ప్రదర్శించడం ద్వారా పాపాలను క్షమించే దేవుని అధికారం కూడా తనకున్నదని యేసు నిరూపించాడు. రోగాన్ని నయం చేసిన ఈ అద్భుతం ఆత్మ సంబంధంగా నయం చేయడానికి దృష్టాంతంగా, సూచనగా ఉంది. ఇక్కడ క్షమాపణ వెనువెంటనే, కేవలం కృపద్వారా సమకూడింది, నిస్సహాయుడైన మనిషికి ఇది దేవుడు ఉచితంగా ఇచ్చినది (అపో. కార్యములు 13:38-39; రోమీయులకు 4:7-8; ఎఫెసీయులకు 1:7; కొలొస్సయులకు 1:14; కొలొస్సయులకు 2:13; హెబ్రీయులకు 8:12; 1 యోహాను 1:9 పోల్చి చూడండి). మనుషులైతే తమకు విరోధంగా చేసిన తప్పిదాలను క్షమించవచ్చు (మత్తయి 6:14-15), గానీ దేవునికి వ్యతిరేకంగా చేసిన పాపాలను దేవుడు మాత్రమే క్షమించగలడు. అసలు పరిశీలించి చూస్తే పాపం అన్నది అంతా దేవునికి వ్యతిరేకమే (కీర్తనల గ్రంథము 51:4). హృదయంలో పశ్చాత్తాపం, నమ్మకం ఉన్నప్పుడే, పాపాలకు సంపూర్ణ క్షమాపణ కలుగుతుంది. అవి ఉన్నాయో లేదో దేవుడు మాత్రమే చూడగలడు. యేసుకు మనిషి అంతరంగ స్థితి చక్కగా కనిపిస్తుంది. గనుక ఆయన అతణ్ణి క్షమించినట్లు ప్రకటించ గలిగాడు. అసలు ఆయన వచ్చినదే దేవుని క్షమాపణ మనుషుల అందుబాటులోకి తేవాలని (లూకా 24:46-47; అపో. కార్యములు 13:38-39). ఎప్పుడైనా ఎక్కడైనా ఎవరైనా విశ్వాసంతో ఆయనవైపుకు తిరిగితే ఆ వ్యక్తి పాపాలన్నిటికీ క్షమాపణ దొరుకుతుంది (మత్తయి 12:31). మనుషులు తమకు స్వస్థత, మొదలైనవి కలగాలని ఆశించినంత ఆత్రుతగా తమ పాపాలకు క్షమాపణ కలగాలని ఆశిస్తే ఈ లోకం ఇప్పటికన్నా మరెంతో భిన్నమైనదిగా ఉంటుంది.

6. అయినను పాపములు క్షమించుటకు భూమిమీద మనుష్యకుమారునికి అధికారము కలదని మీరు తెలిసికొనవలెను అని చెప్పి, ఆయన పక్షవాయువుగలవాని చూచినీవు లేచి నీ మంచ మెత్తికొని నీ యింటికి పొమ్మని చెప్పగా
యెషయా 63:1

7. వాడు లేచి తన యింటికి వెళ్లెను.

8. జనులు అది చూచి భయపడి, మనుష్యులకిట్టి అధికారమిచ్చిన దేవుని మహిమపరచిరి.

యేసు కేవలం మానవ మాత్రుడు కాదని ఆ జనసమూహం అర్థం చేసుకోలేదు.

9. యేసు అక్కడనుండి వెళ్లుచు సుంకపు మెట్టునొద్ద కూర్చుండియున్న మత్తయి అను ఒక మనుష్యుని చూచినన్ను వెంబడించుమని అతనితో చెప్పగా అతడు లేచి ఆయనను వెంబడించెను.

మత్తయి 4:18-22 పోల్చి చూడండి. మార్కు 2:14; లూకా 5:27-28 కూడా చూడండి. అక్కడ మత్తయికి లేవి అనే పేరు కూడా ఉన్నట్టు చూస్తాం. అతని ఉద్యోగం యూదులకు అసహ్యకరమైనది. అధికారంలో ఉన్న రోమ్ ప్రభుత్వం క్రింద పని చేసే ఉద్యోగం అది (మత్తయి 5:46). అయితే ఇతడు క్రీస్తుకు గొప్ప రాయబారి అయ్యాడు. ఇతడి పేరు ఉన్న ఈ శుభవార్త పుస్తకాన్ని రచించాడు. దేవుని కృప ఇలాంటిది.

10. ఇంటిలో భోజనమునకు యేసు కూర్చుండియుండగా ఇదిగో సుంకరులును పాపులును అనేకులు వచ్చి ఆయనయొద్దను ఆయన శిష్యులయొద్దను కూర్చుండిరి.

11. పరిసయ్యులు అది చూచి మీ బోధకుడు సుంకరులతోను పాపులతోను కలిసి యెందుకు భోజనము చేయుచున్నాడని ఆయన శిష్యులనడిగిరి.

“పరిసయ్యులు”– మత్తయి 3:7. ఇక్కడ మరో సారి తాము ఇతరులకన్న మంచివాళ్ళం అనుకున్నట్టు వీరు ప్రవర్తిస్తున్నారు. పవిత్రుడైన ఒక వ్యక్తి “పాపులతో” ఉండాలని ఎందుకు అనుకుంటున్నాడో వారి ఊహక్కూడా అందదు. అంతేగాక, వారి అపనమ్మకం, స్వనీతి వల్ల వారు ఎవరినైతే పాపులని పిలుస్తున్నారో వారికంటే తమ విషయంలోనే యేసుకు ఎక్కువ అభ్యంతరం ఉందని గ్రహించలేకపోయారు.

12. ఆయన ఆ మాటవిని రోగులకేగాని ఆరోగ్యము గలవారికి వైద్యుడక్కరలేదు గదా.

ఎంత చక్కని జవాబు! పాపులందరూ ఆత్మ సంబంధంగా రోగులేననీ అలాంటివారిని బాగుచేసేందుకు తాను వచ్చాననీ యేసు ఇచ్చిన జవాబులోని ఉద్దేశం. రోగులకు సహాయపడేందుకు వైద్యుడు వారితో ఉండడం ఎలా అవసరమో అలానే పాపులను బాగు చేసేందుకు యేసు కూడా వారితో ఉండాలి. అంతేగాని వారి మధ్య ఉండడం ఆయనకు ఆనందం కలిగించేదని గానీ, వారిలాగా ఆయన ప్రవర్తించదలచాడని కాదు.

13. అయితే నేను పాపులను పిలువ వచ్చితిని గాని నీతిమంతులను పిలువ రాలేదు. గనుక కనికరమునే కోరుచున్నాను గాని బలిని కోరను అను వాక్య భావమేమిటో మీరు వెళ్లి నేర్చుకొనుడని చెప్పెను.
హోషేయ 6:6

యేసు హోషేయ 6:6 గురించి చెప్తున్నాడు. దేవుడు తాను కరుణ చూపేవాడైనట్టుగానే మనుషులు కూడా కరుణ చూపాలని కోరుతున్నాడు. మతాచారాలకంటే ఇది ఎంతో ప్రాముఖ్యం. మత్తయి 5:7 కూడా చూడండి. ఈ వచనంలో “న్యాయవంతులు” అంటే తాము న్యాయవంతులం, ఇతరుల కన్నా పవిత్రులం అని ఎంచుకునేవారు అని భావం. నిజానికి అందరూ పాపులే (రోమీయులకు 3:23). అయితే మనుషులు అర్థం చేసుకోవలసిన రీతిలో దీన్ని ఇంకా అర్థం చేసుకోలేదు. క్షమాపణ, పాపవిముక్తి, రక్షణ పాందాలని పాపులను పిలవడానికి యేసు వచ్చాడు (లూకా 19:10; యోహాను 3:17; 1 తిమోతికి 1:15).

14. అప్పుడు యోహాను శిష్యులు ఆయనయొద్దకు వచ్చిపరిసయ్యులును, మేమును తరచుగా ఉపవాసము చేయు చున్నాము గాని నీ శిష్యులు ఉపవాసము చేయరు; దీనికి హేతువేమని ఆయనను అడుగగా

“యోహాను శిష్యులు”– మత్తయి 3:1; యోహాను 3:23-25.

15. యేసుపెండ్లి కుమారుడు తమతోకూడ నుండు కాలమున పెండ్లియింటి వారు దుఃఖపడగలరా? పెండ్లికుమారుడు వారియొద్దనుండి కొనిపోబడు దినములు వచ్చును, అప్పుడు వారు ఉప వాసము చేతురు.

ఇక్కడ యేసుప్రభువు తనకు తాను పెట్టుకున్న పేరును చూడండి. యోహాను 3:28-30; రోమీయులకు 7:4; 2 కోరింథీయులకు 11:2; ఎఫెసీయులకు 5:25-33. తన సంఘానికీ, విశ్వాసికీ ఆయన ఆధ్యాత్మిక వరుడు. పరమ గీతం గ్రంథంపై నోట్స్ చూడండి. కీర్తన 45 పోల్చి చూడండి. ఉపవాసం ఉండడంలో గల ఉపయోగాన్ని యేసు కాదనడం లేదు (మత్తయి 6:16). తాను వెళ్ళిపోయిన తరువాత తన శిష్యులు ఉపవాసం ఉంటారు (లూకా 24:51).

16. ఎవడును పాత బట్టకు క్రొత్తబట్ట మాసిక వేయడు; వేసినయెడల ఆ మాసిక బట్టను వెలితిపరచును చినుగు మరి ఎక్కువగును.

భూమిపై ఒక కొత్త విషయాన్ని చేసేందుకు యేసుప్రభువు వచ్చాడు. అంటే నీతిన్యాయాలు అనే ఒక నూతన వస్త్రాన్ని, ఆనందమనే కొత్త ద్రాక్షరసాన్ని ఇచ్చేందుకు వచ్చాడు. ఆయన చేసే ఈ కొత్త పనికి పాత యూద మతాచారాలూ, తీరులూ తగినవి కావు. యేసు తీసుకువచ్చిన కొత్త సత్యం, జీవితం అందులో ఇమడలేకపోయాయి. పురాతన ధర్మం, ప్రాచీన ఇతిహాసాల కంటే సత్యమే ప్రాముఖ్యమైనది.

17. మరియు పాత తిత్తు లలో క్రొత్త ద్రాక్షారసము పోయరు; పోసినయెడల తిత్తులు పిగిలి, ద్రాక్షారసము కారిపోవును, తిత్తులు పాడగును. అయితే క్రొత్త ద్రాక్షారసము క్రొత్త తిత్తులలో పోయుదురు, అప్పుడు ఆ రెండును చెడిపోక యుండునని చెప్పెను.

18. ఆయన ఈ మాటలు వారితో చెప్పుచుండగా, ఇదిగో ఒక అధికారి వచ్చి ఆయనకు మ్రొక్కినా కుమార్తె యిప్పుడే చనిపోయినది, అయినను నీవు వచ్చి నీ చెయ్యి ఆమెమీద ఉంచుము, ఆమె బ్రదుకుననెను.

ఈ అధికారి ఒక యూద సమాజ కేంద్ర నాయకుడు. ఇతడి పేరు యాయీరు (మార్కు 5:22-43; లూకా 8:41-56).

19. యేసు లేచి అతని వెంట వెళ్లెను; ఆయన శిష్యులు కూడ వెళ్లిరి.

20. ఆ సమయమున, ఇదిగో పండ్రెండు సంవత్సరములనుండి రక్తస్రావ రోగముగల యొక స్త్రీ
లేవీయకాండము 15:25

ఈ వ్యాధి ఈ స్త్రీని “అశుద్ధంగా” చేసింది. లేవీయకాండము 15:25-27 నోట్ చూడండి. పాత ఒడంబడిక కాలంలో ఇది పాపానికి చెప్పిన చిహ్నాల్లో, సాదృశ్యాల్లో ఒకటి.

21. నేను ఆయన పై వస్త్రము మాత్రము ముట్టితే బాగుపడుదునని తనలో తాను అనుకొని, ఆయన వెనుకకు వచ్చి ఆయన వస్త్రపు చెంగు ముట్టెను.

22. యేసు వెనుకకు తిరిగి ఆమెను చూచి కుమారీ, ధైర్యముగా ఉండుము, నీ విశ్వాసము నిన్ను బాగుపరచెనని చెప్పగా ఆ గడియనుండి ఆ స్త్రీ బాగు పడెను.

నమ్మకంలోని ప్రభావం చూడండి. నమ్మకం అంటే దేవుడు బైబిలులో వెల్లడి చేసిన తన మాట, తన స్వభావం ప్రకారం చేస్తాడని విశ్వసించడం, వ్యక్తిగా ఆయనపై కలిగిన నిబ్బరం. హెబ్రీయులకు 11:1, హెబ్రీయులకు 11:6 చూడండి. నమ్మకం బాగు చేసేవాడి సన్నిధిలోకి మనల్ని తెస్తుంది, ఆయన ఆ పని చేసేందుకు మార్గం తెరుస్తుంది కాబట్టే నమ్మకం అనేది మనల్ని బాగు చేస్తుంది, రక్షిస్తుంది.

23. అంతలో యేసు ఆ అధికారి యింటికి వచ్చి, పిల్లన గ్రోవులు వాయించు వారిని, గొల్లు చేయుచుండు జనసమూహమును చూచి

ఈ వాయిద్యగాళ్ళను ఇలాంటి సందర్భాల్లో సంగీతం వినిపించేందుకు యూదులు డబ్బిచ్చి పిలిపించేవారు.

24. స్థలమియ్యుడి; ఈ చిన్నది నిద్రించుచున్నదేగాని చనిపోలేదని వారితో చెప్పగా వారాయనను అపహసించిరి.

“నిద్రపోతూ ఉంది”– ఆ అమ్మాయి చనిపోయింది. అయితే ఆమె శాశ్వతంగా చనిపోయిన స్థితిలో లేదని యేసు ఉద్దేశం. దేవుని ప్రజల శారీరక మరణాన్ని సూచిస్తూ పాత, క్రొత్త ఒడంబడిక గ్రంథాల్లో తరచుగా వాడిన మాట “నిద్రపోవడం” (యోహాను 11:11-14 నోట్స్ చూడండి). తాత్కాలిక మరణ స్థితినుంచి వారు మేల్కొని తిరిగి లేస్తారని ఇందులోని ఉద్దేశం – 1 థెస్సలొనీకయులకు 4:13-18.

25. జనసమూహమును పంపివేసి, ఆయన లోపలికి వెళ్లి ఆమె చెయ్యి పట్టుకొనగానే ఆ చిన్నది లేచెను.

ఎగతాళి చేసిన జనం ఆయన కార్యంలోని మహిమను చూడకూడదు. యేసు చనిపోయినవారిని తిరిగి లేపిన మూడు సందర్భాల్లో ఇది ఒకటి. మిగతా రెండూ లూకా 7:15; యోహాను 11:43-44 లో ఉన్నాయి. అయితే ఇవిగాక వేరే సందర్భాలు కొన్ని ఉన్నాయి అనిపిస్తుంది (మత్తయి 11:4-5).

26. ఈ సమాచారము ఆ దేశమంతటను వ్యాపించెను.

27. యేసు అక్కడనుండి వెళ్లుచుండగా ఇద్దరు గ్రుడ్డివారు ఆయన వెంట వచ్చి దావీదు కుమారుడా, మమ్మును కనికరించుమని కేకలువేసిరి.

“దావీదు కుమారా”– మత్తయి 1:1. ఇస్రాయేల్‌వారి అభిషిక్తుడికి ఉపయోగించే పేరు ఇది. యేసు అభిషిక్తుడేనన్న తమ నమ్మకాన్ని ఈ గుడ్డివారు బయట పెడుతున్నారు.

28. ఆయన యింట ప్రవేశించిన తరువాత ఆ గ్రుడ్డివారు ఆయనయొద్దకు వచ్చిరి. యేసు నేను ఇది చేయగలనని మీరు నమ్ముచున్నారా? అని వారి నడుగగా

మరో సారి నమ్మకం ప్రాముఖ్యత వెల్లడైంది. దీనికీ మార్కు 6:5-6 కూ ఉన్న తేడా చూడండి.

29. వారునమ్ముచున్నాము ప్రభువా అని ఆయనతో చెప్పిరి. అప్పుడాయన వారి కన్నులు ముట్టి మీ నమ్మికచొప్పున మీకు కలుగుగాక అని చెప్పినంతలో వారి కన్నులు తెరువబడెను.

మనుషులమధ్య తన పనిలో ప్రభువు అనుసరించిన నియమాల్లో ఇది ఒకటి (వ 22; మార్కు 11:22-24; హెబ్రీయులకు 11:6; యోహాను 5:14-15).

30. అప్పుడు యేసు ఇది ఎవరికిని తెలియకుండ చూచుకొనుడని వారికి ఖండితముగా ఆజ్ఞాపించెను.

యేసు పేరు ప్రఖ్యాతులను ఆశించకపోవడం (మత్తయి 8:4), తన అద్భుతాల మూలంగా ఎలాంటి లాభాన్ని ఆశించకపోవడం మరో సారి కనబడుతున్నది. ఇతరులకు ఆయన నేర్పినదాన్ని కూడా మత్తయి 6:1-4 లో చూడండి.

31. అయినను వారు వెళ్లి ఆ దేశమంతట ఆయన కీర్తి ప్రచురముచేసిరి.

ఇది అనేకమంది విషయంలో నిజం. వారు యేసుప్రభువు కోరేది గాక తాము కోరినదే చేస్తారు.

32. యేసును ఆయన శిష్యులును వెళ్లుచుండగా కొందరు, దయ్యముపట్టిన యొక మూగవాని ఆయనయొద్దకు తీసికొని వచ్చిరి.

దయ్యం పట్టడం ఒక్కొక్కరిపై ఒక్కొక్క విధంగా ప్రభావం చూపుతుంది. మత్తయి 8:28-32; మత్తయి 12:22 పోల్చి చూడండి. అలాగని ప్రతి మూగవాడూ, గుడ్డివాడూ, మూర్ఛవ్యాధి ఉన్నవాడూ దయ్యం పట్టినవాడని అనుకోరాదు. ఇలాంటి వ్యాధులకు సహజ కారణాలు కూడా ఉంటాయి.

33. దయ్యము వెళ్లగొట్టబడిన తరువాత ఆ మూగ వాడు మాటలాడగా జనసమూహములు ఆశ్చర్యపడి ఇశ్రాయేలులో ఈలాగు ఎన్నడును కనబడలేదని చెప్పుకొనిరి.

“ఎన్నడూ కనిపించలేదు”– ఇస్రాయేల్ ప్రాంతమే కాక అన్ని దేశాల్లోనూ, ఏ కాలంలో కూడా ఇలాంటిది కనిపించలేదు. ప్రపంచ చరిత్రలోనే యేసుప్రభువు, ఆయన రాయబారులు వ్యాధుల్ని నయం చేసిన విషయం సాటి లేనిది, అద్వితీయమైనది.

34. అయితే పరిసయ్యులు ఇతడు దయ్యముల అధిపతివలన దయ్యములను వెళ్లగొట్టుచున్నాడని చెప్పిరి.

ఈ పరిసయ్యులు ఈ విధంగా నమ్మశక్యం కాని హృదయ కాఠిన్యం, అపనమ్మకం ప్రదర్శించి, క్షమాపణకు అందనంత దూరం అయిపోతున్నారు. మత్తయి 12:24-32 చూడండి. “దయ్యాల నాయకుడు” అంటే సైతాను.

35. యేసు వారి సమాజమందిరములలో బోధించుచు రాజ్య సువార్త ప్రకటించుచు, ప్రతివిధమైన రోగమును ప్రతి విధమైన వ్యాధిని స్వస్థపరచుచు, సమస్త పట్టణముల యందును గ్రామములయందును సంచారము చేసెను.

యేసుప్రభువు పరిచర్య అంతా క్లుప్తంగా టూకీగా ఇదే. మత్తయి 4:23-24 చూడండి.

36. ఆయన సమూహములను చూచి, వారు కాపరిలేని గొఱ్ఱెల వలె విసికి చెదరియున్నందున వారిమీద కనికరపడి
సంఖ్యాకాండము 27:17, 1 రాజులు 22:17, 2 దినవృత్తాంతములు 18:16, యెహెఙ్కేలు 34:5, జెకర్యా 10:2

యేసు తాను చేసినదాన్ని ఎందుకు చేశాడో ఆ కారణం ఇక్కడ కనిపిస్తున్నది. ఆయన దిక్కులేనివారిపై వారి అవసరంలో జాలి, ప్రేమ, దయ కలిగి ఉన్నాయి (మత్తయి 14:14; మత్తయి 15:32; మత్తయి 20:34; మార్కు 1:41; మార్కు 6:34; లూకా 7:13; హెబ్రీయులకు 4:15). దేవుని ప్రజలకు కాపరులుగా ఉండవలసిన మత నాయకులు ఇస్రాయేల్‌లో ఉన్నారు. అయితే వారు దొంగల్లాగా, దోపిడీగాళ్ళలాగా ఉన్నారు (యోహాను 10:1, యోహాను 10:7, యోహాను 10:11-13). యూదులే కాక ఇతర ప్రజల్లో, క్రైస్తవుల్లో కూడా ఈ నాటికీ తరచుగా ఇలానే జరుగుతున్నది.

37. కోత విస్తారమేగాని పనివారు కొద్దిగా ఉన్నారు

యోహాను 4:35-38 పోల్చిచూడండి. దేవునికి సేవ చేసేవారికి ఘనమైన శాశ్వతమైన బహుమతులు ఉంటాయి. కానీ మొత్తం మీద కొద్దిమంది మాత్రమే ఆ పనికి సిద్ధమౌతారు.

38. గనుక తన కోతకు పనివారిని పంపుమని కోత యజమానుని వేడు కొనుడని తన శిష్యులతో చెప్పెను.

ఇక్కడ ప్రార్థనలో ఉన్న నిగూఢ ప్రభావం కొంత అర్థం అవుతున్నది. యేసు వారికి (మనకు కూడా) ప్రార్థన చెయ్యాలని ఎందుకు చెప్పాడు? తన ప్రజలు ప్రార్థించకపోతే కోత యజమాని అయిన దేవుడు తన పొలంలోకి కోతపనివారిని పంపడా? ఈ ప్రశ్న సహజంగా మనసులో తలెత్తవచ్చు. అయితే ఇది మనం అడగవలసిన ప్రశ్న కాదు. ప్రభువు చెప్పినట్టు చేసి ఈ రహస్యాన్ని ఆయనకే వదిలెయ్యడం వరకే మన పని. తన పనిలో తన ప్రజలు భాగం పంచుకోవడానికి దేవుడు ఏర్పరచిన విధానాల్లో ప్రార్థన ఒకటి. ఈ విధానాన్ని మనమూ ఉపయోగించుకుందాం.