1. ఆయన సంచరించుచు యెరికో పట్టణములో ప్రవే శించి

లూకా 18:35 చూడండి. ఇది కొత్త యెరికోపట్టణం.

2. దానిగుండా పోవుచుండెను. ఇదిగో సుంకపు గుత్తదారుడును ధనవంతుడునైన జక్కయ్య అను పేరుగల ఒకడు

“సుంకంవాడు”– మత్తయి 5:46.

3. యేసు ఎవరోయని చూడగోరెనుగాని, పొట్టి వాడైనందున జనులు గుంపుకూడి యుండుట వలన చూడ లేకపోయెను.

4. అప్పుడు యేసు ఆ త్రోవను రానై యుండెను గనుక అతడు ముందుగా పరుగెత్తి, ఆయనను చూచుటకు ఒక మేడి చెట్టెక్కెను.

ఒక ధనవంతుడు ప్రవర్తించవలసిన పద్ధతి ఇది కాదని చాలమంది అనుకోవచ్చు. అయితే యేసుప్రభువును చూడాలని అతడెంత ఆత్రుతగా ఉన్నాడో, ఇతరుల అభిప్రాయాన్ని ఎంత తేలికగా కొట్టిపారేశాడో ఇది తెలియజేస్తున్నది.

5. యేసు ఆ చోటికి వచ్చినప్పుడు, కన్నులెత్తి చూచి జక్కయ్యా త్వరగా దిగుము, నేడు నేను నీ యింట నుండవలసియున్నదని అతనితో చెప్పగా

జక్కయ్య ఎక్కడున్నాడో ప్రభువుకు తెలుసు. అతణ్ణి ఇంతకు ముందెన్నడూ కలుసుకోనప్పటికీ అతణ్ణి గురించి అంతా తెలుసు (యోహాను 1:48-50; యోహాను 2:24-25 మొ।। చూడండి). జక్కయ్య పాపంలో దారితప్పాడనీ, సత్యానికీ సుముఖంగానే ఉన్నాడనీ తెలుసు. తన పరిచర్య ఉద్ధేశమేమిటో కూడా యేసుప్రభువుకు తెలుసు (వ 10). జక్కయ్య ఇంటికి వెళ్ళాలని యేసులో ప్రేరణ కలిగింది. అది దైవప్రేమ మూలమైన ప్రేరణ. యోహాను 4:4 చూడండి. 2 కోరింథీయులకు 5:14 పోల్చి చూడండి.

6. అతడు త్వరగా దిగి సంతోషముతో ఆయనను చేర్చుకొనెను.

ఇస్రాయేల్‌వారి మతనాయకులు, ఇంకా అనేకమంది చెయ్యని పనుల్లో ఇదొకటి.

7. అందరు అది చూచి ఈయన పాపియైన మనుష్యునియొద్ద బసచేయ వెళ్లెనని చాల సణుగుకొనిరి.

లూకా 18:9; లూకా 15:1-2; మత్తయి 9:10-13; మత్తయి 11:19.

8. జక్కయ్య నిలువబడి ఇదిగో ప్రభువా, నా ఆస్తిలో సగము బీదలకిచ్చుచున్నాను; నేనెవనియొద్ద నైనను అన్యాయముగా దేనినైనను తీసికొనినయెడల అతనికి నాలుగంతలు మరల చెల్లింతునని ప్రభువుతో చెప్పెను.
నిర్గమకాండము 22:1

ఆ రోజున జక్కయ్య ఒక కొత్త యజమానిని కోరుకుని ఆయన్ను “ప్రభూ” అని పిలుస్తున్నాడు. అప్పటిదాకా డబ్బే అతని యజమాని (లూకా 16:13). దేవుని రాజ్యంలో ప్రవేశించిన కొద్దిమంది ధనికుల్లో ఇతనొకడు (లూకా 18:24-25). ఇతనికీ లూకా 12:16 లోను; లూకా 16:19 లోను ఉన్న ధనవంతులకూ గొప్ప అంతరం ఉంది. అంతేగాక లూకా 18:23 లో ధనిక యువకుడికీ జక్కయ్యకూ తేడా ఉంది. అయితే జక్కయ్య కేవలం యేసును ప్రభూ అని పిలిచినంత మాత్రాన దేవుని రాజ్యంలోకి ప్రవేశించలేదు (మత్తయి 7:21). తన చర్యల ద్వారా ఆయనలో తనకు నిజమైన నమ్మకం ఉందని వెల్లడి చేశాడు. ఇతరులు చాలమంది చేయడానికి ఇష్టపడనిదాన్ని జక్కయ్య చేసేందుకు సమ్మతించాడు (లూకా 16:14; మత్తయి 19:21-24). అతని హృదయంలో జరిగిన దేవుని పనిని ఇది చూపుతున్నది. “మళ్ళీ చెల్లిస్తాను”– లేవీయకాండము 6:1-5; సంఖ్యాకాండము 5:5-7. ధర్మశాస్త్రం విధించిన దానికన్నా ఎక్కువే తిరిగి చెల్లించడానికి జక్కయ్య సిద్ధపడ్డాడు. ఇందులో పశ్చాత్తాపానికి తగిన ఫలాలను అతడు చూపిస్తున్నాడు (మత్తయి 3:8 నోట్‌).

9. అందుకు యేసు ఇతడును అబ్రాహాము కుమారుడే; ఎందుకనగా నేడు ఈ యింటికి రక్షణ వచ్చియున్నది.

ఒక మనిషిలో పరివర్తన, అంటే పాపంనుండి పాపవిముక్తికి, మరణం నుండి జీవానికి అతన్ని తీసుకువచ్చే గొప్ప మార్పు రెప్పపాటు కాలంలో జరిగిపోయిన సంగతి గమనించండి. (యోహాను 5:24). పాపవిముక్తి గురించి నోట్ అపో. కార్యములు 4:12; రోమీయులకు 1:16 చూడండి. జక్కయ్య అబ్రాహాము సంతానమని చెప్పడంలో అతడు కేవలం అబ్రాహాము వంశంలో పుట్టాడని మాత్రమే గాక క్రీస్తులో నమ్మకం ఉంచే వారందరికీ తండ్రి అయిన అబ్రాహాము నిజమైన సంతానం అని యేసు ఉద్దేశం ఆదికాండము 15:6; రోమీయులకు 4:11; రోమీయులకు 4:16.

10. నశించినదానిని వెదకి రక్షించుటకు మనుష్యకుమారుడు వచ్చెనని అతనితో చెప్పెను.
యెహెఙ్కేలు 34:16

“నశించినదానిని”– లూకా 15:4-10, లూకా 15:32. “మానవ పుత్రుడు”– మత్తయి 8:20 నోట్. తాను ఈ లోకానికి రావడంలో గల ముఖ్యోద్దేశాల్లో ఒకదాన్ని చెప్తున్నాడు (యోహాను 3:16-17). మత్తయి 5:17 రిఫరెన్సులు కూడా చూడండి.

11. వారు ఈ మాటలు వినుచుండగా తాను యెరూషలేమునకు సమీపమున ఉండుటవలనను, దేవుని రాజ్యము వెంటనే అగుపడునని వారు తలంచుటవలనను, ఆయన మరియొక ఉపమానము చెప్పెను. ఏమనగా,

ఈ ఉదాహరణకు మత్తయి 25:14-30 లో ఉన్నదానితో కొన్ని పోలికలున్నాయి. అయితే కొన్ని తేడాలు కూడా ఉన్నాయి. ఈ రెంటినీ వేరువేరు చోట్ల, వేరువేరు సమయాల్లో చెప్పాడు యేసు. “దేవుని రాజ్యం”– మత్తయి 4:17. యేసుప్రభువు తాను అభిషిక్తుణ్ణని ఇస్రాయేల్‌వారి రాజునని బహిరంగంగా ప్రకటించుకొని, రోమ్ ప్రభుత్వ కాడి తీసేసి, ఇస్రాయేల్‌కు తిరిగి రాజ్యాధికారాన్ని, ఘనతనూ కట్టబెడతాడని ప్రజలు భావించారు. ఇలాంటిది ఆ సమయంలో జరగదని యేసు అంటున్నాడు. తాను వెళ్ళి పోవాలి (వ 12), ఇస్రాయేల్ వారు తనను రాజుగా అంగీకరించరు (వ 14). అయితే ఆయన తిరిగి వస్తాడు (వ 15), ఈ లోగా ఆయన సేవకులు చెయ్యవలసిన పని ఉంది (వ 13).

12. రాజ కుమారుడొక రాజ్యము సంపాదించుకొని మరల రావలె నని దూరదేశమునకు ప్రయాణమై

యేసుప్రభువు నిజంగా గొప్ప వంశానికి చెందినవాడే. లూకా 1:35; మత్తయి 1:1 చూడండి. ఈ మనిషి రాజుగా నియమించబడిన పద్ధతి ఆ కాలంలో యూదయలో మామూలుగా జరిగేదే. హేరోదు రాజవంశం వారు రోమ్‌కు వెళ్ళి అక్కడ తమ అధికారాన్ని పొంది తిరిగి వచ్చేవారు. యేసుప్రభువు అధికారం రోమ్ నుండి కలగలేదు. పరలోకంనుంచే కలిగింది (మత్తయి 28:18; యోహాను 17:2; అపో. కార్యములు 2:33-36; ఫిలిప్పీయులకు 2:9-11; 1 పేతురు 3:22). ఆయన ఇంకా తిరిగి రావలసి ఉంది. గాని సరైన సమయంలో ఆయన వస్తాడు (మత్తయి 16:27; అపో. కార్యములు 1:11).

13. తన దాసులను పది మందిని పిలిచి వారికి పది మినాల నిచ్చి నేను వచ్చు వరకు వ్యాపారము చేయుడని వారితో చెప్పెను.

“దాసులు”– వీరు క్రీస్తు సేవకులని పిలువబడిన వారందరికీ (రోమీయులకు 6:16-22), క్రైస్తవులమని చెప్పుకునే వారందరికీ ప్రతినిధులు. యజమాని ఒక్కొక్కరికీ ఒక్కొక్క బంగారు నాణెం ఇచ్చాడు. ఇది ఒక కూలివాడి మూడు నెలల సంపాదన. మత్తయి 25:14-30 లో చెప్పిన ఉదాహరణలో దాసులకు ఇంకా ఎక్కువ డబ్బు ఇచ్చినట్టూ, ఒక్కొక్కరికి వేరువేరు మొత్తాలు ఇచ్చినట్టూ రాసి ఉంది. కొన్ని విషయాల్లో దేవుని దాసులంతా వేరువేరుగా ఉన్నారు. మరికొన్నింటిలో అందరూ సమానంగా ఉన్నారు. అన్ని విషయాల్లోనూ వారి నమ్మకత్వాన్ని పరీక్షించడం జరుగుతుంది – లూకా 16:10; 1 కోరింథీయులకు 4:2.

14. అయితే అతని పట్టణస్థులతని ద్వేషించిఇతడు మమ్ము నేలుట మా కిష్టము లేదని అతని వెనుక రాయబారము పంపిరి.

అర్కెలావస్ అనేవాడి విషయంలో 30 సంవత్సరాల క్రితం ఇది నిజంగా జరిగింది. యేసు విషయంలో కూడా ఇది జరిగింది. ఆయన తమకు రాజుగా ఉండబోడంటూ యూదులు రోమ్‌వారికి తెలియజేశారు (యోహాను 19:13-16). ఆ తరువాత కూడా తమ అభిప్రాయం మార్చుకోలేదు (1 థెస్సలొనీకయులకు 2:14-16).

15. అతడా రాజ్యము సంపాదించుకొని తిరిగి వచ్చినప్పుడు, ప్రతివాడును వ్యాపారమువలన ఏమేమి సంపాదించెనో తెలిసికొనుటకై తాను సొమ్మిచ్చిన దాసులను తనయొద్దకు పిలువుమని ఆజ్ఞాపించెను.

యేసుప్రభువును బహిరంగంగా రాజుగా ప్రకటించడం జరుగుతుంది. ఆయన మహిమతో తిరిగి వస్తారు. లోకమంతట్లో ఏ శక్తీ దాన్ని జయవంతంగా అడ్డగించడం అసాధ్యం (ప్రకటన గ్రంథం 11:15; ప్రకటన గ్రంథం 19:11-16). అప్పుడు క్రీస్తు తన సేవకులకు తీర్పు తీరుస్తాడు. 1 కోరింథీయులకు 3:12-15; 2 కోరింథీయులకు 5:10; ప్రకటన గ్రంథం 11:18.

16. మొదటివాడాయన యెదుటికి వచ్చి అయ్యా, నీ మినావలన పది మినాలు లభించెనని చెప్పగా

తాను వ్యాపారంలో విజయవంతం కావడానికి యజమాని ఇచ్చిన నాణెమే కారణమని వినయంగా ఇతడు చెప్తున్నాడు. లూకా 17:10 పోల్చి చూడండి.

17. అతడు భళా, మంచి దాసుడా, నీవు ఈ కొంచెములో నమ్మకముగా ఉంటివి గనుక పది పట్టణముల మీద అధికారివై యుండుమని వానితో చెప్పెను.

లూకా 16:10 చూడండి. చిన్న విషయంలో తనను తాను మంచి దాసుడుగా కనపరచుకున్నాడు. అతనికి లభించిన బహుమతి తాను నెరవేర్చిన చిన్న పని కన్నా ఎన్నో రెట్లు పెద్దది. నమ్మకంగా పని చేసిన తన సేవకులకు దేవుడు బహుమానాలిచ్చే సమయంలో నిజంగా గొప్ప బహుమానాలిస్తాడు. “నగరాలు” అంటే దేవుని రాజ్యం ఈ భూమిపై ప్రత్యక్షం అయినప్పుడు గౌరవం, అధికారం కలుగుతాయని సూచించే మాటలు. లూకా 22:30; మత్తయి 19:28; ప్రకటన గ్రంథం 3:21; ప్రకటన గ్రంథం 20:6 పోల్చి చూడండి.

18. అంతట రెండవవాడు వచ్చి అయ్యా, నీ మినావలన అయిదు మినాలు లభించెననగా

ప్రతి దాసుడికీ సమానమైన మొత్తాలు ఇవ్వడం జరిగింది. అలాగైతే మొదటి దాసుడూ, ఇతడూ సాధించిన ఫలితాల్లో తేడా దేనికి? మొదటివాడు బాగా కష్టపడి పని చేసి ఉండవచ్చు. 1 కోరింథీయులకు 15:10; కొలొస్సయులకు 1:29; కొలొస్సయులకు 3:23; కొలొస్సయులకు 4:13 పోల్చి చూడండి. రోమీయులకు 16:3-12 లోని విశ్వాసుల జాబితాను చూడండి. కొందరు పని చేశారు, మరి కొందరు కష్టపడి పని చేశారు. మరి కొందరు రెక్కలు ముక్కలు చేసుకుని పాటుపడ్డారు.

19. అతడు నీవును అయిదు పట్టణములమీద ఉండుమని అతనితో చెప్పెను.

ఇతని ప్రయత్నాలు, సాధించిన ఫలితాలు అంత గొప్పగా లేవు కాబట్టి అతనికి లభించే బహుమతి మొదటివాడి బహుమతి కన్నా తక్కువగానే ఉంటుంది (ప్రకటన గ్రంథం 22:12 చూడండి). అయినప్పటికీ పనితో పోల్చుకుంటే బహుమానం పెద్దదే.

20. అంతట మరియొకడు వచ్చి అయ్యా, యిదిగో నీ మినా;

మత్తయి 25:24-30.

21. నీవు పెట్టనిదానిని ఎత్తికొనువాడవును, విత్తనిదానిని కోయు వాడవునైన కఠినుడవు గనుక, నీకు భయపడి దీనిని రుమా లున కట్టి ఉంచితినని చెప్పెను.

22. అందుకతడు చడ్డ దాసుడా, నీ నోటి మాటనుబట్టియే నీకు తీర్పు తీర్చుదును; నేను పెట్టనిదానిని ఎత్తు వాడను, విత్తనిదానిని కోయువాడనునైన కఠినుడనని నీకు తెలిసియుండగా

మత్తయి 25:26 లో ఆ సేవకుడు సోమరి, దుర్మార్గుడు అని రాసి ఉంది. అదే ఇక్కడ కూడా నిజం అయి ఉండవచ్చు. ఈ సేవకుడు సోమరివాడు, కాబట్టి యజమాని ఇచ్చిన ఒక్క ఆజ్ఞనూ పాటించలేదు (వ 13), లేక పని చేయడం ఇష్టమే గాని తనకోసం మాత్రమే పని చేసుకోవడం ఇష్టమై ఉండవచ్చు. విశ్వాసులంతా తనను సేవించాలని దేవుడు పిలిచాడు. అయితే తమకోసం పని చేసుకొంటూ యేసుప్రభువు కోసం ఏమీ చెయ్యని క్రైస్తవులనబడినవారు ఉన్నారు. యేసు ఆజ్ఞలను సోమరితనంతో లెక్క చెయ్యకపోవడమూ, లేక సమయాన్నంతా తన సొంత వ్యవహారాల కోసం వెచ్చించడమూ ఇవి రెండూ అవిధేయత క్రిందికే వస్తాయి. అవిధేయత అంటే దుర్మార్గం (1 సమూయేలు 15:22-23). ఈ మనిషి చేసినదాన్ని బట్టి మాత్రమే గాక, చెయ్యక వదిలేసిన దాన్ని బట్టి కూడా ఇతనికి తీర్పు జరిగిన సంగతి గమనించండి. మత్తయి 25:41-46.

23. నీవెందుకు నా సొమ్ము సాహుకారులయొద్ద నుంచలేదు? అట్లు చేసి యుండినయెడల నేను వచ్చి వడ్డితో దానిని తీసికొందునే అని వానితో చెప్పి

24. వీనియొద్దనుండి ఆ మినా తీసివేసి పది మినాలు గలవాని కియ్యుడని దగ్గర నిలిచినవారితో చెప్పెను.

25. వారు అయ్యా, వానికి పది మినాలు కలవే అనిరి.

26. అందుకతడుకలిగిన ప్రతివానికిని ఇయ్య బడును, లేనివానియొద్దనుండి వానికి కలిగినదియు తీసివేయబడునని మీతో చెప్పుచున్నాను.

27. మరియు నేను తమ్మును ఏలు టకు ఇష్టములేని నా శత్రువులను ఇక్కడికి తీసికొనివచ్చి నాయెదుట సంహరించుడని చెప్పెను.

ఆయన్ను తమ రాజుగా స్వీకరించపోవడం మూలంగా ఈ మనుషులు ఆయనకు శత్రువులుగా తమను తాము కనపరచుకున్నారు. ఇప్పుడూ అంతే. యేసుప్రభువును ప్రభువుగా, రక్షకుడుగా, తమ జీవితాలకు పాలకుడుగా అంగీకరించకపోవడం మూలంగా మనుషులు ఆయనపట్ల తమ విరోధ భావాన్ని ప్రకటిస్తున్నారు (యోహాను 1:11; యోహాను 3:19-20; యోహాను 15:18; రోమీయులకు 8:7). తీర్పు రోజున ఇలాంటివారి స్థితి చాలా విచారకరంగా ఉంటుంది. ఈ వచనం చివరి మాటలు దీన్ని తెలియజేస్తున్నాయి. 2 థెస్సలొనీకయులకు 1:7-10; ప్రకటన గ్రంథం 19:11-16 పోల్చి చూడండి.

28. యేసు ఈ మాటలు చెప్పి యెరూషలేమునకు వెళ్ల వలెనని ముందు సాగిపోయెను.

మత్తయి 21:1-9.

29. ఆయన ఒలీవల కొండదగ్గరనున్న బేత్పగే బేతనియ అను గ్రామముల సమీపమునకు వచ్చినప్పుడు, తన శిష్యుల నిద్దరిని పిలిచి

“బేతనీ”– మత్తయి 21:7,

30. మీరు ఎదుటనున్న గ్రామమునకు వెళ్లుడి; అందులో మీరు ప్రవేశింపగానే కట్టబడియున్న ఒక గాడిద పిల్ల మీకు కనబడును; దానిమీద ఏ మనుష్యుడును ఎన్నడు కూర్చుండలేదు

31. ఎవరైననుమీరెందుకు దీని విప్పు చున్నారని మిమ్ము నడిగినయెడల ఇది ప్రభువునకు కావలసియున్నదని అతనితో చెప్పుడని చెప్పి వారిని పంపెను.

32. పంపబడిన వారు వెళ్లి, ఆయన తమతో చెప్పినట్టే కనుగొని

మార్కు 11:4-6.

33. ఆ గాడిదపిల్లను విప్పుచుండగా దాని యజమానులుమీరు, గాడిద పిల్లను ఎందుకు విప్పుచున్నారని వారి నడిగిరి.

34. అందుకు వారు ఇది ప్రభువునకు కావలసియున్నదనిరి.

35. తరువాత వారు యేసునొద్దకు దానిని తోలుకొని వచ్చి, ఆ గాడిదపిల్ల మీద తమ బట్టలువేసి, యేసును దానిమీద ఎక్కించి,

36. ఆయన వెళ్లుచుండగా తమ బట్టలు దారిపొడుగున పరచిరి.
2 రాజులు 9:13

37. ఒలీవలకొండనుండి దిగుచోటికి ఆయన సమీపించు చున్నప్పుడు శిష్యుల సమూహమంతయు సంతోషించుచు

38. ప్రభువు పేరట వచ్చు రాజు స్తుతింపబడునుగాక పరలోకమందు సమాధానమును సర్వోన్నతమైన స్థలములలో మహిమయు ఉండునుగాక అని తాము చూచిన అద్భుతములన్నిటినిగూర్చి మహా శబ్దముతో దేవుని స్తోత్రము చేయసాగిరి.
కీర్తనల గ్రంథము 118:25-26

లూకా 2:14.

39. ఆ సమూ హములో ఉన్న కొందరు పరిసయ్యులు బోధకుడా, నీ శిష్యులను గద్దింపుమని ఆయనతో చెప్పగా

మత్తయి 21:15-16.

40. ఆయన వారిని చూచివీరు ఊరకుండినయెడల ఈ రాళ్లు కేకలు వేయునని మీతో చెప్పుచున్నాననెను.

ఈ సందర్భం ఎంత విశేషమైనదంటే ఎక్కడో ఒక చోట నుంచి ఆనంద ధ్వనులు వెలువడేలా దేవుడు చేస్తాడు.

41. ఆయన పట్టణమునకు సమీపించినప్పుడు దానిని చూచి దాని విషయమై యేడ్చి

సిలువ, హింసలు అక్కడ ఆయనకోసం ఎదురు చూస్తున్నాయి. గానీ ఆయన తనకోసం ఏడవలేదు. దుఃఖాలకు గురి అయినవాడు అని ఆయనకు పేరు (యెషయా 53:3). అయితే ఆయన దుఃఖం ఇతరుల విచారకరమైన స్థితి కారణంగానే.

42. నీవును ఈ నీ దినమందైనను సమాధానసంబంధమైన సంగతులను తెలిసికొనినయెడల నీకెంతో మేలు; గాని యిప్పుడవి నీ కన్నులకు మరుగు చేయబడియున్నవి.
ద్వితీయోపదేశకాండము 32:29, యెషయా 6:9-10

యేసును తమ అభిషిక్తునిగా రక్షకునిగా వారు అంగీకరిస్తే వారికి శాంతి దొరికేది. అయితే వారి దుర్మార్గతను బట్టి దేవుడు వారిని శిక్షిస్తున్నాడు. వారిని అలా అజ్ఞానంలోనే ఉండనివ్వడం కూడా శిక్షలో భాగమే. మత్తయి 11:25; మత్తయి 13:11-16; యోహాను 9:41.

43. (ప్రభువు) నిన్ను దర్శించిన కాలము నీవు ఎరుగకుంటివి గనుక నీ శత్రువులు నీ చుట్టు గట్టు కట్టి ముట్టడివేసి, అన్ని ప్రక్కలను నిన్ను అరికట్టి, నీలోనున్న నీ పిల్లలతో కూడ నిన్ను నేల కలిపి

లూకా 21:6, లూకా 21:20, లూకా 21:24; మత్తయి 24:2. ఇది క్రీ.శ. 70లో జరిగింది. రోమ్ సైన్యాలు వచ్చి జెరుసలంను ధ్వంసం చేశాయి. యేసుప్రభువు దేవుని అవతారం. అయితే జెరుసలం ప్రజలు ఆయన్ను ఘోరమైన నేరస్థునికి చేసినట్టు చేశారు. వారిపై దేవుని తీర్పు రాక తప్పదు.

44. నీలో రాతిమీద రాయి నిలిచియుండ నియ్యని దినములు వచ్చునని చెప్పెను.
కీర్తనల గ్రంథము 137:9

45. ఆయన దేవాలయములో ప్రవేశించి అందులో విక్ర యము చేయువారితో నా మందిరము ప్రార్థన మందిరము అని వ్రాయబడియున్నది.

మత్తయి 21:12-16.

46. అయితే మీరు దానిని దొంగల గుహగా చేసితిరని చెప్పి వారిని వెళ్లగొట్ట నారంభించెను.
యెషయా 56:7, యిర్మియా 7:11

47. ఆయన ప్రతిదినమును దేవాలయములో బోధించు చున్నప్పుడు, ప్రధానయాజకులును శాస్త్రులును ప్రజలలో ప్రధానులును ఆయనను నాశనముచేయ జూచుచుండిరి గాని

లూకా 22:2; మత్తయి 12:14; మత్తయి 26:4; యోహాను 5:18; యోహాను 7:1.

48. ప్రజలందరు ఆయన వాక్యమును వినుటకు ఆయనను హత్తుకొని యుండిరి గనుక ఏమి చేయవలెనో వారికి తోచలేదు.

లూకా 20:19.