1. అన్యజనులును దేవుని వాక్యమంగీకరించిరని అపొస్తలులును యూదయ యందంతటనున్న సహోదరులును వినిరి.

2. పేతురు యెరూషలేమునకు వచ్చినప్పుడు సున్నతి పొందినవారు

ఇక్కడ సున్నతి గలవారంటే క్రైస్తవులుగా మారిన యూదులు.

3. నీవు సున్నతి పొందనివారియొద్దకు పోయి వారితోకూడ భోజనము చేసితివని అతనితో వాదము పెట్టుకొనిరి.

అపో. కార్యములు 10:23, అపో. కార్యములు 10:28. యూదులు కానివారు క్రీస్తును స్వీకరించారని వీరు సంతోషించవలసింది పోయి, వారు ఎవరి సేవవల్ల క్రీస్తును స్వీకరించారో ఆ దేవుని సేవకులను విమర్శించారు. దేవుని సేవకుల సేవలో ఆనందించడానికి బదులుగా వారిని విమర్శించడం, తప్పులు పట్టడం తరచుగా కొందరు క్రైస్తవుల అలవాటు. దీనితో ఫిలిప్పీయులకు 1:15-18 కనిపిస్తున్న పౌలు ధోరణిని పోల్చి చూడండి.

4. అందుకు పేతురు మొదటనుండి వరుసగా వారికి ఆ సంగతి ఈలాగు వివరించి చెప్పెను

5. నేను యొప్పే పట్టణములో ప్రార్థనచేయుచుండగా పరవశుడనైతిని, అప్పుడొక దర్శనము నాకు కలిగెను; అది ఏదనగా నాలుగు చెంగులు పట్టి దింపబడిన పెద్ద దుప్పటివంటి యొక విధమైన పాత్ర ఆకాశమునుండి దిగి నాయొద్దకు వచ్చెను.

6. దానివైపు నేను తేరి చూచి పరీక్షింపగా భూమియందుండు చతుష్పాద జంతువులును అడవి మృగములును ప్రాకెడు పురుగులును ఆకాశపక్షులును నాకు కనబడెను.

7. అప్పుడు పేతురూ, నీవు లేచి చంపుకొని తినుమని యొక శబ్దము నాతో చెప్పుట వింటిని.

8. అందుకు నేనువద్దు ప్రభువా, నిషిద్ధమైనది అపవిత్రమైనది ఏదియు నా నోట ఎన్నడును పడలేదని చెప్పగా

9. రెండవమారు ఆ శబ్దము ఆకాశము నుండిదేవుడు పవిత్రము చేసినవి నీవు నిషిద్ధమైనవిగా ఎంచవద్దని ఉత్తరమిచ్చెను.

10. ఈలాగు ముమ్మారు జరిగెను; తరువాత అదంతయు ఆకాశమునకు తిరిగి తీసికొని పోబడెను.

11. వెంటనే కైసరయనుండి నాయొద్దకు పంపబడిన ముగ్గురు మనుష్యులు మేమున్న యింటియొద్ద నిలిచి యుండిరి.

12. అప్పుడు ఆత్మనీవు భేదమేమియు చేయక వారితో కూడ వెళ్లుమని నాకు సెలవిచ్చెను. ఈ ఆరుగురు సహోదరులు నాతోకూడ వచ్చిరి; మేము కొర్నేలి యింట ప్రవేశించితివిు.

13. అప్పుడతడునీవు యొప్పేకు మనుష్యు లను పంపి పేతురు అను మారుపేరుగల సీమోనును పిలి పించుము;

14. నీవును నీ యింటివారందరును ఏ మాటలవలన రక్షణ పొందుదురో ఆ మాటలు అతడు నీతో చెప్పునని, తన యింట నిలిచి తనతో చెప్పిన యొక దేవదూతను చూచిన సంగతి మాకు తెలిపెను.

అపో. కార్యములు 10:2 నోట్. వారు భక్తిపరులు, ప్రార్థన చేసేవారు అయినా వారికింకా పాపవిముక్తి, రక్షణ కలగలేదు (రోమీయులకు 3:23).

15. నేను మాటలాడ నారంభించినప్పుడు పరిశుద్ధాత్మ మొదట మన మీదికి దిగిన ప్రకారము వారి మీదికిని దిగెను.

అపో. కార్యములు 10:44; అపో. కార్యములు 2:4.

16. అప్పుడుయోహాను నీళ్లతో బాప్తిస్మమిచ్చెను గాని మీరు పరిశుద్ధాత్మలో బాప్తి స్మము పొందుదురని ప్రభువు చెప్పినమాట నేను జ్ఞాపకము చేసికొంటిని.

అపో. కార్యములు 1:5.

17. కాబట్టి ప్రభువైన యేసు క్రీస్తునందు విశ్వాసముంచిన మనకు అనుగ్రహించినట్టు దేవుడు వారికి కూడ సమానవరము అనుగ్రహించి యుండగా, దేవుని అడ్డగించుటకు నేను ఏపాటివాడనని చెప్పెను.

అపో. కార్యములు 10:45; అపో. కార్యములు 2:38-39.

18. వారు ఈ మాటలు విని మరేమి అడ్డము చెప్పక అట్లయితే అన్య జనులకును దేవుడు జీవార్థమైన మారుమనస్సు దయచేసి యున్నాడని చెప్పుకొనుచు దేవుని మహిమ పరచిరి.

దేవుని ఇతర సేవకుల ప్రవర్తనకు కారణాలను అర్థం చేసుకోవడంవల్ల సరైన ప్రవర్తన, మనస్తత్వం మనకు కలుగవచ్చు. ఈ సందర్భంలో ఇలా జరిగింది. ఈ వచనంలో జీవం అంటే ఆధ్యాత్మిక శాశ్వత జీవమని అర్థం (యోహాను 3:16). పశ్చాత్తాపం ఇచ్చేది దేవుడే అని గమనించండి (అపో. కార్యములు 5:31; 2 తిమోతికి 2:25).

19. స్తెఫను విషయములో కలిగిన శ్రమనుబట్టి చెదరి పోయినవారు యూదులకు తప్ప మరి ఎవనికిని వాక్యము బోధింపక, ఫేనీకే, కుప్ర, అంతియొకయ ప్రదేశములవరకు సంచరించిరి.

అపో. కార్యములు 8:1, అపో. కార్యములు 8:4. “ఫీనీకే”– ఇస్రాయేల్‌కు ఉత్తరాన, మధ్యధరా సముద్ర తీరాన ఉన్న ప్రాంతం. దానిలో తూరు, సీదోను అనే పట్టణాలు ఉన్నాయి. “సైప్రస్”– తూరు సీదోనులకు పశ్చిమోత్తరాన, మధ్యధరా సముద్రంలో ఒక పెద్ద ద్వీపం. “అంతియొకయ”– మధ్యధరా సముద్ర తీరంనుంచి తూర్పుగా సుమారు 25 కిలోమీటర్ల దూరాన, సిరియా దేశంలో ఉన్న పెద్ద నగరం (అప్పుడు రోమ్ సామ్రాజ్యంలో నగరాలన్నిటిలో జనాభా విషయంలో మూడో నగరం. దానికంటే రోమ్, అలెగ్జాంద్రియ మాత్రమే పెద్దవి). మొదటి శతాబ్దంలో అంతియొకయ క్రైస్తవానికి చాలా ప్రాముఖ్య స్థలం అయింది. ఈ విశ్వాసులు యూదులకు మాత్రమే శుభవార్త ప్రకటించారు. ఎందుకంటే దేవుడు ఇతర ప్రజలకు కూడా పాపవిముక్తి లభించే అవకాశం దయ చేస్తున్నాడని వారు ఇంకా గ్రహించలేదు.

20. కుప్రీయులు కొందరును కురేనీయులు కొందరును వారిలో ఉండిరి. వీరు అంతియొకయకు వచ్చి గ్రీసు దేశపువారితో మాటలాడుచు ప్రభువైన యేసును గూర్చిన సువార్త ప్రకటించిరి;
నిర్గమకాండము 8:19

ఇది ఎప్పుడు జరిగిందో, ఈ మనుషులు గ్రీసువారికి శుభవార్త ప్రకటించడానికి ఎందుకు నిశ్చయించుకొన్నారో రాసిలేదు. బహుశా వారు 10వ అధ్యాయంలోని విషయాల గురించి విన్న తరువాత ఆ నిర్ణయానికి వచ్చారేమో.

21. ప్రభువు హస్తము వారికి తోడైయుండెను గనుక నమ్మిన వారనేకులు ప్రభువుతట్టు తిరిగిరి.

బోధకులకూ శుభవార్తికులకూ అవసరం ఇదే – ప్రభు హస్తం వారికి తోడై వారి పక్షంగా పని చేయడం.

22. వారినిగూర్చిన సమాచారము యెరూషలేములో నున్న సంఘపువారు విని బర్నబాను అంతియొకయవరకు పంపిరి.

“బర్నబా”– అపో. కార్యములు 4:36; అపో. కార్యములు 9:27.

23. అతడు వచ్చి దేవుని కృపను చూచి సంతోషించి, ప్రభువును స్థిరహృదయముతో హత్తుకొనవలెనని అందరిని హెచ్చరించెను.

“కృపను చూచి”– అంటే దేవుని కృపవల్ల కలిగిన ఫలితాలను చూశారు. ఆధ్యాత్మిక ఫలాలు కృపకు సూచనలు. యోహాను 15:1-6 చూడండి. ఇతరులను ప్రోత్సహించే సామర్థ్యం బర్నబాకు ఉంది (రోమీయులకు 12:6-8 పోల్చి చూడండి). ఇక్కడ బర్నబా వారిని ఏమి చేయాలని ప్రోత్సహించాడో గమనించండి. చపలచిత్తులైన క్రైస్తవులు అనేకమంది ఉన్నారు. అలాంటివారి మధ్య ప్రభువు పక్షాన స్థిరంగా నిలుచుండడం చాలా ప్రాముఖ్య విషయం.

24. అతడు పరిశుద్ధాత్మతోను విశ్వా సముతోను నిండుకొనిన సత్పురుషుడు; బహు జనులు ప్రభువు పక్షమున చేరిరి.

దేవుని వాక్కును ఇతరులకు ప్రకటించే ప్రతివాడూ ఉపదేశించే ప్రతి వ్యక్తీ (ఆ మాటకు వస్తే ప్రతి విశ్వాసీ కూడా) ఎలా ఉండాలో ఈ వచనంలో కనబడుతున్నది. క్రొత్త ఒడంబడిక గ్రంథంలో ఇద్దరిని గురించి మాత్రమే వారు మంచివారని రాసి ఉంది (ఆ మరో వ్యక్తి లూకా 23:50 లో కనిపిస్తున్నాడు). ఈ ఇద్దరు తప్ప మంచివారు ఎవరూ లేరని అర్థం కాదు. మత్తయి 5:45; మత్తయి 7:17-18; మత్తయి 12:35; లూకా 8:15; రోమీయులకు 15:14; 1 పేతురు 2:18 చూడండి. దేవుని ప్రజలకు ఉన్న మంచితనం పుట్టుకతో వారికి కలిగింది కాదు (మత్తయి 7:11; రోమీయులకు 7:18 చూడండి). వారిని మంచివారుగా చేసేది దేవుడే (గలతియులకు 5:22; ఎఫెసీయులకు 4:24; ఎఫెసీయులకు 5:9). దేవుని ఆత్మతో నిండి ఉండడం గురించి అపో. కార్యములు 2:4; ఎఫెసీయులకు 5:18 చూడండి. దేవుని ఆత్మతో నిండి ఉండడం విశ్వాసంతో నిండిపోవడానికి దారి తీస్తుంది. అప్పుడు దేవుని సేవలో ఆధ్యాత్మిక విజయాలు కలుగుతాయి.

25. అంతట అతడు సౌలును వెదకుటకు తార్సునకు వెళ్లి అతనిని కనుగొని అంతియొకయకు తోడుకొని వచ్చెను.

26. వారు కలిసి యొక సంవత్సర మంతయు సంఘములో ఉండి బహుజనములకు వాక్యమును బోధించిరి. మొట్టమొదట అంతియొకయలో శిష్యులు క్రైస్తవులనబడిరి.

“సంఘం”– మత్తయి 16:18 నోట్. మొదట క్రీస్తు అనుచరులను “క్రైస్తవులు” అని పిలిచినవారు బయటివారు ఈ గ్రంథంలో క్రీస్తుకు చెందినవారిని “శిష్యులు” (అపో. కార్యములు 6:1), “పవిత్రులు” (అపో. కార్యములు 9:13 నోట్‌), “సోదరులు” (అపో. కార్యములు 9:30), “విశ్వాసులు” (అపో. కార్యములు 10:45) అని పిలవడం చూడవచ్చు. అసలు ఈ వచనం మినహా అగ్రిప్ప (అపో. కార్యములు 26:28), పేతురు (1 పేతురు 4:16) మాత్రమే “క్రైస్తవుడు” అనే మాట వాడారు (ఇతరులు విశ్వాసులను “క్రైస్తవులు” అన్నారు గనుక పేతురు అక్కడ ఆ మాట వాడాడు. సాధారణంగా అతడు ఆ మాట వాడలేదు).

27. ఆ దినములయందు ప్రవక్తలు యెరూషలేమునుండి అంతియొకయకు వచ్చిరి.

ప్రవక్తల గురించి నోట్, రిఫరెన్సులు ఆదికాండము 20:7.

28. వారిలో అగబు అను ఒకడు నిలువబడి, భూలోకమంతట గొప్ప కరవు రాబోవుచున్నదని ఆత్మ ద్వారా సూచించెను. అది క్లౌదియ చక్రవర్తి కాలమందు సంభవించెను.

భవిష్యత్తులో ఏమి జరుగనున్నదో దాన్ని దేవుని ఆత్మ అగబుకు వెల్లడించాడు. అపో. కార్యములు 21:10-11 కూడా చూడండి. “క్లౌదియ”– క్రీస్తు శకం 41–54లో రోమ్ చక్రవర్తి.

29. అప్పుడు శిష్యులలో ప్రతి వాడును తన తన శక్తికొలది యూదయలో కాపురమున్న సహోదరులకు సహాయము పుంపుటకు నిశ్చయించుకొనెను.

క్రైస్తవులు నామకార్థ క్రైస్తవులు గాక “శిష్యులు”గా ఉండడం గొప్ప విషయం. వీరు చేసినదానితో 2 కోరింథీయులకు 8:1-5 ను పోల్చి చూడండి.

30. ఆలాగున చేసి బర్నబా సౌలు అను వారిచేత పెద్దల యొద్దకు దానిని పంపిరి.

నిశ్చయించుకోవడం మాత్రమే కాక చర్య తీసుకోవడం కూడా జరిగింది. 2 కోరింథీయులకు 8:10-11; యాకోబు 2:15; 1 యోహాను 3:17-18; మత్తయి 25:34-46 పోల్చి చూడండి.