1. ప్రతి ప్రధానయాజకుడును మనుష్యులలోనుండి యేర్పరచబడినవాడై, పాపములకొరకు అర్పణలను బలులను అర్పించుటకు దేవుని విషయమైన కార్యములు జరిగించుటకై మనుష్యులనిమిత్తము నియమింపబడును.

ప్రముఖ యాజిగా క్రీస్తు అనే అంశాన్నే రచయిత కొనసాగిస్తున్నాడు. వ 1-4లో ఇస్రాయేల్‌ప్రజల మధ్య మంచి ప్రముఖ యాజి అర్హతలేమిటో కనిపిస్తున్నాయి. వ 5-10లో క్రీస్తుకు ఈ యోగ్యతలు ఉన్నాయని తెలుస్తున్నది. “ప్రతి ప్రముఖ యాజినీ”– మోషేకూ క్రీస్తుకూ మధ్య కాలంలో ఇస్రాయేల్‌లోని మత వ్యవస్థను గురించి రచయిత మాట్లాడుతున్నాడు.“ప్రతి ప్రముఖ యాజినీ”– మోషేకూ క్రీస్తుకూ మధ్య కాలంలో ఇస్రాయేల్‌లోని మత వ్యవస్థను గురించి రచయిత మాట్లాడుతున్నాడు.

2. తానుకూడ బలహీనతచేత ఆవరింపబడియున్నందున అతడు ఏమియు తెలియనివారియెడలను త్రోవతప్పిన వారియెడలను తాలిమి చూపగలవాడై యున్నాడు.

“తెలివి లేక త్రోవ తప్పినవారిపట్ల”– లేవీయకాండము 4:2; లేవీయకాండము 5:17; సంఖ్యాకాండము 15:28. ఇలాంటివారి విషయంలో యాజి కాస్త మృదువుగా ప్రవర్తించవచ్చు. కానీ కావాలని అహంకారంతో పాపం చేసినవారికి కఠినమైన శిక్ష పడుతుంది – హెబ్రీయులకు 2:2; సంఖ్యాకాండము 15:30-36; నిర్గమకాండము 21:14; ద్వితీయోపదేశకాండము 17:12-13.

3. ఆ హేతువుచేత ప్రజల కొరకేలాగో ఆలాగే తనకొరకును పాపములనిమిత్తము అర్పణము చేయవలసినవాడై యున్నాడు.
లేవీయకాండము 9:7, లేవీయకాండము 16:6

“ప్రజల నిమిత్తం”– లేవీయకాండము 16:15-16, లేవీయకాండము 16:32-34. “తన నిమిత్తం”– లేవీయకాండము 16:3-6. ఇతరుల్లాగానే ఇస్రాయేల్‌లోని ప్రముఖ యాజులు కూడా బలహీనులే, పాపం చేయగల అవకాశం ఉన్నవారే. మొదటి ప్రముఖ యాజి అహరోను లోపాలు చూడండి – నిర్గమ 32 అధ్యాయం.

4. మరియు ఎవడును ఈ ఘనత తనకుతానే వహించుకొనడు గాని, అహరోను పిలువబడినట్టుగా దేవునిచేత పిలువబడినవాడై యీ ఘనతపొందును.
నిర్గమకాండము 28:1

నిర్గమకాండము 28:1.

5. అటువలె క్రీస్తుకూడ ప్రధాన యాజకుడగుటకు తన్నుతానే మహిమపరచుకొనలేదు గాని నీవు నా కుమారుడవు, నేను నేడు నిన్ను కనియున్నాను. అని ఆయనతో చెప్పినవాడే అయనను మహిమపరచెను.
కీర్తనల గ్రంథము 2:7

హెబ్రీయులకు 1:5; కీర్తనల గ్రంథము 2:7.

6. ఆ ప్రకారమే నీవు మెల్కీసెదెకుయొక్క క్రమము చొప్పున నిరంతరము యాజకుడవై యున్నావు అని మరియొకచోట చెప్పుచున్నాడు.
కీర్తనల గ్రంథము 110:4

వ 10; హెబ్రీయులకు 6:20; హెబ్రీయులకు 7:17. కీర్తనల గ్రంథము 110:4 చూడండి. 110వ కీర్తన క్రీస్తును గురించిన (వ 5లోని కుమారుడు) భవిష్యద్వాక్కు. అహరోనును నియమించినట్టుగానే తండ్రి అయిన దేవుడు ఆయన్ను కూడా ప్రముఖ యాజిగా నియమించాడు. “మెల్కీసెదెక్”– 7 అధ్యాయంమీద నోట్స్ చూడండి.

7. శరీరధారియై యున్న దినములలో మహా రోదనముతోను కన్నీళ్లతోను, తన్ను మరణమునుండి రక్షింపగలవానికి ప్రార్థనలను యాచనలను సమర్పించి, భయభక్తులు కలిగి యున్నందున ఆయన అంగీకరింపబడెను.

క్రీస్తుకు ప్రముఖ యాజికి ఉండవలసిన లక్షణాల్లో మరొకటి ఉన్న సంగతి రచయిత వివరిస్తున్నాడు – మనుషులతో మృదువుగా వ్యవహరించగలిగిన సామర్థ్యం. భూమిపై ఆయన బాధల మూలంగా ఈ సామర్థ్యం పరిపూర్ణం అయింది. ఈ ఉత్తరంలో వేరే చోట్ల క్రీస్తు ప్రముఖయాజి ఇతర బాధ్యతలను ఎలా నెరవేర్చాడో రచయిత వర్ణించాడు – దేవుని ఎదుట తన ప్రజలకు ప్రతినిధిగా ఉండడం (వ 1; హెబ్రీయులకు 7:25; హెబ్రీయులకు 9:24), పాపాలకోసం బలి అర్పణ చెల్లించడం (హెబ్రీయులకు 7:27; హెబ్రీయులకు 8:3; హెబ్రీయులకు 9:11-12; హెబ్రీయులకు 10:28; హెబ్రీయులకు 10:10, హెబ్రీయులకు 10:14). “చావు”– సైతాను గెత్‌సేమనే తోటలోనే యేసును చంపడానికి ప్రయత్నించాడనీ, తాను సిలువపై పాపం కోసం అర్పణగా చనిపోగలిగేలా ఆ సమయంలో తన ప్రాణాన్ని కాపాడవలసిందనీ యేసు పరమ తండ్రిని ప్రార్థిస్తున్నాడనీ కొందరు వ్యాఖ్యాతలు అన్నారు. అయితే బైబిల్లో ఇలాంటి ఉపదేశం ఎక్కడా లేదు. అసలు సిలువ మరణం నుంచే తప్పించవలసిందిగా యేసు తండ్రిని ప్రార్థించాడని మరికొందరు అన్నారు. ఇది నిజం అయ్యేందుకు వీలు లేదు. అలా మరణించడానికే తాను వచ్చినది అని ఆయనకు తెలుసు (మత్తయి 20:28; యోహాను 10:17-18). సరిగ్గా ఈ విషయం కోసమే ఆయన తనను తండ్రికి అప్పగించుకున్నాడు (మత్తయి 16:21; మత్తయి 20:28; యోహాను 12:27-28). అంతేగాక ఆయన ప్రార్థనలను దేవుడు “విన్నాడు” అని కూడా ఈ లేఖ రచయిత రాశాడు. అంటే దేవుడు ఆయన ప్రార్థన అంగీకరించాడని అర్థం. సిలువమీద చనిపోకుండా ఆయన్ను కాపాడడం జరగలేదని మనకు తెలుసు, కాబట్టి ఆయన ప్రార్థన అందుకోసం అయి ఉండడానికి వీలు లేదు. బహుశా సరైన వివరణ ఇది – యేసు తాను చనిపోయిన తరువాత చావులోకం నుంచి తండ్రి అయిన దేవుడు తనను విడిపించాలని ప్రార్థించాడు, “మరణం ఆయనను బంధించి ఉంచకూడదని” తండ్రిని వేడుకొన్నాడు (అపో. కార్యములు 2:24). వేరే మాటల్లో చెప్పాలంటే తండ్రి తనను మరణించినవారిలో నుంచి సజీవంగా లేపాలని ఆయన ప్రార్థన. కీర్తనల గ్రంథము 22:15-21 (వ 19-21 దేవుడు తనను సజీవంగా లేపాలని ఆయన చేసిన ప్రార్థనలాగా ఉంది). అయితే దేవుడు తనను అలా సజీవంగా లేపుతాడని ఆయనకు తెలియదా? అందుకోసం ప్రార్థించవలసిన అవసరం ఏముంది? దేవుడు తనను సజీవంగా లేపుతాడని వాగ్దానం చేసినట్టు ఆయనకు తెలుసు (కీర్తనల గ్రంథము 16:10). అయితే ప్రార్థనలో ఇదొక ప్రాముఖ్యమైన విషయం – ఆయన చేసిన వాగ్దానాలను నెరవేర్చవలసిందని దేవుణ్ణి బ్రతిమాలడం (యోహాను 17వ అధ్యాయం; దానియేలు 9:2-19; మొ।। పోల్చి చూడండి). తనకు “గిన్నె” (మత్తయి 26:39), 2 కోరింథీయులకు 5:21 లోని భయానకమైన అనుభవం, చీకటి ఘడియ (లూకా 22:53) ఎదురైనప్పుడు మానవుడైన యేసుకు బాధ ముంచుకువచ్చి కన్నీళ్ళతో మొరపెట్టాడు. దేవుడాయన ప్రార్థన విన్నాడు (మత్తయి 28:6). ఆయన “భయభక్తులను బట్టి” ఇలా జరిగింది (భయభక్తులు – యెషయా 11:2; ఆదికాండము 20:11; కీర్తనల గ్రంథము 34:11-14; కీర్తనల గ్రంథము 111:10; సామెతలు 1:7 నోట్స్ చూడండి). “ప్రార్థనలూ, విన్నపాలూ”– యేసుప్రభువు ఈ లోకంలో ఉన్న రోజుల్లో ఎప్పుడూ ప్రార్థనాపరుడుగా ఉన్నాడు (మత్తయి 14:23; మత్తయి 19:13; మత్తయి 26:36; లూకా 5:16). కానీ ఇక్కడ ఆయన మరణాన్ని ఎదుర్కొంటున్న ఒక ప్రత్యేక సమయాన్ని దృష్టిలో ఉంచుకొని రచయిత మాట్లాడుతున్నట్టున్నాడు. బహుశా గెత్‌సేమనే తోటలో క్రీస్తు ప్రార్థించిన సమయం గురించి చెప్తున్నాడు (మత్తయి 26:36-46; మార్కు 14:32-42; లూకా 22:39-46). అక్కడ ఆయనకు “ప్రాణం పోయేంతగా దుఃఖం ముంచుకు” వచ్చింది. ఆయన గొప్ప “వేదనతో” ఉండగా “చెమట పెద్ద రక్తబిందువుల్లాగా” అయింది. దేవుడు ఆయన్ను బలపరచేందుకు ఒక దేవదూతను పంపించాడు. ఇది దారుణమైన విషమ పరీక్షనూ, శారీరక బలహీనతనూ సూచిస్తున్నది (2 కోరింథీయులకు 13:4). అందువల్ల గట్టి ఏడుపులు, కన్నీళ్ళు ఆయననుంచి వెలువడ్డాయి.

8. ఆయన, కుమారుడైయుండియు తాను పొందిన శ్రమలవలన విధేయతను నేర్చుకొనెను.

“విధేయత...నేర్చుకున్నాడు”– అంటే ఒకప్పుడు దేవుని పట్ల అవిధేయంగా ఉండి క్రమంగా విధేయత నేర్చుకున్నాడని కాదు. అవిధేయత పాపం, ఆయన ఒక్క సారైనా అవిధేయంగా లేడు (యోహాను 4:34; యోహాను 6:38; యోహాను 8:29; ఫిలిప్పీయులకు 2:6-8; 1 పేతురు 2:21-22). అసలు విధేయత అంటే ఏమిటో, ఈ భూమిమీద మనిషిగా విధేయత చూపడంలో ఎంత త్యాగం, విషమ పరీక్షలు, బాధలు ఇమిడివున్నాయో అనుభవ పూర్వకంగా నేర్చుకున్నాడాయన. “గిన్నె” (మత్తయి 26:39) తన ఎదురుగా ఉన్నప్పుడు విధేయత అనేది తేలిక విషయం కాదని అనుభవాన్ని బట్టి నేర్చుకున్నాడు.

9. మరియు ఆయన సంపూర్ణసిద్ధి పొందినవాడై, మెల్కీ సెదెకుయొక్క క్రమములోచేరిన ప్రధానయాజకుడని దేవునిచేత పిలువబడి,
యెషయా 45:17

“పరిపూర్ణుడై”– హెబ్రీయులకు 2:10 నోట్. మనకు పరిపూర్ణుడైన ప్రముఖ యాజిగా ఆయన్ను చేసేందుకు దేవుడాయనను బాధలలో నడిపించాడు. అది లేకుండా ఆయన మనకు అవసరమైన పరిపూర్ణుడైన ప్రముఖ యాజిగా ఉండేందుకు సాధ్యం అయ్యేది కాదు. “తన మాట విన్నవారందరికీ”– యేసుప్రభువుకు విధేయత చూపడానికి నిరాకరించే వారెవ్వరికీ పాపవిముక్తి లేదు (యోహాను 3:36; అపో. కార్యములు 5:32; 2 థెస్సలొనీకయులకు 1:8). ఇది నమ్మకం సంబంధమైన విధేయత, మన మంచి పనులద్వారా రక్షణ సంపాదించే ప్రయత్నం కాదు.

10. తనకు విధేయులైన వారికందరికిని నిత్య రక్షణకు కారకుడాయెను.
కీర్తనల గ్రంథము 110:4

11. ఇందునుగూర్చి మేము చెప్పవలసినవి అనేక సంగతులున్నవి గాని, మీరు వినుటకు మందులైనందున వాటిని విశదపరచుట కష్టము.

రచయిత మరొక ప్రోత్సాహం, హెచ్చరిక అంశం మొదలు పెట్టాడు. ఇది హెబ్రీయులకు 6:12 దగ్గర ముగిసింది. దారి తప్పిపోవడానికి వ్యతిరేకంగా వస్తున్న హెచ్చరిక ఇది (హెబ్రీయులకు 6:5-6). ఈ హీబ్రూ క్రైస్తవుల క్రైస్తవ జీవితంలో ఎదుగూబొదుగూ లేకపోవడం గమనించి రచయిత ఈ హెచ్చరికను ఇస్తున్నాడు.

12. కాలమునుబట్టి చూచితే మీరు బోధకులుగా ఉండవలసినవారై యుండగా, దేవోక్తులలో మొదటి మూలపాఠములను ఒకడు మీకు మరల బోధింపవలసి వచ్చెను. మీరు పాలుత్రాగవలసినవారే గాని బలమైన ఆహారము తినగలవారుకారు.

ఈనాడు కూడా అనేకమంది కాపరులూ ఉపదేశకులూ శుభవార్త ప్రచారకులూ ఫిర్యాదు చేసేది ఇదే. చాలా సంవత్సరాలు క్రైస్తవులుగా చెలామణి అవుతున్న చాలామంది పాలు మాత్రమే తాగుతూ, పాలు మాత్రమే జీర్ణం చేసుకోగలిగినట్టు కనిపిస్తూ ఉన్నారు (పాలు అంటే శుభవార్తలోని సామాన్యమైన ప్రాథమిక సత్యాలు). శుభవార్త సమావేశాలకు మందలు మందలుగా వెళ్తారు గానీ వాక్కును ధ్యానించే చోట్లకు వెళ్ళరు. ప్రాథమిక సత్యాలు సైతం వారినుంచి జారి పోతున్నట్టు కనిపిస్తుంటాయి. మళ్ళీ మళ్ళీ వాటినే నేర్పించవలసిన అవసరం కనిపిస్తూ ఉంటుంది. “బలమైన ఆహారం”– అంటే ప్రముఖ యాజిగా క్రీస్తు, ఆయన గురించిన ఇతర గొప్ప సిద్ధాంతాలవంటి బలమైన ఉపదేశాలన్నమాట. దేవుని వాక్కులోని లోతైన సత్యాలను గ్రహించడానికి ప్రయత్నం లేకపోవడం పరిపక్వం కాని స్థితిని సూచిస్తున్నది. 1 కోరింథీయులకు 3:1-4 కూడా చూడండి.

13. మరియు పాలు త్రాగు ప్రతివాడును శిశువేగనుక నీతి వాక్యవిషయములో అనుభవములేనివాడై యున్నాడు.

“నీతిన్యాయాల సందేశం”– ఇది బహుశా వ 12లోని “బలమైన ఆహారం” కావచ్చు. ఇది క్రీస్తులో పరిపక్వం చెందిన విశ్వాసులకు పౌలు ఉపదేశించిన “జ్ఞానం” వంటిదే (1 కోరింథీయులకు 2:6-10).

14. వయస్సు వచ్చిన వారు అభ్యాసముచేత మేలు కీడులను వివేచించుటకు సాధకముచేయబడిన జ్ఞానేంద్రియములు కలిగియున్నారు గనుక బలమైన అహారము వారికే తగును.

“పెద్దలకే”– అంటే ఆధ్యాత్మిక జ్ఞానంలో బలం పుంజుకుని దేవుని వాక్కు ప్రకారం నడుచుకునేవారు. మంచికీ చెడుకూ, సత్యానికీ అసత్యానికీ తేడా గుర్తించడం కొన్ని సార్లు కష్టం అవుతుంది. ఇందుకు తనను తాను క్రమశిక్షణలో పెట్టుకోవడం, దేవుని వాక్కులోని లోతైన విషయాలు అర్థం తెలుసుకోవడానికీ, ఎదురైన పరిస్థితులలో ఆ సత్యాలను ఆచరణలో పెట్టడానికీ ప్రయాసపడడం అవసరం. ఎడతెగని ప్రయత్నం, బైబిలు పఠన, క్రమశిక్షణ కావాలి. ఆధ్యాత్మికంగా చిన్న పిల్లలుగానే ఉండిపోయే వారెవరంటే అలాంటి ప్రయత్నం చేయడానికి సిద్ధంగా లేనివారు.