1. గొఱ్ఱెల దొడ్డిలో ద్వారమున ప్రవేశింపక వేరొకమార్గమున ఎక్కువాడు దొంగయు దోచుకొనువాడునైయున్నాడు.

9 అధ్యాయంలో చివరి వచనాలకు ఇది కొనసాగింపు. ఆ దృశ్యం, వ 19-21లో చెప్పిన యూదులు, గుడ్డివాడు అలానే ఉన్నారు. కాబట్టి ఈ అధ్యాయం వ 1-18ను యేసు పరిసయ్యులకు చెప్తున్నాడనుకోవచ్చు. వారు తమను తాము గురువులుగా, ఇస్రాయేల్‌ప్రజల కాపరులుగా భావించుకొనేవారు (మత్తయి 23:2-3; రోమీయులకు 2:17-21). ఈ అధ్యాయంలో యేసు తానే దేవుని ప్రజలకు నిజమైన కాపరిననీ, పరిసయ్యులు దొంగలు, దోపిడీదారులు, తోడేళ్ళవంటి వారనీ చెప్తున్నాడు. వారు తమ స్వలాభం కోసం గొర్రెలను వాడుకోవడం, లేదా వారిని నాశనం చేయడానికే సమకట్టిన వారనీ చెప్తున్నాడు. అంటే పరిసయ్యులు కపటులు, స్వార్థపరులైన కాపరులన్నమాట. కొన్ని పాత ఒడంబడిక లేఖనాల్లో దేవుడు తానే తన ప్రజలకు కాపరినని చెప్తూ, ఇలాంటి దొంగ కాపరులను కఠినమైన పదజాలంతో వర్ణించాడు. కీర్తనల గ్రంథము 80:1; యెషయా 40:10-11; యెషయా 56:9-12; యిర్మియా 23:1-4; యిర్మియా 25:32-38; యెహె 34 అధ్యాయం; జెకర్యా 11:4-17 చూడండి. ఇక్కడ యోహాను 10:1-18 లో యేసు ఒక ఆధ్యాత్మిక సత్యాన్ని తెలిపేందుకు ఒక ఉదాహరణ చెప్తున్నాడు. గొర్రెలు అంటే క్రీస్తు సొంత ప్రజలు. ఆయన స్వరం విని, నమ్మి, విధేయులయ్యేవారు (వ 15-29). క్రీస్తు తానే తన ప్రజలకు ద్వారం, నిజమైన కాపరి (వ 7,11). దొంగలు, దోచుకునేవారు, తోడేళ్ళు వీరంతా తమ లాభంకోసం రహస్యంగా గానీ బహిరంగంగా గానీ గొర్రెల మీద పడి తినేసే మనుషులకు గుర్తు.

2. ద్వారమున ప్రవేశించువాడు గొఱ్ఱెల కాపరి.

దేవుని ప్రజల నిజమైన కాపరి సరైన దారిగుండా ప్రవేశిస్తాడు. దేవుడు ఆయన్ను నియమించి కాపరి పరిచర్యలో ఉంచుతాడు.

3. అతనికి ద్వారపాలకుడు తలుపు తీయును, గొఱ్ఱెలు అతని స్వరము వినును, అతడు తన సొంత గొఱ్ఱెలను పేరుపెట్టి పిలిచి వాటిని వెలుపలికి నడి పించును.

వ 27; యోహాను 18:37. క్రీస్తువిశ్వాసులు ఆయన తమతో మాట్లాడినప్పుడు గ్రహించగలుగుతారు. ఇతర ఉపదేశకుల మాటలకూ ఆయన మాటలకూ తేడాను గుర్తించగలుగుతారు. ఆయన స్వరానికి లోబడాలని చూస్తారు. బయటికి నడిపించడమంటే ఏమిటి? అంటే నీటి వాగులకూ పచ్చిక మైదానాలకూ తీసుకువెళ్ళడం. కీర్తనల గ్రంథము 23:1-2.

4. మరియు అతడు తన సొంత గొఱ్ఱెలనన్నిటిని వెలుపలికి నడిపించునపుడెల్ల వాటికి ముందుగా నడుచును; గొఱ్ఱెలు అతని స్వరమెరుగును గనుక అవి అతనిని వెంబ డించును.

మంచి కాపరి గొర్రెలను తోలడు గాని అవి వెళ్ళవలసిన చోటికి తాను ముందుండి తీసుకువెళ్తాడు. క్రీస్తు తన ప్రజలను భూమినుంచి పరలోకానికి నడిపిస్తాడు. వారు వెయ్యవలసిన ప్రతి అడుగూ ఆయనకు తెలుసు, ఎందుకంటే వారికి సంభవించబోయే ప్రతిదాని విషయంలోనూ ఆయన వారికి ముందుగా వెళ్ళాడు. (1 పేతురు 2:21-25; హెబ్రీయులకు 12:1-3).

5. అన్యుల స్వరము అవి యెరుగవు గనుక అన్యుని ఎంతమాత్రమును వెంబడింపక వానియొద్దనుండి పారిపోవునని మీతో నిశ్చయముగా చెప్పుచున్నానని వారితో అనెను.

“పరాయివారి”– అంటే దుర్బోధకులు, కపట గురువులు. యేసుప్రభువును అనుసరించేవారికి సత్యం, అసత్యాల మధ్య ఉన్న తేడాను గుర్తించే వివేచన జ్ఞానం ఉంటుంది. యేసు చేసిన ఉపదేశానికి వ్యతిరేకమైనదేదైనా తప్పు, ప్రమాదకరం అని వారు తెలుసుకోగలుగుతారు. తమను తప్పుదారి పట్టించాలని చూస్తున్న పరాయివారి స్వరాన్ని అందులో వారు గుర్తిస్తారు (రోమీయులకు 16:17-18; హెబ్రీయులకు 13:9). యేసు ఉపదేశాలను వారెంతగా తెలుసుకుని అర్థం చేసుకోగలిగితే, ఈ పరాయివారి స్వరాలను అంత స్పష్టంగా వారు గుర్తించగలుగుతారు. గొర్రెనని చెప్పుకునే వారెవరైనా క్రీస్తును పూర్తిగా వదిలిపెట్టి దుర్బోధల వెంట వెళ్ళిపోతే అది 1 యోహాను 2:19 కు ఉదాహరణ.

6. ఈ సాదృశ్యము యేసు వారితో చెప్పెను గాని ఆయన తమతో చెప్పిన సంగతులెట్టివో వారు గ్రహించుకొనలేదు.

ఈ శుభవార్తలో తరచుగా యూదులు యేసు మాటలను అర్థం చేసుకోలేకపోవడం చూస్తాం (యోహాను 6:41-42, యోహాను 6:52; యోహాను 7:35; యోహాను 8:22, యోహాను 8:27). వారు ఆయన గొర్రెలు కారు (వ 26) కాబట్టి ఆధ్యాత్మిక జ్ఞానం వారికి లేదు.

7. కాబట్టి యేసు మరల వారితో ఇట్లనెను

“నేనే ద్వారాన్ని”– యేసు ఆ రోజుల్లో కాపరులు, గొర్రెల పద్ధతులను బట్టి ఈ భాషాలంకారం ఉపయోగించాడు. కాపరి తన గొర్రెలను తిరిగి తన ఆవరణానికి తీసుకువచ్చి ద్వారంగుండా ఒక్కొక్కటీ వెళ్తుంటే వాటిని కనిపెట్టి చూచేవాడు. అన్నీ లోపలికి వెళ్ళాక అతడు ఈ ద్వారానికి అడ్డంగా పడుకునేవాడు. అతని శరీరం మీదుగా దాటకుండా ఏదీ, ఎవరూ లోపలికి రావడానికీ, బయటికి వెళ్ళడానికీ వీలులేదు. అతడే ద్వారమన్నమాట. పాపవిముక్తికి ఏకైక ద్వారం క్రీస్తే (ఆయన ఇక్కడ చెప్తున్నది ఇదే – వ 9). ఆయనద్వారా తప్ప ఎవరూ దేవుని ప్రజలనే గొర్రెల దొడ్డిలోకి రాలేరు. యోహాను 14:6 చూడండి. మత్తయి 7:13-14 పోల్చి చూడండి.

8. గొఱ్ఱెలు పోవు ద్వారమును నేనే; నాకు ముందు వచ్చిన వారందరు దొంగలును దోచుకొనువారునై యున్నారు; గొఱ్ఱెలు వారి స్వరము వినలేదు.
యిర్మియా 23:1-2, యెహెఙ్కేలు 34:2-3

“నాకు ముందుగా”– పాత ఒడంబడిక కాలం ప్రవక్తల గురించి కాదు యేసుప్రభువు ఇలా చెప్పినది. మోషే, సమూయేలు, దావీదు లాంటివారు ప్రధాన కాపరి అయిన దేవుణ్ణి సేవించిన మంచి ఉపకాపరులు (కీర్తనల గ్రంథము 78:70-72). తన ప్రజలకోసం దేవుడు తానే ఇలాంటి కాపరులను బయలుదేరదీశాడు. దేవుడు పంపకుండా వచ్చిన వారి గురించి ఇక్కడ యేసు మాట్లాడుతున్నాడు. వారు తమ సొంత ప్రయోజనాల కోసం తమంతట తామే వచ్చి కాపరులమని చెప్పుకున్నారు (యిర్మియా 23:21). క్రీస్తు కాలంలో ఇస్రాయేల్ పరిస్థితి ఇది. మత విషయాల్లో దొంగలు, దోపిడిగాళ్ళు పుష్కలంగా ఉన్నారు. అయితే ఈ యేసుప్రభువు గాక “కాపరి” అనే పేరుకు తగినవాళ్ళు వేరెవరూ లేరు (మత్తయి 9:36)

9. నేనే ద్వారమును; నా ద్వారా ఎవడైన లోపల ప్రవేశించిన యెడల వాడు రక్షింపబడినవాడై, లోపలికి పోవుచు బయటికి వచ్చుచు మేత మేయుచునుండును.
కీర్తనల గ్రంథము 118:20

“రక్షణ”– కాపరి, గొర్రెల ఉదాహరణలో యేసు మాట్లాడుతున్నది దీన్ని గురించే, అంటే పాపవిముక్తిలోని అన్ని అంశాల గురించీ అన్నమాట (రోమీయులకు 1:16). క్రీస్తు తన ప్రజలను బలపరిచే ఆహారాన్ని “మేత” సూచిస్తున్నది. వారు లోపలికి వస్తూ బయటికి వెళ్తూ ఉండడం జీవనయాత్ర అంతటిలో భద్రతనూ విడుదలనూ సూచించే మాటలు. గొర్రెల దొడ్డి, పచ్చిక మైదానం, మిగతావన్నీ కూడా మంచి కాపరివే, ఆయన పరిపాలన క్రింద ఉన్నవే. ఈ వచనానికి శ్రేష్ఠమైన వ్యాఖ్యానం 23వ కీర్తన అంతా.

10. దొంగ దొంగతనమును హత్యను నాశనమును చేయుటకు వచ్చును గాని మరిదేనికిని రాడు; గొఱ్ఱెలకు జీవము కలుగుటకును అది సమృధ్ధిగా కలుగుటకును నేను వచ్చితినని మీతో నిశ్చయముగా చెప్పుచున్నాను.

“దొంగ”– కపట ఉపదేశకులూ గురువులూ పాపవిముక్తి పొందని స్వార్థపరులైన కాపరులూ దొంగిలిస్తారు, దోచుకుంటారు, నాశనం చేస్తారు. దేవునికి మాత్రమే చెందవలసిన ఘనతను దొంగిలించే ప్రయత్నం చేస్తారు (యోహాను 7:18; మత్తయి 23:5-12). మనుషుల దగ్గర్నుంచి దేవుని వాక్కును తీసేసేందుకు ప్రయత్నిస్తారు (మత్తయి 15:6-9; యిర్మియా 36:23-25; గలతియులకు 1:6-7). ఈ విధంగా వారు మనుషుల్ని నాశనం చేయజూస్తారు. ఇలాంటివారు తరచుగా హత్యకు కూడా పాల్పడతారు (మత్తయి 23:34-37; మొ।।). యేసు క్రీస్తు ఉద్దేశం, పరిచర్య ఇందుకు పూర్తిగా వ్యతిరేకం. మనుషులకు శాశ్వత జీవం, ఆత్మ సంబంధమైన జీవం ఇవ్వాలని ఆయన కోరిక. ఆయన పరలోకంనుంచి భూమికి వచ్చినది ఇందుకే. ఈ శుభవార్త జీవం అనేదానికి అంతటా ప్రాముఖ్యత ఇస్తున్నది (యోహాను 1:4; యోహాను 3:16, యోహాను 3:36; యోహాను 4:14; యోహాను 5:24; యోహాను 6:35, యోహాను 6:47, యోహాను 6:51; యోహాను 11:25; యోహాను 14:6). యేసు ఈ లోకానికి వచ్చిన ఇతర కారణాలకు మత్తయి 5:17 నోట్ చూడండి.

11. నేను గొఱ్ఱెలకు మంచి కాపరిని; మంచి కాపరి గొఱ్ఱెలకొరకు తన ప్రాణము పెట్టును.
కీర్తనల గ్రంథము 23:1, యెషయా 40:11, యెహెఙ్కేలు 34:15

పాత ఒడంబడికలో యెహోవా దేవుడే కాపరి (కీర్తనల గ్రంథము 23:1; యెషయా 40:10-11). ఈ వచనంలో యేసుప్రభువు తాను కాపరినంటున్నాడు. ఆయన యెహోవాదేవుని అవతారం. యోహాను 8:24, యోహాను 8:58; యోహాను 12:41; లూకా 2:11 కూడా చూడండి. ప్రాణం ధారపోస్తాడు అనేది ఆయన సిలువ మరణాన్ని సూచిస్తూ పలికిన మాట.

12. జీతగాడు గొఱ్ఱెల కాపరికాడు గనుక గొఱ్ఱెలు తనవికానందున తోడేలు వచ్చుట చూచి గొఱ్ఱెలను విడిచిపెట్టి పారిపోవును, తోడేలు ఆ గొఱ్ఱెలను పట్టి చెదరగొట్టును.

“జీతగాడు”– కేవలం డబ్బుకోసం, లేదా ఏదైనా స్వంత ప్రయోజనంకోసం దేవుని ప్రజలకు పరిచర్య చేసేవాడు. గొర్రెలంటే వారికి ఏమీ ప్రేమ లేదు (వ 13). “తోడేలు”– కపట బోధకులకూ అబద్ధ ప్రవక్తలకూ సూచన (మత్తయి 7:15-16; అపో. కార్యములు 20:29-31).

13. జీతగాడు జీతగాడే గనుక గొఱ్ఱెలనుగూర్చి లక్ష్యము చేయక పారిపోవును.

14. నేను గొఱ్ఱెల మంచి కాపరిని.

త్రిత్వంలో తండ్రి, కుమారుని విషయంలో ఉన్నంత వాస్తవంగానే క్రీస్తుకు గొర్రెలు, గొర్రెలకు క్రీస్తు తెలుసు. క్రీస్తు తన గురించి నేరుగా వారికి వెల్లడి చేసుకొన్నందువల్ల తన ప్రజలకు ఆయన తెలుసు (మత్తయి 11:27). ఆయన్ను గురించిన పూర్తి జ్ఞానం వారికి ఒక్క రోజులో వచ్చేయ్యదు. ఆయనలో నమ్మకం ఉంచి లోబడుతూ ఉండగా క్రమేణా పెరుగుతూ ఉండే జ్ఞానం అది (ఎఫెసీయులకు 1:17; ఫిలిప్పీయులకు 3:10; 2 పేతురు 3:18). యేసు ఇక్కడ ఉపదేశిస్తున్నది తన గొర్రెలందరికీ తాను తెలుసునన్న సత్యమే. ఇది ఆయనెవరో కేవలం తెలిసి ఉండడం మాత్రమే కాదు. ఆరంభంలో ఆయన్ను కలుసుకోవడం, ఆయనతో సహవాసం చేయడం వీటిని ఇది సూచిస్తున్నది (1 యోహాను 1:3). ఇది ఆత్మ సంబంధమైన కలయిక, సహవాసం అని వేరే చెప్పనవసరం లేదుగా.

15. తండ్రి నన్ను ఏలాగున ఎరుగునో నేను తండ్రిని ఏలాగు ఎరుగుదునో ఆలాగే నేను నా గొఱ్ఱెలను ఎరుగుదును, నా గొఱ్ఱెలు నన్ను ఎరుగును. మరియు గొఱ్ఱెలకొరకు నా ప్రాణము పెట్టుచున్నాను.

16. ఈ దొడ్డివికాని వేరే గొఱ్ఱెలును నాకు కలవు; వాటినికూడ నేను తోడుకొని రావలెను, అవి నా స్వరము వినును, అప్పుడు మంద ఒక్కటియు గొఱ్ఱెల కాపరి ఒక్కడును అగును.
యెషయా 56:8, యెహెఙ్కేలు 34:23, యెహెఙ్కేలు 37:24

తరువాతి కాలంలో ఆయనమీద నమ్మకం ఉంచబోయే ఇతర దేశప్రజలు, జాతుల మనుషుల గురించి యేసు ఇక్కడ చెప్తున్నాడు. వారు ఇప్పటిదాకా శుభవార్త వినకపోయినా, నమ్మకపోయినా, భవిష్యత్తులో వారలా చేస్తారని ఆయనకు తెలుసు. యోహాను 6:37 పోల్చి చూడండి. అలాంటివారిని తన ప్రజల గుంపులోకి చేరుస్తానంటున్నాడు. ఈ కృప యుగమంతటిలో తన సేవకుల ద్వారా ఆయన ఇది చేస్తున్నాడు. “ఒకే కాపరి”– ఈ యుగంలో “ఒకే మంద” అంటే యేసుక్రీస్తు సంఘం. యూదులు మాత్రమే గాక అన్ని జాతులవారూ అందులో ఉన్నారు. ఆయనొక్కడే సంఘానికి నిజమైన అధిపతి (ఎఫెసీయులకు 2:11-22 చూడండి).

17. నేను దాని మరల తీసికొనునట్లు నా ప్రాణము పెట్టుచున్నాను; ఇందు వలననే నా తండ్రి నన్ను ప్రేమించుచున్నాడు.

మూడోసారి యేసు తన ప్రాణాన్ని ధారపోయడం గురించి చెప్తున్నాడు (వ 11,15). ఆయన తన గొర్రెలకోసం చేసిన అత్యంత ప్రాముఖ్యమైన విషయం ఇదే. ఇంతకన్నా స్పష్టంగా గొర్రెల కోసం తన ప్రేమను ప్రదర్శించడం సాధ్యం కాదు (యోహాను 15:13; రోమీయులకు 5:6-8; 1 యోహాను 4:10). తండ్రి అయిన దేవుడు అనంత కాలంనుంచి కుమారుణ్ణి ప్రేమిస్తున్నాడు (యోహాను 5:20; యోహాను 17:24). అయితే తన ప్రజలకోసం క్రీస్తు ప్రాణత్యాగం చేయడం తండ్రి ఆయన్ను ప్రేమించడానికి గల ప్రత్యేక కారణం. ఈ కారణాన్ని బట్టే తండ్రి ఆయన్ను అత్యున్నతంగా ఘనపరిచాడు (ఫిలిప్పీయులకు 2:8-9).

18. ఎవడును నా ప్రాణము తీసికొనడు; నా అంతట నేనే దాని పెట్టుచున్నాను; దాని పెట్టుటకు నాకు అధికారము కలదు, దాని తిరిగి తీసికొనుటకును నాకు అధికారము కలదు; నా తండ్రివలన ఈ ఆజ్ఞ పొందితిననెను.

యేసు తాను చనిపోయిన వారిలో నుంచి సజీవంగా లేవడం గురించి మాట్లాడుతున్నాడు (మత్తయి 16:21; మత్తయి 28:6). ఆయన అనుమతిస్తేనే తప్ప ఎవరూ ఆయన ప్రాణం తీసుకోలేకపోయారు (యోహాను 19:10-11; మత్తయి 26:53). మరణించి తిరిగి సజీవంగా లేవకుండా ఆయన్నెవరూ ఆపలేకపోయారు. ఈ రెండూ కూడా ఆయన విషయంలో దేవుని సంకల్పమే. యేసుకు ఈ రెంటిమీద అధికారం ఉంది.

19. ఈ మాటలనుబట్టి యూదులలో మరల భేదము పుట్టెను.

యోహాను 7:12, యోహాను 7:43; యోహాను 9:16.

20. వారిలో అనేకులువాడు దయ్యము పట్టిన వాడు, వెఱ్ఱివాడు; వాని మాట ఎందుకు వినుచున్నారనిరి.

యోహాను 7:20; యోహాను 8:48, యోహాను 8:52; మత్తయి 4:24. తాను ఏమై ఉన్నానని ఆయన చెప్పుకున్నాడో దాన్ని వారు నమ్మలేదు గనుక ఆయన పిచ్చివాడనుకున్నారు. మతి ఉన్న ఏ మనిషీ కూడా అవి సత్యం అయితేనే తప్ప యేసు తన గురించి చెప్పుకున్న సంగతులను చెప్పుకోలేడన్నది పచ్చి నిజం. యేసు పలికినది సత్యమై ఉండాలి. లేదా ఆయన నిజంగా పిచ్చివాడై ఉండాలి. దేన్ని నమ్మాలో ప్రతి వ్యక్తీ స్వయంగా నిశ్చయించుకోవాలి. యేసును దయ్యం పట్టినవాడని, పిచ్చివాడని చెపితే, ఆయన చూపిన సాక్ష్యాధారాలనూ రుజువులనూ పట్టించుకొనే అవసరం లేదనుకున్నారు ఆ యూదులు (వ 25; యోహాను 5:31-47). ఎదుటివాడి వాదననుంచి బయట పడాలంటే ఇది సులభ మార్గం.

21. మరి కొందరుఇవి దయ్యము పట్టినవాని మాటలుకావు; దయ్యము గ్రుడ్డివారి కన్నులు తెరవగలదా అనిరి.

కొందరు ఇతరులకన్నా కొంచెం తెలివైనవారు. అయితే వీరు కూడా యేసుప్రభువును అనుసరించడానికి ముందుకు రాలేదు. ఆయన పక్షంగా రెండు మూడు మాటలు మాట్లాడ్డం ఆయన కోరుతున్న నమ్మకం, భక్తిశ్రద్ధలు, అభినవేశం కావు.

22. ఆలయ ప్రతిష్ఠితపండుగ యెరూషలేములో జరుగు చుండెను.

ఆలయం శత్రువుల చేతిలో పడి ధ్వంసమైన తరువాత క్రీ.పూ. 165లో దాన్ని తిరిగి ప్రతిష్ఠించిన సందర్భాన్ని గుర్తుచేసుకుంటూ ఏటేటా జరిపేదే ఈ ప్రతిష్ఠ మహోత్సవం.

23. అది శీతకాలము. అప్పుడు యేసు దేవాల యములో సొలొమోను మంటపమున తిరుగుచుండగా

24. యూదులు ఆయనచుట్టు పోగైఎంతకాలము మమ్మును సందేహపెట్టుదువు? నీవు క్రీస్తువైతే మాతో స్పష్టముగా చెప్పుమనిరి.

“అభిషిక్తుడు” – గురించి మత్తయి 1:1 నోట్. ఆయన్ను స్పష్టంగా మాట్లాడమంటున్నారు – ఆయన్ను నమ్మాలని కాదు, గాని తన గురించి చెప్పుకున్నది అబద్ధమని చెప్పి ఆయనపై నేరం మోపాలని.

25. అందుకు యేసుమీతో చెప్పితిని గాని మీరు నమ్మరు, నేను నా తండ్రి నామమందు చేయుచున్న క్రియలు నన్ను గూర్చి సాక్ష్యమిచ్చుచున్నవి.

“నేనే క్రీస్తును, ఇస్రాయేల్ వారి అభిషిక్తుణ్ణి” అనే మాటలు యేసు వాడలేదు. అయితే ఆయన మాటల్లో కొన్ని స్పష్టంగా ఈ అర్థాన్నే ఇస్తున్నాయి. యోహాను 5:16-47; యోహాను 6:32-58; యోహాను 8:12, యోహాను 8:23-29; యోహాను 10:7-18 వంటి మాటలను ఆ అభిషిక్తుడు తప్ప వేరెవరూ యథార్థంగా పలకలేరు. ఆయన చూపిన రుజువుల్లో ఆయన చేసిన అద్భుతాలు కూడా భాగమే – వ 38; యోహాను 5:36.

26. అయితే మీరు నా గొఱ్ఱెలలో చేరినవారుకారు గనుక మీరు నమ్మరు.

యోహాను 8:44.

27. నా గొఱ్ఱెలు నా స్వరము వినును, నేను వాటి నెరుగుదును, అవి నన్ను వెంబడించును.

ఈ సత్యాలను ఆయన ఇంతకుముందే చెప్పాడు (వ 3,14,16). కొత్తగా ఆధ్యాత్మికంగా జన్మించినవారే క్రీస్తుకు చెందిన గొర్రెలు (యోహాను 3:3-8). వారిలో ఒక నూతన ఆధ్యాత్మిక స్వభావం ఉంది. గనుకనే క్రీస్తు స్వరాన్ని విని ఆయన వెంట వెళ్ళగలుగుతారు. ఆయన వెంట వెళ్ళడమంటే ఆయనపై నమ్మకం పెట్టి ఆయనకు లోబడడం. ఆయన ప్రజల జంట లక్షణాలు నమ్మకం, విధేయత. అవి రెండూ లేకుండా మనుషులు నిజమైన క్రైస్తవులు కాలేరు.

28. నేను వాటికి నిత్యజీవము నిచ్చుచున్నాను గనుక అవి ఎన్నటికిని నశింపవు, ఎవడును వాటిని నా చేతిలోనుండి అపహ రింపడు.

“శాశ్వత జీవం”– ఇది ప్రస్తుతం విశ్వాసులకు ఉన్నది (యోహాను 3:36; యోహాను 5:24). క్రీస్తును అనుసరించడం మూలంగా వారికి శాశ్వత జీవం కలగదు. వారిలో శాశ్వత జీవం ఉంది కాబట్టి వారు క్రీస్తును అనుసరిస్తారు. “ఎన్నడూ నశించరు”– తన గొర్రెలన్నీ ఎప్పటికీ క్షేమంగా భద్రంగా ఉన్నారని క్రీస్తు బహు స్పష్టంగా ప్రకటిస్తూ ఉన్నాడు. యోహాను 6:39-40, యోహాను 6:54, యోహాను 6:56; యోహాను 17:11, యోహాను 17:15; రోమీయులకు 5:9-10; రోమీయులకు 8:30-39; ఫిలిప్పీయులకు 1:6; హెబ్రీయులకు 7:25; 1 పేతురు 1:3-5 చూడండి. వ 27,28లోని మాటల కూర్పును జాగ్రత్తగా గమనించండి. ఇలా రాసి లేదు – “నా గొర్రెలు నా స్వరం వింటే, నన్ను అనుసరిస్తే నేను వాటికి శాశ్వత జీవం ఇస్తాను. అప్పుడు అవి ఎన్నడూ నశించవు”. క్రీస్తు మాటల్లో “వింటే”, “అనుసరిస్తే” అన్నవి లేవు. అలాంటి షరతులు కూడా లేవు. గొర్రెల భద్రత అవి యేసు గొర్రెలే అన్న విషయంపై ఆధారపడేది గాని మరి ఏ ఇతర షరతుపైనా ఆధారపడి లేదు. గొర్రెల లక్షణం తను కాపరి స్వరం విని అతణ్ణి అనుసరించడమే. అవి అలా చెయ్యకపోతే అవి గొర్రెలే కాదన్నమాట. నిజమైన గొర్రెలు మంచి కాపరి కాపుదలలో ఉండడం వల్లే క్షేమంగా, భద్రంగా ఉన్నారు. కానీ విశ్వాసులు క్రీస్తులో తమ నమ్మకాన్ని వదులుకుని ఆయన్ను శాశ్వతంగా విడిచిపెట్టడం సాధ్యం కాదా? అలా చేసేవారు నశించిపోతారు. కానీ తన గొర్రెలు ఎన్నడూ నశించరని క్రీస్తు చెప్తున్నాడు. మొదట్లో వారికి నమ్మకాన్ని దయచేసిన దేవుడు (ఫిలిప్పీయులకు 1:29; ఎఫెసీయులకు 2:8; హెబ్రీయులకు 12:2) వారిని ఆ నమ్మకంలో చివరిదాకా కొనసాగేలా చేస్తాడని దీని భావం (లూకా 22:31-32; రోమీయులకు 5:9-10; రోమీయులకు 8:37; ఫిలిప్పీయులకు 1:6; 1 పేతురు 1:5 చూడండి). యిర్మియా 32:40 పోల్చి చూడండి. అలాగైతే గొర్రెలు కొన్నిసార్లు దారి తప్పి ఎటో వెళ్ళిపోవచ్చు గదా. తాత్కాలికంగా అలా జరగవచ్చు. అయితే అలాంటి సందర్భాల్లో తానేమి చేస్తాడో యేసుప్రభువు తెలియజేశాడు (మత్తయి 18:12-14; లూకా 15:3-7). అయితే ఇలా భద్రత ఉందన్న ఉపదేశం పాపాన్ని ప్రోత్సహించదా? తాము శాశ్వతంగా క్షేమంగా ఉన్నామనుకుని గొర్రెలు తమకిష్టం వచ్చినట్టు చేయరా? ఈ ఆలోచనా విధానం నిజమైన గొర్రెల మనస్తత్వం కాదు. వారికిష్టమైనదాన్నే ఇప్పుడు చేస్తున్నారు. అంటే క్రీస్తును అనుసరించడం వారికి ఇష్టం. ఇప్పుడు అనుసరిస్తున్నదాని కంటే మరింత సన్నిహితంగా అనుసరించలేకపోతున్నామే అన్నదే వాళ్ళ విచారం. అలా కాకపోతే వారు ఆయన గొర్రెలు కాదన్నమాట. తాము భద్రంగా ఉన్నామన్న జ్ఞానం వారిలో పవిత్రతను పెంపొందిస్తుంది. ఈ పవిత్రత తప్పిపోతామేమోనన్న భయంపై ఆధారపడేది కాదు గాని మంచి కాపరిని ప్రేమించడంపై, ఆయన ప్రేమ, ప్రభావాలపై ఉన్న నమ్మకంమీద ఆధారపడే పవిత్రత అది. “నా చేతిలో నుంచి”– ఆయన చేతిలోనుంచి గొర్రెలను లాక్కోవాలంటే ఆయనకన్నా బలమైన చెయ్యి కావాలి. ఏ దుర్మార్గుడూ, సాక్షాత్తూ సైతాను అయినా క్రీస్తు గొర్రెలను ఆయననుంచి ఎత్తుకుపోలేడు. క్రీస్తు మంచి కాపరి. ఏ కాపరి అయినా తన గొర్రెలను క్షేమంగా ఉంచుకోవాలంటే రెండు విషయాలు అవసరం – అలా ఉంచుకోవాలన్న పట్టుదల, అందుకు కావలసిన శక్తిసామర్థ్యాలు. క్రీస్తుకు ఈ పట్టుదల, సామర్థ్యం రెండూ పరిపూర్ణంగా ఉన్నాయి. ఆయన ఎవరో, ఏమిటో దాన్నిబట్టే గొర్రెలు క్షేమంగా ఉన్నారు. క్రీస్తుకు చెందిన ప్రజలు తండ్రినుంచి ఆయనకు లభించిన ప్రత్యేక ప్రేమ బహుమానం (యోహాను 6:37; యోహాను 17:6). ఈ బహుమానాన్ని కాపాడుకోవడానికి ఆయన తన శక్తినంతటినీ ఉపయోగిస్తాడు. ఆయన శక్తి అమితం.

29. వాటిని నాకిచ్చిన నా తండ్రి అందరికంటె గొప్పవాడు గనుక నా తండ్రి చేతిలోనుండి యెవడును వాటిని అపహరింపలేడు;

రెండు అమిత శక్తిగల హస్తాలు క్రీస్తు గొర్రెలకు కాపుదలగా ఉన్నాయి. ఇది రెట్టింపు భద్రత. కొలొస్సయులకు 3:2 చూడండి. విశ్వాసుల జీవం దేవుని లోపలే దాచబడి ఉంది. దాన్ని అక్కడనుంచి తొలగించగలిగేదెవరు? “అందరికంటే గొప్పవాడు”– యోహాను 14:28 చూడండి.

30. నేనును తండ్రియును ఏకమై యున్నామని వారితో చెప్పెను.

తండ్రీ, కుమారుడూ ఒకే వ్యక్తి అని ఇది చెప్పడం లేదు. అలాంటి అర్థం దీనికి రాదు. గ్రీకులో ఈ “ఒకటే” అనే పదం ఇద్దరూ ఒకే తత్వంలో ఐక్యమై ఒకే స్వభావంలో భాగస్వాములై ఉన్నారని సూచిస్తున్నది. యోహాను 1:1 చూడండి. ఫిలిప్పీయులకు 2:6; లూకా 2:11 నోట్స్‌లో ఇతర రిఫరెన్సులు చూడండి. త్రిత్వం గురించి యోహాను 5:30; మత్తయి 3:16-17; మత్తయి 28:19; 2 కోరింథీయులకు 13:14; ఎఫెసీయులకు 4:6 చూడండి. ఇక్కడ ఉన్న యేసు ఉపదేశం అద్వైత వేదాంతం వంటిది ఏమాత్రమూ కాదు. మనుషులంతా దేవునితో ఏకమైన వారేననీ, మనిషి ఆత్మ, దేవుని ఆత్మ ఒకటేననీ అద్వైతం నేర్పుతూవుంది. యేసు చెప్పినది ఇది కానే కాదు. తాను అంటే దేవుని ఏకైక కుమారుడు తండ్రితో ఏకంగా ఉన్నానని చెప్తున్నాడు. తాను ప్రత్యేకమైన వ్యక్తిననీ, కొన్ని ప్రాముఖ్య విషయాల్లో ఇతర మనుషుల్లాంటివాడు కాదని పదే పదే చెప్పాడు – యోహాను 3:15; యోహాను 8:23-24; మొ।।.

31. యూదులు ఆయనను కొట్టవలెనని మరల రాళ్లుచేత పట్టుకొనగా

యోహాను 5:18 చూడండి.

32. యేసు తండ్రి యొద్దనుండి అనేకమైన మంచి క్రియలను మీకు చూపితిని; వాటిలో ఏ క్రియ నిమిత్తము నన్ను రాళ్లతో కొట్టుదురని వారినడిగెను.

వ 30లో ఆయన చెప్పిన సత్యాన్ని సూచించేవే ఆయన అద్భుతాలు. మొద్దుబారిపోయిన ఈ అవిశ్వాసులు తన గురించి ఆయన చెప్పిన దాన్నంతటినీ, చూపిన రుజువులన్నిటినీ నిరాకరించి ఆయన మానవ మాత్రుడే అన్నారు. కానీ రెండు విషయాల్లో వాళ్లు చెప్పినది నిజమే – ధర్మశాస్త్రం ప్రకారం దేవదూషణకు శిక్ష మరణమే. మానవ మాత్రుడు తాను దేవుణ్ణని చెప్పుకోవడం దేవదూషణే. అది మరణశిక్షకు తగిన భయంకరమైన పాపం (లేవీయకాండము 24:16; సంఖ్యాకాండము 15:30). రాబోయే న్యాయవిరోధి చేసే పాపం సరిగ్గా ఇదే (2 థెస్సలొనీకయులకు 2:3-4). బైబిల్లో నిజ దేవుడు మనుషులందరినీ సృష్టించినవాడుగా, వారికంటే అన్ని విధాలా ఉన్నతుడుగా తనను తాను వెల్లడి చేసుకున్నాడు (ఆదికాండము 2:7; సంఖ్యాకాండము 23:19; కీర్తనల గ్రంథము 9:19-20; యెషయా 40:22-26). కానీ యేసు మానవమాత్రుడు అనుకోవడంలో ఈ యూదులు ఘోరమైన పొరపాటులో ఉన్నారు.

33. అందుకు యూదులునీవు మనుష్యుడవై యుండి దేవుడనని చెప్పుకొనుచున్నావు గనుక దేవదూషణ చేసినందుకే నిన్ను రాళ్లతో కొట్టుదుము గాని మంచి క్రియ చేసినందుకు కాదని ఆయనతో చెప్పిరి.
లేవీయకాండము 24:16

34. అందుకు యేసు మీరు దైవములని నేనంటినని మీ ధర్మశాస్త్రములో వ్రాయబడియుండలేదా?
కీర్తనల గ్రంథము 82:6

కీర్తనల గ్రంథము 82:6. ఆ కీర్తన గురించి నోట్స్ చూడండి.

35. లేఖనము నిరర్థకము కానేరదు గదా, దేవుని వాక్యమెవరికి వచ్చెనో వారే దైవములని చెప్పినయెడల నేను దేవుని కుమారుడనని చెప్పినందుకు,

పూర్తి పాత ఒడంబడిక గ్రంథం (లేఖనం) రాయించినది దేవుడే అనీ అది దేవుని అధికారం గలదనీ యేసుప్రభువు ఇక్కడ స్థిరపరుస్తున్నాడు. మత్తయి 4:4, మత్తయి 4:7, మత్తయి 4:10; మత్తయి 5:17-18; మత్తయి 15:3; మత్తయి 22:43; మార్కు 12:36; లూకా 24:44 కూడా చూడండి. ఆయన దృష్టిలో పాత ఒడంబడిక గ్రంథం దేవుని వాక్కు.

36. తండ్రి ప్రతిష్ఠచేసి యీ లోకములోనికి పంపినవానితో నీవు దేవదూషణ చేయుచున్నావని చెప్పుదురా?

యేసు వారికిచ్చిన జవాబు స్పష్టంగా, చాలా ప్రభావం గలదిగా ఉంది. దేవుడే మానవమాత్రులను కీర్తన 82:6లో దేవుళ్ళు అనీ, సర్వాతీతుని కుమారులు అనీ అన్నాడు. ఇది దేవదూషణ కాదు. అలాగైతే సాక్షాత్తూ ఒక్కడే అయిన దేవుని కుమారుడే తాను ఆ కుమారుణ్ణి అని చెప్పుకోవడం దేవదూషణ ఎలా అవుతుంది? 82వ కీర్తనలో దేవుడు ఇస్రాయేల్ నాయకులకు వారి ఉన్నత పదవులకు అనుగుణంగా బిరుదులు ఇవ్వడం ద్వారా వారిని గౌరవిస్తున్నాడు. అయితే దేవుడు క్రీస్తును ప్రత్యేకించి ఈ లోకానికి పంపడం ద్వారా ఆయనను గౌరవించాడు (యోహాను 3:13-17; యోహాను 5:37; యోహాను 6:57; యోహాను 8:29 కూడా చూడండి).

37. నేను నాతండ్రి క్రియలు చేయనియెడల నన్ను నమ్మకుడి,

తాను దేవుని కుమారుణ్ణనీ, తండ్రితో ఏకమై ఉన్నాననీ చెప్పడమే కాదు, అందుకు ఆధారాలూ రుజువులూ ప్రదర్శించాడు. ఆయన అద్భుతాలు ఆయన మాటల్ని బలపరచాయి (యోహాను 2:11; యోహాను 5:36; మత్తయి 8:1; మత్తయి 11:4-5).

38. చేసినయెడల నన్ను నమ్మకున్నను, తండ్రి నాయందును నేను తండ్రియందును ఉన్నామని మీరు గ్రహించి తెలిసి కొనునట్లు ఆ క్రియలను నమ్ముడని వారితో చెప్పెను.

39. వారు మరల ఆయనను పట్టుకొన చూచిరి గాని ఆయన వారి చేతినుండి తప్పించుకొని పోయెను.

యేసు చెప్పగలిగినదేదీ కఠినులు, దురభిమానులు, బుద్ధికి వ్యతిరేకులు అయిన ఈ మనుషుల్ని ఒప్పించలేదు.

40. యొర్దాను అద్దరిని యోహాను మొదట బాప్తిస్మమిచ్చు చుండిన స్థలమునకు ఆయన తిరిగి వెళ్లి అక్కడనుండెను.

యోహాను 1:28. ఇది యొర్దాను నదికి తూర్పున ఉంది.

41. అనేకులు ఆయనయొద్దకు వచ్చి యోహాను ఏ సూచక క్రియను చేయలేదు గాని యీయననుగూర్చి యోహాను చెప్పిన సంగతులన్నియు సత్యమైన వనిరి.

“చెప్పినదంతా”– యోహాను 1:26-27, యోహాను 1:29, యోహాను 1:34.

42. అక్కడ అనేకులు ఆయనయందు విశ్వాసముంచిరి.

జెరుసలంలో గాఢమైన యూద మతనిష్ఠ వాతావరణానికి దూరంగా ఉన్నవారు క్రీస్తు ఉపదేశాలను అంత తేలికగా నిరాకరించక, నమ్మడానికి మరింత సుముఖంగా ఉన్నారు.