1. అననీయ అను ఒక మనుష్యుడు తన భార్యయైన సప్పీరాతో ఏకమై పొలమమ్మెను.

దేవుని సంఘం ప్రవర్తనలో పవిత్రంగా ఉంది, ఆయన ఆత్మతో నిండివుంది, క్రీస్తును గురించి సాక్ష్యం చెపుతూ ఉంది. పాపం తప్ప దాని పనినీ అభివృద్ధినీ ఆటంకపరచగలిగేదీ ఏదీ లేదు. ఇక్కడ సైతాను దేవుని సంఘంలో చెడు విధానాలను ప్రవేశపెట్టే ప్రయత్నం కనిపిస్తున్నది. అననీయ, అతని భార్య తాము పొలం అమ్మిన డబ్బంతా ఇస్తున్నామన్నట్టు చెప్పారు (వ 8). ఔదార్యం, ఘనబుద్ధి లేకుండానే ఔదార్యం, ఘనబుద్ధి గలవారమన్న పేరు తమకు కలగాలని వారు కోరారు. తమ నిజ స్థితికంటే తాము ఎక్కువ ఆధ్యాత్మిక వ్యక్తులమని ఇతరులు అనుకోవాలని కోరారు. ఇది కపటం, మత వంచన. మత్తయి 6:2-4; మత్తయి 23:5-7 పోల్చి చూడండి.

2. భార్య యెరుకనే వాడు దాని వెలలో కొంత దాచుకొని కొంత తెచ్చి అపొస్తలుల పాదములయొద్ద పెట్టెను.

3. అప్పుడు పేతురు అననీయా, నీ భూమి వెలలో కొంత దాచుకొని పరి శుద్ధాత్మను మోసపుచ్చుటకు సాతాను ఎందుకు నీ హృదయమును ప్రేరేపించెను. ?

వారు తమ ఆస్తిని అమ్మి ఆ డబ్బులో కొంతైనా సంఘానికి ఇవ్వాలని ఏమీ బలవంతం లేదు. అపో. కార్యములు 2:44-45 చూడండి. అననీయ పలికిన అబద్ధం సైతానునుంచి వచ్చిందని గమనించండి. యోహాను 8:44 చూడండి. అబద్ధం చెప్పమని సైతాను అతణ్ణి ప్రేరేపించాడు. ఆ ప్రేరేపణకు అననీయ లొంగిపోయాడు. దేవుని ప్రజలతో అబద్ధమాడడం దేవునితో అబద్ధమాడినట్టే అని కూడా గమనించండి. అసలు మనం దేవుని ప్రజల పట్ల జరిగించేదంతా ఆయనపట్ల జరిగించినట్టే. అపో. కార్యములు 9:4-5; మత్తయి 25:34-46; మార్కు 9:37 చూడండి. అబద్ధమాడడం గురించిన రిఫరెన్సులు, నోట్స్ నిర్గమకాండము 20:16; కీర్తనల గ్రంథము 5:6; కీర్తనల గ్రంథము 15:2; కీర్తనల గ్రంథము 51:6; సామెతలు 6:16-19; సామెతలు 12:22; ఎఫెసీయులకు 4:15, ఎఫెసీయులకు 4:25; కొలొస్సయులకు 3:9; ప్రకటన గ్రంథం 21:8, ప్రకటన గ్రంథం 21:27; ప్రకటన గ్రంథం 22:15.

4. అది నీయొద్ద నున్నపుడు నీదే గదా? అమ్మిన పిమ్మట అది నీ వశమై యుండలేదా? యెందుకు ఈ సంగతి నీ హృదయములో ఉద్దేశించు కొన్నావు? నీవు మనుష్యులతో కాదు దేవునితోనే అబద్ధమాడితివని వానితో చెప్పెను.

5. అననీయ యీ మాటలు వినుచునే పడి ప్రాణము విడువగా వినినవారి కందరికిని మిగుల భయము కలిగెను;

అననీయ మరణం అతడిమీదికి వచ్చిన దేవుని శిక్షే గాని పేతురు చేసినదానికి ఫలితంగా కాదు. అననీయ చేసిన పాపం మూలంగా సంఘం ఆధ్యాత్మిక జీవానికి అపాయం కలిగింది గనుక ఆ అపాయాన్ని తొలగించడానికి దేవుడు తీవ్రమైన శిక్ష పంపవలసి వచ్చింది. దేవునికి కోపం కలుగుతుందేమో జాగ్రత్త! అనే భయం, కపటానికీ అబద్ధాలకూ రావలసిన శిక్షను గురించిన భయం చాలా సవ్యంగా, ఆరోగ్యకరంగా ఉంది. ఆదికాండము 20:11; కీర్తనల గ్రంథము 34:11-14; కీర్తనల గ్రంథము 111:10; సామెతలు 1:7 నోట్స్ చూడండి.

6. అప్పుడు పడుచు వారు లేచి వానిని బట్టతో చుట్టి మోసికొనిపోయి పాతిపెట్టిరి.

7. ఇంచుమించు మూడు గంటల సేపటికి వానిభార్య జరిగినది యెరుగక లోపలికి వచ్చెను.

8. అప్పుడు పేతురుమీరు ఆ భూమిని ఇంతకే అమ్మితిరా నాతో చెప్పుమని ఆమెను అడిగెను. అందుకామె అవును ఇంతకే అని చెప్పెను.

9. అందుకు పేతురు ప్రభువుయొక్క ఆత్మను శోధించుటకు మీరెందుకు ఏకీభవించితిరి? ఇదిగో నీ పెనిమిటిని పాతిపెట్టినవారి పాదములు వాకిటనే యున్నవి; వారు నిన్నును మోసికొని పోవుదురని ఆమెతొ చెప్పెను.

తన తీర్పు ఆమె మీదికి కూడా వచ్చిపడుతుందని దేవుడు పేతురుకు వెల్లడించాడు. ఆమె తన కథను మార్చి పశ్చాత్తాపపడడానికి పేతురు అవకాశం ఇచ్చాడు గాని ఆమె ముఖాముఖిగా అబద్ధమాడింది. అననీయ, సప్పీరాలు చేసిన పాపం దేవుని ఆత్మను పరీక్షించడమని గమనించండి. ద్వితీయోపదేశకాండము 6:16; మత్తయి 4:7; నిర్గమకాండము 17:7; కీర్తనల గ్రంథము 95:7-11 చూడండి.

10. వెంటనే ఆమె అతని పాదములయొద్ద పడి ప్రాణము విడిచెను. ఆ పడుచువారు, లోపలికి వచ్చి, ఆమె చనిపోయినది చూచి, ఆమెను మోసికొనిపోయి, ఆమె పెనిమిటియొద్ద పాతిపెట్టిరి.

11. సంఘమంతటికిని, ఈ సంగతులు వినినవారికందరికిని మిగుల భయము కలిగెను.

క్రైస్తవులు పాపం చేసేందుకు భయపడుతూ ఉంటే సంఘం పవిత్రంగా ఉంటుంది, దాని పనిలో శీఘ్రంగా ముందుకు సాగిపోతూ ఉంటుంది. ఈ కృప యుగంలో, పవిత్రాత్మ యుగంలో దేవుడు ఇక్కడ ఒక పాఠం నేర్పాడు – ఆయన పాపాన్ని చూచీ చూడనట్టుండడు, శిక్షించకుండా ఉండడు. పాపం అంత తేలికైన సంగతి కాదు. కపటం, వంచన, అబద్ధమాడడం గురించి తాను ఏమి అనుకుంటున్నాడో దేవుడు ఎప్పటికీ గుర్తుండేలా ఉదాహరణ ఇచ్చాడు. దేవుని దృష్టిలో అవి మరణానికి తగిన పాపాలు. సంఘంలో ఈ పాపాలు చేసినవారందరినీ దేవుడు చంపాడని అర్థం కాదు. విశ్వాసుల సమూహమంతటికీ భయం కలిగించేందుకు ఒకే ఉదాహరణ సరిపోయింది. ఈ ఒకే ఉదాహరణ మనకు కూడా సరిపోవాలి. దేవుడు ధర్మశాస్త్రాన్ని ఇచ్చినప్పుడు దానికి అవిధేయత చూపడం గురించి తాను ఏమి అనుకొంటున్నాడో దాన్ని సూచించే ఒక ఉదాహరణ ఇచ్చాడు. సంఖ్యాకాండము 15:32-36 చూడండి. ఇస్రాయేల్‌ప్రజలు కనానుదేశాన్ని జయించడం ఆరంభించి నప్పుడు కూడా దేవుడు ఒక ఉదాహరణ ఇచ్చాడు. యెహోషువ 7వ అధ్యాయం చూడండి. ఒక స్థానిక సంఘంలో క్రైస్తవులు సహించి ఉండనిచ్చిన పాపమే అన్నిటికంటే ఆ సంఘానికి అపాయకరం. అది చివరికి శరీరాన్ని చంపగలిగే కొరుకు పుండులాంటిది. సంఘం గురించి మత్తయి 16:18 నోట్స్ చూడండి.

12. ప్రజలమధ్య అనేకమైన సూచకక్రియలును మహ త్కార్యములును అపొస్తలులచేత చేయబడుచుండెను. మరియు వారందరు ఏకమనస్కులై సొలొమోను మంటప ములో ఉండిరి.

అపో. కార్యములు 2:43; అపో. కార్యములు 3:11.

13. కడమవారిలో ఎవడును వారితో కలిసి కొనుటకు తెగింపలేదు గాని

14. ప్రజలు వారిని ఘనపరచు చుండిరి. పురుషులును స్త్రీలును అనేకులు మరియెక్కువగ విశ్వాసులై ప్రభువు పక్షమున చేర్చబడిరి.

పవిత్రంగా ఉండి సాక్ష్యం చెపుతున్న సంఘం సేవ మూలంగా పాపులు క్రీస్తువైపుకు మళ్ళుకొని పాపవిముక్తులు అవుతారు. అననీయ, అతడి భార్య దేవుని తీర్పుకు గురి అయిన తరువాత సంఘం కొత్త విజయాలను సాధిస్తూ ముందుకు సాగింది. యెహో 8వ అధ్యాయం పోల్చి చూడండి.

15. అందు చేత పేతురు వచ్చుచుండగా జనులు రోగులను వీధులలోనికి తెచ్చి, వారిలో ఎవనిమీదనైనను అతని నీడయైనను పడవలెనని మంచములమీదను పరుపులమీదను వారిని ఉంచిరి.

పేతురుకు గానీ అతని నీడకు గానీ రోగులను బాగు చేసే శక్తి లేదు (అపో. కార్యములు 3:12). ప్రజల ఎదుట క్రీస్తురాయబారులను గౌరవించడానికీ దేవుడు ఈ విధానాన్ని ఎన్నుకున్నాడు. ఇప్పుడు వారి ఉపదేశం స్థాపించబడింది. క్రొత్త ఒడంబడిక గ్రంథం మనకు ఇవ్వబడింది. మరెవరి ద్వారానో సత్యాన్ని మళ్ళీ స్థాపించడం అనవసరం.

16. మరియు యెరూషలేము చుట్టునుండు పట్టణముల జనులు రోగులను అపవిత్రాత్మలచేత పీడింప బడిన వారిని మోసికొని కూడివచ్చిరి. వారందరు స్వస్థత పొందిరి.

ఇక్కడ క్రీస్తు శుభవార్త జెరుసలంనుంచి ఇతర స్థలాలకు వ్యాపించడం ఆరంభించింది. “మలిన పిశాచాల”– మత్తయి 4:24.

17. ప్రధానయాజకుడును అతనితో కూడ ఉన్నవారందరును, అనగా సద్దూకయ్యుల తెగవారు లేచి మత్సరముతో నిండుకొని

“సద్దూకయ్యుల”– మత్తయి 3:7. “అసూయ”– మత్తయి 27:18; సామెతలు 27:4; గలతియులకు 5:26 నోట్స్.

18. అపొస్తలులను బలాత్కారముగా పట్టుకొని పట్టణపు చెరసాలలో ఉంచిరి.

19. అయితే ప్రభువు దూత రాత్రివేళ ఆ చెరసాల తలుపులు తీసి వారిని వెలుపలికి తీసికొని వచ్చిమీరు వెళ్లి దేవాలయములో నిలువబడి

“దేవదూత”– ఆదికాండము 16:7. తన ప్రజలకు పరిచర్య చేయడానికి దేవుడు దేవదూతలను పంపుతాడు (హెబ్రీయులకు 1:14). వారు చేయగలిగేవాటిలో ఇది ఒక్క ఉదాహరణ మాత్రమే. అయితే వారు ఎల్లప్పుడూ విశ్వాసులను కష్టాలనుంచి విడిపించరు (అపో. కార్యములు 12:1-2; అపో. కార్యములు 24:27; 2 కోరింథీయులకు 11:23-27).

20. ఈ జీవమునుగూర్చిన మాటలన్నియు ప్రజలతో చెప్పుడని వారితో అనెను.

వారి విడుదల వారు భయంతో తమ ఇండ్లకు వెళ్ళి ఊరుకునేందుకు కాదు. ఇక్కడ శుభవార్తకు “ఈ జీవం” అనే మరో పేరు కనిపిస్తున్నది. శుభవార్త ప్రజలకు కొత్త జీవం తెస్తుంది (యోహాను 3:16; యోహాను 5:24), వారు కొత్త విధానంలో బ్రతికేందుకు కారణం అవుతుంది (2 కోరింథీయులకు 5:17).

21. వారామాట విని, తెల్లవారగానే దేవాలయములోనికి వెళ్లి బోధించుచుండిరి. ప్రధాన యాజకుడును అతనితోకూడ నున్న వారును వచ్చి, మహా సభవారిని ఇశ్రాయేలీయుల పెద్దలనందరిని పిలువనంపించివారిని తోడుకొని రండని బంట్రౌతులను చెరసాలకు పంపిరి.

వారి నమ్మకానికి గుర్తు విధేయత – దానివల్ల ఎంత కష్టం కలిగినా విధేయతలోనే కొనసాగాలి. “సమాలోచన సభ”– మత్తయి 5:22.

22. బంట్రౌతులు అక్కడికి వెళ్లినప్పుడు వారు చెరసాలలో కనబడనందున తిరిగివచ్చి

23. చెరసాల బహు భద్రముగా మూసియుండుటయు, కావలివారు తలుపుల ముందర నిలిచియుండుటయు చూచితివిు గాని తలుపులు తీసినప్పుడు లోపల మాకొకడైనను కనబడలేదని వారికి తెలిపిరి.

వెలుగుకంటే చీకటి అంటే ఇష్టం ఉన్నవారి అన్యాయమైన ధోరణి ఇది (యోహాను 3:19-20; యోహాను 10:31; యోహాను 12:10-11; యోహాను 15:18-20).

24. అంతట దేవాలయపు అధిపతియు ప్రధాన యాజకులును ఆ మాటలు వినిఇది యేమవునో అని వారి విషయమై యెటుతోచక యుండిరి.

25. అప్పుడు ఒకడు వచ్చిఇదిగో మీరు చెరసాలలో వేయించిన మనుష్యులు దేవాలయములో నిలిచి ప్రజలకు బోధించుచున్నారని వారికి తెలుపగా

26. అధిపతి బంట్రౌతులతో కూడ పోయి, ప్రజలు రాళ్లతో కొట్టుదురేమో అని భయపడి, బలాత్కారము చేయకయే వారిని తీసికొని వచ్చెను.

మత్తయి 21:46; లూకా 22:2. ఈ మత నాయకులకు న్యాయమంటే ఇంకా పట్టింపు లేదు. ఇతరులను ఏలడానికి ప్రయత్నించారు గాని అసూయ, విరోధ భావం, భయం వారిని ఏలాయి.

27. వారిని తీసికొని వచ్చి సభలో నిలువబెట్టగా

28. ప్రధానయాజకుడు వారిని చూచిమీరు ఈ నామమునుబట్టి బోధింపకూడdదని మేము మీకు ఖండితముగా ఆజ్ఞాపింపలేదా? ఇదిగో మీరు యెరూషలేమును మీ బోధతో నింపి, యీ మనుష్యుని హత్య మామీదికి తేవలెనని ఉద్దేశించుచున్నారని చెప్పెను.

“ఆ పేరున”– అంటే యేసు. ఆ పేరు ఉచ్చరించడం కూడా వారికి ఇష్టం లేదు. ఎంత న్యాయ విరుద్ధంగా, బుద్ధిహీనంగా వారు క్రీస్తురాయబారుల మీద నేరం మోపజూపారు. అంతకుముందు వారు పూర్తిగా అపరాధులు. మత్తయి 27:24-25 చూడండి.

29. అందుకు పేతురును అపొస్తలులునుమనుష్యలకు కాదు దేవునికే మేము లోబడవలెను గదా.

అపో. కార్యములు 4:19 చూడండి. దేవుని ఆజ్ఞలకూ మనుషుల ఆజ్ఞలకూ పొందిక లేనప్పుడు ప్రతి విశ్వాసీ అనుసరించవలసిన నియమం ఇక్కడ ఉంది. దేవునికి చూపిన విధేయతను బట్టి వారికి హింస, ఖైదు, చివరికి మరణం కలిగాయి. అయినా వారు ఈ నియమాన్నే గట్టిగా చేపట్టి ముందుకు సాగారు.

30. మీరు మ్రానున వ్రేలాడవేసి సంహరించిన యేసును మన పితరుల దేవుడు లేపెను.
ద్వితీయోపదేశకాండము 21:22-23

అపో. కార్యములు 2:23-24; అపో. కార్యములు 4:10. పేతురు సిలువను సూచించడానికి “మ్రాను” అనే పదం వాడాడు (అపో. కార్యములు 10:39; గలతియులకు 3:13; గలతియులకు 3:29; 1 పేతురు 2:24 కూడా చూడండి). ద్వితీయోపదేశకాండము 21:22 పోల్చి చూడండి.

31. ఇశ్రాయేలునకు మారుమనస్సును పాప క్షమాపణను దయచేయుటకై దేవుడాయనను అధిపతిని గాను రక్షకునిగాను తన దక్షిణహస్తబలముచేత హెచ్చించి యున్నాడు.

అపో. కార్యములు 2:33-36. పశ్చాత్తాపం, క్షమాపణ కలిసి వస్తాయనీ, రెండూ క్రీస్తు ఉచితంగా ఇచ్చేవే అనీ మరో సారి గమనించండి (అపో. కార్యములు 2:38; లూకా 24:47; 2 తిమోతికి 2:25).

32. మేమును, దేవుడు తనకు విధేయులైన వారికి అనుగ్రహించిన పరిశుద్ధాత్మయు, ఈ సంగతులకు సాక్షులమై యున్నామని చెప్పిరి.

అపో. కార్యములు 1:8; అపో. కార్యములు 2:32; అపో. కార్యములు 3:15; అపో. కార్యములు 4:33. రాయబారుల ద్వారా జరిగించిన అద్భుతాలవల్ల, సాక్ష్యం చెప్పినప్పుడు వారికి అధికారాన్నీ బలప్రభావాలనూ ఇవ్వడంవల్ల, వారి సాక్ష్యం విన్నవారి హృదయాలతో మాట్లాడడంవల్ల పవిత్రాత్మ సాక్షిగా ఉన్నాడు. విధేయతకూ దేవుని ఆత్మను పొందడానికీ గల సంబంధాన్ని గమనించండి. వేరే చోట్ల అడగడంవల్ల, విశ్వాసంవల్ల పవిత్రాత్మ వస్తాడని కనిపిస్తున్నది (లూకా 11:13; గలతియులకు 3:14). యేసుప్రభువులో ఉంచిన విశ్వాసం అనే విధేయత గురించి మాట్లాడుతున్నాడు పేతురు. యోహాను 6:29; రోమీయులకు 1:7 చూడండి. క్రీస్తుమీద నమ్మకం ఉంచడం దేవుని సంకల్పానికి లోబడడం. క్రీస్తుకు లోబడి ఆయనకు విధేయత చూపే మనసు లేకపోతే ఆయనలో నమ్మకం పెట్టడం అసాధ్యం. దేవునికి లొంగకుండా తిరగబడే హృదయంలో నమ్మకం పుట్టదు. తనకు విధేయత చూపేందుకు సిద్ధంగా ఉన్నవారికే దేవుడు తన ఆత్మను ప్రసాదిస్తాడు. వారు తనకు ఇంకా విధేయత చూపాలని ఆయనను ప్రసాదిస్తాడు. మత్తయి 7:21; రోమీయులకు 10:9-10 కూడా చూడండి.

33. వారు ఈ మాట విని అత్యాగ్రహము తెచ్చుకొని వీరిని చంప నుద్దేశించగా

34. సమస్త ప్రజలవలన ఘనత నొందినవాడును ధర్మశాస్త్రోపదేశకుడునైన గమలీయేలను ఒక పరిసయ్యుడు మహాసభలో లేచిఈ మనుష్యులను కొంత సేపు వెలుపల ఉంచుడని ఆజ్ఞాపించి వారితో ఇట్లనెను

“పరిసయ్యుడు”– మత్తయి 3:7. గమలీయేల్ తార్సువాడైన సౌలుకు మత గురువు (అపో. కార్యములు 22:3). తరువాత సౌలు క్రీస్తురాయబారి పౌలు అయ్యాడు.

35. ఇశ్రాయేలీయులారా, యీ మనుష్యుల విషయమై మీరేమి చేయబోవుచున్నారో జాగ్రత్తసుమండి.

36. ఈ దినములకు మునుపు థూదా లేచి తానొక గొప్ప వాడనని చెప్పుకొనెను; ఇంచుమించు నన్నూరుమంది మనుష్యులు వానితో కలిసి కొనిరి, వాడు చంపబడెను, వానికి లోబడిన వారందరును చెదరి వ్యర్థులైరి.

ఇవి బైబిలులో రాసి లేని సంఘటనలు.

37. వానికి తరువాత జనసంఖ్య దినములలో గలిలయుడైన యూదా అను ఒకడు వచ్చి, ప్రజలను తనతో కూడ తిరుగుబాటుచేయ ప్రేరేపించెను; వాడుకూడ నశించెను, వానికి లోబడినవారందరును చెదరి పోయిరి.

38. కాబట్టి నేను మీతో చెప్పునదేమనగా ఈ మనుష్యుల జోలికి పోక వారిని విడిచిపెట్టుడి. ఈ ఆలోచనయైనను ఈ కార్యమైనను మనుష్యులవలన కలిగిన దాయెనా అది వ్యర్థమగును.

39. దేవునివలన కలిగినదాయెనా మీరు వారిని వ్యర్థపరచలేరు; మీరొకవేళ దేవునితో పోరాడువారవుదురు సుమీ.

దేవుడు ఆ యూద నాయకుల కోపాన్ని చల్లార్చడానికి ఈ సలహాను ఉపయోగించాడు. దానిద్వారా అప్పుడు రాయబారులను మరణం నుంచి విడిపించాడు. అయినా 38 వ వచనంలో గమలీయేల్ చెప్పినది నిజం కాదు. మనుషులు కల్పించిన అనేక వేదాంతాలూ మత సంబంధమైన వ్యవస్థలూ పద్ధతులూ, సైతాను చేసే పనులూ అనేక శతాబ్దాలుగా ముందుకు సాగుతూ ఇహలోక సంబంధంగా అభివృద్ధి పొందుతూ ఉంటాయి. అయితే నిత్యత్వం సంబంధంగా గమలీయేల్ చెప్పినది నిజం. మానవమాత్రుల ద్వారా పుట్టే ప్రతిదీ చివరికి శూన్యం అవుతుంది (యెషయా 2:10-22 పోల్చి చూడండి). వ 39లోని గమలీయేల్ మాటలు ఎప్పుడూ నిజమే. ఆ రోజుల్లో కూడా అనేకమంది చేస్తున్నదాన్ని అతడు తగిన విధంగా వివరించాడు – వారు “దేవునితోనే పోరాడేవారు”.

40. వారతని మాటకు సమ్మతించి, అపొస్తలులను పిలిపించి కొట్టించియేసు నామమునుబట్టి బోధింపకూడదని ఆజ్ఞాపించి వారిని విడుదల చేసిరి.

కొరడాలతో కొట్టడం అనేది కఠినమైన శిక్ష. వారిని వీపుమీద 39 కొరడా దెబ్బలు కొట్టారు (మత్తయి 27:26; 2 కోరింథీయులకు 11:24).

41. ఆ నామముకొరకు అవమానము పొందుటకు పాత్రులని యెంచబడినందున వారు సంతోషించుచు మహాసభ యెదుటనుండి వెళ్లిపోయి

దేవునితో సరైన సంబంధం కలిగి ప్రభువైన యేసు క్రీస్తును ప్రేమించడం ద్వారా జీవితానికీ ప్రవర్తనకూ ఎంత మార్పు కలుగుతుంది! అలాంటివారు అవమానాన్నీ అపకీర్తినీ ఆనందంగా భావించుకోగలరు (యోహాను 16:33; మత్తయి 5:11-12; యాకోబు 1:2; 1 పేతురు 4:12-16). ఇక్కడ ఈ రాయబారులు అవమానానికీ, అవమాన భావాన్ని తెచ్చే గర్వానికీ దూరమైన ఉన్నత స్థితిలో ఉన్నారు.

42. ప్రతిదినము దేవాలయములోను ఇంటింటను మానక బోధించుచు, యేసే క్రీస్తని ప్రకటించుచుండిరి.

కఠినమైన శిక్ష, ఖైదు, మరణం గురించిన బెదిరింపు మాటలు – వీటిలో ఏదీ పవిత్రాత్మతో నిండి ఉన్న యేసుప్రభు సేవకులను ఆపడం అసాధ్యం.