1. కొంచెమవివేకముగా నేను మాటలాడినను మీరు సహింపవలెనని కోరుచున్నాను, నన్నుగూర్చి మీరేలా గైనను సహించుడి.

“ఆసక్తి”– పౌలు ఆధ్యాత్మిక విషయాల గురించి మాట్లాడుతున్నాడు. కొరింతులో కొందరు అబద్ధ బోధకుల మాటలు వింటున్నారు. తాను వారికి నేర్పిన దేవుని సత్యాన్ని వారు వదిలేస్తారేమోనని అతనికి భయంగా ఉంది. ఇక్కడ “ఆసక్తి” అనే పదం అతనికి వారిపట్ల ఉన్న ప్రేమను తెలుపుతున్నది. కానీ ఆ క్రైస్తవులను అతడు తనకోసమే, తన మెప్పు, ఘనత కోసమే ఉంచుకోవాలని చూడడం లేదు. క్రీస్తుతో వారికి ఉన్న సంబంధం గురించే అతని ఆందోళనంతా. “పురుషునికి”– మత్తయి 22:1-2; యోహాను 3:29; రోమీయులకు 7:4; ఎఫెసీయులకు 5:24-33; Rev,1,,6-9; కీర్తనల గ్రంథము 45:9-15; యెషయా 54:5; యిర్మియా 3:14, యిర్మియా 3:20; హోషేయ 2:16, హోషేయ 2:19 పోల్చి చూడండి.

2. దేవాసక్తితో మీ యెడల ఆసక్తి కలిగి యున్నాను; ఎందుకనగా పవిత్రురాలైన కన్యకనుగా ఒక్కడే పురుషునికి, అనగా క్రీస్తుకు సమర్పింపవలెనని, మిమ్మును ప్రధానము చేసితిని గాని,

3. సర్పము తన కుయుక్తిచేత హవ్వను మోసపరచినట్లు మీ మనస్సులును చెరుపబడి, క్రీస్తు ఎడలనున్న సరళతనుండియు పవిత్రత నుండియు ఎట్లయినను తొలగిపోవునేమో అని భయపడు చున్నాను.
ఆదికాండము 3:13

ఆదికాండము 3:1-7. ఆదాము గురించి గాక హవను గురించి పౌలు ఇక్కడ మాట్లాడ్డం తగిన విషయమే. ఎందుకంటే మొదటి ఆదాముకు భార్య హవ; చివరి ఆదాముకైతే (1 కోరింథీయులకు 15:45) భార్య తన సంఘం; అంతేగాక మోసానికి గురి అయింది హవ గాని ఆదాము కాదు (1 కోరింథీయులకు 2:14). కొరింతులో విశ్వాసులు ఎదుర్కొంటున్నది సైతాను ప్రయోగిస్తున్న మోసం (వ 13-15).

4. ఏలయనగా వచ్చినవాడెవడైనను మేము ప్రకటింపని మరియొక యేసును ప్రకటించినను, లేక మీరు పొందని మరియొక ఆత్మను మీరు పొందినను, మీరు అంగీ కరింపని మరియొక సువార్త మీరు అంగీకరించినను, మీరు వానినిగూర్చి సహించుట యుక్తమే.

అక్కడి క్రైస్తవుల్లో కొందరి విషయంలో పౌలుకు ఎందుచేత భయంగా ఉందో కారణం చెప్తున్నాడు. సత్యం కోసం వారికున్న ప్రీతి, లేక అసత్యాన్ని పసిగట్టగల సామర్థ్యం వారికి కొదువగా ఉంది. కనీసం అబద్ధ బోధకులను ఎదిరించేందుకు సిద్ధంగా లేరు. అలాంటివారి విషయంలో కొరింతువారు చూపుతున్న సహనం చూచి పౌలు కంగారుపడ్డాడు. అలాటివారిని తమ మధ్య సహనంతో ఉండనివ్వడం వారిలో సత్యం పట్ల ఏమంత శ్రద్ధ లేదని సూచిస్తున్నదని అతనికి బాగా తెలుసు. ఏదో ఒక ఆత్మ ఉన్నవారిలో, ఏదో ఒక శక్తి లేక ప్రభావం ఉన్నవారిలో ప్రతి ఒక్కరూ తప్పకుండా దేవుని ఆత్మ, ప్రభావాలే ఉన్నవారనుకోనవసరం లేదు. శుభవార్త ప్రకటిస్తున్నట్టు కనిపిస్తున్న వారిలో ప్రతి ఒక్కరూ నిజమైన శుభవార్తనే ప్రకటిస్తున్నారని అనుకోనవసరం లేదు (గలతియులకు 1:6-9; 1 యోహాను 4:1 చూడండి).

5. నేనైతే మిక్కిలి శ్రేష్ఠులైన యీ అపొస్తలులకంటె లేశమాత్రమును తక్కువవాడను కానని తలంచుకొనుచున్నాను.

కొరింతులో క్రీస్తు రాయబారులుగా చెలామణి అవుతున్న ఆ అబద్ధ ఉపదేశకులను “ఉత్తమోత్తములైన రాయబారులు” అని పౌలు వ్యంగ్యంగా పిలుస్తున్నాడు. ఎందుకంటే వారు తమ గురించి చాలా గొప్పలు చెప్పుకొంటున్నారు.

6. మాటల యందు నేను నేర్పులేనివాడనైనను జ్ఞానమందు నేర్పులేని వాడను కాను. ప్రతి సంగతిలోను అందరి మధ్యను మీ నిమిత్తము మేము ఆ జ్ఞానమును కనుపరచియున్నాము.

“మాటలలో...శిక్షణ”– 2 కోరింథీయులకు 10:10; 2 కోరింథీయులకు 2:1-5. “తెలివి”– 1 కోరింథీయులకు 2:6-16; గలతియులకు 1:11-12.

7. మిమ్మును హెచ్చింపవలెనని మీకు దేవుని సువార్తను ఉచితముగా ప్రకటించుచు నన్ను నేనే తగ్గించుకొనినందున పాపము చేసితినా?

1 కోరింథీయులకు 9:4-15. పౌలుకు తాను నిజమైన రాయబారిని కానని తెలుసు కాబట్టీ కొరింతువారి దగ్గర తన జీవనోపాధి కోసం ఏమైనా పుచ్చుకునే యోగ్యత తనకు లేదనీ తెలుసు కాబట్టీ ఏమీ పుచ్చుకోవడం లేదని అతని పగవారు చెప్తున్నారేమో. జీవనోపాధి కోసం తన సొంత చేతులతో పని చేసుకోవడం (అపో. కార్యములు 18:3) క్రీస్తు రాయబారి పదవికి తగదని వారు చెప్తున్నారేమో. కానీ కొరింతువారి పట్ల అతనికి గల ప్రేమ మూలానే (వ 11), వారిని “గొప్ప చేసి”, ఆధ్యాత్మికంగా వారు ఎదిగేలా చేయడమే (వ 7) ఇందులో తన ఉద్దేశమని పౌలు చెప్తున్నాడు.

8. మీకు పరిచర్య చేయుటకై నేనితర సంఘములవలన జీతము పుచ్చుకొని, వారి ధనము దొంగిలినవాడనైతిని.

“దోచుకొన్నాను”– పౌలు అలంకారికంగా మాట్లాడు తున్నాడు. ఇతర సంఘాలను పౌలు ఎప్పుడూ ఆర్థిక సహాయం కోసం అడగలేదు గాని వారిస్తే పుచ్చుకొన్నాడు. కొన్ని సార్లు అలా ఇచ్చినవారు పేదవాళ్ళు కూడా. మరింత ధనికులైన కొరింతువారికి పరిచర్య చేస్తూ అలాంటి పేదల నుంచి సహాయం స్వీకరించడం దాదాపుగా వారిని దోచుకోవడం వంటిదిగా అతనికి అనిపించింది.

9. మరియు నేను మీయొద్దనున్నప్పుడు నాకక్కర కలిగియుండగా నేనెవనిమీదను భారము మోపలేదు; మాసిదోనియనుండి సహోదరులు వచ్చి నా అక్కర తీర్చిరి. ప్రతి విషయములోను నేను మీకు భారముగా ఉండకుండ జాగ్రత్తపడితిని, ఇక ముందుకును జాగ్రత్త పడుదును

విశ్వాసుల నుంచి పౌలు కొన్ని సార్లు ఆర్థిక సహాయం స్వీకరించకపోలేదు. అయితే ఒక సంఘంలో పరిచర్య చేస్తున్నప్పుడు అతడు మాత్రం దాని నుంచి ఏ సహాయమూ స్వీకరించలేదని తలంచడానికి అవకాశం ఉంది.

10. క్రీస్తు సత్యము నాయందు ఉండుటవలన అకయ ప్రాంతములయందు నేనీలాగు అతిశయ పడకుండ, నన్ను ఆటంకపరచుటకు ఎవరి తరముకాదు.

1 కోరింథీయులకు 9:15-18.

11. ఎందువలన? నేను మిమ్మును ప్రేమింపనందువలననా? దేవునికే తెలియును.

12. అతిశయకారణము వెదకువారు ఏవిషయములో అతిశయించుచున్నారో, ఆ విషయములో వారును మావలెనే యున్నారని కనబడునిమిత్తము వారికి కారణము దొరకకుండ కొట్టివేయుటకు, నేను చేయుచున్న ప్రకారమే యిక ముందుకును చేతును.

అబద్ధ బోధకులు తమ ఉపదేశాలకోసం కొరింతువారి దగ్గర డబ్బులు వసూలు చేశారన్నది నిస్సందేహం (2 కోరింథీయులకు 2:17). వారు తాము పౌలుతో సమానం అనుకొంటున్నారు, గానీ ఉచితంగా శుభవార్త ప్రకటించడంలో వారు తనకు సమానులు కారని పౌలు చూపిస్తున్నాడు. ఈ తేడా చూపించడం అలానే కొనసాగించేందుకు అతడు దృఢ సంకల్పంతో ఉన్నారు.

13. ఏలయనగా అట్టి వారు క్రీస్తుయొక్క అపొస్తలుల వేషము ధరించుకొనువారై యుండి, దొంగ అపొస్తలులును మోసగాండ్రగు పనివారునై యున్నారు.

ఇప్పుడు పౌలు దేవుని ఆత్మ మూలంగా కొరింతులోని అబద్ధ మత బోధకుల గుట్టు బయట పెట్టాడు. అంతేగాక, అన్ని తరాల్లో, అన్ని చోట్లా క్రీస్తు పేరుతో వచ్చే అబద్ధ బోధకుల సంగతి కూడా బయట పెట్టాడు. వారి గురించి ఆరు సంగతులు చెప్తున్నాడు. ఒకటి, వారు “వాస్తవమైన” సేవకులు కాదు. దేవుడు తమను పంపాడంటారు గాని నిజంగా ఆయన పంపలేదు (ప్రకటన గ్రంథం 2:2; యిర్మియా 23:21 పోల్చి చూడండి) వారు “మోసంగా పని చేసేవారు”– వారి పద్ధతులు, వారి సందేశం కూడా మోసకరమే, వారి ఉద్దేశం ఇతరులను మోసగించడమే (మత్తయి 24:11, మత్తయి 24:24; రోమీయులకు 16:18; 2 థెస్సలొనీకయులకు 2:9-10) వారు “మారువేషం వేసుకునేవారు”– ఇతరులు తమను క్రీస్తురాయబారులుగా భావించాలని తమ బయటి ప్రవర్తనను మార్చుకొన్నారు గానీ తమ చెడు హృదయాలను మార్చుకోలోకపోతారు. వారు సైతాను సేవకులు (వ 15; యోహాను 8:44; 2 థెస్సలొనీకయులకు 2:9; 1 తిమోతికి 4:1-2) వారు నీతిన్యాయాలకు సేవకుల్లాగా నటిస్తారు – వాటి గురించి మాట్లాడేవారే గాని నిజానికి వారు పాపానికే సేవకులు (2 పేతురు 2:18-19). పేతురు రాసిన రెండో లేఖంతా, యూదా లేఖంతా ఈ అబద్ధ బోధకులు ఎలాంటివారో వర్ణిస్తున్నాయి. చివరగా, దేవుడు వారి క్రియలను బట్టి వారిని దండిస్తాడు (2 థెస్సలొనీకయులకు 2:8; 2 పేతురు 2:3; 2 పేతురు 2:9; యూదా 1:13; మత్తయి 7:22-23). కొరింతు క్రైస్తవుల్లో కొందరు ఇలాంటి వ్యక్తుల మాటలు వింటున్నారు, వారికి డబ్బిస్తున్నారు, వారి ఉపదేశాలను విని సహనం, మెప్పు చూపుతున్నారు. పౌలు కంగారు మనకు అర్థం అవుతున్నది గదా. మనుషులు సైతాను సేవకులను స్వీకరించి కూడా తమ ఆధ్యాత్మిక జీవితాలకు గొప్ప హాని కలగకుండా ఉండగలరా?

14. ఇది ఆశ్చర్యము కాదు; సాతాను తానే వెలుగుదూత వేషము ధరించుకొనుచున్నాడు

సైతాను సైతానుగా రాడు. పాపాన్ని పాపం లాగా దుర్మార్గం దుర్మార్గంలాగా కనిపించేలా చేయడు. తనను వెలుగులాగా మెరిసిపోతూ ఆకర్షణీయంగా చేసుకోగలడు. దేవుని వాక్కును త్రోసిపుచ్చడం చాలా సహజంగా, బుద్ధికి అనుగుణంగా అనిపించేలా చేయగలడు. పాపాన్ని నీతిన్యాయాల్లాగా కనిపించేలా చేయగలడు. లోకమంతటినీ తలక్రిందులు చేసి సత్యాన్ని అబద్ధంగా, అబద్ధాన్ని సత్యంగా, చీకటిని వెలుగుగా వెలుగును చీకటిగా కనిపించేలా ప్రయత్నం చేస్తున్నాడు (ఈ ప్రయత్నం చాలా వరకు విజయవంతంగా ఉంది). మనుషుల్లో అనేకమంది సహాయకులు వాడికి ఉన్నారు. అలాంటివారిపై దేవుడు యెషయా 5:20 లో తన తీర్పును వినిపిస్తున్నాడు. సైతాను గురించి 1 దినవృత్తాంతములు 21:1; మత్తయి 4:1; యోహాను 8:44 నోట్స్ చూడండి.

15. గనుక వాని పరిచారకులును నీతి పరిచారకుల వేషము ధరించుకొనుట గొప్ప సంగతికాదు. వారి క్రియల చొప్పున వారి కంతము కలుగును.

16. నేను అవివేకినని యెవడును తలంచవద్దని మరల చెప్పు చున్నాను. అట్లు తలంచినయెడల నేను కొంచెము అతిశయపడునట్లు నన్ను అవివేకినైనట్టు గానే చేర్చు కొనుడి.

పౌలు ఎక్కడా తనను తాను పొగడుకోవడం లేదు. దేవుని కృప, బలప్రభావాలు లేకుంటే తానేమిటో అతనికి బాగా తెలుసు – 2 కోరింథీయులకు 12:11; ఎఫెసీయులకు 3:8; 1 తిమోతికి 1:5. తనను తాను పొగడుకుంటున్నట్టు కనిపించడం కూడా అతనికి అసహ్యం. అది బుద్ధిహీనతలాగా అతనికి అనిపించింది. కొరింతు క్రైస్తవులకోసం తన రాయబారి పదవి పక్షంగా వాదించాలని తీవ్రమైన ప్రేరేపణ అతనికి కలిగింది (2 కోరింథీయులకు 12:19). అలా చేసేందుకు ఏకైక మార్గం తాను దేవుని సహాయంతో క్రీస్తుకోసం చేయగలగిన పనులు, అనుభవించిన బాధల గురించి చెప్పుకోవడమే.

17. నేను చెప్పుచున్నది ప్రభువు మాట ప్రకారము చెప్పుటలేదు గాని ఇట్లు అతిశయపడుటకు ఆధారము కలిగి అవివేకివలె చెప్పుచున్నాను.

18. అనేకులు శరీర విషయములో అతిశయపడుచున్నారు గనుక నేనును ఆలాగే అతిశయపడుదును.

19. మీరు వివేకులైయుండి సంతోషముతో అవివేకులను సహించుచున్నారు.

వారికి సిగ్గు కలిగించాలని పౌలు వ్యంగ్యంగా మాట్లాడుతున్నాడు. అబద్ధ బోధకులు చెప్పుకుంటున్న గొప్పలన్నిటినీ వారు విని సహించారు. క్రీస్తు నిజమైన రాయబారి చెప్పుకునే కొన్ని గొప్పలు కూడా కాస్త వినాలి మరి. ఆ అబద్ధ బోధకులు అక్కడ చేస్తున్నదేమిటో వ 20 వర్ణిస్తున్నది.

20. ఒకడు మిమ్మును దాస్యమునకు లోపరచినను, ఒకడు మిమ్ము మింగివేసినను, ఒకడు మిమ్ము వశపరచుకొనినను, ఒకడు తన్ను గొప్పచేసి కొనినను, ఒకడు ముఖముమీద మిమ్మును కొట్టినను మీరు సహించుచున్నారు.

“బానిసలుగా చేస్తే”– మోషే ధర్మశాస్త్రం కిందికి క్రైస్తవులను తీసుకురావడమని బహుశా దీని అర్థం కావచ్చు (అపో. కార్యములు 15:1; గలతియులకు 2:4 పోల్చి చూడండి). ఎలాంటి అబద్ధ ఉపదేశం కింద ఉండడమైనా బానిసత్వం వంటిదే.

21. మేము బలహీనులమై యున్నట్టు అవమానముగా మాటలాడుచున్నాను. ఏ విషయమందు ఎవడైన ధైర్యము కలిగి యున్నాడో, ఆ విషయమందు నేనుకూడ ధైర్యము కలిగినవాడను; అవివేకముగా మాటలాడుచున్నాను సుమా.

“అతిశయించే ధైర్యం”– 2 కోరింథీయులకు 1:12 దగ్గర నోట్.

22. వారు హెబ్రీయులా? నేనును హెబ్రీయుడనే. వారు ఇశ్రాయేలీయులా? నేనును ఇశ్రాయేలీయుడనే. వారు అబ్రాహాము సంతానమా? నేనును అట్టివాడనే.

అక్కడున్న అబద్ధ బోధకులు క్రీస్తును అనుసరిస్తున్నామని చెప్పుకొంటూ కూడా విముక్తికోసం మోషే ధర్మశాస్త్రాన్ని పాటించడం అవసరమేనని నేర్పించే యూద క్రైస్తవులని దీన్ని బట్టి అనుకోవచ్చు. తాము అబ్రాహాము సంతానమనీ, మత నిష్ఠ గలవారమై మూల హీబ్రూ భాషలో లేఖనాలను చదవగలవారమనీ (అపో. కార్యములు 6:1 నోట్‌) వారు గొప్పలు చెప్పుకుంటున్నారు. తనకు కూడా అలాంటివన్నీ ఉన్నాయని పౌలు చెప్తున్నాడు (రోమీయులకు 11:1; ఫిలిప్పీయులకు 3:5).

23. వారు క్రీస్తు పరిచారకులా? వెఱ్ఱివానివలె మాటలాడు చున్నాను, నేనును మరి యెక్కువగా క్రీస్తు పరిచారకుడను. మరి విశేషముగా ప్రయాసపడితిని, మరి అనేక పర్యాయములు చెరసాలలో ఉంటిని; అపరిమితముగా దెబ్బలు తింటిని, అనేకమారులు ప్రాణాపాయములలో ఉంటిని.

తాము క్రీస్తు సేవకులమని వారు చెప్పుకున్నారు (వ 23). అది నిజం కాదని పౌలు ఇంతకుముందే చెప్పాడు (వ 13-15) కాబట్టి మళ్ళీ చెప్పడం లేదు. దానికి బదులుగా వారికంటే తానే క్రీస్తు సేవకుణ్ణనేందుకు ఎక్కువ సాక్ష్యాధారాలు, రుజువులు ఉన్నట్టు చూపుతున్నాడు. ఈ సాక్ష్యాలు మూడు రకాలు – క్రీస్తుకోసం అతడు పడ్డ అధిక ప్రయాస (వ 23,26,27), క్రీస్తుకోసం అతడు అనుభవించిన అధిక కష్టాలు, బాధలు (వ 23-27), క్రీస్తు ప్రజలపట్ల అతనికున్న అధిక శ్రద్ధ (వ 28,29). “ప్రయాసపడ్డాను”– రోమీయులకు 15:9; 1 కోరింథీయులకు 4:12; కొలొస్సయులకు 1:29. పౌలు తన జాబితాలో దీన్ని మొట్టమొదట ఉంచుతున్నాడు. ఎవరైనా తాను క్రీస్తు సేవకుణ్ణని చెప్పుకుంటే మాటలు కాదు, అతని చేతలే అందుకు పరీక్ష. క్రీస్తుపట్ల ఒక వ్యక్తికున్న ప్రేమను కొలిచే ఒక విధానం ఏమిటంటే ఆయనకోసం ఎంత కష్టపడి పని చేసేందుకు అతడు సిద్ధపడుతున్నాడు అని చూడడమే. “ఖైదు”– పౌలు 7 సార్లు ఖైదులో ఉన్నాడని మొదటి శతాబ్దం నుంచి వాడుకలో ఉన్న ఒక మాట. “ప్రాణాపాయం”– 2 కోరింథీయులకు 1:8-9; 2 కోరింథీయులకు 2:11-12.

24. యూదులచేత అయిదుమారులు ఒకటి తక్కువ నలువది దెబ్బలు తింటిని;

ధర్మశాస్త్రం అనుమతించే కొరడా దెబ్బలు 40 మాత్రమే – ద్వితీయోపదేశకాండము 25:1-3. సాధారణంగా యూదులు 39 దెబ్బలే కొట్టేవారు. ఎందుకంటే 40 వరకు కొడితే లెక్కలో ఒక్క తప్పు వచ్చినా 41 దెబ్బలు వేసి ధర్మశాస్త్రాన్ని మీరిన వారమౌతామని వారి భయం. ఈ కొరడా దెబ్బలు బహు ఘోరమైనవి. ఈ దెబ్బలు తిన్నవారు చనిపోవచ్చు. ఒక వ్యక్తికి క్రీస్తుపై గల ప్రేమ ఎంతో ఆయనకోసం ఎలాంటి బాధలు అనుభవించడానికి అతడు సిద్ధమౌతున్నాడనే దాన్ని బట్టి కూడా తెలుస్తుంది.

25. ముమ్మారు బెత్తములతో కొట్టబడితిని; ఒకసారి రాళ్లతో కొట్టబడితిని; ముమ్మారు ఓడ పగిలి శ్రమపడితిని; ఒక రాత్రింబగళ్లు సముద్రములో గడిపితిని.

“రాళ్ళతో కొట్టడం”– అపో. కార్యములు 14:19-20.

26. అనేక పర్యాయములు ప్రయాణములలోను, నదులవలననైన ఆపదలలోను, దొంగలవలననైన ఆపదలలోను, నా స్వజనులవలననైన ఆపదలలోను, అన్యజనుల వలననైన ఆపదలలోను, పట్టణములో ఆపదలలోను, అరణ్యములో ఆపదలలోను, సముద్రములో ఆపదలలోను, కపట సహోదరులవలని ఆపదలలోను ఉంటిని

“పదేపదే”– శుభవార్త ప్రచారం, ఉపదేశించడం అనే అతని పరిచర్యలోనన్నమాట. “అపాయాలు”– క్రీస్తుకోసం ఏమేమి ఎదుర్కొనేందుకు ఒక వ్యక్తి సిద్ధమౌతాడో దాన్ని బట్టి కూడా ఆయన పట్ల అతని ప్రేమను కొలవవచ్చు. దుర్బోధకులు కొరింతులో కూర్చుని తామేదో గొప్పవాళ్ళమని చెప్పుకోవచ్చు. అయితే వారు సహించిన హింసలు ఏమిటి? క్రీస్తుకోసం ఏ అపాయాలను ఎదుర్కోవడానికైనా వారు సిద్ధం?

27. ప్రయాస తోను, కష్టములతోను, తరచుగా జాగరణములతోను, ఆకలి దప్పులతోను, తరచుగా ఉపవాసములతోను, చలి తోను, దిగంబరత్వముతోను ఉంటిని, ఇంకను చెప్ప వలసినవి అనేకములున్నవి.

“ప్రయాసలో”– వ 23. “నిద్రరాని”– నిద్రపోయేందుకు సరైన చోటు కూడా తరచుగా అతనికి దొరికేది కాదు. అంతే కాక తన పనికి సంబంధించిన ఒత్తిడులు, భారాలు అతణ్ణి నిద్రకు దూరం చేసి ఉంటాయి. క్రీస్తుకోసమని తమ జీవితమంతట్లో ఒక్క రాత్రి నిద్రను కూడా వదులుకోని వారు కావాలంటే తనను విమర్శించుకోనివ్వండని పౌలు భావం. “భోజనం”, “సరైన బట్టలు”– రోమీయులకు 8:35-37 లో పౌలు ఏదో గొప్పగా ధ్వనించే సిద్ధాంతాన్ని రాయలేదు. తన అనుభవంలో దీన్ని నిరూపించుకున్నాడు. తాను చేసిన పనుల మూలంగా, అనుభవించిన బాధల మూలంగా తాను క్రీస్తురాయబారినని కూడా రుజువు చేసుకున్నాడు. తన జీవితాన్ని మరింత సౌఖ్యవంతంగా, హాయిగా, మరింత ఆర్థిక భద్రత ఉన్నదిగా అతడు చేసుకోలేకపోయాడా? నిస్సందేహంగా చేసుకోగలిగేవాడే. వ్యక్తులను లేక సంఘాలను డబ్బులు అడిగేవాడైతే, మార్గమధ్యంలో వచ్చే విలాసవంతమైన హోటళ్ళు, శ్రేష్ఠమైన భోజనాల కోసం డబ్బు తీసుకుపోయేవాడైతే అలా చేసుకోగలిగేవాడే. వెళ్ళడానికి అనువైన చోట్లకే వెళ్ళేవాడైతే, అతడు రాకముందే అక్కడ అన్ని ఏర్పాట్లూ జరిగిపోయే ప్రదేశాలకే వెళ్ళేవాడైతే అతనికి సుఖంగానే ఉండేది. అయితే అలాంటి వాటిల్లో అతనికి ఆసక్తి లేదు (అపో. కార్యములు 20:24). క్రీస్తు కోసం బాధలు పడడం తనకు ఆధిక్యతగా మహిమగా అతడు ఎంచాడు – 2 కోరింథీయులకు 4:17; రోమీయులకు 8:17; ఫిలిప్పీయులకు 1:29; ఫిలిప్పీయులకు 3:10; కొలొస్సయులకు 1:24. కొరింతులో కూర్చుని గప్పాలు కొట్టుకుంటున్న బోధకులకూ ఉపదేశకులకూ ఈ దేవుని మనిషి పూర్తిగా భిన్నమైనవాడు. ఈ రోజుల్లో క్రీస్తు కోసం ఒక చిన్న అవమానం భరించడం, ఒక పూట భోజనం మానెయ్యవలసి రావడం తమకేదో గొప్ప అన్యాయం జరిగిపోయినట్టు భావించే ప్రసంగీకులకు కూడా పౌలు భిన్నమైనవాడే.

28. ఇవియును గాక సంఘము లన్నిటినిగూర్చిన చింతయు కలదు. ఈ భారము దిన దినమును నాకు కలుగుచున్నది.

“క్రీస్తు సంఘాలు అన్నిటిని”– కొరింతు సంఘమొక్కటే కాదు, వివిధ ప్రదేశాల్లో అతడు నాటిన సంఘాలు మాత్రమే కాదు, అతడెన్నడూ చూడని సంఘాల గురించి (కొలొస్సయులకు 2:1) కూడా అతనికి భారంగా ఉంది. ఈ సంఘాలన్నీ క్రీస్తుతో సంబంధం గలవి, ఆయన పేరుప్రతిష్ఠలతో ముడిపడి ఉన్నాయి. కాబట్టి పౌలు ఆలోచనలో వాటన్నిటితో తనకు కూడా సంబంధం ఉంది. ఒక సంఘ కాపరిని కృంగదీయాలంటే ఒకే సంఘం యొక్క బరువు బాధ్యతలు చాలు. పౌలుకైతే అన్ని సంఘాల గురించిన భారం, శ్రద్ధ ఉన్నాయి.

29. ఎవడైనను బలహీను డాయెనా? నేనును బలహీనుడను కానా? ఎవడైనను తొట్రుపడెనా? నాకును మంట కలుగదా?

కేవలం సంఘాలు మాత్రమే కాదు అతనిపై ఉన్నభారం. ఆ సంఘాల్లోని వ్యక్తులు కూడా. “బలహీనత”– రోమీయులకు 14:1; రోమీయులకు 15:1; 1 కోరింథీయులకు 9:22. “మండిపడనా”– క్రైస్తవులను ఇతరులెవరైనా వారి నమ్మకంలో తొట్రుపడేలా చేస్తే పౌలుకు కోపం వచ్చింది. రోమీయులకు 12:15; గలతియులకు 6:2 లో తాను చెప్పిన మాటలను తానే నెరవేరుస్తున్నాడు. క్రైస్తవులకు బాధ కలిగితే పౌలుకు బాధ కలిగింది. వారి బాధలను, సమస్యలను, కష్టాలను తనపై వేసుకున్నాడు. అతనికి దీన్ని నేర్పించినది, ఇలా చేసేందుకు సామర్థ్యత ఇచ్చినది క్రీస్తే.

30. అతిశయ పడవలసియుంటే నేను నా బలహీనత విషయమైన సంగ తులనుగూర్చియే అతిశయపడుదును.

“బలహీనత”– 2 కోరింథీయులకు 12:5, 2 కోరింథీయులకు 12:9-10.

31. నేనబద్ధమాడుటలేదని నిరంతరము స్తుతింపబడుచున్న మన ప్రభువగు యేసుయొక్క తండ్రియైన దేవుడు ఎరుగును.

పౌలు కష్టాలు, బాధల జాబితా కొరింతులో ఉన్న కొందరికీ నమ్మరానిదిగా అనిపించవచ్చు. అందువల్ల దేవుని పేరట తాను సత్యం చెప్తున్నట్లుగా అతడు వారికి గంబీరంగా చెప్తున్నాడు.

32. దమస్కులో అరెత అను రాజుక్రింద ఉన్న అధిపతి నన్ను పట్టగోరి కావలియుంచి దమస్కీయుల పట్టణమును భద్రము చేసెను.

అపో. కార్యములు 9:22-25. అతడు అతిశయంగా చెప్పుకున్న “బలహీనత” విషయాల్లో ఈ అవమానకరమైన అనుభవం ఒకటి మాత్రమే. కష్టాలు, ప్రమాదాలు సహించేందుకు కావలసిన శక్తి తనలో లేదనీ, అలా సహించే శక్తి ఇచ్చినది దేవుడేననీ, తాను గొప్పలు చెప్పుకోవడం దాని గురించే అనీ వారు అర్థం చేసుకోవాలని కోరుతున్నాడు (2 కోరింథీయులకు 3:5; 2 కోరింథీయులకు 4:7).

33. అప్పుడు నేను కిటికీగుండ గోడ మీదనుండి గంపలో దింపబడి అతని చేతిలోనుండి తప్పించుకొనిపోతిని.