1. నీవు హితబోధకనుకూలమైన సంగతులను బోధించుము.

వ 2,3,9,15; తీతుకు 1:9; 1 తిమోతికి 1:3. తప్పుడు బోధలనుంచి సత్యాన్ని కాపాడుకోవాలంటే దాన్ని నేర్పించడమే అన్నిట్లోకీ మంచి మార్గం.

2. ఏలాగనగా వృద్ధులు మితానుభవముగలవారును, మాన్యులును, స్వస్థబుద్ధిగలవారును, విశ్వాస ప్రేమ సహనములయందు లోపములేనివారునై యుండవలె ననియు,

సరైన ఉపదేశం వివిధ రకాల ప్రజలకు వారి అవసరాలకూ బలహీనతలకూ తగినదై ఉంటుంది. సంఘ ఉపదేశకులు ప్రతి రకం వ్యక్తికీ దేవుని వాక్కును ఉపదేశించాలి. “ప్రేమభావం”– దేవునినుంచి వచ్చే ప్రేమ (1 కోరింథీయులకు 13:1). “సహనం”– రోమీయులకు 5:3-4; రోమీయులకు 15:4-5; 2 కోరింథీయులకు 1:6; కొలొస్సయులకు 1:11; 1 థెస్సలొనీకయులకు 1:3; ప్రకటన గ్రంథం 1:9.

3. ఆలాగుననే వృద్ధస్త్రీలు కొండెకత్తెలును, మిగుల మద్యపానాసక్తులునై యుండక, ప్రవర్తనయందు భయభక్తులుగలవారై యుండవలెననియు, దేవునివాక్యము దూషింపబడకుండునట్లు,

“మంచి విషయాలు”– బహుశా సిద్ధాంతాల గురించి కాక, క్రైస్తవ స్త్రీలు ఆచరణలో పెట్టవలసినవాటి గురించి పౌలు మాట్లాడుతున్నాడు. “నేర్పుతూ”– 1 కోరింథీయులకు 14:3-4; 1 తిమోతికి 2:11-12 పోల్చి చూడండి. క్రైస్తవ స్త్రీలు యువతులకు దేవుని వాక్కును నేర్పడం ద్వారా విలువైన సేవ చేయవచ్చు.

4. ¸యౌవనస్త్రీలు తమ భర్తలకు లోబడియుండి తమ భర్తలను శిశువులను ప్రేమించు వారును స్వస్థబుద్ధిగలవారును పవిత్రులును ఇంట ఉండి పనిచేసికొనువారును మంచివారునై యుండవలెనని బుద్ధి చెప్పుచు,

“దేవుని వాక్కు దూషణకు గురి కాకుండా”– క్రైస్తవ స్త్రీలు తమ భర్తలకు ఎదురు తిరిగేవారైతే, దయ లేనివారై, అపవిత్రంగా ఉంటే వారు తమకు చెడ్డ పేరు తెచ్చుకోవడమే కాకుండా తాము విశ్వసిస్తూ అనుసరిస్తున్నామన్న దేవుని వాక్కుకు కూడా చెడ్డ పేరు తెచ్చినవారవుతారు. ఈ విషయం పై పౌలు ఎప్పుడూ ప్రత్యేకమైన శ్రద్ధ చూపేవాడు (1 తిమోతికి 6:1).

5. మంచి ఉపదేశముచేయువారునై యుండవలె ననియు బోధించుము.

6. అటువలెనే స్వస్థబుద్దిగలవారై యుండవలెనని ¸యౌవనపురుషులను హెచ్చరించుము.

“మనసును అదుపులో”– వ 2; 1 తిమోతికి 3:2; అపో. కార్యములు 24:25; గలతియులకు 5:23. ఇక్కడ ఈ ఒక్క విషయం పౌలు నొక్కి చెపుతున్నాడు కాబట్టి ఈ హెచ్చరిక యువకులకు ఎంతో అవసరమని మనం భావించవచ్చు.

7. పరపక్షమందుండువాడు మనలనుగూర్చి చెడుమాట యేదియు చెప్పనేరక సిగ్గుపడునట్లు అన్నిటియందు నిన్ను నీవే సత్కార్యములవిషయమై మాదిరిగా కనుపరచుకొనుము.

సత్యాన్ని ఇతరులకు ఉపదేశించినంత మాత్రాన సరిపోదు. ఉపదేశకులు వారు ఉపదేశించేదానికి ఆదర్శంగా ఉండాలి – 1 తిమోతికి 4:12; మొ।।. “సిగ్గుపడాలి”– 1 పేతురు 3:16. దేవునికి చెందిన నిజమైన ఉపదేశకులను వ్యతిరేకించేవారు, వారి గురించి చెడు చెప్పడానికి కారణం కోసం చూచేవారు ఎప్పుడూ ఉంటారు. కాబట్టి క్రీస్తు సేవకులు తమ మాటలలోనూ చేతలలోనూ చాలా జాగ్రత్తగా ఉండాలి.

8. నీ ఉపదేశము మోసములేనిదిగాను మాన్య మైనదిగాను నిరాక్షేపమైన హితవాక్యముతో కూడినదిగాను ఉండవలెను.

9. దాసులైనవారు అన్ని విషయముల యందు మన రక్షకుడగు దేవుని ఉపదేశమును అలంక రించునట్లు, తమ యజమానులకు ఎదురుమాట చెప్పక,

ఎఫెసీయులకు 6:5-8; 1 తిమోతికి 6:1-2.

10. ఏమియు అపహరింపక, సంపూర్ణమైన మంచి నమ్మకమును కనుపరచుచు, అన్ని కార్యములయందు వారిని సంతోష పెట్టుచు, వారికి లోబడియుండవలెనని వారిని హెచ్చరించుము.

“పూర్తిగా నమ్మకమైనవారమని”– ఎఫెసీయులకు 4:28; లూకా 16:10. “ఆకర్షణీయంగా”– క్రీస్తు శుభవార్త మనోహరమైనది, సుందరమైనది. ప్రతి విశ్వాసీ అది ఇతరులకు ఆ విధంగా కనబడేలా ప్రయత్నం చేయాలి. ఇతరులు దాన్ని నమ్మే విధంగా చేయాలంటే ఇదే మార్గం. 1 పేతురు 2:9; మత్తయి 5:16 పోల్చి చూడండి.

11. ఏలయనగా సమస్త మనుష్యులకు రక్షణకరమైన దేవుని కృప ప్రత్యక్షమై

తీతుకు 3:4-6; ఎఫెసీయులకు 2:8-9; రోమీయులకు 6:23. దీని అర్థం మనుషులందరూ పాపవిముక్తి, రక్షణ పొందుతారని కాదు గానీ పాపవిముక్తి, రక్షణ అన్ని రకాల వారి కోసం – బానిసలకోసం, యజమానులకోసం, ముసలివారికోసం, పడుచువారికోసం, స్త్రీలకోసం, పురుషులకోసం, యూదులకోసం, ఇతర ప్రజలకోసం, అంతటా ఉన్న మనుషులందరి కోసమూ. “పాపవిముక్తి, రక్షణ”– మత్తయి 1:21; రోమీయులకు 1:16 నోట్స్. “కృప”– యోహాను 1:14, యోహాను 1:16; రోమీయులకు 1:2; 2 కోరింథీయులకు 8:9 నోట్స్.

12. మనము భక్తిహీనతను, ఇహలోక సంబంధమైన దురాశలను విసర్జించి, శుభప్రదమైన నిరీక్షణ నిమిత్తము,

దేవుని కృప తెలివిగల ఉపదేశకుని వంటిది. ఇది విశ్వాసులకు ఏ విధంగా జీవించాలి, ఏ విధంగా జీవించకూడదు అని నేర్పిస్తుంది. “నేను నీకు రక్షణ ఇచ్చాను కాబట్టి నీ ఇష్టం వచ్చినట్టు చేయవచ్చు” అని కృప చెప్పదు. రోమీయులకు 6:1, రోమీయులకు 6:15-18; ఎఫెసీయులకు 4:22-24 చూడండి. పాపానికీ స్వార్థానికీ సైతానుకూ “వద్దు” అని చెప్పడం, దేవునికీ భయభక్తులకూ మంచితనానికీ “అవును” అని చెప్పడం నేర్పిస్తుంది. ఈ విషయాలు మనం ఇంకా నేర్చుకోకపోతే కృప మనకు ఉపదేశించిందా? మనల్ని రక్షించిందా అనే ప్రశ్నలు వేయాలి. ఎలా జీవించాలో కృపద్వారా నేర్చుకోవడమే క్రీస్తులో మనకు ఆధ్యాత్మిక జీవితం ఉంది అనడానికి రుజువు.

13. అనగా మహా దేవుడును మన రక్షకుడునైన యేసుక్రీస్తు మహిమయొక్క ప్రత్యక్షత కొరకు ఎదురుచూచుచు, ఈ లోకములో స్వస్థబుద్ధితోను నీతితోను, భక్తితోను బ్రదుకుచుండవలెనని మనకు బోధించుచున్నది.
హోషేయ 1:7

“దివ్యమైన ఆశాభావం”– ఆశాభావం మీద నోట్స్ రోమీయులకు 5:2; రోమీయులకు 8:24-25. క్రీస్తే మన ఆశాభావం (కొలొస్సయులకు 1:27; 1 తిమోతికి 1:1). విశ్వాసులుగా మనం కోరేవాటన్నిటికి ఆయనే నెరవేర్పుగా ఉంటాడు. కృపద్వారా పాపవిముక్తి లభించినవారికి ఆయన రాకడ ఆశీర్వాదకరం, ఆనందకరం అవుతుంది. “మన గొప్ప దేవుడు...క్రీస్తు”– ఈ అనువాదం ఇక్కడ ఉన్న గ్రీకు భాషతోనూ కొత్త ఒడంబడిక గ్రంథంలోని క్రీస్తును గురించిన ఉపదేశాలతోనూ ఏకీభవిస్తుంది. ఫిలిప్పీయులకు 2:6 నోట్‌లో రిఫరెన్సులు చూడండి. పాత ఒడంబడిక గ్రంథంలో యెహోవాదేవుడు రక్షకుడు (యెషయా 49:26; యెషయా 60:16). క్రొత్త ఒడంబడిక గ్రంథంలో యేసుప్రభువు రక్షకుడు. ఇద్దరు రక్షకులు మనకు లేరు. యేసు యెహోవా దేవుని అవతారం. లూకా 2:11 నోట్ చూడండి. “మహిమ ప్రత్యక్షత కోసం”– మత్తయి 16:27; మత్తయి 24:30; మత్తయి 25:31 చూడండి. ఇక్కడ పౌలు ఏమంటున్నాడో జాగ్రత్తగా గమనించండి. దివ్యమైన ఆశాభావంతో విశ్వాసులు ఎదురుచూస్తున్నది క్రీస్తు రహస్యమైన రీతిగా రావడం కోసం కాదు గానీ మహిమతో ఆయన ప్రత్యక్షం కావడం కోసమే.

14. ఆయన సమస్తమైన దుర్నీతినుండి మనలను విమోచించి, సత్‌క్రియలయందాసక్తిగల ప్రజలను తన కోసరము పవిత్రపరచుకొని తన సొత్తుగా చేసికొనుటకు తన్నుతానే మనకొరకు అర్పించుకొనెను.
నిర్గమకాండము 19:5, ద్వితీయోపదేశకాండము 4:20, ద్వితీయోపదేశకాండము 7:6, ద్వితీయోపదేశకాండము 14:2, కీర్తనల గ్రంథము 72:14, కీర్తనల గ్రంథము 130:8, యెహెఙ్కేలు 37:23

“దుర్మార్గమంతటి నుంచీ”– మత్తయి 1:21; గలతియులకు 1:4; హెబ్రీయులకు 13:12. “విమోచించి”– కీర్తనల గ్రంథము 78:35; కీర్తనల గ్రంథము 130:8; మత్తయి 28:18; రోమీయులకు 3:24; ఎఫెసీయులకు 1:7; కొలొస్సయులకు 1:14; హెబ్రీయులకు 9:12, హెబ్రీయులకు 9:15; 1 పేతురు 1:18. “తన సొంత ప్రత్యేక ప్రజగా”– యోహాను 6:37; యోహాను 17:6; 1 కోరింథీయులకు 6:19-20; 1 పేతురు 2:9-10. నిర్గమకాండము 19:5 పోల్చి చూడండి. “ఆసక్తితో మంచి పనులు చేసేవారుగా”– మత్తయి 5:16; రోమీయులకు 12:11; హెబ్రీయులకు 13:6; 1 తిమోతికి 6:18. “పవిత్రపరచుకోవాలని”– ఎఫెసీయులకు 5:25-27; యోహాను 15:3; హెబ్రీయులకు 9:14; 1 యోహాను 1:7, 1 యోహాను 1:9; 2 కోరింథీయులకు 7:1. యెహెఙ్కేలు 37:23 పోల్చి చూడండి. పవిత్రత మీద నోట్స్ యోహాను 17:17-19; లేవీయకాండము 20:7. “మనకోసం”– రోమీయులకు 5:8; 2 కోరింథీయులకు 5:21; గలతియులకు 2:20; హెబ్రీయులకు 9:28; 1 పేతురు 2:24; 1 పేతురు 3:8. మనం ఏ విధంగా ఉండాలని యేసుప్రభువు కోరుతాడో ఈ వచనంలో మంచి వివరణ ఉంది. సహజ సిద్ధంగా మనిషిలో ఉండే భ్రష్ట స్వభావానికి ఇది పూర్తిగా వ్యతిరేకం. ఆ స్వభావం చెడు చేద్దామని ఆసక్తితో ఎదురుచూస్తూ ఉంటుంది. విశ్వాసులకు నూతన ఆధ్యాత్మిక స్వభావం ఉంది. మంచి చేయాలని ఇతరులు మనల్ని బలవంతం చేయడానికి అవసరం ఉండకూడదు. మంచి చేయడానికి మనం ఏ మాత్రం వెనుక తీయకూడదు. మంచి చేయాలనే తపన, ఉత్సాహం, ఆసక్తి మన హృదయంలోనుంచి రావాలి. మనం కృపద్వారా పాపవిముక్తి పొందామనీ కృప మనకు నేర్పుతున్నదనీ అనడానికి ఇది కూడా మంచి రుజువు – మత్తయి 7:17-20; మత్తయి 12:33-35; హెబ్రీయులకు 6:9-11.

15. వీటినిగూర్చి బోధించుచు, హెచ్చరించుచు సంపూర్ణాధికారముతో దుర్భోధను ఖండించుచునుండుము నిన్నెవనిని తృణీకరింపనీయకుము.

“చెప్పు”– వ 11-14. పాపవిముక్తి, రక్షణ గురించిన అనేక ముఖ్య సత్యాలు పౌలు మన ముందుంచాడు – దేవుని కృప, స్వార్థ త్యాగం, దేవుని పట్ల భక్తి, క్రీస్తు రెండో రాకడ, క్రీస్తు దేవత్వం, క్రీస్తుద్వారా విమోచనం, క్రీస్తు తన ప్రజలను పవిత్రపరచడం, విశ్వాసులు గడపవలసిన ఆధ్యాత్మిక జీవితం. ప్రతి క్రైస్తవ బోధకుడూ ఉపదేశకుడూ నొక్కి చెప్పవలసిన సంగతులివి. ఎవరైనా వీటికి వ్యతిరేకంగా నేర్పిస్తున్నారంటే వారిలో సత్యం లేదన్నమాటే (1 తిమోతికి 6:3-5). “అధికారంతో”– 1 తిమోతికి 4:11-13; 1 పేతురు 4:11.