1. దేవునియెదుటను సజీవులకును మృతులకును తీర్పు తీర్చు క్రీస్తుయేసు ఎదుటను, ఆయన ప్రత్యక్షతతోడు ఆయన రాజ్యముతోడు, నేను ఆనబెట్టి చెప్పునదేమనగా

పౌలు ఎంత గంబీరంగా మాట్లాడుతున్నాడు! ఒక అతి ప్రాముఖ్యమైన విషయం గురించి చెప్పాలనుకుంటున్నాడు. “ప్రత్యక్షం”– వ 8; 1 తిమోతికి 6:14; తీతుకు 2:13; హెబ్రీయులకు 9:28. “రాజ్యం”– మత్తయి 4:17; మత్తయి 13:11; మత్తయి 19:28; మత్తయి 25:34; లూకా 19:11-12; అపో. కార్యములు 1:3, అపో. కార్యములు 1:6. “తీర్పు”– యోహాను 5:27; అపో. కార్యములు 17:31; రోమీయులకు 2:16; 1 కోరింథీయులకు 4:5; 2 కోరింథీయులకు 5:10.

2. వాక్యమును ప్రకటించుము; సమయమందును అసమయ మందును ప్రయాసపడుము; సంపూర్ణమైన దీర్ఘశాంతముతో ఉపదేశించుచు ఖండించుము గద్దించుము బుద్ధి చెప్పుము.

సంఘ కాపరులకూ బోధకులకూ శుభవార్తీకులకూ ఇదే గొప్ప పని (భూమి మీద ఇంత కంటే గొప్ప పని ఏదీ లేదు). వారు తమ ఊహలనూ కల్పనలనూ విచిత్రమైన భావార్థలనూ, తమ అభిప్రాయాలనూ, లేదా ఇతరుల అభిప్రాయాలనూ ప్రకటించకూడదు. వారు ప్రకటించవలసిన సందేశం దేవుని వాక్కే, మరేదీ కాదు. మత్తయి 28:20; మార్కు 16:15; 1 కోరింథీయులకు 1:23; 1 కోరింథీయులకు 2:1-5; 2 కోరింథీయులకు 4:5; 1 పేతురు 4:11 పోల్చి చూడండి. “యుక్తకాలంలో, అకాలంలో”– ఇది సంఘంలో ఉన్నా, బయట ఉన్నా ఎప్పుడూ సిద్ధంగా ఉండాలని సూచిస్తుంది. “ఓర్పుతో ఉపదేశంతో”– 2 తిమోతికి 2:24-25. “మందలించు...ప్రోత్సహించు”– 2 తిమోతికి 3:16; 1 థెస్సలొనీకయులకు 3:2; 1 థెస్సలొనీకయులకు 4:18; 1 తిమోతికి 5:20; తీతుకు 1:9, తీతుకు 1:13; తీతుకు 2:15; హెబ్రీయులకు 3:13; హెబ్రీయులకు 10:25.

3. ఎందుకనగా జనులు హితబోధను సహింపక, దురద చెవులు గలవారై తమ స్వకీయ దురాశలకు అను కూలమైన బోధకులను తమకొరకు పోగుచేసికొని,

2 తిమోతికి 3:1; 1 తిమోతికి 4:1. “క్షేమకరమైన సిద్ధాంతాలు”– 2 తిమోతికి 1:13; 1 తిమోతికి 1:10-11; 1 తిమోతికి 6:3; తీతుకు 1:9; తీతుకు 2:1. “దురద చెవులు కలిగి”– ఇలాంటివారు తమకిష్టం వచ్చినట్టు చేస్తూ తమ చెవులకు ఇంపైన విషయాలనే వినపడాలని ఇష్టపడతారు. “ఏది నిజం?” అని కాదు వారి ప్రశ్న. “ఏది నన్ను సంతోషపరుస్తుంది?” అనేదే వారికి ముఖ్యం (దీన్ని వారు మాటలతో పైకి చెప్పరు). సత్యమంటే వారికి ఇష్టం లేదు. ఎందుకంటే సత్యం వారి జీవిత విధానానికీ, వారికిష్టమైనదానిని చేయడానికీ అడ్డుపడుతుంది. అందుకే వారు సత్యం అనే వెలుగుకు దూరంగా చీకట్లోకి తొలగిపోతారు. ఇదే వారి గొప్ప పాపం, దోషం – యోహాను 3:18-20. దేవుడిచ్చే పాపవిముక్తి, రక్షణ పొందాలంటే అన్నింటికంటే ముఖ్యంగా దేవుని సత్యాన్ని ఆశించాలి. కానీ ఈ మనుషులు దేవుని సత్యాన్ని ఆశించరు సరిగదా ఆశించాలనుకోరు కూడా. 2 థెస్సలొనీకయులకు 2:10-12 చూడండి.

4. సత్యమునకు చెవినియ్యక కల్పనాకథలవైపునకు తిరుగుకాలము వచ్చును.

“కల్పిత కథలు”– 1 తిమోతికి 1:4; 1 తిమోతికి 4:7; తీతుకు 2:14. వారు దేవుని సత్యం కంటే వట్టి కథలనే కోరుకుంటారు.

5. అయితే నీవు అన్నివిషయములలో మితముగా ఉండుము, శ్రమపడుము, సువార్తికుని పనిచేయుము, నీ పరిచర్యను సంపూర్ణముగా జరిగించుము.

“కష్టాలు”– 2 తిమోతికి 2:3. “ప్రచారకుడు”– తిమోతి సంఘానికి కాపరి, ఉపదేశకుడు అయినప్పటికీ శుభవార్తను ప్రకటించి ప్రజలను క్రీస్తువైపు మళ్లించే బాధ్యత కూడా అతనికి ఉంది.

6. నేనిప్పుడే పానార్పణముగ పోయబడుచున్నాను, నేను వెడలిపోవు కాలము సమీపమై యున్నది.

“పానార్పణంగా”– ఫిలిప్పీయులకు 2:17. “నేను పోయే సమయం”– దేవుడు ఈ విషయం పౌలుకు బయలు పరచినట్టు కనిపిస్తున్నది.

7. మంచి పోరాటము పోరాడితిని, నా పరుగు కడ ముట్టించితిని, విశ్వాసము కాపాడుకొంటిని.

“పోరాటం”– 1 కోరింథీయులకు 9:26; 2 కోరింథీయులకు 10:4; 1 తిమోతికి 1:18; 1 తిమోతికి 6:12; ఎఫెసీయులకు 6:10-18. “పరుగు”– 1 కోరింథీయులకు 9:24; గలతియులకు 2:2; గలతియులకు 5:7; ఫిలిప్పీయులకు 3:13-14; హెబ్రీయులకు 12:1. అపో. కార్యములు 20:24 లో తాను చెప్పిన గమ్యాన్ని చేరుకున్నాడు. “విశ్వాస...పాటించాను”– దేవుడు పౌలుకు అప్పగించిన సత్యాన్ని (1 కోరింథీయులకు 4:1; ఎఫెసీయులకు 3:2-9) అతడు పాటించాడు. తన స్వంత విశ్వాసానికి మూలాధారంలాగా తన జీవితానికి నియమంలాగా పాటించాడు. అంతేగాక ఇతరులకు అందించడానికి నమ్మకమైన పనివాడుగా పాటించాడు. విశ్వసనీయతతో ఇదంతా చేశాడు కాబట్టి తాను “వెళ్ళిపోయే సమయాన్ని” సంతోషంతో చూడగలిగాడు.

8. ఇకమీదట నా కొరకు నీతికిరీట ముంచబడియున్నది. ఆ దినమందు నీతిగల న్యాయాధి పతియైన ప్రభువు అది నాకును, నాకు మాత్రమే కాకుండ తన ప్రత్యక్షతను అపేక్షించు వారికందరికిని అనుగ్రహించును.

“నీతిన్యాయాల కిరీటం”– ఆ రోజుల్లో ఆటల పోటీల్లో గెలుపొందినవారికి కిరీటం తొడిగేవారు (వాస్తవంగా ఇది పొన్న చెట్టు ఆకులతో చేసిన దండ). పౌలు తన పరుగు పందాన్ని ముగించి, తన హారం కోసం ఎదురు చూస్తున్నాడు. 1 కోరింథీయులకు 9:25 పోల్చి చూడండి. నీతిన్యాయాల కిరీటం అంటే తాను జీవించిన నీతిమంతమైన జీవితానికీ, న్యాయం కాని దానికి ఎదురు నిలిచి పోరాడిన పోరాటానికీ, న్యాయమైన పందాన్ని పరుగెత్తినదానికీ, న్యాయమైన విశ్వాస సత్యాలను పాటించినందుకూ బహుమానంగా ఇచ్చిన కిరీటం. కిరీటం గురించి 2 తిమోతికి 2:5; ఫిలిప్పీయులకు 4:1; యాకోబు 1:23; 1 పేతురు 5:4; ప్రకటన గ్రంథం 2:10 చూడండి. “ఆ రోజున”– 2 తిమోతికి 1:12, 2 తిమోతికి 1:18; 2 థెస్సలొనీకయులకు 1:10. “ప్రత్యక్షత”– నీతిన్యాయాల కిరీటానికీ క్రీస్తు ప్రత్యక్షతకూ మధ్య ఉన్న సంబంధం ఏమిటి? నీతిమంతమైన జీవితం జీవించేవారు క్రీస్తు మళ్ళీ రావాలని ఆశతో ఎదురుచూస్తూ ఉంటారు. ఆయన రావాలని కోరేవారు తమను తాము పవిత్రంగా చేసుకుంటారు. 1 యోహాను 3:2-3 చూడండి. ఆయన రాకడ గురించి తెలుసుకొని, దాని గురించి మాట్లాడడం, బోధించడం సరిపోదు. నీతిన్యాయాల కిరీటం సంపాదించుకోవాలంటే మనస్ఫూర్తిగా ఆయన రాకడను ఆశించాలి.

9. నాయొద్దకు త్వరగా వచ్చుటకు ప్రయత్నము చేయుము.

10. దేమా యిహలోకమును స్నేహించి నన్ను విడిచి థెస్సలొనీకకు వెళ్లెను, క్రేస్కే గలతీయకును తీతు దల్మతియకును వెళ్లిరి;

“ఈ లోకంమీద ప్రీతి కలిగి”– ఎవరి గురించి అయినా ఈ విధంగా చెప్పాలంటే చాలా విచారకరం. 1 యోహాను 2:15-17 చూడండి.

11. లూకా మాత్రమే నా యొద్ద ఉన్నాడు. మార్కును వెంటబెట్టుకొని రమ్ము, అతడు పరిచారము నిమిత్తము నాకు ప్రయోజనకరమైనవాడు. తుకికును ఎఫెసునకు పంపితిని.

“లూకా”– కొలొస్సయులకు 4:14; ఫిలేమోనుకు 1:24. “మార్కు”– అపో. కార్యములు 12:25; అపో. కార్యములు 13:5, అపో. కార్యములు 13:13; అపో. కార్యములు 15:37, అపో. కార్యములు 15:39; 1 పేతురు 5:13. మార్కు ముందు తప్పు చేసినా తరువాత తాను దేవుని నమ్మకమైన సేవకుణ్ణని నిరూపించుకున్నాడు. మనం తప్పు చేసినప్పుడు మనలను తోసివేయకుండా మనపట్ల సహనం చూపుతూ మనలను మంచిగా చేయడానికి దేవుడు మనలో పని చేస్తూ ఉంటాడన్న విషయం ఎంతో గొప్పది.

12. నీవు వచ్చునప్పుడు నేను త్రోయలో కర్పునొద్ద ఉంచి వచ్చిన అంగీని పుస్తకములను,

13. ముఖ్యముగా చర్మపు కాగితములను తీసికొని రమ్ము.

“పుస్తకాలు...తోలు కాగితాలు”– పుస్తకాలంటే ఒక విధమైన జమ్ముమొక్కలతో తయారు చేసిన కాగితం చుట్టలు. అప్పుడు తోలుతో కూడా కాగితం వంటిదాన్ని తయారు చేసి దానిమీద రాసేవారు. తాను కోరిన వాటిలో ఏమి రాసి ఉందో పౌలు మనకు చెప్పలేదు.

14. అలెక్సంద్రు అను కంచరివాడు నాకు చాల కీడుచేసెను, అతని క్రియలచొప్పున ప్రభువతనికి ప్రతిఫలమిచ్చును;
2 సమూయేలు 3:39, కీర్తనల గ్రంథము 28:4, కీర్తనల గ్రంథము 62:12, సామెతలు 24:12

2 తిమోతికి 1:15; 2 తిమోతికి 2:17; 1 తిమోతికి 1:20. క్రైస్తవులకు హాని చేయగల వ్యక్తుల పేర్లు చెప్పి వారి విషయంలో జాగ్రత్తగా ఉండాలని హెచ్చరించడంలో పౌలు వెనుకాడలేదు.

15. అతని విషయమై నీవును జాగ్రత్తగా ఉండుము, అతడు మా మాటలను బహుగా ఎదిరించెను.

16. నేను మొదట సమాధానము చెప్పినప్పుడు ఎవడును నా పక్షముగా నిలువలేదు, అందరు నన్ను విడిచిపోయిరి; ఇది వారికి నేరముగా ఎంచబడకుండును గాక.

“నా పక్షం”– పౌలు ఖైదులో ఉండి న్యాయ స్థానంలో విచారణను ఎదుర్కోవలసి వచ్చింది. ఇక్కడ పౌలు మొదటి విచారణ గురించి మాట్లాడుతున్నాడు. అపొ కా 24వ అధ్యాయం పోల్చి చూడండి. “విడిచివెళ్ళిపోయారు”– 2 తిమోతికి 1:15. ఆ సమయంలో లూకా అక్కడ లేడని దీన్ని బట్టి తెలుస్తుంది. లూకా పౌలును విడిచి పెట్టి వెళ్ళడం అనేది ఆలోచించలేని విషయం.

17. అయితే నా ద్వారా సువార్త పూర్ణముగా ప్రకటింపబడు నిమిత్తమును, అన్య జనులందరును దాని విను నిమిత్తమును, ప్రభువు నా ప్రక్క నిలిచి నన్ను బలపరచెను గనుక నేను సింహము నోటనుండి తప్పింపబడితిని.
కీర్తనల గ్రంథము 22:21, దానియేలు 6:21

ప్రభు సేవకులను మనుషులు విడిచివెళ్ళవచ్చు గానీ ప్రభువు మాత్రం అలా కాదు – హెబ్రీయులకు 13:5-6. “బలం”– యెషయా 40:29-31. అపో. కార్యములు 18:9-10 పోల్చి చూడండి. “వినాలనీ”– తనను విచారణ చేసినవారూ ఇంకా అక్కడ ఉన్న అన్య జనులూ వినాలని పౌలు ఉద్దేశం. అలాంటి సమయంలో కూడా శుభవార్త ప్రకటించే ధైర్యాన్ని దేవుడు పౌలుకిచ్చాడు. మత్తయి 10:17-20; మార్కు 13:9; లూకా 21:12-15 పోల్చి చూడండి. “సింహం నోటి నుంచి”– ఏదో భయంకరమైన అపాయమని పౌలు ఉద్దేశం. అది శారీరకమైన అపాయమో ఆధ్యాత్మికమైన అపాయమో అతడు చెప్పలేదు. 1 పేతురు 5:8 చూడండి.

18. ప్రభువు ప్రతి దుష్కార్యమునుండి నన్ను తప్పించి తన పరలోక రాజ్యమునకు చేరునట్లు నన్ను రక్షించును. యుగయుగములు ఆయనకు మహిమ కలుగును గాక, ఆమేన్‌.

“విడిపిస్తాడు”– దేవుడు తనను మరణం నుంచి విడిపిస్తాడని అనడం లేదు. తనకు మరణం దగ్గర పడిందని ముందే చెప్పాడు – వ 6. కానీ ప్రభువు ఆయన ఇష్టప్రకారం, ఆయనకిష్టమైన సమయంలో తనను చెడునుంచి కాపాడి పరలోకానికి తీసుకువెళ్తాడనే నమ్మకం పౌలుకుంది. మత్తయి 6:13 పోల్చి చూడండి.

19. ప్రిస్కకును అకులకును ఒనేసిఫొరు ఇంటివారికిని నా వందనములు.

“అకుల”– అపో. కార్యములు 18:2, అపో. కార్యములు 18:18-19, అపో. కార్యములు 18:26; రోమీయులకు 16:3.

20. ఎరస్తు కొరింథులో నిలిచిపోయెను. త్రోఫిము రోగియైనందున అతని మిలేతులో విడిచివచ్చి తిని.

21. శీతకాలము రాకమునుపు నీవు వచ్చుటకు ప్రయ త్నముచేయుము. యుబూలు, పుదే, లిను, క్లౌదియయు సహోదరులందరును నీకు వందనములు చెప్పుచున్నారు.

వ 9,13. ఆ ప్రదేశంలో చలికాలంలో చలి చాలా ఎక్కువగా ఉండవచ్చు.

22. ప్రభువు నీ ఆత్మకు తోడై యుండును గాక. కృప మీకు తోడై యుండును గాక.

ఈ గొప్ప రాయబారి రాసిన మాటలలో మనకు లభించిన ఆఖరి మాటలు ఇవి. తన పరిచర్య అంతటిలో ఉన్న రెండు ప్రాముఖ్యమైన అంశాలను తిరిగి ప్రస్తావిస్తున్నాడు – తన ప్రజలతో క్రీస్తు యేసు సన్నిధి, వారిని రక్షించి, కాపాడి, ఆశీర్వదించే దేవుని కృప.