1. కాబట్టి ఈ పరిచర్య పొందినందున కరుణింపబడిన వారమై అధైర్యపడము.

కొత్త ఒడంబడిక కింద దేవుని సేవకులు చేపట్టిన పరిచర్య మోషే పరిచర్యకంటే గొప్పది, మహిమతో నిండి ఉన్నది (2 కోరింథీయులకు 3:9). వారు మనుషులను నేరస్థులుగా తీర్చే ధర్మశాస్త్రానికి కాదు, గాని పాపవిముక్తి ఇచ్చే దేవుని కృపకే పరిచారకులు. దేవుని కరుణ వల్ల వారీ పరిచర్యను పొందారే గాని వ్యక్తిగతమైన యోగ్యతల వల్ల కాదు (1 కోరింథీయులకు 15:10; 1 తిమోతికి 1:13-14). అందువల్ల ఎన్ని కష్టాలు, అపాయాలు, బాధలు ఎదురైనా నిరుత్సాహపడి, పరిచర్యను చాలించుకోనని అంటున్నాడు పౌలు (వ 16. 1 కోరింథీయులకు 15:58; లూకా 18:1 పోల్చి చూడండి).

2. అయితే కుయుక్తిగా నడుచు కొనకయు, దేవుని వాక్యమును వంచనగా బోధింపకయు, సత్యమును ప్రత్యక్షపరచుటవలన ప్రతి మనుష్యుని మనస్సాక్షి యెదుట మమ్మును మేమే దేవుని సముఖమందు మెప్పించుకొనుచు, అవమానకరమైన రహస్యకార్యములను విసర్జించియున్నాము.

2 కోరింథీయులకు 1:12; 2 కోరింథీయులకు 2:17. పౌలు తన నిజాయితీ గురించి ఇక్కడ పదే పదే చెప్తున్నది ఎందుకంటే కొరింతులో కొందరు దాన్ని సందేహించారు. అతని రాయబారి పదవిలో కొరింతువారికి నమ్మకం పోతే అక్కడి సంఘానికి ఎంత హాని కలుగుతుందో అతనికి తెలుసు.

3. మా సువార్త మరుగుచేయబడిన యెడల నశించుచున్నవారి విషయములోనే మరుగుచేయ బడియున్నది.

2 కోరింథీయులకు 3:14-16. ఇక్కడ పౌలు అవిశ్వాసులైన యూదుల గురించే గాక ఇతర ప్రజలందరి గురించీ చెప్తున్నాడు.

4. దేవుని స్వరూపియైయున్న క్రీస్తు మహిమను కనుపరచు సువార్త ప్రకాశము వారికి ప్రకా శింపకుండు నిమిత్తము, ఈ యుగ సంబంధమైన దేవత అవిశ్వాసులైనవారి మనో నేత్రములకు గ్రుడ్డితనము కలుగ జేసెను.

“ఈ యుగ దేవుడు” అంటే సైతాను. యోహాను 12:31; యోహాను 16:11 పోల్చి చూడండి. వాడు మనుషులు తనను పూజించాలని కోరుతూ పూజలందుకుంటూ ఉన్నాడు కాబట్టీ లోకం యొక్క చీకటి రాజ్యాన్ని ఏలుతున్నాడు (ఎఫెసీయులకు 6:12) కాబట్టి సైతానుకు ఈ పేరు పెట్టాడు. సైతాను గురించి నోట్స్ 1 దినవృత్తాంతములు 21:1; మత్తయి 4:1-10; యోహాను 8:44. “మనసులకు...గుడ్డితనం కలిగించాడు” అంటే మనుషులు దేవుని సత్యాన్ని అర్థం చేసుకోకుండేలా, వారికి ఆధ్యాత్మిక దృష్టి కలగకుండేలా చేస్తాడు. ఇలా జరగడానికి వారు కూడా సైతానుకు సహకరిస్తారు (యోహాను 3:19-20; 2 థెస్సలొనీకయులకు 2:10-11). “క్రీస్తు మహిమ”– శుభవార్త దేవుని మహిమను, ఆయన అభిషిక్తుడైన క్రీస్తు మహిమను వెల్లడి చేసింది (యోహాను 12:23). క్రీస్తు దేవుని స్వరూపం (హెబ్రీయులకు 1:3; ఫిలిప్పీయులకు 2:6; కొలొస్సయులకు 1:15; కొలొస్సయులకు 2:9; యోహాను 1:14, యోహాను 1:18; యోహాను 12:45; యోహాను 14:9). అదృశ్యుడైన దేవుడు ఎలాంటివాడో కంటికి కనిపించే రూపమే క్రీస్తు.

5. అంధకారములోనుండి వెలుగు ప్రకాశించును గాక అని పలికిన దేవుడే తన మహిమను గూర్చిన జ్ఞానము యేసుక్రీస్తునందు వెల్లడిపరచుటకు మా హృదయములలో ప్రకాశించెను.

ఆరంభంలో దేవుడు సృష్టించిన వెలుగును (ఆదికాండము 1:1-3) విశ్వాసుల హృదయాల్లో దేవుడు ప్రసరింపజేసిన ఆధ్యాత్మిక వెలుగుతో పౌలు పోలుస్తున్నాడు. సత్యం గురించిన జ్ఞానాన్ని వారు గ్రహించేలా దేవుడు వారి మనోనేత్రాలు తెరిచాడు. అంతకుముందు అందరిలాగా వారి మనస్సు కూడా చీకటి, అల్లకల్లోలంతో నిండి ఉంది – ఎఫెసీయులకు 1:18; అపో. కార్యములు 26:18; యోహాను 8:12; మత్తయి 6:22-23; మత్తయి 11:27; మత్తయి 16:17; 1 కోరింథీయులకు 2:11-16 పోల్చి చూడండి. దేవుడిచ్చే ఈ జ్ఞానప్రకాశాలు ఎలాంటివో చూడండి. మనిషి తానే దేవుణ్ణని తెలుసుకోగలడన్న తప్పు సిద్ధాంతంతో ఈ మాటలకు పని లేదు. మనుషులు దేవుడు కాదు, కాలేరు. తాము దేవుణ్ణని అనుకుంటే గనుక భయంకరమైన పొరపాటులో పడిపోయారన్నమాట. దేవుడు నిజమైన జ్ఞానప్రకాశాలను మనుషులకు ఇచ్చి దేవుని మహిమ తమలో కాదు క్రీస్తులోనే ఉందని (హెబ్రీయులకు 1:3) వారు గ్రహించేలా చేస్తాడు. దమస్కు ప్రయాణంలో పౌలుకు ఈ జ్ఞానప్రకాశాల అనుభవం కలిగింది (అపొ కా 9:3-9). మనలో చాలమందికి అంత హఠాత్తుగా, అంత వింతగా ఇది జరగదు. అయితే ప్రతి విశ్వాసికీ ఈ ఆధ్యాత్మికమైన కనుచూపు, వెలుగు కలిగింది; అతడు వెలుగు సంతానమయ్యాడు (యోహాను 12:36; ఎఫెసీయులకు 5:8; 1 థెస్సలొనీకయులకు 5:5).

6. గనుక మేము మమ్మునుగూర్చి ప్రకటించు కొనుటలేదు గాని, క్రీస్తుయేసునుగూర్చి ఆయన ప్రభువనియు, మమ్మునుగూర్చి, యేసు నిమిత్తము మేము మీ పరిచారకులమనియు ప్రకటించుచున్నాము.
యెషయా 9:2

తన రాయబారి పదవిపై వస్తున్న దాడుల బారినుంచి దాన్ని పౌలు ఈ లేఖలో కాపాడుకోవలసి వస్తున్నది కాబట్టి ఎక్కువగా తన గురించి చెప్పుకున్నాడు. కానీ ఇదంతా కొరింతు విశ్వాసుల కోసమే గాని తనకోసం కాదు (2 కోరింథీయులకు 1:12-24 నోట్స్‌). ముక్తి మార్గంగా అతడు తనను వారికి ప్రకటించుకోలేదు. శుభవార్త అతడు కల్పించిన ఊహ కాదు. తానెవరో గొప్పవాణ్ణని అతడు అనుకోలేదు. క్రీస్తుకోసం ఇతరులకు సేవకుణ్ణని మాత్రమే భావించాడు (1 కోరింథీయులకు 3:5-7; 1 కోరింథీయులకు 9:19-23). తనకంటే ఎంతో గొప్పవాడైన మరో వ్యక్తిని గురించి, అంటే క్రీస్తును గురించి ప్రకటించే ఆధిక్యత అతనికి కలిగింది. పరలోకానికీ భూమికీ ఒకే ఒక ప్రభువుగా ఆయన్ను పౌలు ప్రకటించాడు. లూకా 2:11; రోమీయులకు 10:9; 1 కోరింథీయులకు 8:6; 1 కోరింథీయులకు 12:3; అపో. కార్యములు 2:36; ఫిలిప్పీయులకు 2:10-11 పోల్చి చూడండి. “క్రీస్తు ముఖం”– 2 కోరింథీయులకు 3:13 పోల్చి చూడండి. పాత ఒడంబడిక మహిమకు మోషే ముఖంపై ఉన్న వెలుగు సూచనగా ఉంది. అది మసకబారిపోతూ ఉండేది. కొత్త ఒడంబడిక స్థాపకుడైన క్రీస్తు ముఖంపై ఉండే మహిమ ఎన్నటికీ గతించదు.

7. అయినను ఆ బలాధిక్యము మా మూలమైనది కాక దేవునిదైయుండునట్లు మంటి ఘటములలో ఈ ఐశ్వర్యము మాకు కలదు.

“ఐశ్వర్యం”– క్రీస్తులో దేవుని మహిమ ఉన్నదని తెలియడమే అన్నిటికన్నా గొప్ప ఐశ్వర్యం. కీర్తనల గ్రంథము 19:10; కీర్తనల గ్రంథము 119:72, కీర్తనల గ్రంథము 119:127; సామెతలు 2:1-5 పోల్చి చూడండి. “ఐశ్వర్యం” అంటే దేవుడు అతనికి అప్పగించిన శుభవార్త పరిచర్య అని కూడా పౌలు ఉద్దేశం కావచ్చు. అతని దృష్టిలో ఇది కూడా దివ్యమైన సత్యమే (ఎఫెసీయులకు 3:8). “మట్టి పాత్రలలో”– అంటే దుర్భలమైన మానవ స్వభావంలో, వ్యక్తుల శరీరం, ఆత్మ, హృదయం, మనసుల్లో అని పౌలు భావం. ఐశ్వర్యం ఎంతో బ్రహ్మాండమైనది. అది ఉన్న “పాత్రలు” మాత్రం ఆ ఐశ్వర్యంతో పోల్చుకుంటే కంటికింపుగా లేవు, శక్తివంతం కావు. అంటే వారు ఇతరులకు ఈ ఐశ్వర్యాన్ని ఇవ్వగలిగే బలప్రభావాలు, కొత్త ఒడంబడికకు సరైన పరిచారకులుగా ఉండే సమర్థత (2 కోరింథీయులకు 3:6) దేవునినుంచే కలిగాయి. అపో. కార్యములు 1:4-5, అపో. కార్యములు 1:8 పోల్చి చూడండి.

8. ఎటుబోయినను శ్రమపడుచున్నను ఇరికింపబడువారము కాము; అపాయములో నున్నను కేవలము ఉపాయము లేనివారము కాము;

ఈ “మట్టి పాత్రల” బలహీనతను ఈ వచనాల్లో పౌలు వర్ణిస్తున్నాడు. “అన్ని వైపులా ఒత్తిడి”, “ఏమి చెయ్యాలో పాలుపోవడం లేదు”, “హింసలకు గురి”, పడద్రోయడం”, “మరణించడం” ఇవి ఆ బలహీనతను సూచిస్తున్నవి. అయితే వారిలో దేవుని శక్తి ఎలా పనిచేస్తున్నదో కూడా తెలియజేస్తున్నాడు – “ఇరుక్కొనిపోవడం లేదు”, “నిరాశ చెందడం లేదు”, “విడిచిపెట్టబడ్డవారం కాము”, “నాశనం కావడం లేదు” మొదలైనవి. ఈ “మట్టి పాత్రల”లో దేవుని శక్తి పని చేస్తూ ఉండకపోతే మనలో ఎవరమైనా దేన్నీ సాధించలేకపోతాం, త్వరలోనే నాశనమైపోతాం.

9. తరుమబడు చున్నను దిక్కులేనివారము కాము; పడద్రోయబడినను నశించువారము కాము.
ఆదికాండము 1:3

10. యేసుయొక్క జీవము మా శరీరమందు ప్రత్యక్షపరచబడుటకై యేసుయొక్క మరణానుభవమును మా శరీరమందు ఎల్లప్పుడును వహించు కొని పోవుచున్నాము.

“యేసు మరణం”– 2 కోరింథీయులకు 1:8-9 చూడండి. పౌలు ఎదుర్కొన్న కడగండ్లు, హింసలు అంతకుముందు యేసుప్రభువు ఎదుర్కొన్నాడు. పౌలు ఎదుర్కొన్నదంతా “యేసు కోసం” (వ 11), నిజంగా అది అతనిలో ఉన్న “యేసు మరణానుభవమే”. అంటే అస్తమానం అపాయాలూ కష్టాలూ కలుగుతూ ఉండడం (2 కోరింథీయులకు 11:23-27), “అహం” అనేదాన్ని చంపేసుకోవడం (మత్తయి 10:38-39; లూకా 9:23), క్రీస్తు కోసమే జీవించడం (గలతియులకు 2:20) అతని అనుభవం అయింది. వ్యక్తిగతమైన ఆశయాలు, ఏర్పాట్లు, తన ఇష్టాయిష్టాలు, సౌకర్యాలు, సుఖభోగాలు, స్వార్థ పూరితమైన సంతోషాలు – వీటికి తన యజమాని క్రీస్తు మనసులో తావు లేనట్టే పౌలు మనసులోనూ తావు లేదు. ఇది జీవ మార్గం, ఆధ్యాత్మిక జీవం, తనలో పని చేసే క్రీస్తు జీవం (వ 11) అని పౌలు తెలుసుకున్నాడు. ఈ అనుభవం మూలంగా కొరింతులోని విశ్వాసులవంటి వారికి (వ 12) కూడా ఆధ్యాత్మిక జీవం కలగడం సాధ్యమైంది. ఇక్కడొక వాస్తవమైన సూత్రం ఉంది. ఇతరులకు ఆధ్యాత్మిక జీవం కలిగించే సాధనంగా ఉండగోరినవారు పౌలు లాగా ఈ మరణానుభవానికి కూడా సిద్ధపడి ఉండాలి. దీనికి ఇష్టం లేనివారికి విజయంగా సఫలతగా కనిపించేది ఉండవచ్చు గానీ అది దేవుని దృష్టిలో మాత్రం విజయం, సఫలత కాదు.

11. ఏలయనగా, యేసుయొక్క జీవముకూడ మా మర్త్య శరీరమునందు ప్రత్యక్ష పరచబడినట్లు, సజీవులమైన మేము ఎల్లప్పుడు యేసు నిమిత్తము మరణమునకు అప్పగింపబడుచున్నాము.

12. కావున మాలో మరణమును మీలో జీవమును కార్యసాధకమగుచున్నవి.

13. కృప యెక్కువమంది ద్వారా ప్రబలి దేవుని మహిమ నిమిత్తము కృతజ్ఞతాస్తుతులు విస్తరింపజేయులాగున, సమస్తమైనవి మీకొరకై యున్నవి.
కీర్తనల గ్రంథము 116:10

కీర్తనల గ్రంథము 116:10. ఇన్ని కష్టాలూ ఆపదలూ అపాయాలూ ఉన్నా పౌలు క్రీస్తు సేవలో కొనసాగేలా చేసినది ఏమిటి? అతడు దేవుణ్ణి నమ్మాడు గనుక మౌనంగా ఉండలేకపోయాడు. ధన్యకరమైన భవిష్యత్తు తనకుందని కూడా అతనికి బాగా తెలుసు. విశ్వాసులు రాబోయే కాలంలో మరణం నుంచి సజీవంగా లేస్తారన్న ఆశాభావం అతడు ఆగకుండా కొనసాగేలా చేసింది (రోమీయులకు 8:23-25; 1 కోరింథీయులకు 15:49-58).

14. కాగా విశ్వసించితిని గనుక మాటలాడితిని అని వ్రాయబడిన ప్రకారము అట్టి విశ్వాసముతో కూడిన ఆత్మగలవారమై,

15. ప్రభువైన యేసును లేపినవాడు యేసుతో మమ్మునుకూడ లేపి, మీతోకూడ తన యెదుట నిలువ బెట్టునని యెరిగి, మేమును విశ్వసించుచున్నాము గనుక మాటలాడుచున్నాము.

పౌలు బాధలు, అనుభవాలు అన్నీ ఇతరుల మేలుకోసమే. అతడు కోరినది కూడా అదే – కొలొస్సయులకు 1:24; 1 కోరింథీయులకు 10:33; 2 తిమోతికి 2:10. ఇలాంటి మనస్తత్వం ఉంటే అది దేవుని సేవకులకు ఎంత సహాయకరం! ఇతరులకెంత దీవెనకరం! దేవునికే (తనకు కాదు) విరివిగా కృతజ్ఞతలు చెల్లించడం జరగాలని పౌలు ఎంత ఆసక్తితో ఉన్నాడో చూడండి – 2 కోరింథీయులకు 1:11; 2 కోరింథీయులకు 9:11-13.

16. కావున మేము అధైర్యపడము; మా బాహ్య పురుషుడు కృశించుచున్నను, ఆంతర్యపురుషుడు దినదినము నూతన పరచబడుచున్నాడు.

ఈ అధ్యాయంలో ఉన్న కొన్ని అంశాలను ఇక్కడ మరో సారి క్లుప్తంగా చెప్తున్నాడు. “నిరుత్సాహం చెందము”– వ 1. “క్షీణించిపోతూ”– వ 7-12. “కొత్తదనం”– వ 10,11. అనుదినం అతడు మరణాన్ని ఎదుర్కొంటూ ఉన్నాడు (1 కోరింథీయులకు 15:31) గానీ దేవుడు అనుదినం అతనికి జీవాన్ని ఇస్తున్నాడు.

17. మేము దృశ్యమైనవాటిని చూడక అదృశ్యమైనవాటినే నిదానించి చూచుచున్నాము గనుక క్షణమాత్రముండు మా చులకని శ్రమ మాకొరకు అంత కంతకు ఎక్కువగా నిత్యమైన మహిమ భారమును కలుగ జేయుచున్నది.

18. ఏలయనగా దృశ్యమైనవి అనిత్యములు; అదృశ్యమైనవి నిత్యములు.

“క్షణికమైన”– పౌలు క్రైస్తవుడైన కొద్ది దినాలకు అతనికి కష్టాలు ఆరంభమై అతడు చనిపోయేదాకా వెన్నాడాయి. అంటే చాలా సంవత్సరాలన్నమాట. అయితే అనంత యుగాలతో పోల్చుకుంటే అవి క్షణికమే. క్రీస్తుకోసం ఎవరైనా అనుభవిస్తున్న కష్టాలు నిజానికి వారి శాశ్వతమైన మేలు కోసమే పని చేస్తున్నాయని పౌలు అంటున్నాడని గమనించండి. విశ్వాసులు పొందబోయే మహిమను కలిగించడంలో అవి తోడ్పడతాయి. రోమీయులకు 8:17-18, రోమీయులకు 8:28 పోల్చి చూడండి. పౌలు తనకు వచ్చిన కష్టాలన్నిటినీ ఎందుకు సహనంతో భరించగలిగాడో, అవన్నీ అతని దృష్టిలో చులకనగా, క్షణికంగా ఎందుకు ఉన్నాయో వ 17 తెలియజేస్తున్నది. అయితే కంటికి కనిపించని వాటిపై దృష్టిని ఎలా నిలుపుకోవడం? దేవుడిచ్చే ఆధ్యాత్మిక జ్ఞానం మూలంగానే (వ 5). దేవుని అదృశ్యమైన శాశ్వతమైన విషయాలు వాస్తవానికి మనకు తెలిసేది నమ్మకం ద్వారానే (హెబ్రీయులకు 11:1). 2 కోరింథీయులకు 5:7 లో పౌలు ఈ సంగతినే వేరే మాటల్లో చెప్పాడు. మన కళ్ళతో లోకాన్ని, మనకు వచ్చే కష్టాలు, బాధల్ని చూస్తాం. మన ఆధ్యాత్మిక జ్ఞాన నేత్రాలతో క్రీస్తు వదనంలోకీ (వ 5) అనంత యుగాల్లోకీ చూడగలం. “బాధలు”(వ 18) – ఇవి ఎలాంటివో చూడండి – వ 8-10; 2 కోరింథీయులకు 1:8; 2 కోరింథీయులకు 11:23-27. పౌలు వీటిని చులకనైనవని అంటున్నాడు! అంటే తనకు కలగబోయే బహుమతితో పోల్చుకుంటే ఇవి తేలికైనవి అని అర్థం. అలాగైతే మన చిన్నచిన్న బాధల గురించి మనం ఏమనుకోవాలి? మనమీద మనం జాలిపడుతూ, సణుగుతూ ఉండాలా? దేవుడు పౌలుకిచ్చిన జ్ఞానమే మనకు ఇస్తే అలా చేయము.