1. ప్రియులారా, మనకు ఈ వాగ్దానములు ఉన్నవి గనుక దేవుని భయముతో పరిశుద్ధతను సంపూర్తిచేసి కొనుచు, శరీరమునకును ఆత్మకును కలిగిన సమస్త కల్మషము నుండి మనలను పవిత్రులనుగా చేసికొందము.

దేవుని గొప్ప వాగ్దానాలను మనం వినకముందు ఎలా ఉన్నామో విన్నాక అలానే ఉండకూడదు. దేవునికి లోబడి, ఆయన కోరిన రీతిగా ఆయనకు పవిత్రమైన, ప్రత్యేకమైన, సంతోషభరితమైన ప్రజగా ఉండాలని తన వాక్కును, కృపను మనకు అనుగ్రహించాడు. రోమీయులకు 12:12; 1 కోరింథీయులకు 15:58; ఎఫెసీయులకు 4:1; కొలొస్సయులకు 3:1; తీతుకు 2:11-14 పోల్చి చూడండి. ఇక్కడ క్రీస్తు రాయబారి పవిత్రతలో లోపం లేని స్థితిని గురిగా పెట్టుకోవాలని మనకు చెప్తున్నాడు (లోపరహితమైన స్థితి గురించి మత్తయి 5:48 నోట్ చూడండి). మనం సగం లేక మూడు వంతులు, లేక పదింట తొమ్మిది వంతులు పవిత్రంగా ఉండాలని దేవుడు ఎంతమాత్రం చెప్పి ఉండడు గదా (2 కోరింథీయులకు 13:9, 2 కోరింథీయులకు 13:11). క్రీస్తు ఈ భూమిపై ఎంత పవిత్రంగా జీవించాడో అంత పవిత్రంగా జీవించడమే మన గమ్యమై ఉండాలి. అయితే లోప రహిత స్థితిని గురిగా పెట్టుకున్నంత మాత్రాన దాన్ని సాధించడం జరగదు. ఆధ్యాత్మికంగా చూస్తే ఈ లోకం చాలా మురికి ప్రదేశం. అందులో నివసించడం మూలంగా విశ్వాసులకు తేలికగా మురికి అంటగలదు. యోహాను 13:10 చూడండి. “సంపూర్తి చేసుకొంటూ” అంటే ఎప్పుడూ కొనసాగుతూ ఉండే ఒక చర్య. ఈ అంశం గురించి యోహాను 17:17-19 నోట్ చూడండి. పవిత్రత గురించి లేవీయకాండము 20:7 నోట్ చూడండి. “భయభక్తులతో”– 2 కోరింథీయులకు 5:11; 1 పేతురు 1:17. మనలో పవిత్రత సంపూర్తి అయ్యే పనికి దేవునిపై భయభక్తులు అవసరం.

2. మమ్మును మీ హృదయములలో చేర్చుకొనుడి; మే మెవనికి అన్యాయము చేయలేదు, ఎవనిని చెరుపలేదు, ఎవనిని మోసము చేయలేదు.

2 కోరింథీయులకు 6:11-13.

3. మీకు శిక్షావిధి కలుగవలెనని నేనీలాగు చెప్పలేదు. చనిపోయినగాని జీవించిన గాని మీరును మేమును కూడ ఉండవలెననియు మీరు మా హృదయములలో ఉన్నారనియు నేను లోగడ చెప్పితిని గదా

4. మీ యెడల నేను బహు ధైర్యముగా మాట లాడుచున్నాను, మిమ్మును గూర్చి నాకు చాల అతిశయము కలదు, ఆదరణతో నిండుకొనియున్నాను, మా శ్రమయంతటికి మించిన అత్యధికమైన ఆనందముతో ఉప్పొంగు చున్నాను.

“ఆనందం”– ఆ విషయంలో అతని ఆనందం ఏమిటంటే కొరింతులోని క్రైస్తవులు నమ్మకం మీదే స్థిరంగా నిలిచి దేవుని వాక్కుకు విధేయత చూపుతూ ఉండే ప్రయత్నం చేస్తున్నారనేదే.

5. మేము మాసిదోనియకు వచ్చినప్పుడును మా శరీరము ఏమాత్రమును విశ్రాంతి పొందలేదు. ఎటుబోయినను మాకు శ్రమయే కలిగెను; వెలుపట పోరాటములు లోపట భయములు ఉండెను.

పౌలు గొప్ప రాయబారి అయినప్పటికీ, ఈ సమయంలో భయాలు, నెమ్మది లేకపోవడం, సంఘర్షణలు అనుభవించిన స్థితిలోనే ఉన్నాడు (2 కోరింథీయులకు 2:13).

6. అయినను దీనులను ఆదరించు దేవుడు తీతు రాకవలన మమ్మును ఆదరించెను.
యెషయా 49:13

2 కోరింథీయులకు 1:3-4. తీతు కొరింతును సందర్శించి మాసిదోనియా ప్రాంతంలో ఉన్న పౌలు దగ్గరికి వచ్చాడు.

7. తీతు రాకవలనమాత్రమే కాకుండ, అతడు మీ అత్యభిలాషను మీ అంగలార్పును నా విషయమై మీకు కలిగిన అత్యాసక్తిని మాకు తెలుపుచు, తాను మీ విషయమై పొందిన ఆదరణవలన కూడ మమ్మును ఆదరించెను గనుక నేను మరి ఎక్కువగ సంతోషించితిని.

8. నేను వ్రాసిన పత్రికవలన మిమ్మును దుఃఖపెట్టినందున విచారపడను; నాకు విచారము కలిగినను ఆ పత్రిక మిమ్మును స్వల్పకాలముమట్టుకే దుఃఖ పెట్టెనని తెలిసికొనియున్నాను.

2 కోరింథీయులకు 2:3-4. వారు ఆధ్యాత్మికంగా ప్రమాదంలో ఉన్నారు కాబట్టి వారికి చాలా ఘాటైన ఉత్తరం రాశాడు. అది వారిని నొప్పించింది. అతనికి వారంటే ప్రేమ కాబట్టి, దేవుని సత్యంలో వారు స్థిరంగా వేరుపారి ఉండాలని కోరుతున్నాడు కాబట్టి అలా రాశాడు. ప్రేమ దుర్బలమైనది కాదు, పైపై భావోద్రేకాలకు లోనయ్యేది కాదు. ఇతరులు తమను తాము నాశనం చేసుకుంటూ ఉంటే అది నోరెత్తకుండా ఉండదు.

9. మీరు దుఃఖపడితిరని సంతోషించుట లేదుగాని మీరు దుఃఖపడి మారుమనస్సు పొందితిరని యిప్పుడు సంతోషించుచున్నాను. ఏలయనగా ఏ విషయములోనైనను మావలన మీరు నష్టము పొందకుండుటకై, దైవచిత్తానుసారముగా దుఃఖపడితిరి.

పౌలు ఉత్తరం మూలంగా వారిలో కలిగిన నొప్పి, దుఃఖం ఒక మంచి ఫలితాన్ని కలిగించాయి – వారిలో పశ్చాత్తాపం కలిగింది. వారు కొన్ని చెడుతనాలను విసర్జించి, తప్పుడు మార్గాల నుంచి వైదొలగి ఇంతకుముందెన్నడూ లేనంతగా హృదయ పూర్వకంగా దేవుని వైపుకు తిరిగారు.

10. దైవచిత్తాను సారమైన దుఃఖము రక్షణార్థమైన మారు మనస్సును కలుగజేయును; ఈ మారుమనస్సు దుఃఖమును పుట్టించదు. అయితే లోకసంబంధమైన దుఃఖము మరణమును కలుగజేయును.

“దేవునివల్ల అయిన దుఃఖం”అంటే దేవుడిచ్చే దుఃఖం. దేవుని ఆత్మకు దుఃఖం కలిగించినందువల్ల విశ్వాసికి కలిగే దుఃఖం, (ఎఫెసీయులకు 4:30). అలాంటి దుఃఖం మనిషిని దేవునికి బాధ, దుఃఖం కలిగించేవాటన్నిటి నుంచి దేవుని వైపుకు తిరిగేలా చేస్తుంది. లౌకిక దుఃఖమంటే దేవునికి సంబంధించినది కాదు. నష్టం, నిరాశ, నొప్పి, లేక తాను కోరినది దొరక్కపోవడం, కొనసాగించుదాం అనుకున్న పాపం బయటపడిపోవడం మొదలైన వాటిమూలంగా కలిగేది. ఇది కొన్ని సార్లు కొంత విచారాన్ని కలిగిస్తుంది గాని నిజమైన పశ్చాత్తాపాన్నెప్పుడూ కలిగించదు (మత్తయి 27:3-5 పోల్చి చూడండి). లౌకిక విచారమున్నవారు అలానే పాపాలు చేస్తూ ఉంటారు. లౌకికమైనవన్నీ చావుకు దారి తీసేవిధంగా ఇది కూడా చావును కలిగిస్తుంది – ఆధ్యాత్మికమైన చావు.

11. మీరు దేవుని చిత్త ప్రకారము పొందిన యీ దుఃఖము ఎట్టి జాగ్రతను ఎట్టిదోష నివారణకైన ప్రతివాదమును ఎట్టి ఆగ్రహ మును ఎట్టి భయమును ఎట్టి అభిలాషను ఎట్టి ఆసక్తిని ఎట్టి ప్రతిదండనను మీలో పుట్టించెనో చూడుడి. ఆ కార్యమునుగూర్చి సమస్త విషయములలోను మీరు నిర్దోషులై యున్నారని ఋజువు పరచుకొంటిరి.

దేవుడు కలిగించే దుఃఖం, పశ్చాత్తాపం ఏవిధంగా కలిసి పని చేస్తాయో చూడండి. “ఈ విషయం” అంటే 2 కోరింథీయులకు 2:5-7 లోని విషయం.

12. నేను మీకు వ్రాసినను ఆ దుష్కార్యము చేసినవాని నిమిత్తము వ్రాయలేదు; వానివలన అన్యాయము పొందిన వాని నిమిత్తమైనను వ్రాయలేదు; మాయెడల మీ కున్న ఆసక్తి దేవునియెదుట మీ మధ్య బాహాటమగుటకే వ్రాసితిని.

2 కోరింథీయులకు 2:9. “మీపట్ల...శ్రద్థాసక్తులు”– అంటే దేవుని సత్యం పట్ల ఉన్న శ్రద్ధాసక్తులు అని కూడా. పౌలుకు ప్రాముఖ్యమైన విషయం ఇదే.

13. ఇందుచేత మేము ఆదరింపబడితివిు. అంతే కాదు, మాకు ఈ ఆదరణ కలిగినప్పుడు తీతుయొక్క ఆత్మ మీ అందరివలన విశ్రాంతిపొందినందున అతని సంతోషమును చూచి మరి యెక్కువగా మేము సంతోషించితివిు.

విశ్వాసులు ఒకరినొకరు ఆదరించుకుని ఒకరినుంచి ఒకరు ప్రోత్సాహం, ఆనందం అనుభవించే సంగతికి మంచి ఉదాహరణ ఈ వచనాల్లో కనిపిస్తున్నది. క్రీస్తు కోసం వ్యక్తుల్ని సంపాదించేవాడు తన పరిచర్య ద్వారా మార్పు పొందినవారు సత్యంలో నడుచుకుంటుంటే అనుభవించే ఆనందం కూడా ఇక్కడ కనిపిస్తున్నది.

14. ఏలయనగా, నేనతని యెదుట మీ విషయమై ఏ అతిశయపు మాటలు చెప్పినను నేను సిగ్గుపరచబడలేదు మేమేలాగు అన్నిటిని మీతో నిజముగా చెప్పితిమో ఆలాగే మేము తీతు ఎదుట మీ విషయమై చెప్పిన అతిశయపు మాటలు నిజమని కనబడెను.

15. మరియు మీరు భయముతోను వణకుతోను తన్ను చేర్చుకొంటిరని అతడు మీయందరి విధేయతను జ్ఞాపకముచేసికొనుచుండగా, అతని అంతఃకరణము మరి యెక్కువగా మీ యెడల ఉన్నది.

16. ప్రతివిషయములోను మీవలన నాకు ధైర్యము కలుగుచున్నది గనుక నంతోషించుచున్నాను.