1. నేను స్వతంత్రుడను కానా? నేను అపొస్తలుడను కానా? మన ప్రభువైన యేసును నేను చూడలేదా? ప్రభువునందు నాపనికి ఫలము మీరు కారా?

8వ అధ్యాయంలో పౌలు నేర్పించిన సూత్రం ఇతర విశ్వాసుల మేలుకోసం స్వార్థాన్ని త్యాగం చెయ్యడం. ఈ అధ్యాయంలో తన ఉదాహరణనే విశ్వాసుల ఎదుట ఉంచుతున్నాడు. ఒకదాన్ని బోధిస్తూ వేరొక విధంగా ప్రవర్తించలేదు పౌలు. ఇక్కడ అనేక సార్లు తన స్వేచ్ఛ, హక్కులను గురించి మాట్లాడుతున్నాడు – వ 1,4,5,12,15,19. అయితే తన స్వేచ్ఛను, హక్కులను తనకే సంతోషం కలిగించుకునేందుకు అతడు వాడుకోలేదు గానీ ఇతరులను క్రీస్తు దగ్గరికి నడిపించడానికి, వారి నమ్మకాన్ని అభివృద్ధి చేయడానికి తాను ఎలా సహాయపడగలనా అనే ఆలోచించాడు. దేవుడు నమ్మకస్థులైన సేవకులకు వాగ్దానం చేసిన ప్రతి ఫలాలను వారిలో ఎవరైనా పొందాలంటే స్వార్థ త్యాగం, వైరాగ్యం ఒక్కటే అనుసరించవలసిన మార్గం అని చెప్పడంతో ముగించాడు. “క్రీస్తు రాయబారి”– కనీసం ఇతర విశ్వాసులకున్నంత స్వేచ్ఛ, అన్ని హక్కులయినా ఒక రాయబారికి ఉండాలని ఈ మాటలకు అర్థం. “స్వేచ్ఛ”– ఆత్మసంబంధమైన స్వేచ్ఛ, ఆహార నియమాలనుంచి విడుదల మొదలైనవాటిని గురించి మాట్లాడుతున్నాడు. “ప్రభువైన...చూడలేదా”– 1 కోరింథీయులకు 15:8; అపో. కార్యములు 9:3-5.

2. ఇతరులకు నేను అపొస్తలుడను కాకపోయినను మీమట్టుకైనను అపొస్తలుడనై యున్నాను. ప్రభువునందు నా అపొస్తలత్వ మునకు ముద్రగా ఉన్నవారు మీరే కారా?

పౌలు క్రీస్తురాయబారి కాదని కొందరన్నారు. కానీ కొరింతు విశ్వాసులు అలా అనకూడదు. వారు క్రీస్తులో నమ్మకం ఉంచినది అతని ద్వారానే – 1 కోరింథీయులకు 4:15.

3. నన్ను విమర్శించువారికి నేను చెప్పుసమాధానమిదే.

పౌలు క్రీస్తురాయబారి కాదన్నవారితో అతడు చెప్పిన జవాబు వ 1,2లో ఉంది.

4. తినుటకును త్రాగుటకును మాకు అధికారము లేదా?

ఈ భాగంలో పౌలు క్రీస్తురాయబారుల హక్కుల గురించి (ఆ మాటకొస్తే క్రీస్తు తన పనిలోకి పంపిన ఏ వ్యక్తికైనా ఉండే హక్కుల గురించి) మాట్లాడుతున్నాడు. ఈ హక్కులేవంటే, తాము కోరిన వాటన్నిటినీ తిని త్రాగే హక్కు (వ 4), పెళ్ళి చేసుకుని తమ ప్రయాణాల్లో భార్యను వెంటబెట్టుకు వెళ్ళే హక్కు (వ 5), ఎవరికైతే పరిచర్య చేస్తున్నారో వారినుంచి తమ జీవనోపాధి మొత్తాన్ని పొందే హక్కు (వ 6-14). రోమీయులకు 14:14.

5. తక్కిన అపొస్తలులవలెను, ప్రభువుయొక్క సహోదరులవలెను, కేఫావలెను విశ్వాసురాలైన భార్యను వెంటబెట్టుకొని తిరుగుటకు మాకు అధికారములేదా?

“ప్రభు సోదరులు”– అపో. కార్యములు 1:14. “కేఫా”– పేతురు మరో పేరు (యోహాను 1:42). అతడు వివాహితుడు (మత్తయి 8:14). అతని ప్రయాణాల్లో అతని భార్య కూడా వెంట వెళ్ళినట్టు కనిపిస్తున్నది.

6. మరియు పని చేయకుండుటకు నేనును బర్నబాయు మాత్రమే అధికారము లేని వారమా?

అపో. కార్యములు 18:3; అపో. కార్యములు 20:34.

7. ఎవడైనను తన సొంత ఖర్చు పెట్టుకొని దండులో కొలువు చేయునా? ద్రాక్షతోటవేసి దాని ఫలము తిననివాడెవడు? మందను కాచి మంద పాలు త్రాగనివాడెవడు?

సంఘాల్లో క్రీస్తు కోసం పరిచర్య చేసేవారిని సంఘాలు పోషించడమన్నది ఎంత సహజమో తెలిపేందుకు ఈ ఉదాహరణలు వాడుతున్నాడు.

8. ఈ మాటలు లోకాచారమును బట్టి చెప్పుచున్నానా? ధర్మశాస్త్రముకూడ వీటిని చెప్పు చున్నదిగదా?

ద్వితీయోపదేశకాండము 25:4; 1 తిమోతికి 5:17-18.

9. కళ్లము త్రొక్కుచున్న యెద్దు మూతికి చిక్కము పెట్టవద్దు అని మోషే ధర్మశాస్త్రములో వ్రాయబడియున్నది. దేవుడు ఎడ్లకొరకు విచారించుచున్నాడా?
ద్వితీయోపదేశకాండము 25:4

10. కేవలము మనకొరకు దీనిని చెప్పుచున్నాడా? అవును, మనకొరకే గదా యీ మాట వ్రాయబడెను? ఏలయనగా, దున్నువాడు ఆశతో దున్నవలెను, కళ్లము త్రొక్కించువాడు పంటలో పాలుపొందుదునను ఆశతో త్రొక్కింపవలెను.

11. మీకొరకు ఆత్మసంబంధమైనవి మేము విత్తియుండగా మీవలన శరీరసంబంధమైన ఫలములు కోసికొనుట గొప్ప కార్యమా?

ఈ ఉదాహరణల భావం ఇది: “ఆధ్యాత్మిక విత్తనాలు చల్లినవారు”– క్రీస్తురాయబారులు, శుభవార్త ప్రచారకులు, సంఘకాపరులు, ఉపదేశకులు దేవుని వాక్కు అనే విత్తనాలు చల్లుతారు (లూకా 8:11). “శరీరం కోసమైనవాటిని”– అంటే వారి పోషణకు అవసరమైనవి (వ 12).

12. ఇతరులకు మీ పైని యీ అధికారములో పాలు కలిగినయెడల మాకు ఎక్కువ కలదు గదా? అయితే మేము ఈ అధికారమును వినియోగించుకొనలేదు; క్రీస్తు సువార్తకు ఏ అభ్యంతరమైనను కలుగజేయకుండుటకై అన్నిటిని సహించుచున్నాము.

పౌలు హృదయంలో పని చేసిన నియమం చూడండి. క్రీస్తు శుభవార్త నిమిత్తం ఎలాంటి హక్కునైనా, ఇతరులను నొప్పించగల ఎలాంటి చర్యలయినా వదులుకునేందుకు పౌలు సిద్ధమే. దేనినైనా సహించి ఉండేందుకు సిద్ధమే. 2 తిమోతికి 2:10 చూడండి. పౌలు మనందరికీ ఆదర్శం (1 కోరింథీయులకు 4:16; 1 కోరింథీయులకు 11:1).

13. ఆలయకృత్యములు జరిగించువారు ఆలయమువలన జీవనము చేయుచున్నా రనియు, బలిపీఠమునొద్ద కనిపెట్టుకొనియుండువారు బలి పీఠముతో పాలివారై యున్నారనియు మీరెరుగరా?
లేవీయకాండము 6:16, లేవీయకాండము 6:26, సంఖ్యాకాండము 18:8, సంఖ్యాకాండము 18:31, ద్వితీయోపదేశకాండము 18:1-3

లేవీయకాండము 7:6, లేవీయకాండము 7:8-10, లేవీయకాండము 7:14, లేవీయకాండము 7:28-36 చూడండి.

14. ఆలాగున సువార్త ప్రచురించువారు సువార్తవలన జీవింపవలెనని ప్రభువునియమించియున్నాడు.

వ 11; మత్తయి 10:9-10; లూకా 10:7-8. తమ మధ్య పరిచర్య చేసే క్రీస్తు సేవకులను తమ శక్తిమేరకు పోషించడం అన్ని క్రైస్తవ సంఘాలు, సమూహాల పరమ ధర్మం. అలా చేయని సంఘమేదైనా ప్రభువుకే అవిధేయత చూపుతున్నది.

15. నేనైతే వీటిలో దేనినైనను వినియోగించుకొనలేదు; మీరు నాయెడల యీలాగున జరుపవలెనని ఈ సంగతులు వ్రాయనులేదు. ఎవడైనను నా అతిశయమును నిరర్థకము చేయుటకంటె నాకు మరణమే మేలు.

దేవుడు పౌలుకు తన రహస్య సత్యాలు అప్పగించాడు (1 కోరింథీయులకు 4:1-2). వాటిని ప్రకటించేందుకు క్రీస్తు అతణ్ణి పంపాడు (అపో. కార్యములు 20:24; గలతియులకు 2:7; ఎఫెసీయులకు 3:8). అది తనకు ఇష్టమున్నా లేకపోయినా చేయక తప్పదు. ఒకవేళ అలా చేయకపోతే అతనికెంతో “నష్టం” (వ 16. గ్రీకులో ఈ మాటకు ఏదో ఒక శిక్ష వస్తుందన్న అర్థం ఉంది). కాబట్టి శుభవార్త ప్రకటించడం తన గురించి అతిశయంగా చెప్పుకునేందుకు కారణం కాదు. కానీ అతిశయ కారణం ఒకటి ఉంది అతనికి. అదేమిటంటే, అతడు జీతం లేకుండా శుభవార్త ప్రకటించాడు. ఈ విధంగా పౌలు తన ఉద్దేశం మంచిదనీ, ఇష్టపూర్వకంగా తాను ప్రకటిస్తున్నాననీ, జీతగాడిలాగా కాదనీ రుజువు చేశాడు. తన సొంత ఖర్చులు పెట్టుకొని సైన్యంలో పని చేస్తున్న సైనికుడిలాగా (వ 7), యేసుప్రభువువంటి మంచి యజమానికి సేవ చేయడంలో ఆనందిస్తూ ఉన్నాడు. వ 18లో తన జీతం గురించి మాట్లాడుతున్నాడు – జీతం లేకుండా ఉచితంగా సేవించి తన యథార్థతను, ప్రేమను కనపరచుకోవడమే తన జీతం.

16. నేను సువార్తను ప్రకటించు చున్నను నాకు అతిశయకారణములేదు. సువార్తను ప్రకటింపవలసిన భారము నామీద మోపబడియున్నది. అయ్యో, నేను సువార్తను ప్రకటింపక పోయినయెడల నాకు శ్రమ.
యిర్మియా 20:9

17. ఇది నేనిష్టపడి చేసినయెడల నాకు జీతము దొరకును. ఇష్టపడకపోయినను గృహనిర్వాహకత్వము నాకు అప్పగింపబడెను.

18. అట్లయితే నాకు జీతమేమి? నేను సువార్తను ప్రకటించునప్పుడు సువార్తయందు నాకున్న అధికారమును పూర్ణముగా వినియోగ పరచుకొనకుండ సువార్తను ఉచితముగా ప్రకటించుటయే నా జీతము.

19. నేను అందరి విషయము స్వతంత్రుడనై యున్నను ఎక్కువమందిని సంపాదించుకొనుటకై అందరికిని నన్ను నేనే దాసునిగా చేసికొంటిని.

8,9 అధ్యాయాలు క్రైస్తవ స్వేచ్ఛనూ ఆధ్యాత్మిక స్వతంత్రతనూ సరిగా ఉపయోగించుకోవడం గురించి చెప్తున్నాయి. ఇతరులను క్రీస్తులోకి తెచ్చేలా అది చేస్తుందనుకుంటే స్వేచ్ఛ స్వతంత్రతలను పూర్తిగా వదులుకోవడానికి కూడా అతడు సిద్ధమే. అంటే తన స్వేచ్ఛ కంటే ఇతరులంటేనే అతనికి; ప్రీతి. తన వ్యక్తిగతమైన ఇష్టాయిష్టాలను ఇతరులకు మేలు చేయాలన్న కోరికతో పోల్చుకుంటే ఏమీ లేనట్టుగానే ఉన్నాయి. తన ఇష్టప్రకారం చెయ్యాలన్న కోరిక కంటే ఇతరులను క్రీస్తులోకి నడిపించాలన్న కోరికే బలంగా ఉంది. తాను అందరికీ బానిసనయ్యాననీ చెప్పడంలో అతని భావమేమిటో తరువాతి వచనాల్లో ఉంది. మూడు రకాల మనుషుల గురించి పౌలు చెప్తున్నాడు – యూదులు, ఇతర ప్రజలు, అంతర్వాణి, నమ్మకం విషయాల్లో బలహీనులు.

20. యూదులను సంపాదించుకొనుటకు యూదులకు యూదునివలె ఉంటిని. ధర్మశాస్త్రమునకు లోబడినవారిని సంపాదించుకొనుటకు నేను ధర్మశాస్త్రమునకు లోబడినవాడను కాకపోయినను, ధర్మశాస్త్రమునకు లోబడినవానివలె ఉంటిని.

యూదులకు తన ఉపదేశాలు ఎక్కువ అంగీకారం అయ్యే విధంగా అతడు కొన్ని పనులు చేశాడు – క్రైస్తవ విశ్వాసానికీ, జీవిత విధానానికీ ఆ పనులు విరుద్ధమైనవి కాకపోతే. దీనికి ఉదాహరణలు అపో. కార్యములు 16:3; అపో. కార్యములు 18:18; అపో. కార్యములు 21:20-26.

21. దేవుని విషయమై ధర్మశాస్త్రము లేనివాడను కాను గాని క్రీస్తు విషయమై ధర్మశాస్త్రమునకు లోబడినవాడను. అయినను ధర్మశాస్త్రము లేనివారిని సంపాదించుకొనుటకు ధర్మశాస్త్రము లేనివారికి ధర్మశాస్త్రము లేనివానివలెఉంటిని.

రోమీయులకు 2:12. యూదులు కానివారి మధ్య పని చేస్తున్నప్పుడు యూద ధర్మానికి చెందిన శాసనాలనూ ఆచారాలనూ పక్కన పెట్టాడు. ధర్మశాస్త్రం కోరుతున్న నైతిక విలువలను కూడా నిర్లక్ష్యం చేశాడని కాదు (రోమీయులకు 8:4). తాను దేవునికి లోబడాలనీ, క్రీస్తు నేర్పించిన ఆధ్యాత్మిక సూత్రాలను పాటించాలనీ అతనికి తెలుసు.

22. బలహీనులను సంపాదించుకొనుటకు బలహీనులకు బలహీనుడనైతిని. ఏ విధముచేతనైనను కొందరిని రక్షింపవలెనని అందరికి అన్నివిధముల వాడనైయున్నాను.

“బలహీనులను”– 1 కోరింథీయులకు 8:7; రోమీయులకు 14:1. వారిని నొప్పించడం, బాధపెట్టడం జరగకుండా జాగ్రత్తగా ఉన్నాడు. వారిలో మరింత ఆధ్యాత్మిక ధోరణి కలిగించాలని తన స్వేచ్ఛనూ తన హక్కులనూ అతడు వదులుకున్నాడు. తనకు సంతోషం కలిగించడం కాక ఇతరుల మేలే అన్ని రకాల ప్రజల మధ్య కూడా అతని లక్ష్యం. రోమీయులకు 15:1-3 చూడండి.

23. మరియు నేను సువార్తలో వారితో పాలివాడనగుటకై దానికొరకే సమస్తమును చేయుచున్నాను.

పౌలుకు ప్రధానమైనది తన ఇష్టాయిష్టాలు కాదు, తన అభిలాషలు, లేక తన “హక్కులు” కాదు గాని శుభవార్తే. “పాలివాణ్ణి”– ఇలా కావడం అంటే శుభవార్తలోని దీవెనలను తానొక్కడే ఉంచుకోవడం కాకుండా అందరితో పంచుకోవడమని అర్థం.

24. పందెపు రంగమందు పరుగెత్తువారందరు పరుగెత్తుదురుగాని యొక్కడే బహుమానము పొందునని మీకు తెలియదా? అటువలె మీరు బహుమానము పొందునట్లుగా పరుగెత్తుడి.

నమ్మకమైన సేవకు దేవుడిచ్చే బహుమతులు పొందాలని ఉంటే అందుకు మార్గం ఒకటే. అది పౌలు వెళ్ళిన మార్గం. అది శుభవార్త కోసం స్వార్థత్యాగం, క్రమశిక్షణల మార్గం. మత్తయి 10:38; మత్తయి 16:24; లూకా 9:23 పోల్చి చూడండి. అలాగైతే క్రీస్తుకోసం సేవ చేయడం అన్నది పందెంలో పరుగెత్తడం వంటిదా? ఒక విధంగా చూస్తే అలాంటిదే. అపో. కార్యములు 20:24; 2 తిమోతికి 4:7; హెబ్రీయులకు 12:1 చూడండి. పరుగెత్తిన వారందరికీ బహుమతి లభించదు. పౌలు చెప్తున్న ఈ బహుమతి రక్షణ కాదు (ఇది ఉచితంగానే దొరికేది. విశ్వాసులందరికీ ఇది ఉంది, వారిలో కొందరికి మాత్రమే కాదు – ఎఫెసీయులకు 2:8-9). క్రీస్తుకోసం చేసిన సేవకు దొరికే ఏదో ప్రతిఫలం ఇది.

25. మరియు పందెమందు పోరాడు ప్రతివాడు అన్ని విషయములయందు మితముగా ఉండును. వారు క్షయమగు కిరీటమును పొందుటకును, మనమైతే అక్షయమగు కిరీటమును పొందుటకును మితముగా ఉన్నాము.

క్రీస్తు సేవకుల సంపాదించుకోగల కిరీటాలు కొన్ని క్రొత్త ఒడంబడిక గ్రంథంలో కనిపిస్తాయి – 1 థెస్సలొనీకయులకు 2:19; 2 తిమోతికి 4:8; యాకోబు 1:12; 1 పేతురు 5:4. క్రీడాకారులు చాలా ప్రయాసలకోర్చి, కఠినమైన శిక్షణ, అభ్యాసాలతో ఈ లోకంలో తాత్కాలికమైన బహుమతుల కోసం పాటుపడతారు. క్రీస్తుసేవకులకు కనీసం వారికున్న జ్ఞానం, నియమ నిష్ఠలు, పట్టుదల ఉండవద్దా? మనం సంపాదించుకోగల బహుమతులు శాశ్వతంగా ఉంటాయి.

26. కాబట్టి నేను గురి చూడనివానివలె పరుగెత్తు వాడనుకాను,

పౌలు తన మనసులో ఒక గురిని ఉంచుకొని పరుగెత్తాడు – ఫిలిప్పీయులకు 3:13-14. పోరాడుతున్నట్లు నటించడం కాదు, నిజంగా పోరాడాడు. గెలిచేందుకే పోరాడాడు – 2 తిమోతికి 4:7.

27. గాలిని కొట్టినట్టు నేను పోట్లాడుట లేదు గాని ఒకవేళ ఇతరులకు ప్రకటించిన తరువాత నేనే భ్రష్టుడనై పోదునేమో అని నా శరీరమును నలగగొట్టి, దానిని లోపరచుకొనుచున్నాను.

అతడు గాలిలో దెబ్బలు వేయలేదు. శరీరాన్నే దెబ్బలు కొట్టి వశపరచుకున్నాడు. తన శరీరాన్ని గాయపరచాడనీ దానికి హాని చేశాడనీ దీని అర్థం కాదు. క్రమశిక్షణ, తనను అదుపు చేసుకోవడం గురించి మాట్లాడుతున్నాడు. తన శరీర సౌఖ్యాన్ని చూచుకోకుండా అది తనకు లోబడేలా బలవంతం చేశాడు. అంటే తనను జయించాలని పోరాడుతున్న ప్రత్యర్థిగా తన శరీరాన్ని ఎంచాడన్నమాట. దాన్ని బలంగా పోరాడేదిగా పరిగణించి దాన్ని లోపరచుకోవాలని భావించినట్టున్నాడు (రోమీయులకు 7:24 పోల్చి చూడండి). తన శరీరానికి బానిస అయ్యేందుకు అతడు ఒప్పుకోలేదు గానీ క్రమశిక్షణ, తనను అదుపు చేసుకోవడం ద్వారా శరీరాన్నే తనకు బానిసగా చేసుకునేందుకు తీవ్రంగా ప్రయత్నించాడు. భావికాలంలో కలగబోయే దేవుని మెప్పు అనే శాశ్వత బహుమానాన్ని అతడు కోరాడు. దానికోసం ఇప్పటి శరీర సుఖాన్ని, సౌకర్యాలను విసర్జించేందుకు సిద్ధమయ్యాడు. దీన్ని బట్టి చూస్తే పవిత్రమైన, ఆధ్యాత్మికమైన, ఫలవంతమైన క్రైస్తవ జీవితం గడిపేందుకు పౌలుకు ఇంతకన్నా తేలిక మార్గమేదీ తెలిసినట్టు లేదు. అతనికి అందులో పోరాటం, శరీరాన్ని లోపరచుకోవాలన్న నిశ్చయమే ఉన్నాయి. “అయోగ్యుణ్ణి”– తన పాపవిముక్తిని, రక్షణను కోల్పోతానేమోనని భయంగా ఉంది అనడం లేదు, తన బహుమతులు పోతాయేమోనని భయపడుతున్నాడు (1 కోరింథీయులకు 3:12-15; 2 తిమోతికి 2:5 పోల్చి చూడండి). శరీరం అనేది మనిషిలోని భ్రష్ట స్వభావానికి నిలయం. దాని కోరికలు, వాంఛలు తీరడమే దానికి కావాలి. అదుపులో లేని శరీరం ఒక మనిషిని తన అదుపులోకి తెస్తుంది. ఇది తిండిబోతుతనం, త్రాగుబోతుతనం, అవినీతి మొదలైనవాటికి దారి తీస్తుంది.