1. సహోదరులారా, నేను మీయొద్దకు వచ్చినప్పుడు వాక్చాతుర్యముతో గాని జ్ఞానాతిశయముతో గాని దేవుని మర్మమును మీకు ప్రకటించుచు వచ్చినవాడనుకాను.

“జ్ఞానం”– అంటే మనుషులు దేన్ని జ్ఞానమని ఎంచుతారో అది.

2. నేను, యేసుక్రీస్తును అనగా, సిలువవేయబడిన యేసుక్రీస్తును తప్ప, మరిదేనిని మీమధ్య నెరుగకుందునని నిశ్చ యించుకొంటిని.

పౌలు నేరుగా ఏథెన్సు పట్టణం నుంచి కొరింతుకు వచ్చాడు. ఏథెన్సు తాను వేదాంతానికీ, జ్ఞానానికీ ప్రపంచవ్యాప్తంగా గొప్ప కేంద్రమని గొప్పలు చెప్పుకునేది (అపో. కార్యములు 17:15; అపో. కార్యములు 18:1.). శుభవార్తలోని ప్రధాన విషయాలను కల్తీ లేకుండా ప్రకటించడం ఎంత ప్రాముఖ్యమో కొత్తగా అతడు గ్రహించాడు.

3. మరియు బలహీనతతోను భయముతోను ఎంతో వణకుతోను మీయొద్ద నుంటిని.

మనుషులేం చేస్తారోనన్న భయం అతనికి లేదు. అతని భయమంతా ఏథెన్సులోని “జ్ఞానులు” శుభవార్తను పెడచెవిని పెట్టినట్టే కొరింతువారు కూడా చేస్తారేమోననీ, తనలోని ఏదన్నా లోపం మూలంగా తన ఉపదేశం సఫలం కాదేమోననీ. శుభవార్త ప్రకటించేవాడెవడైనా ఆత్మనిబ్బరం, సొంత తెలివి మీద ఆధారపడడం, నిర్లక్ష్యంగా ఉండడం కన్నా భయంతో, వణుకుతో ఉండడం ఎంతో మేలు. 2 కోరింథీయులకు 12:9-10 పోల్చి చూడండి.

4. మీ విశ్వాసము మనుష్యుల జ్ఞానమును ఆధారము చేసికొనక, దేవుని శక్తిని ఆధారము చేసికొని యుండవలెనని,

1 కోరింథీయులకు 1:17. సందర్భానికి అవసరమని పౌలు అనుకొంటే మనుషుల్ని సమ్మతింపజేసే జ్ఞానయుక్తమైన మాటలు చెప్పగలిగే సామర్థ్యం అతనికి లేకపోలేదు (అపో. కార్యములు 17:22-31). అయితే శుభవార్త ప్రకటనలో అతి ప్రాముఖ్యమైన రెండు విషయాలు సరైన సందేశం, దాన్ని అందించేందుకు దేవుని ఆత్మ శక్తి అని అతనికి తెలుసు. సరైన సందేశం ఉండి కూడా కొందరు బోధకులు మనుషులకు నచ్చజెప్పి దేవుని రాజ్యంలోకి వారిని తీసుకురావడానికి ప్రయత్నిస్తుండగా వారికి దేవుని శక్తి లోపించి నందువల్ల అలా చేయలేకపోతారు. లూకా 24:49; అపో. కార్యములు 1:8; ఎఫెసీయులకు 5:18 చూడండి. మనుషులు పాపవిముక్తి పొంది విశ్వాసంలో స్థిరపడేది ప్రసంగం చేసేవాడి జ్ఞానం, వాగ్దాటి గొప్పవని అనుకోవడం వల్ల కాదు గానీ క్రీస్తులో నమ్మకం ఉంచడం మూలంగానే.

5. నేను మాటలాడినను సువార్త ప్రకటించినను, జ్ఞానయుక్తమైన తియ్యని మాటలను వినియోగింపక, పరిశుద్ధాత్మయు దేవుని శక్తియు కనుపరచు దృష్టాంతములనే వినియోగించితిని.

దేవుని ఆత్మశక్తి మూలంగా నిజమైన నమ్మకం మనుషుల హృదయాల్లో కలుగుతుంది. వారి నమ్మకం ప్రసంగికుడి జ్ఞానం మీద గానీ వాగ్దాటి మీద గానీ నమ్మించే వాదనల మీద గానీ ఆధారపడితే అది పైపై నమ్మకమే. పాపవిముక్తి కలిగించే నమ్మకం స్థాయికి అది చేరుకోదు. క్రైస్తవ విశ్వాసం సవ్యమైన బుద్ధికి అనుగుణంగానే ఉంది గానీ కేవలం మనసుకు నచ్చేలా చెప్పే వాదాలు ఎవరికీ హృదయంలో కొత్త జన్మను కలిగించవు. క్రీస్తు సేవకులు సిలువ వేయబడిన క్రీస్తును ప్రకటించాలి. పరలోకం నుంచి దేవుడు పంపించిన ఆయన బలప్రభావాలతో అలా ప్రకటించాలి.

6. పరిపూర్ణులైనవారి మధ్య జ్ఞానమును బోధించుచున్నాము, అది యీ లోక జ్ఞానము కాదు, నిరర్థకులై పోవుచున్న యీ లోకాధికారుల జ్ఞానమును కాదుగాని

అజ్ఞానాన్ని తాను మెచ్చుకుంటున్నట్లు తన లేఖ చదివేవారు అనుకోవడం పౌలుకు ఇష్టం లేదు. జ్ఞానం విషయంలో క్రీస్తు విశ్వాసులు అందరికంటే అల్పులని ఎవరైనా అనుకోవడం కూడా అతనికి ఇష్టం లేదు. దేవుని రహస్య జ్ఞానం వారికి అందుబాటులో ఉంది (1 కోరింథీయులకు 1:31; కొలొస్సయులకు 2:2-3). ఈ జ్ఞానం ఈ లోకంలోని జ్ఞానులకూ ఘనులకూ తెలియదు. “జ్ఞానం” గురించి కీర్తనల గ్రంథము 51:6; కీర్తనల గ్రంథము 90:12; కీర్తనల గ్రంథము 111:10; సామెతలు 1:7, సామెతలు 1:20; సామెతలు 2:1-6; సామెతలు 3:13; సామెతలు 8:1-36; సామెతలు 9:10; ఎఫెసీయులకు 1:17; యాకోబు 1:5 కూడా చూడండి. ప్రపంచాన్ని సృష్టించక మునుపే దేవుడు తన ప్రజలను ముందుగా ఎరిగి వారిని ఎన్నుకున్నాడు (రోమీయులకు 8:29-30). జ్ఞానమంతటిలోకి అత్యున్నత జ్ఞానం వారికి కలగాలని నియమించాడు. అది దేవుణ్ణి, క్రీస్తును గురించిన జ్ఞానం.

7. దేవుని జ్ఞానము మర్మమైనట్టుగా బోధించుచున్నాము; ఈ జ్ఞానము మరుగైయుండెను. జగదుత్పత్తికి ముందుగానే దీనిని దేవుడు మన మహిమ నిమిత్తము నియమించెను.

8. అది లోకాధికారులలో ఎవనికిని తెలియదు; అది వారికి తెలిసి యుండినయెడల మహిమాస్వరూపియగు ప్రభువును సిలువ వేయక పోయియుందురు.
కీర్తనల గ్రంథము 24:7-10

9. ఇందును గూర్చిదేవుడు తన్ను ప్రేమించువారికొరకు ఏవి సిద్ధపరచెనో అవి కంటికి కనబడలేదు, చెవికి వినబడలేదు, మనుష్య హృదయమునకు గోచరముకాలేదు అని వ్రాయబడియున్నది.
యెషయా 52:15, యెషయా 64:4

యెషయా 64:4 లో అక్షరాలా ఇవి కాదు గాని ఇలాంటి మాటలే ఉన్నాయి.

10. మనకైతే దేవుడు వాటిని తన ఆత్మవలన బయలుపరచి యున్నాడు; ఆ ఆత్మ అన్నిటిని, దేవుని మర్మములను కూడ పరిశోధించుచున్నాడు.

పౌలు చెప్తున్న ఈ జ్ఞానం మనిషి తెలివితేటలవల్ల గానీ వేదాంత తర్కాలవల్ల గానీ దొరకదు. మతాలు తరచినా, నిగూఢ వాదాన్ని వెదకినా, క్షుద్రవిద్యలు నేర్చినా దొరకదు. దేవుడు తన ఆత్మమూలంగా దీన్ని వెల్లడి చేస్తాడు. దీన్ని పొందేందుకు వేరే మార్గమేదీ లేదు. యోహాను 16:13-15 పోల్చి చూడండి. దేవుని ఆత్మను పొందగలిగిన ఏకైక మార్గం క్రీస్తులో నమ్మకం ఉంచడం ద్వారానే.

11. ఒక మనుష్యుని సంగతులు అతనిలోనున్న మనుష్యాత్మకే గాని మనుష్యులలో మరి ఎవనికి తెలియును? ఆలాగే దేవుని సంగతులు దేవుని ఆత్మకే గాని మరి ఎవనికిని తెలియవు.
సామెతలు 20:27

దేవుడు వెల్లడిస్తే తప్ప ఆయనేమి ఆలోచిస్తున్నాడో ఎవరూ తెలుసుకోలేరు. కానీ అది పవిత్రాత్మకు తెలుసు. ఎందుకంటే ఆయన కూడా దేవుడే. ఆయనేదో వ్యక్తిత్వం లేని ప్రభావం, లేక అభూత శక్తి కాదని ఈ వచనం నేర్పిస్తున్నది. ఆయనకు జ్ఞానం ఉంది. జ్ఞానాన్ని ఆయన తెలియజేయగలడు (వ 10).

12. దేవునివలన మనకు దయచేయబడినవాటిని తెలిసికొనుటకై మనము లౌకికాత్మను కాక దేవుని యొద్దనుండి వచ్చు ఆత్మను పొందియున్నాము.

లోకానికి (పతనమైన భ్రష్టమైన స్థితిలో ఉన్న మానవజాతికి) దేవుని ఆత్మ లేడు. ఆయన్ను లోకం స్వీకరించడం అసాధ్యం (యోహాను 14:16-17), క్రీస్తులో విశ్వాసులు దేవుని ఆత్మను పొందారు (అపో. కార్యములు 2:38; అపో. కార్యములు 5:32; గలతియులకు 3:14; ఎఫెసీయులకు 1:13). ఇతరులు తెలుసుకోవడానికి వీలులేని వాటిని వారు తెలుసుకోగలరు (వ 14).

13. మనుష్యజ్ఞానము నేర్పుమాటలతో గాక ఆత్మ సంబంధమైన సంగతులను ఆత్మ సంబంధమైన సంగతులతో సరిచూచుచు, ఆత్మ నేర్పు మాటలతో వీటిని గూర్చియే మేము బోధించుచున్నాము.

మాటల గురించి పౌలు ప్రాముఖ్యంగా చెప్పడం గమనించండి. దేవుని ఆత్మ క్రీస్తు రాయబారులకు ఇచ్చినది దేవుని సత్యాన్ని వెల్లడి చేసే మాటలు, గానీ మనసులో ఏదో స్థూలమైన కొన్ని తలంపులు మాత్రమే కాదు. మత్తయి 4:4; మత్తయి 5:18; 2 తిమోతికి 3:16 పోల్చి చూడండి.

14. ప్రకృతి సంబంధియైన మనుష్యుడు దేవుని ఆత్మ విషయ ములను అంగీకరింపడు, అవి అతనికి వెఱ్ఱితనముగా ఉన్నవి, అవి ఆత్మానుభవముచేతనే వివేచింపదగును గనుక అతడు వాటిని గ్రహింపజాలడు.

1 కోరింథీయులకు 1:18, 1 కోరింథీయులకు 1:23; రోమీయులకు 8:5-8. మనం దేవుని సత్యాన్ని అంగీకరించి అర్థం చేసుకోదలచుకుంటే దేవుని ఆత్మ మనకు ఉపదేశించడం తప్పనిసరి. అందుకే ఎఫెసీయులకు 1:15-19లో పౌలు అలా రాశాడు.

15. ఆత్మసంబంధియైనవాడు అన్ని టిని వివేచించును గాని అతడెవనిచేతనైనను వివేచింప బడడు.

1 యోహాను 2:20, 1 యోహాను 2:27; యోహాను 3:8. దేవుని ఆత్మ మూలంగా ఆధ్యాత్మిక వ్యక్తులుగా మారిన క్రీస్తువిశ్వాసులు మాత్రమే లోక విషయాలను, మనుషుల నిజ స్థితిని గుర్తించ గలుగుతారు. ఆత్మలేని వారు అలా అర్థం చేసుకోలేరు గనుక అలాంటి విషయాల్లో సరైన అభిప్రాయానికి రాలేరు. సరైన నిర్ణయానికి రాగలగడం ఆధ్యాత్మిక జ్ఞానం మీద ఆధారపడి ఉంది. ఇది సహజంగా ఎవరికీ ఉండదు.

16. ప్రభువు మనస్సును ఎరిగి ఆయనకు బోధింపగలవాడెవడు? మనమైతే క్రీస్తు మనస్సు కలిగినవారము.
యెషయా 40:13

యెషయా 40:13. పై సత్యాలకు ఆధారంగా దీన్ని ఇచ్చాడు పౌలు. సహజసిద్ధమైన మనుషులు (దేవుని ఆత్మ లేనివారు) దేవుని మనసును గ్రహించలేరు, కాబట్టి విశ్వాసుల మనసులను కూడా గ్రహించలేరు. ఇది ఎందుకంటే విశ్వాసులు ఈ లోకానికి చెందిన మనుషుల్లా ఆలోచించడం మానుకున్నారు. క్రీస్తు ద్వారా దేవుని మనసు కొంత వరకు వారికి ఉంది. అంటే క్రీస్తుకూ దేవునికీ తెలిసినవన్నీ విశ్వాసులకు తెలుసని కాదు. క్రీస్తు వారిలో ఉన్నాడు కాబట్టి, ఆయన ఆత్మ వారికి ఉన్నాడు కాబట్టి వారు దేవుని సత్యం మూలాధారం దగ్గరే ఉన్నారనీ, ఆ సత్యంలో ఏ భాగమైనా వారు అర్థం చేసుకునేలా ఆయన చేయగలడని దీని అర్థం. ఇది క్రీస్తురాయబారుల విషయంలో, గొప్ప జ్ఞానం ఉన్న క్రైస్తవ నాయకుల విషయంలో మాత్రమే నిజమా? కాదు. ఆధ్యాత్మిక విశ్వాసులందరి విషయంలోనూ ఇది నిజమే (1 కోరింథీయులకు 1:26-28). చదువు, గొప్ప మేధాశక్తి, మానవ జ్ఞానం మొదలైనవాటితో దీనికి పని లేదు. మనిషి ఆత్మకు దేవుని ఆత్మ జ్ఞానాన్ని ఇవ్వడం – అదే అత్యంత అవసరమైన సంగతి. ఈ చర్చ అంతటిలో దేవుని ఆత్మ మానవ ఆత్మకు వేరుగా ఉన్నాడనే తలంపు కనిపిస్తూ ఉంది. ఎక్కడ చూచినా దేవుని వాక్కంతటిలోనూ కనిపించే ఉపదేశం ఇదే. యోహాను 14:17; రోమీయులకు 8:9, రోమీయులకు 8:16; గలతియులకు 3:2; ఎఫెసీయులకు 4:18; యూదా 1:19 నోట్స్ చూడండి.