1. సహోదరులారా, ఆత్మసంబంధులైన మనుష్యులతో మాటలాడినట్లు నేను మీతో మాటలాడలేక పోతిని. శరీర సంబంధులైన మనుష్యులే అనియు, క్రీస్తునందు పసిబిడ్డలే అనియు, మీతో మాటలాడవలసివచ్చెను.

“ఆధ్యాత్మిక”– దేవుని ఆత్మలేని మనుషులతో పోల్చుకుంటే విశ్వాసులంతా ఆధ్యాత్మిక వ్యక్తులే (1 కోరింథీయులకు 2:14-16; రోమీయులకు 8:5-9) కానీ విశ్వాసుల్లో కూడా కొంతమంది ఇతరులకన్న ఎంతో ఆధ్యాత్మికమైనవారు. దురదృష్టవశాత్తూ అప్పుడప్పుడు కొందరు విశ్వాసులు భ్రష్ట స్వభావాన్ని అనుసరించి నడుచుకునే లోకప్రజల మాదిరిగానే ప్రవర్తిస్తుంటారు. మొత్తం మీద కొరింతు క్రైస్తవులు ఇలాంటివారే. ఆధ్యాత్మికంగా చూస్తే వారింకా చంటిపిల్లల్లాంటివారే. దేవుని లోతైన సంగతులు పౌలు వారికి బోధించడానికి వీల్లేక పోయింది (1 కోరింథీయులకు 2:6; హెబ్రీయులకు 5:11-14 పోల్చి చూడండి). 1 కోరింథీయులకు 2:14-16 1 కోరింథీయులకు 3:1 లో పౌలు మూడు రకాల వ్యక్తుల గురించి చెప్పాడు. “సహజ సిద్ధమైన” వ్యక్తి – అంటే దేవుని ఆత్మ లేనివాడు; “ఆధ్యాత్మిక వ్యక్తి” – దేవుని ఆత్మ కలిగి ఆత్మ ప్రకారం నడచుకునేవాడు; “శరీర స్వభావాన్ని అనుసరించే వ్యక్తి” – దేవుని ఆత్మ తనలో ఉన్నా తన విధానాలు కొన్నింటిలో దేవుని ఆత్మ లేనట్టు నడుచుకునేవాడు.

2. అప్పటిలో మీకు బలము చాలకపోయినందున పాలతోనే మిమ్మును పెంచితినిగాని అన్నముతో మిమ్మును పెంచలేదు. మీరింకను శరీరసంబంధులై యుండుటవలన ఇప్పుడును మీరు బలహీనులై యున్నారు కారా?

3. మీలో అసూయయు కలహమును ఉండగా మీరు శరీర సంబంధులై మనుష్య రీతిగా నడుచుకొనువారు కారా?

వారు శరీర స్వభావాన్ని అనుసరించేవారు అనడానికి రుజువు ఇదే. ఎందుకంటే విశ్వాసుల మధ్య కక్షలు, కలహాలు దేవుని ఆత్మమూలంగా రావు గాని మనుషుల భ్రష్ట స్వభావం నుంచి వస్తాయి (గలతియులకు 5:19-20; యాకోబు 3:14-18). క్రీస్తులో విశ్వాసులు “మామూలు మనుషుల్లాగా” ప్రవర్తించ కూడదు. వారు దేవుని పవిత్ర ప్రజ. దేవుని ఆత్మ వారిలో ఉన్నాడు. ఉన్నత జీవిత విధానానికి వారు పిలవబడ్డారు.

4. ఒకడు నేను పౌలు వాడను, మరియొకడునేను అపొల్లోవాడను, అని చెప్పునప్పుడు మీరు ప్రకృతిసంబంధులైన మనుష్యులు కారా?

1 కోరింథీయులకు 1:11-12. నేటికి కూడా చాలామంది విశ్వాసులు తమ చీలికలు, వర్గాల ద్వారా, తమ శాఖ, సంఘ డినామినేషన్ విషయంలో వారికున్న గర్వం ద్వారా, మనుషులకు ఘనత ఇవ్వడం ద్వారా తమ లోక సంబంధమైన, శరీర సంబంధమైన స్వభావాన్ని కనపరచుకొంటూ ఉన్నారు.

5. అపొల్లో ఎవడు? పౌలెవడు? పరిచారకులే గదా. ఒక్కొ క్కరికి ప్రభువనుగ్రహించిన ప్రకారము వారి ద్వారా మీరు విశ్వసించితిరి

ప్రభువే ప్రాముఖ్యమైన వ్యక్తి అనీ, ఆయన వాక్కును ప్రకటించేవారంతా కేవలం సేవకులనీ, తమలో తాము ఏమీ కాదనీ విశ్వాసులు గుర్తించాలి (వ 7). వివిధ సేవకులకు వివిధమైన పనులు అప్పగించేవాడు ప్రభువే (వ 5). ఆ పనిని అభివృద్ధి చేసేవాడూ దేవుడే, మనుషులు కాదు (వ 7). దేవుడు మాత్రమే సత్యానికీ ఆధ్యాత్మిక జీవానికీ దీవెనలకూ ఉత్పత్తి స్థానం. పౌలు, అపొల్లో లాంటి నిజ సేవకులకు ఉన్న గురి ఒక్కటే (వ 8). విశ్వాసులు దీన్ని గుర్తించి ఏక హృదయంతో, ఏక మనస్సుతో వారందరినీ స్వీకరించాలి (1 కోరింథీయులకు 1:10), అంతేగాని వారిలో ఎవరినైనా గొప్ప చేయకూడదు. “మహిమా...ప్రభువు”– దేవునికి మాత్రమే ఇవ్వదగిన ఒక బిరుదును పౌలు క్రీస్తుకు ఇస్తున్నాడు. కీర్తనల గ్రంథము 24:10 పోల్చి చూడండి. అక్కడ యెహోవా దేవుణ్ణి “మహిమ స్వరూపి అయిన రాజు” అన్నాడు రచయిత. అపో. కార్యములు 7:2; యాకోబు 2:1 కూడా చూడండి. యేసే యెహోవాదేవుడని చూపే ఇతర రిఫరెన్సులు లూకా 2:11 నోట్‌లో ఉన్నాయి. మనుషులు దేవత్వంలోని ఒక వ్యక్తిని చంపారన్న సత్యమే వారికి దేవుడు తెలియదని, దేవుని జ్ఞానం వారికి లేదని తెలియజేస్తున్నది.

6. నేను నాటితిని, అపొల్లో నీళ్లు పోసెను, వృద్ధి కలుగజేసిన వాడు దేవుడే

7. కాబట్టి వృద్ధి కలుగజేయు దేవునిలోనే గాని, నాటువానిలోనైనను నీళ్లు పోయువానిలోనైనను ఏమియులేదు.

“ఏమీ లేదు”– దేవుని సేవకుడు ఎవరికైనా తన గురించి ఉండవలసిన సరియైన అభిప్రాయం ఇది. 1 కోరింథీయులకు 15:9; 2 కోరింథీయులకు 3:5; ఎఫెసీయులకు 3:8; 1 తిమోతికి 1:15 చూడండి. నిర్గమకాండము 3:11; న్యాయాధిపతులు 6:15; యిర్మియా 1:6 కూడా చూడండి. పౌలు సేవ అంత ఫలవంతం కావడానికి నిస్సందేహంగా ఇది ఒక కారణం. మనుషుల పొగడ్తలు, నిందలు, గౌరవం, తృణీకారం వేటినీ అతడు లెక్క చెయ్యలేదు.

8. నాటువాడును నీళ్లుపోయువాడును ఒక్కటే. ప్రతి వాడు తాను చేసిన కష్టముకొలది జీతము పుచ్చుకొనును.

వ 14.

9. మేము దేవుని జతపనివారమై యున్నాము; మీరు దేవుని వ్యవసాయమును దేవుని గృహమునై యున్నారు.

“దేవుని పొలం”– మత్తయి 13:24. “దేవుని కట్టడం”– వ 16; ఎఫెసీయులకు 2:19-22; 1 పేతురు 2:5.

10. దేవుడు నాకనుగ్రహించిన కృపచొప్పున నేను నేర్పరి యైన శిల్పకారునివలె పునాదివేసితిని, మరియొకడు దాని మీద కట్టుచున్నాడు; ప్రతివాడు దానిమీద ఏలాగు కట్టుచున్నాడో జాగ్రత్తగా చూచు కొనవలెను.

వ 7లో పౌలు తనలో ఏమీ లేదని చెప్పాడు. ఇక్కడ క్రీస్తు సేవకుడుగా తాను చేసినదంతా దేవుని కృపవల్లే అంటున్నాడు. తన సమర్థతలు, అవకాశాలు అన్నీ దేవుడే ఉచితంగా ఇచ్చినవి. 2 కోరింథీయులకు 3:5-6 కూడా చూడండి.

11. వేయబడినది తప్ప, మరియొక పునాది ఎవడును వేయనేరడు; ఈ పునాది యేసు క్రీస్తే.
యెషయా 28:16

యెషయా 28:16; అపో. కార్యములు 4:11; ఎఫెసీయులకు 2:20; 1 పేతురు 2:6. పౌలు క్రీస్తును గురించిన సత్యాన్ని ప్రకటించడం ద్వారా ఉపదేశించడం ద్వారా తనలో పని చేస్తున్న దేవుని ఆత్మ ప్రభావం మూలంగా మనుషులను క్రీస్తులో నమ్మకం పెట్టుకొనేలా నడిపించడం ద్వారా కొరింతులో పునాది వేశాడు. ఆ తరువాత అక్కడినుంచి వెళ్ళిపోయాడు. కట్టేవారు ఇతరులు అక్కడ పని మొదలు పెట్టారు.

12. ఎవడైనను ఈ పునాదిమీద బంగారము, వెండి, వెలగల రాళ్లు, కఱ్ఱ, గడ్డి, కొయ్యకాలు మొదలైనవాటితో కట్టినయెడల,

కట్టేవారు ఆధ్యాత్మిక వ్యక్తులై ఉండి దేవుని వాక్కులోని అమూల్య సత్యాలను ఉపదేశిస్తూ వాటిని అనుసరించేవారైతే వారు కట్టేదానిలో విలువ గల లోహాలు, మణిమాణిక్యాలూ వాడుతున్నట్టన్నమాట. అలా కాకుండా వారు లోక సంబంధులు, సొంత ఆలోచనలను ఉపయోగిస్తూ ఉంటే వారు చెక్క, గడ్డి, కసవును ఉపయోగిస్తున్నారన్నమాట.

13. వాని వాని పని కనబడును, ఆ దినము దానిని తేటపరచును, అది అగ్నిచేత బయలు పరచబడును. మరియు వాని వాని పని యెట్టిదో దానిని అగ్నియే పరీక్షించును.

తన సేవకులందరి పనికీ దేవుడు తీర్పు తీర్చే రోజు గురించి పౌలు మాట్లాడుతున్నాడు. వ 13లో అది తేటతెల్లం చేసే తీర్పు, మంటలతో వచ్చే తీర్పు, పరీక్షించే తీర్పు అని దాని గురించి పౌలు వివరిస్తున్నాడు. ఒక మనిషి చేసిన పని ఎంత అన్నది కాదు ఆ రోజున వచ్చే ప్రశ్న. దాని నాణ్యత ఎలాంటిది అని చూడడం జరుగుతుంది. దేవుని అగ్నిపరీక్షకు ముందు కంటికి చక్కగా కనిపించడం కాదు. దాని తరువాత ఏమి మిగిలి ఉంది అన్నది ముఖ్యం. ఎంత శ్రద్ధగా, భయం, వణకుతో (1 కోరింథీయులకు 2:3) దేవుని సేవకులు తమ పని చెయ్యాలో గదా!

14. పునాదిమీద ఒకడు కట్టిన పని నిలిచినయెడల వాడు జీతము పుచ్చుకొనును.

మత్తయి 16:27; 2 కోరింథీయులకు 5:10; ప్రకటన గ్రంథం 22:12.

15. ఒకని పని కాల్చివేయబడిన యెడల వానికి నష్టము కలుగును; అతడు తనమట్టుకు రక్షింపబడును గాని అగ్నిలో నుండి తప్పించుకొన్నట్టు రక్షింపబడును.

నష్టం అంటే తనకు రాగలిగి ఉండే ప్రతిఫలం విషయంలో నష్టం. 2 యోహాను 8 పోల్చి చూడండి. “మంటలు”– 1 పేతురు 4:17-18 పోల్చి చూడండి.

16. మీరు దేవుని ఆలయమై యున్నారనియు, దేవుని ఆత్మ మీలో నివసించుచున్నాడనియు మీరెరుగరా?

వ్యక్తిగతంగానూ, సమూహంగానూ కూడా క్రీస్తు విశ్వాసులు దేవుని ఆలయం. దేవాలయం అంటే ఆరాధన జరిగే స్థలం, దేవునికి అర్పణలు చెల్లించే స్థలం (రోమీయులకు 12:1-2; హెబ్రీయులకు 13:15-16; 1 పేతురు 2:5). దేవుని సన్నిధి నిలిచి ఉండే స్థలం అది (కీర్తనల గ్రంథము 11:4; యోహాను 17:23; అపో. కార్యములు 2:4; రోమీయులకు 8:9). దేవునికి ఇప్పుడు భూమిపై ఉన్న ఆలయం విశ్వాసులు మాత్రమే. దేవుణ్ణి, ఆయన విశ్వాసులను తిరస్కరించేవాడు మనుషులు కట్టిన ఆలయాలకు వెళ్ళవచ్చు గానీ దేవుడు అక్కడ లేడు (అపో. కార్యములు 17:24).

17. ఎవడైనను దేవుని ఆలయమును పాడుచేసినయెడల దేవుడు వానిని పాడుచేయును. దేవుని ఆలయము పరిశుద్ధమై యున్నది; మీరు ఆ ఆలయమై యున్నారు.

“పాడు చేస్తే”– ఇక్కడ గాయపరచడం, హాని చేయడం, చెడగొట్టడం అని అర్థం. విశ్వాసులు దేవుని ఆలయాన్ని నాశనం చెయ్యరు. వారే ఆయన ఆలయం. ఆ రోజుల్లో (ఈ కాలంలో కూడా) అనేక క్రైస్తవ సంఘాల్లో గందరగోళం కలిగిస్తూ ఉన్న కపట బోధకులను దృష్టిలో ఉంచుకుని పౌలు ఈ మాట చెప్పి ఉండాలి – రోమీయులకు 16:17-18. కొరింతులో ఇలాంటివారు కొందరు క్రీస్తు సిలువను అలా ఉంచి లోక సంబంధమైన జ్ఞానాన్ని ఉపదేశిస్తూ, శుభవార్తను వక్రం చేస్తున్నట్టున్నారు. 2 కోరింథీయులకు 11:4, 2 కోరింథీయులకు 11:13-15, 2 కోరింథీయులకు 11:18 చూడండి. దేవుని ఆలయాన్ని పాడు చేసేది అలాంటి ఉపదేశమే. తన పవిత్రమైన పనిని పాడు చేసేందుకు చూచే మనుషులతో దేవుడు చాలా కఠినంగా వ్యవహరిస్తాడన్న విషయంలో సందేహం అవసరం లేదు.

18. ఎవడును తన్నుతాను మోసపరచుకొనకూడదు. మీలో ఎవడైనను ఈ లోకమందు తాను జ్ఞానినని అనుకొనిన యెడల, జ్ఞాని అగునట్టు వెఱ్ఱివాడు కావలెను.

“మోసగించుకోకూడదు”– 1 కోరింథీయులకు 6:9; 1 కోరింథీయులకు 15:33. “జ్ఞానిని”– దేవుని దృష్టిలో జ్ఞానవంతులెవరంటే లోక సంబంధమైన జ్ఞానాన్ని వెంటాడుతూ ఉండేవారు కాదు గాని దాన్ని త్రోసిపుచ్చి క్రీస్తు శుభవార్తలో నమ్మకం ఉంచేవారే. అయితే అలాంటివారు లోక సంబంధమైన జ్ఞానం ఉన్నవారి దృష్టిలో వెర్రివారు.

19. ఈ లోక జ్ఞానము దేవుని దృష్టికి వెఱ్ఱితనమే. జ్ఞానులను వారి కుయుక్తిలో ఆయన పట్టుకొనును;
యోబు 5:13

1 కోరింథీయులకు 1:20; యోబు 5:13.

20. మరియు జ్ఞానుల యోచనలు వ్యర్థములని ప్రభువునకు తెలియును అని వ్రాయబడియున్నది.
కీర్తనల గ్రంథము 94:11

కీర్తనల గ్రంథము 94:11. మన సొంత జ్ఞానం వ్యర్థం, తెలివితక్కువతనం గనుక దాన్ని నిరాకరించుకోవాలి.

21. కాబట్టి యెవడును మనుష్యులయందు అతిశయింపకూడదు; సమస్తమును మీవి.

వ 4; 1 కోరింథీయులకు 1:12, 1 కోరింథీయులకు 1:29, 1 కోరింథీయులకు 1:31. మనుషులు దేవుని చేతిలో కేవలం సాధనాలు. ఆ సాధనాలను తయారు చేసి ఉపయోగిస్తున్న దేవునికే స్తుతి అంతా అర్పించాలి.

22. పౌలైనను అపొల్లోయైనను, కేఫాయైనను, లోకమైనను, జీవమైనను, మరణమైనను, ప్రస్తుతమందున్నవియైనను రాబోవునవియైనను సమస్తమును మీవే.

దేవుడు తన విశ్వాసుల మేలుకోసం తన సేవకులను నియమించాడు (వ 5; ఎఫెసీయులకు 4:11-13). విశ్వాసులను నాటి నీరు పోసి ఎదిగేలా చేసే పొలం ఈ భూమి అంతా. ఈ జీవితంలో జరిగే సంభవాలన్నీ వారి మేలుకోసమే పని చేస్తాయి (రోమీయులకు 8:28). చావు కూడా విశ్వాసులదే – వారి మర్త్య దేహం నుంచీ, పాపమంతటి నుంచి కష్టాలన్నిటి నుంచీ వారిని విడుదల చేసి, దేవునితో మరింత ఉన్నతమైన, ఉత్తమమైన జీవితానికి తలుపు తెరిచే మంచి బహుమానం అది. రాబోయే కాలంలో వచ్చేవి కూడా వారివే – వారు దేవుని వారసులు, క్రీస్తుతో కూడా వారసత్వం పంచుకునేవారు (రోమీయులకు 8:17; మత్తయి 5:5; ఎఫెసీయులకు 1:14; ప్రకటన గ్రంథం 21:7). అలాగైతే మనుషుల విషయంలో ఆ గొప్పలు చెప్పుకోవడం ఎందుకు? ఒకరికన్నా మరొకరు గొప్ప చేసుకోవడం ఎందుకు?

23. మీరు క్రీస్తు వారు; క్రీస్తు దేవునివాడు.

విశ్వాసులు క్రీస్తుకు చెందినవారే గాని మనుషులకు చెందినవారు కారు (యోహాను 6:37, యోహాను 6:39; యోహాను 17:6). ఆయన విషయంలోనే వారు అతిశయించాలి (1 కోరింథీయులకు 1:31). క్రీస్తు దేవునికి చెందినవాడు – 1 కోరింథీయులకు 11:3; 1 కోరింథీయులకు 15:28; మత్తయి 3:17; యోహాను 3:16; యోహాను 14:28.