1. మరియు నేను చెప్పునదేమనగా, వారసుడు అన్నిటికిని కర్తయైయున్నను బాలుడైయున్నంతకాలము అతనికిని దాసునికిని ఏ భేదమును లేదు.

పౌలు ఆ రోజుల్లో ఉన్న కొన్ని ఆచారాలను చెప్తూ, కొన్ని ఆధ్యాత్మిక సత్యాలకు ఉదాహరణలుగా వాటిని ఉపయోగిస్తున్నాడు. కొడుకులు తండ్రులకు వారసులు. తండ్రికున్నదంతా కొడుక్కి వస్తుంది. స్తోమతు ఉన్న తండ్రులు తమ కొడుకులకు కొంత వయసు వచ్చేదాకా వారి ఆలనా పాలనా చూచేందుకు సంరక్షకులను నియమించేవారు. ఆ వయసు వచ్చినప్పుడు వారిని ఇక పిల్లలుగా కాక ఈడేరిన కొడుకులుగా పరిగణించేవారు. ధర్మశాస్త్రం కింద ఉన్నవారు ఇలాంటి బాల్యదశలోనే, పరిపక్వం లేని స్థితిలోనే ఉన్నారనీ దేవుడు వారి విషయంలో ఆశించిన విధంగా లేరనీ పౌలు చెప్తున్నాడు. అయితే క్రీస్తు రాకతో దేవుడు విశ్వాసులకు కుమారత్వం హక్కును ఇచ్చే సమయం వచ్చింది. క్రీస్తు రాకముందు వారు లోకం ప్రాథమిక విషయాల కింద (వ 3), లేక ధర్మశాస్త్రం కింద (వ 5) ఉన్నారు. ఇప్పుడైతే వారు అలాంటి సంరక్షకులు, నిర్వాహకులందరి నుంచీ విడుదలయ్యారు. దేవుని పిల్లలుగా వారికి పూర్తి స్వేచ్ఛ, హక్కులు ఉన్నాయి.

2. తండ్రిచేత నిర్ణయింపబడిన దినము వచ్చువరకు అతడు సంరక్షకుల యొక్కయు గృహనిర్వాహకులయొక్కయు అధీనములో ఉండును.

3. అటువలె మనమును బాలురమై యున్నప్పుడు లోక సంబంధమైన మూలపాఠములకు లోబడి దాసులమై యుంటిమి;

4. అయితే కాలము పరిపూర్ణమైనప్పుడు దేవుడు తన కుమారుని పంపెను;ఆయన స్త్రీయందు పుట్టి,

“కాలం”అంటే 2000 సంవత్సరాల క్రితం అన్నమాట. దేవుని కుమారుడంటే యేసు. ఆయన “స్త్రీ గర్భాన జన్మించాడు” (మత్తయి 1:18-21; లూకా 1:26-38). ఆయనలో నిజమైన మానవ స్వభావం ఉంది (యోహాను 1:14; హెబ్రీయులకు 2:14). మోషే ధర్మశాస్త్రం కింద యూదులందరిలాగానే ఆయన యూదుడుగా జన్మించాడు.

5. మనము దత్తపుత్రులము కావలెనని ధర్మశాస్త్రమునకు లోబడి యున్నవారిని విమోచించుటకై ధర్మశాస్త్రమునకు లోబడినవాడాయెను.

“విమోచించాలని”– గలతియులకు 3:13-14. మనుషులు ధర్మశాస్త్రం కింద ఉన్నంతకాలం వారికి ఇప్పుడు దేవుని సంతానం కలిగి ఉన్న పూర్తి హక్కులు ఉండడం సాధ్యం కాదు.

6. మరియు మీరు కుమారులై యున్నందుననాయనా తండ్రీ, అని మొఱ్ఱపెట్టు తన కుమారుని ఆత్మను దేవుడు మన హృదయములలోనికి పంపెను.

గలతియులకు 3:2, గలతియులకు 3:14; రోమీయులకు 8:15.

7. కాబట్టి నీవిక దాసుడవు కావు కుమారుడవే. కుమారుడవైతే దేవునిద్వారా వారసుడవు.

క్రీస్తు విశ్వాసులు నిర్బంధంగా చాకిరి చేయవలసిన బానిసల్లాంటివారు కారు. దేవునివన్నీ ఉచితంగా పొందిన దేవుని సంతానం లాంటివారే (1 కోరింథీయులకు 3:21-23).

8. ఆ కాలమందైతే మీరు దేవుని ఎరుగనివారై, నిజమునకు దేవుళ్లు కానివారికి దాసులై యుంటిరి గాని
2 దినవృత్తాంతములు 13:9, యెషయా 37:19, యిర్మియా 2:11

ఈ యూదేతర క్రైస్తవులు ఇంతకుముందు అబద్ధ మతాలకూ దేవుళ్ళకూ దాసులుగా ఉన్నారు. అయితే నిజ దేవుణ్ణి తెలుసుకోవడంతో వారికి విడుదల కలిగింది. ఇప్పుడు మోషే ధర్మశాస్త్రం కింద తమను ఉంచుకునే ఆలోచన వారి మనసులో కదులుతున్నది. పాత దాస్యం నుంచి తప్పించుకుని, ఆ స్వతంత్రతను మరో కొత్త దాస్యంలో పడేందుకు వదులుకోవడమే ఇది.

9. యిప్పుడు మీరు దేవునిని ఎరిగినవారును, మరి విశేషముగా దేవునిచేత ఎరుగబడినవారునై యున్నారు గనుక, బల హీనమైనవియు నిష్‌ప్రయోజనమైనవియునైన మూల పాఠములతట్టు మరల తిరుగనేల? మునుపటివలె మరల వాటికి దాసులైయుండ గోరనేల?

10. మీరు దినములను, మాసములను, ఉత్సవకాలములను, సంవత్సరములను ఆచరించుచున్నారు.

పౌలు మోషే ధర్మశాస్త్రం గురించి మాట్లాడుతున్నాడు. “దినాలు” అంటే విశ్రాంతి దినాలని అతని భావం. “నెలలు” అంటే అమావాస్య పండుగలు. “కాలాలు”– యూదుల పండుగలు. “సంవత్సరాలు”– విశ్రాంతి సంవత్సరాలు, మహోత్సవ సంవత్సరాలు (నిర్గమకాండము 20:8; నిర్గమకాండము 23:10-11, నిర్గమకాండము 23:14-17; లేవీ 23వ అధ్యాయం; లేవీయకాండము 25:8-12). వీటిని నిష్ఠగా ఆచరించడమంటే దుర్బలమైన వ్యర్థమైన నియమాల (వ 9) వైపుకు మళ్ళీ తిరగడమే. ఆ దినాలు మొదలైనవి ఆధ్యాత్మిక సత్యాలకు సాదృశ్యాలు, సూచనలు, లేక నీడలే. వాటిలో దేన్నైనా ఆచరించడానికి క్రైస్తవులకు ఎలాంటి అవసరమూ లేదు. హెబ్రీయులకు 8:5; హెబ్రీయులకు 10:1 పోల్చి చూడండి. కొన్ని దినాలను పాటించడం, పాటించకపోవడం మనల్ని మంచిగా గానీ చెడుగా గానీ చెయ్యదని పౌలుకు బాగా తెలుసు (మనం కూడా తెలుసుకోవాలి). కానీ క్రైస్తవులు వాటిని తప్పక పాటించాలనే ఉపదేశం వారిని దాస్యం కిందికి తెచ్చి వారి ఆధ్యాత్మిక జీవితానికి హాని కలిగిస్తుంది.

11. మీ విషయమై నేను పడిన కష్టము వ్యర్థమై పోవునేమో అని మిమ్మును గూర్చి భయపడుచున్నాను.

“నాకు భయం”– యూదుల పవిత్ర దినాలు మొదలైన వాటిని వారు ఆచరించడం పౌలులో కంగారు పుట్టించింది. అబద్ధ ఉపదేశకుల వక్ర బోధల వైపుకు వారు తిరుగుతున్నారని దీన్ని బట్టి అతనికి అనిపించింది (గలతియులకు 1:6-7). నిజమైన శుభవార్తను వారు అసలు అర్థం చేసుకున్నారో లేదోనని అతనికి సందేహం వచ్చి ఉండాలి.

12. సహోదరులారా, నేను మీవంటివాడనైతిని గనుక మీరును నావంటివారు కావలెనని మిమ్మును వేడు కొనుచున్నాను.

పౌలు అతి ప్రాముఖ్యమైన సిద్ధాంత విషయాల గురించి రాశాడు. ఇప్పుడు తనకూ గలతీయవారికీ మధ్య ఉన్న వ్యక్తిగత సంబంధం గురించి రాస్తున్నాడు. ఇక్కడ అతనిలోని కాపరి హృదయం కనిపిస్తున్నది. వారు అతని “పిల్లలు”. వారంటే అతనికి చాలా ప్రేమ, శ్రద్ధ. “మీలాంటి”– వారు యూదులు కాని ఇతర ప్రజలు. అందువల్ల వారికి శుభవార్త ప్రకటించేందుకు వెళ్ళినప్పుడు పౌలు కూడా యూదేతరుడిలాగా అయ్యాడు. 1 కోరింథీయులకు 9:20-23 పోల్చి చూడండి. వారు తనకేదో వ్యక్తిగతంగా హాని చేశారని తాను అలా మాట్లాడ్డం లేదంటున్నాడు. తరువాతి వచనాల్లో తమ మధ్య చాలా ప్రేమ ఉందని చూపుతున్నాడు. “నాలాంటి వారు”– ధర్మశాస్త్రం దాస్యం నుంచి పౌలు విడుదల పొంది కేవలం దేవుని కృపలో మాత్రమే సంతోషిస్తున్నాడు. వారు ఆ విషయంలో తనను అనుసరించాలని కోరుతున్నాడు.

13. మీరు నాకు అన్యాయము చేయలేదు. మొదటిసారి శరీరదౌర్బల్యము కలిగినను నేను సువార్త మీకు ప్రకటించితినని మీరెరుగుదురు.

అతని వ్యాధి ఏమిటో మనకు తెలియదు. అది ఏదో కంటి జబ్బా (వ 15)? 2 కోరింథీయులకు 12:7 లో చెప్పినట్టు అతని శరీరంలో ఉన్న ఆ ముల్లా? లేక తాను పడిన హింసల వల్ల కలిగిన ఫలితమా (అపో. కార్యములు 14:19)? ఖచ్చితంగా చెప్పలేము.

14. అప్పుడు నా శరీరములో మీకు శోధనగా ఉండిన దానినిబట్టి నన్ను మీరు తృణీకరింపలేదు, నిరాకరింపనైనను లేదు గాని దేవుని దూతనువలెను, క్రీస్తుయేసునువలెను నన్ను అంగీక రించితిరి.

“పరీక్ష”– అతని వ్యాధి దేవుడు అతనికి పంపిన శిక్షగా భావించి, అతడు దేవుని సందేశాన్ని తెచ్చినవాడు కాదని తలంచాలన్న దుష్‌ప్రేరణ వారికి కలిగి ఉండవచ్చు. అయితే వారు దానికి లొంగలేదు గాని గొప్ప గౌరవ మర్యాదలతో అతణ్ణి ఆహ్వానించారు.

15. మీరు చెప్పుకొనిన ధన్యత ఏమైనది? శక్యమైతే మీ కన్నులు ఊడబీకి నాకిచ్చివేసి యుందురని మీ పక్షమున సాక్ష్యము పలుకుచున్నాను.

తమను మోషే ధర్మశాస్త్రం దాస్యం కిందికి తెస్తున్న అబద్ధ బోధకుల ఉపదేశాలు వారి ఆనందాన్నీ, పౌలుపట్ల వారి ప్రేమనూ పాడు చేస్తున్నాయి. అసలు పాపవిముక్తి కోసం సొంత ప్రయత్నాలు చెయ్యాలన్న సిద్ధాంతం ఎప్పుడూ ఆనందాన్ని హరించివేస్తుంది.

16. నేను మీతో నిజమాడినందున మీకు శత్రువునైతినా?
ఆమోసు 5:10

మనుషులకు దేవుని సత్యం తెలియచెప్పడం వారికి మనం చేయగలిగిన మేళ్ళన్నిట్లోకీ గొప్ప మేలు, అయితే అలా చేసినందుకు తరచుగా మనుషులు మనల్ని తిరస్కరించి ద్వేషిస్తారు.

17. వారు మీ మేలుకోరి మిమ్మును ఆసక్తితో వెంటాడువారు కారు; మీరే తమ్మును వెంటాడవలెనని మిమ్మును బయటికి త్రోసి వేయగోరుచున్నారు.

“వారికి”– వక్రమైన శుభవార్త ప్రకటిస్తున్న దుర్బోధకులకు (గలతియులకు 1:6-7). అలాంటి వారెప్పుడూ గుంపులకు, ముఠాలకు నాయకులుగా ఉండాలనీ, అనేకమంది ఆసక్తితో తమ పక్షం వహించాలనీ కోరుతారు. రోమీయులకు 16:17-18 పోల్చి చూడండి. పౌలైతే మనుషులు దేవుని విషయంలోనే ఆసక్తిగా ఉండాలని కోరాడు (అతడు మనకందరికీ ఆదర్శం). 1 కోరింథీయులకు 3:4-9, 1 కోరింథీయులకు 3:21 పోల్చి చూడండి.

18. నేను మీయొద్ద ఉన్నప్పుడు మాత్రమే గాక యెల్లప్పుడును మంచి విషయములో ఆసక్తిగానుండుట యుక్తమే.

19. నా పిల్లలారా, క్రీస్తు స్వరూపము మీయందేర్పడు వరకు మీ విషయమై మరల నాకు ప్రసవవేదన కలుగుచున్నది.

గలతీయలోని విశ్వాసులు పౌలుకు ఆధ్యాత్మిక సంతానం (1 కోరింథీయులకు 4:15 పోల్చి చూడండి), వారిమధ్య అతని ప్రయాసల మూలంగా వారు తిరిగి జన్మించినవారు (యోహాను 3:3-8). ఆ ప్రయాసలు పౌలు పాలిట స్త్రీ పడే పురిటి నొప్పుల్లా ఉన్నాయి. ఇప్పుడు మళ్ళీ వారికోసం నొప్పుల్లో ఉన్నాడు పౌలు. ఇప్పుడు వారు మరోసారి కొత్తగా జన్మించడం అవసరం లేదు (మనుషులు ఒకటి కంటే ఎక్కువ సార్లు కొత్త జన్మ పొందడం అనేది సాధ్యమని క్రొత్త ఒడంబడిక గ్రంథంలో రాసి లేదు). క్రీస్తు వారిలో రూపుదిద్దుకోవడమే ఇప్పుడు వారికి అవసరం. అంటే అప్పటికీ వారిలో ఉన్న క్రీస్తు (గలతియులకు 3:2, గలతియులకు 3:26-29) పౌలులో లాగా వారిలో తన జీవితాన్ని చూపించవలసి ఉంది (గలతియులకు 2:20). వారు తమ ఆలోచనల్లో చర్యల్లో మార్పు నొందాలి (రోమీయులకు 12:2; రోమీయులకు 13:14; 2 కోరింథీయులకు 3:18; ఎఫెసీయులకు 4:13-15).

20. మిమ్మునుగూర్చి యెటుతోచక యున్నాను; నేనిప్పుడే మీ మధ్యకు వచ్చి మరియొక విధముగా మీతో మాటలాడ గోరుచున్నాను.

“ఎటూ తోచకుండా”– వ 11; గలతియులకు 1:6; గలతియులకు 3:1s. ఉత్తరంలో ఏమి రాయాలో కూడా ఆలోచించడం కష్టం అనిపించింది.

21. ధర్మశాస్త్రమునకు లోబడియుండ గోరువారలారా, మీరు ధర్మశాస్త్రము వినుటలేదా? నాతో చెప్పుడి.

“ధర్మశాస్త్రం...ఉండగోరే”– వారిలో కొందరు ఈ భయంకరమైన తప్పులో పడిపోయారు. ధర్మశాస్త్రమంటే ఏమిటో వారికి సరిగా తెలియనందువల్లే ఇలా జరిగిందని పౌలుకు తెలుసు.

22. దాసివలన ఒకడును స్వతంత్రురాలివలన ఒకడును ఇద్దరు కుమారులు అబ్రాహామునకు కలిగిరని వ్రాయబడియున్నది గదా?
ఆదికాండము 16:5, ఆదికాండము 21:2

ఆదికాండము 16:1-4; ఆదికాండము 17:15-16; ఆదికాండము 21:1-5; రోమీయులకు 4:18-21.

23. అయినను దాసివలన పుట్టినవాడు శరీరప్రకారము పుట్టెను, స్వతంత్రురాలివలన పుట్టినవాడు వాగ్దాన మునుబట్టి పుట్టెను.

24. ఈ సంగతులు అలంకార రూపకముగా చెప్పబడియున్నవి. ఈ స్త్రీలు రెండు నిబంధనలై యున్నారు; వాటిలో ఒకటి సీనాయి కొండ సంబంధమైనదై దాస్యములో ఉండుటకు పిల్లలు కనును; ఇది హాగరు.

పాత ఒడంబడిక గ్రంథంలోని అబ్రాహాము, అతని భార్య శారా, బానిస పిల్ల హాగరు చరిత్రలో నుంచి పౌలు ఆధ్యాత్మిక పాఠాలను బయటికి తెస్తున్నాడు. వారు నిజంగా గత చరిత్రలో ఉన్న వ్యక్తులని అతనికి తెలుసు. అయితే ఆధ్యాత్మిక సత్యాలకు సాదృశ్యాలుగా, సూచనలుగా, లేక చిహ్నాలుగా పౌలు ఇక్కడ వారిని చూస్తున్నాడు. ఇక్కడ పౌలు ఉపయోగించిన విధానానికి కొందరు పండితులు అభ్యంతరం చెప్పారు. అయితే పౌలు దేవుని ఆత్మప్రేరణ కింద ఉన్నాడు కాబట్టి ఏ పొరపాటు చెయ్యడం లేదు. సన్నిధి గుడారం, ధర్మశాస్త్రం మొత్తం కూడా ఆధ్యాత్మిక విషయాలకు నీడలే (హెబ్రీయులకు 8:5; హెబ్రీయులకు 10:1). ఆ మాటకొస్తే క్రీస్తు స్థాపించిన కొత్త ఒడంబడికలోని ఆధ్యాత్మిక వాస్తవికతలకు పాత ఒడంబడిక గ్రంథం మొత్తం సాదృశ్యం, చిహ్నం, సూచన, లేక నీడ అని కూడా చెప్పవచ్చు. అయితే పాత ఒడంబడిక గ్రంథంలోని సంఘటనలకు, వివరాలకు అర్థం చెప్పేటప్పుడు మనం చాలా జాగ్రత్తగా ఉండాలి. దేవుడు పౌలుకు తన ఆత్మ ద్వారా ప్రత్యేకమైన ప్రేరేపణ, వివరణ ఇచ్చి అతని ఉపదేశం ఏ తప్పు లేనిదిగా ఉండేలా చేశాడు. మన విషయంలో ఇది నిజం కాదు. సీనాయి కొండ దగ్గర దేవుడు మోషే ద్వారా చేసిన పాత ఒడంబడిక ప్రతినిధి హాగరు (నిర్గమ 19 అధ్యాయం). క్రీస్తు ఇచ్చిన కొత్త ఒడంబడికకు (మత్తయి 26:28) ప్రతినిధి శారా. హాగరు బానిస పిల్ల. ఆమె సంతానం అబ్రాహాముకు పుట్టుక నుంచి స్వతంత్రత గల సంతానంగా లెక్కలోకి రాలేదు (రోమీయులకు 9:7-8 చూడండి). హాగరు మోషే ధర్మశాస్త్రానికీ, దాన్ని ఇచ్చిన సీనాయి కొండకూ, పాత ఒడంబడిక ఆచారాలకు కేంద్రమైన జెరుసలంకూ గుర్తుగా ఉంది. పాత ఒడంబడిక ఆత్మసంబంధమైన బానిసత్వానికి గుర్తు అని పౌలు అంటున్నాడు (వ 1,9; గలతియులకు 3:10, గలతియులకు 3:23).

25. ఈ హాగరు అనునది అరేబియాదేశములోఉన్న సీనాయి కొండయే. ప్రస్తుతమందున్న యెరూషలేము దాని పిల్లలతో కూడ దాస్యమందున్నది గనుక ఆ నిబంధన దానికి దీటయియున్నది.

26. అయితే పైనున్న యెరూషలేము స్వతంత్రముగా ఉన్నది; అది మనకుతల్లి.

శారా కొత్త ఒడంబడికకూ, దానికి చెందిన ఆధ్యాత్మిక వాస్తవాలకు కేంద్రమైన పరలోక జెరుసలంకూ గుర్తుగా ఉంది (హెబ్రీయులకు 12:22). అక్కడ దాస్యం, బానిసత్వం లేవు. ఇప్పుడు విశ్వాసులు చెందేది కొత్త ఒడంబడికకే గాని పాత ఒడంబడికకు కాదు.

27. ఇందుకుకనని గొడ్రాలా సంతోషించుము, ప్రసవవేదనపడని దానా, బిగ్గరగా కేకలువేయుము; ఏలయనగా పెనిమిటిగలదాని పిల్లలకంటె పెనిమిటి లేనిదాని పిల్లలు ఎక్కువమంది ఉన్నారు అని వ్రాయబడియున్నది.
యెషయా 54:1

యెషయా 54:1. అభిషిక్తుని దీవెనల క్రిందికి, ఆయన స్థాపించబోయే నవ యుగంలోకి ఇస్రాయేల్ వచ్చేటప్పుడు ఆ జాతికి కలగబోయే దివ్య భవిష్యత్తు గురించి యెషయా రాశాడు. అంతకుముందు ఫలించకుండా ఉన్న ఇస్రాయేల్ దేవుని కృప, ప్రభావాలవల్ల ఫలవంతం అవుతుంది.

28. సహోదరులారా, మనమును ఇస్సాకువలె వాగ్దానమునుబట్టి పుట్టిన కుమారులమై యున్నాము.

అబ్రాహాము దేవుని వాగ్దానంలో నమ్మకం ఉంచాడు. ఆయన అతనికి ఇస్సాకును ఇచ్చాడు. జీవాన్నిచ్చే, అద్భుతాలు చేసే దేవుని వాక్కు మూలంగా ఇస్సాకు జన్మించాడు. విశ్వాసులు కొత్త జీవాన్ని పొంది అబ్రాహాము ఆధ్యాత్మిక వారసులు అయ్యేది ఈ మార్గం ద్వారానే (యాకోబు 1:18; 1 పేతురు 1:23). ఇక్కడ “వాగ్దానం” అనే మాటను మోషే ధర్మశాస్త్రానికి వ్యతిరేకంగా వాడుతున్నాడు పౌలు.

29. అప్పుడు శరీరమునుబట్టి పుట్టినవాడు ఆత్మనుబట్టి పుట్టినవానిని ఏలాగు హింసపెట్టెనో యిప్పుడును ఆలాగే జరుగుచున్నది.
ఆదికాండము 21:9

ఆదికాండము 21:8-9 చూడండి. ఇష్మాయేల్ “శరీర రీతిగా పుట్టాడు”. ఇస్సాకు “దేవుని ఆత్మ ద్వారా” పుట్టాడు. అంటే అది మానవపరంగా అసాధ్యమైనప్పుడు దేవుని ఆత్మ అబ్రాహాము, శారాలకు కొడుకు కలిగేలా చేశాడు (హెబ్రీయులకు 11:11-12; రోమీయులకు 4:18-21). ఇష్మాయేల్ ఇస్సాకును హింసించినట్టే పాత ఒడంబడిక కింద ఉన్నవారు (యూదులు) కొత్త ఒడంబడిక కింద ఉన్నవారిని (క్రైస్తవులను) హింసలు పెట్టారు. అపో. కార్యములు 5:40; అపో. కార్యములు 7:54-58; అపో. కార్యములు 13:49-50; అపో. కార్యములు 14:19; మొ।। చూడండి. అలాగే ఆధ్యాత్మికత లేని వ్యక్తులు ఆధ్యాత్మిక వ్యక్తులను ఏ కాలంలోనైనా బాధలు పెడుతుంటారు.

30. ఇందును గూర్చి లేఖనమేమి చెప్పుచున్నది?దాసిని దాని కుమారుని వెళ్లగొట్టుము, దాసి కుమారుడు స్వతంత్రురాలి కుమారునితోపాటు వారసుడై యుండడు.
ఆదికాండము 21:10

“లేఖనం”– ఆదికాండము 21:10. ధర్మశాస్త్రాన్ని పాటించే ప్రయత్నాలతో పాపవిముక్తి సంపాదించుకోవాలని చూస్తున్నవారు దాస్యం కింద ఉన్నారనీ, దేవుని కృప మూలంగా పాపవిముక్తి, విడుదల పొందిన వారితో వారికి చోటు లేదనీ దీనికి ఆధ్యాత్మిక అర్థం. పూర్తిగా భిన్నమైన ఈ రెండు దారులూ కలవవు. ఏదో విధంగా పాత ఒడంబడికను, కొత్త ఒడంబడికను కలిపి మూడోదిగా మరో దాన్ని చేయడం తగదు. అలాంటి ప్రయత్నం వక్రమైన శుభవార్తను పుట్టిస్తుంది అంతే (గలతియులకు 1:7).

31. కాగా సహోదరులారా, మనము స్వతంత్రురాలి కుమా రులమే గాని దాసి కుమారులము కాము.

అంటే క్రీస్తు విశ్వాసులకు మోషే ధర్మశాస్త్రంతో, పాత ఒడంబడికతో, యూద మతంతో ఎలాంటి సంబంధమూ లేదు. వారు కేవలం కొత్త ఒడంబడిక సంతానమే. క్రీస్తు శుభవార్త వాగ్దానాల మూలంగా దేవుని ప్రభావంవల్ల వారు కొత్తగా జన్మించినవారు. పాత ఒడంబడికకూ, కొత్త ఒడంబడికకూ మధ్య ఇతర తేడాలకు 2 కోరింథీయులకు 3:6-18; హెబ్రీయులకు 8:6-10; హెబ్రీయులకు 12:18-24 చూడండి.