1. కాబట్టి శరీరము విషయమై మన మూలపురుషుడగు అబ్రాహామునకేమి దొరికెనని అందుము.

“మన”– యూదుడుగా అబ్రాహాము సంతానంగా పుట్టిన పౌలు మాట్లాడుతున్నాడు. యూదులంతా అబ్రాహాము సంతానం (ఆది 12–25 అధ్యాయాలు). సాధారణంగా ఈ సంబంధాన్ని బట్టి యూదులకు గర్వం. తాము శారీరికంగా అబ్రాహాము సంతానం కాబట్టి తామంతా దేవుని సంతానమని చాలమంది భావించారు (మత్తయి 3:9; యోహాను 8:33, యోహాను 8:39). వారిలో చాలామంది ధర్మశాస్త్రంలోని ఆజ్ఞలు, ఆచారాలు పాటించడంపై విముక్తి, రక్షణ ఆధారపడి ఉంటాయనుకున్నారు. ఎక్కడికి వెళ్ళినా పౌలును ఇలాంటివారు ఎదిరించారు (అపో. కార్యములు 9:23; అపో. కార్యములు 13:45; అపో. కార్యములు 14:5, అపో. కార్యములు 14:19; అపో. కార్యములు 15:1; అపో. కార్యములు 17:5; అపో. కార్యములు 21:11; 2 కోరింథీయులకు 11:24; 1 థెస్సలొనీకయులకు 2:14-16). పౌలు ఇక్కడ అబ్రాహాము విషయం ఎందుకు తెచ్చాడు? నమ్మకం ద్వారానే మనుషులు నిర్దోషుల లెక్కలోకి వస్తారన్న తన ఉపదేశం అబ్రాహాము గురించి పాత ఒడంబడిక గ్రంథం చెప్తున్నదానికి అనుగుణంగానే ఉందని చూపించడం కోసమే.

2. అబ్రాహాము క్రియల మూలముగా నీతిమంతుడని తీర్చబడినయెడల అతనికి అతిశయకారణము కలుగును గాని అది దేవుని యెదుట కలుగదు.
ఆదికాండము 15:6

రోమీయులకు 3:27 చూడండి.

3. లేఖనమేమి చెప్పుచున్నది? అబ్రాహాము దేవుని నమ్మెను, అది అతనికి నీతిగా ఎంచబడెను
ఆదికాండము 15:6

ఆదికాండము 15:6. అక్కడ నోట్ చూడండి. ఈ ఒక్క రిఫరెన్సు ద్వారా పౌలు తాను చెప్పినదాన్ని రుజువు చేశాడు. “లేఖనం చెప్పేదేమిటి”? – మనకు సత్యం కావాలంటే ఇది ప్రాముఖ్యమైన ప్రశ్న.

4. పని చేయువానికి జీతము ఋణమేగాని దానమని యెంచ బడదు.

మనుషుల మత సంబంధమైన క్రియలనుబట్టి దేవుడు వారిని రక్షిస్తాడంటే వారు తమ రక్షణను తామే సంపాదించు కుంటారన్నమాట. అలాంటప్పుడు వారు గొప్పలు చెప్పుకునేందుకు ఆస్కారం ఉంటుంది.

5. పనిచేయక, భక్తిహీనుని నీతిమంతునిగా తీర్చు వానియందు విశ్వాసముంచు వానికి వాని విశ్వాసము నీతిగా ఎంచబడుచున్నది.

పాపవిముక్తి, రక్షణ, నీతిన్యాయాలు దేవుడు ఉచితంగా ఇచ్చేవే. వాటిని పాందడానికి ఏకైక మార్గం ఏమిటంటే విశ్వాస హస్తంతో వాటిని దేవునినుంచి తీసుకోవడమే (రోమీయులకు 3:21-28; రోమీయులకు 6:23; రోమీయులకు 11:6). మనుషులు స్వభావ సిద్ధంగా ఆలోచించేదానికి ఇది సరిగ్గా వ్యతిరేకం. తాము చేసే పనులను బట్టి తాము న్యాయవంతులం అనుకోవడం మనుషులకు ఇష్టం. తమ అభిప్రాయంలో తాము చేస్తున్న మంచి పనులను బట్టి ముక్తిని, రక్షణను సంపాదించుకోగలం అనుకుంటారు. ముక్తి, రక్షణ కోసం “పని చెయ్యి” అంటారు మనుషులు. దానికోసం “పని చెయ్యవద్దు” అంటాడు దేవుడు. దేవుడు నిర్దోషులుగా తేల్చేది ఎవరినో గమనించండి – “పాపులను”. దేవుని దృష్టిలో పాపులు కాని వారెవరూ లేరు – రోమీయులకు 3:9-19; మత్తయి 7:11. పశ్చాత్తాపపడి యేసుప్రభువు మీద నమ్మకం పెట్టుకుంటే దేవుడు విముక్తుల్ని చేసి నిర్దోషులుగా చేయలేనంత దుర్మార్గులు ఎవరూ లేరు. పౌలు సంగతే ఆలోచించండి (అపో. కార్యములు 8:3; అపో. కార్యములు 9:1-5). సిలువపై దొంగ విషయం చూడండి (లూకా 23:39-43). యెషయా 55:7; 1 కోరింథీయులకు 6:9-11.

6. ఆ ప్రకారమే క్రియలు లేకుండ దేవుడెవనిని నీతిమంతుడుగా ఎంచునో ఆ మనుష్యుడు ధన్యుడని దావీదుకూడ చెప్పుచున్నాడు.

ఇస్రాయేల్‌వారి రాజుల్లో గొప్పవాడైన దావీదు అబ్రాహాము గురించి చెప్పబడినదానితో ఏకీభవించాడు. కీర్తనల గ్రంథము 32:1-2 చూడండి. దేవుడు దయామయుడు గనుక, మనుషులకు ఆ ఉచిత కృపావరం ఇవ్వడం ఆయనకు ఇష్టం గనుక ఆయన మనుషులను క్షమిస్తాడు. అంతేగాని వారు మంచివారనీ, అందుకు తగినవిధంగా పని చేసి దాన్ని సంపాదించుకున్నారనీ కాదు. నిర్దోషిగా ఎంచడమంటే ఏమిటో ఇక్కడ చూడండి – అప్పటినుంచి నిర్దోషులుగా ఎంచబడినవారి పాపాలను దేవుడు వారి లెక్కలో ఉంచడు (రోమీయులకు 8:33-34).

7. ఏలాగనగా తన అతిక్రమములకు పరిహారము నొందినవాడు తన పాపమునకు ప్రాయశ్చిత్తము నొందినవాడు ధన్యుడు.
కీర్తనల గ్రంథము 32:1-2

8. ప్రభువు చేత నిర్దోషియని ఎంచబడినవాడు ధన్యుడు,
కీర్తనల గ్రంథము 32:1-2

9. ఈ ధన్యవచనము సున్నతిగలవారినిగూర్చి చెప్పబడినదా సున్నతిలేనివారినిగూర్చికూడ చెప్ప బడినదా? అబ్రాహాము యొక్క విశ్వాస మతనికి నీతి అని యెంచబడెనను చున్నాము గదా?
ఆదికాండము 15:6

“సున్నతి ఉన్నవారి”– అంటే యూదులు, శారీరికంగా అబ్రాహాము సంతానం. సున్నతి లేనివారంటే ఇతర ప్రజలు.

10. మంచిది; అది ఏ స్థితి యందు ఎంచ బడెను?సున్నతి కలిగి యుండినప్పుడా సున్నతి లేనప్పుడా? సున్నతి కలిగి యుండినప్పుడు కాదు సున్నతి లేనప్పుడే.

ఇది యూదుల గర్వం పై లేఖనాల సహాయంతో వేసిన గట్టి దెబ్బ. అబ్రాహాము సున్నతి పొందకమునుపే దేవుడతణ్ణి నిర్దోషిగా ఎంచాడు. అంటే అతడింకా ఇతర ప్రజల్లో ఒకడుగా ఉన్నప్పుడే! ఆది 15వ అధ్యాయంలో దేవుడు అబ్రాహామును నిర్దోషిగా తీర్చాడు. అబ్రాహాముకు సున్నతి చేసినది ఆది 17వ అధ్యాయంలో. అబ్రాహాము విముక్తికీ సున్నతికీ ఏ సంబంధమూ లేదని చూపించేందుకు దేవుడు ఈ విధంగా ఏర్పాటు చేశాడు. అబ్రాహాము విశ్వాసం మూలంగా మాత్రమే నిర్దోషుల లెక్కలోకి వచ్చాడు. అతణ్ణి అనుసరించ దలచిన వారంతా యూదులైనా ఇతర ప్రజలైనా అదే పద్ధతిలో నిర్దోషుల లెక్కలోకి రావాలి. ఏకైక నిజ దేవునిలో నమ్మకం ఉంచిన వారందరికీ అబ్రాహాము తండ్రి. అంటే అబ్రాహాములో దేవుడు తాను మొట్టమొదటి సారిగా మనుషులను ఏ పద్ధతి ద్వారా నిర్దోషులుగా తీరుస్తున్నాడో చూపించాడన్నమాట. అబ్రాహాముకు అంతకు క్రితమే ఉన్నదానికి సున్నతి అనేది ఒక ముద్ర లేక గురుతు మాత్రమే. (ఇప్పుడు బాప్తిసం గురించి కూడా ఇదే చెప్పవచ్చు. ఇది ఒక గుర్తు మాత్రమే. నమ్మకం ద్వారా దేవుడిచ్చే నీతిన్యాయాలు, విముక్తి లేనివారికి అది దేనికీ పనికి రాదు.)

11. మరియు సున్నతి లేని వారైనను, నమ్మినవారికందరికి అతడు తండ్రి యగుటవలన వారికి నీతి ఆరోపించుటకై, అతడు సున్నతి పొందకమునుపు, తనకు కలిగిన విశ్వాసమువలననైన నీతికి ముద్రగా, సున్నతి అను గురుతు పొందెను.
ఆదికాండము 17:11

12. మరియు సున్నతి గలవారికిని తండ్రియగుటకు, అనగా సున్నతిమాత్రము పొందినవారు గాక, మన తండ్రియైన అబ్రాహాము సున్నతి పొందకమునుపు అతనికి కలిగిన విశ్వాసముయొక్క అడుగు జాడలనుబట్టి నడుచుకొనిన వారికి తండ్రి అగుటకు, అతడు ఆ గురుతు పొందెను.

13. అతడు లోకమునకు వారసుడగునను వాగ్దానము అబ్రాహామునకైనను అతని సంతానమునకైనను ధర్మశాస్త్రమూలముగా కలుగలేదుగాని విశ్వాసమువలననైన నీతి మూలము గానే కలిగెను.
ఆదికాండము 18:18, ఆదికాండము 22:17-18

దేవుడు మోషేకిచ్చిన ధర్మశాస్త్రంతో నిమిత్తం లేకుండానే దేవుడు అబ్రాహామును నిర్దోషిగా లెక్కించాడని పౌలు చూపిస్తున్నాడు (విముక్తి పొందాలంటే ఆ ధర్మశాస్త్రాన్ని పాటించాలని యూదులు బోధిస్తూ వచ్చారు). దేవుడు అబ్రాహామును నిర్దోషిగా ఎంచిన తరువాత కొన్ని వందల సంవత్సరాలకు గాని ధర్మశాస్త్రాన్నివ్వలేదు (గలతియులకు 3:16-18). దేవుడు అబ్రాహాముకు కనాను దేశాన్ని ఇస్తానని వాగ్దానం చేశాడు (ఆదికాండము 15:7, ఆదికాండము 15:18). ఇది ఎందుచేతనంటే అబ్రాహాము దేవుణ్ణి నమ్మాడు. దేవుడు ధర్మశాస్త్రాన్ని ఇవ్వకముందు చాలాకాలం క్రితమే ఈ వాగ్దానం చేశాడు. అంతేగాక లోకమంతా అబ్రాహాము ద్వారా ధన్యమవుతుందని కూడా వాగ్దానం చేశాడు – ఆదికాండము 12:1-3. అబ్రాహాము సంతానంలో అభిషిక్తుడు అనబడే వ్యక్తిద్వారా ఈ ధన్యత వస్తుందని చెప్పాడు (అభిషిక్తుడు క్రీస్తు. కీర్తనల గ్రంథము 72:5-11; మత్తయి 1:1 చూడండి). అభిషిక్తుడు (ఆయనతో బాటు నమ్మకం ఉంచినవారంతా) లోకమంతటికీ వారసుడు (రోమీయులకు 8:17; హెబ్రీయులకు 1:2).

14. ధర్మశాస్త్ర సంబంధులు వారసులైన యెడల విశ్వాసము వ్యర్థమగును, వాగ్దానమును నిరర్థక మగును.

దేవుని ధర్మశాస్త్రానికి లోబడడం ద్వారా మనుషులు దేవుని వారసులు కాగలిగితే ఆయన వాగ్దానాల్లో నమ్మకం పెట్టుకోవడం అనవసరం. అసలు ఆ వాగ్దానాలే అనవసరం. అందువల్ల క్రియల ద్వారా పాపవిముక్తి, రక్షణ అనే తలంపే విపరీతం.

15. ఏలయనగా ధర్మశాస్త్రము ఉగ్రతను పుట్టించును; ధర్మశాస్త్రము లేని యెడల అతిక్రమమును లేక పోవును.

దేవుని ధర్మశాస్త్రాన్ని పాటించడం ద్వారా న్యాయవంతులు కావాలనుకునేవారు తమమీదికి దేవుని కోపాన్ని మాత్రమే తెచ్చుకుంటున్నారు. ఎందుకంటే ధర్మశాస్త్రాన్ని పాటించడానికి బదులుగా దాన్ని వారు మీరుతున్నారు. ఇలా ఉల్లంఘించడం వారి దోషాన్ని మరింత పెంచుతుంది (రోమీయులకు 5:20; రోమీయులకు 7:7-11; గలతియులకు 3:10 పోల్చి చూడండి).

16. ఈ హేతువుచేతను ఆ వాగ్దానమును యావత్సంతతికి, అనగా ధర్మశాస్త్రముగలవారికి మాత్రముకాక అబ్రాహామునకున్నట్టి విశ్వాసముగలవారికికూడ దృఢము కావలెనని, కృప ననుసరించినదై యుండునట్లు, అది విశ్వాసమూలమైనదాయెను.

విముక్తి వాగ్దానానికీ దానితో కలిసి ఉండే వారసత్వానికీ దేవుని ధర్మశాస్త్రాన్ని పాటించడంతో ఏ సంబంధమూ లేదు కాబట్టి, కేవలం నమ్మకం మాత్రమే దానికి అవసరం కాబట్టి అది అన్ని జనాల వారికీ లభించగలదు. యూదులనీ, ఇతర జనాలనీ తేడా లేదు. దేవుడు విముక్తికి మార్గంగా నమ్మకాన్ని ఎందుకు నియమించాడో ఆ కారణం ఈ వచనంలో కనిపిస్తున్నది. విముక్తిని, రక్షణను తన కృపవల్ల ఉచితంగా ఇవ్వాలని ఆయన నిర్ణయించాడు, గానీ చేసిన పనికి జీతంగా కాదు.

17. తాను విశ్వసించిన దేవుని యెదుట, అనగా మృతులను సజీవులనుగా చేయువాడును, లేనివాటిని ఉన్నట్టుగానే పిలుచువాడునైన దేవుని యెదుట, అతడు మనకందరికి తండ్రియైయున్నాడు ఇందును గూర్చినిన్ను అనేక జనములకు తండ్రినిగా నియమించితిని అని వ్రాయబడియున్నది.
ఆదికాండము 17:15, యెషయా 48:13

ఆదికాండము 17:5. నమ్మిన వారందరికీ అబ్రాహాము ఆధ్యాత్మికంగా తండ్రి (వ 11). ఈ వచనం చివరి భాగంలో అబ్రాహాము నమ్మకం ఎలాంటిదో చూపించడం ఆరంభిస్తున్నాడు పౌలు. అతడు నమ్మకం పెట్టినది సర్వ శక్తి, సర్వ జ్ఞానం ఉన్న సృష్టికర్తమీదే. ఆ దేవుడు ఏదైనా చెయ్యగలడు. తానేమి చెయ్యబోతున్నాడో ముందుగా చెప్పగలడు. “చనిపోయినవారికి జీవమిస్తాడు”– హెబ్రీయులకు 11:19, హెబ్రీయులకు 11:35 చూడండి.

18. నీ సంతానము ఈలాగు ఉండునని చెప్పిన దానినిబట్టి తాననేక జనములకు తండ్రి యగునట్లు, నిరీక్షణకు ఆధారము లేనప్పుడు అతడు నిరీక్షణ కలిగి నమ్మెను.
ఆదికాండము 15:5

అబ్రాహాము నమ్మకం ఎలాంటిది? మానవ పరంగా చూస్తే దేవుని వాగ్దానం నెరవేరే అవకాశాలు బొత్తిగా లేనప్పుడు అతడు దేవుణ్ణి నమ్మాడు (వ 18; ఆదికాండము 15:4-5). దేవుడు చేస్తానని ఇచ్చిన మాట నెరవేరడం తనకు అసాధ్యం అనిపించినా అబ్రాహాము ఆయనపై నమ్మకం పెట్టుకున్నాడు (వ 19. అబ్రాహాము వయసు దాదాపు నూరేళ్ళు. శారా తొంభై ఏళ్ళ వయసు గలది. అప్పుడు ఆమె అబ్రాహాముకు ఒక కొడుకును కంటుందని దేవుడు చెప్పాడు – ఆదికాండము 17:1, ఆదికాండము 17:15-16). అబ్రాహాము తన శక్తి సామర్థ్యాలపై గాక దేవునిపైనే నమ్మకం పెట్టుకున్నాడు. దేవుడు కేవలం వాగ్దానం చేశాడు గనుక, దేవుడు దాన్ని నెరవేర్చగలడు గనుక, నెరవేరుస్తాడు గనుక అతడు దేవుణ్ణి నమ్మాడు. దేవుడు తాను చెప్పినదాన్ని చేస్తానని అబ్రాహాముకు ఎలాంటి రుజువూ చూపలేదు. కేవలం తన మాట మాత్రం ఇచ్చాడు. అబ్రాహాము దాన్ని నమ్మాడు (వ 20,21).

19. మరియు అతడు విశ్వాసమునందు బలహీనుడు కాక, రమారమి నూరేండ్ల వయస్సుగలవాడై యుండి, అప్పటికి తన శరీరము మృతతుల్యమైనట్టును, శారాగర్భమును మృతతుల్యమైనట్టును ఆలోచించెను గాని,
ఆదికాండము 17:17

20. అవి శ్వాసమువలన దేవుని వాగ్దానమునుగూర్చి సందేహింపక

21. దేవుని మహిమపరచి, ఆయన వాగ్దానము చేసినదానిని నెరవేర్చుటకు సమర్థుడని రూఢిగా విశ్వసించి విశ్వాసమువలన బలమునొందెను.

22. అందుచేత అది అతనికి నీతిగా ఎంచబడెను.
ఆదికాండము 15:6

వ 3.

23. అది అతనికి ఎంచబడెనని అతని నిమిత్తము మాత్రమే కాదుగాని

విముక్తి, రక్షణ పొందడానికి, లోకానికి వారసులు కావడానికి (వ 13) మన నమ్మకం అబ్రాహాము నమ్మకం వంటిది కావాలి. ఉన్నాడని ప్రజలు భావిస్తున్న ఏదో ఒక దేవుణ్ణి లేక దేవతను నమ్ముకుంటే సరిపోదు. చనిపోయిన యేసుప్రభువును సజీవంగా లేపిన దేవునిలో నమ్మకం ఉంచాలి (వ 24; రోమీయులకు 10:9). ఎందుకంటే ఉన్న దేవుడు ఆయనొక్కడే. ఈ ఒక్క దేవుడూ ఉన్నాడనీ, ఆయన శక్తివంతుడనీ నమ్మినంత మాత్రాన సరిపోదు (యాకోబు 2:19). ఆయన మనకు చేసిన వాగ్దానాలను నమ్మాలి. ఆయనమీద ఆయన వాక్కుమీద నమ్మకం పెట్టి ఆధారపడాలి (హెబ్రీయులకు 11:6. ఆయన తన కుమారుని ద్వారా ఇచ్చిన వాగ్దానాలు కొన్నిటిని ధ్యానించండి – యోహాను 3:16; యోహాను 4:14; యోహాను 5:24; యోహాను 6:37; యోహాను 7:38; యోహాను 11:25-26; ప్రకటన గ్రంథం 3:20; మత్తయి 11:28). మనం నమ్మితే ఆయన అబ్రాహామును చేసినట్టుగానే మనల్నీ నిర్దోషుల లెక్కలో చేరుస్తాడు.

24. మన ప్రభువైన యేసును మృతులలోనుండి లేపినవానియందు విశ్వాసముంచిన మనకును ఎంచబడునని మన నిమిత్తముకూడ వ్రాయ బడెను.

25. ఆయన మన అపరాధముల నిమిత్తము అప్పగింప బడి, మనము నీతిమంతులముగా తీర్చబడుటకై లేపబడెను.
యెషయా 53:5, యెషయా 53:12

విశ్వాసుల విముక్తి, రక్షణ ఈ ఒక్క పునాది మీదే ఉంది – క్రీస్తు మరణం, పునర్జీవితం (1 కోరింథీయులకు 15:1-4). క్రీస్తు పాపుల స్థానంలో, వారి పాపాలను బట్టి వారు పొందవలసిన మరణాన్ని ఆయన అనుభవించాడు. క్రీస్తు బలిని దేవుడు అంగీకరించాడనడానికి రుజువు ఆయన సజీవంగా మళ్ళీ లేవడం. మన పాపాలన్నీ పోయాయనీ, క్షమించబడ్డాయని, శాశ్వతంగా తుడిచిపెట్టుకు పోయాయని ఇదే రుజువు. క్రీస్తు మరణమై సజీవంగా లేచాడు కాబట్టి విశ్వాసులమైన మనకు దేవునితో సరైన సంబంధం ఉన్నదనీ నిర్దోషుల లెక్కలో చేరామనీ, పాపంనుంచి విడుదల పొందామనీ మనం తెలుసుకోవచ్చు, తెలుసుకోవాలి. దేవుని ఎదుట మనల్ని నిర్దోషులుగా నిలబెట్టే వాడు, మన నీతిన్యాయాలు క్రీస్తే – 1 కోరింథీయులకు 1:30-31.