1. ఎఫెసులో ఉన్న సంఘపు దూతకు ఈలాగు వ్రాయుము ఏడు నక్షత్రములు తన కుడిచేత పట్టుకొని యేడు దీపస్తంభములమధ్య సంచరించువాడు చెప్పు సంగతు లేవనగా

“ఎఫెసు”– అపో. కార్యములు 18:19; అపో. కార్యములు 19:1-20; ఎఫెసీయులకు 1:1. “దూత”– ప్రకటన గ్రంథం 1:20 నోట్. “వ్రాయి”– యోహాను ఈ ఏడు సంఘాల్లో ప్రతిదానికీ ఏమి రాయాలో యేసుప్రభువు అతనితో సరిగ్గా ఎక్కువ తక్కువ లేకుండా చెప్పాడు – వ 8,12,18; ప్రకటన గ్రంథం 3:1, ప్రకటన గ్రంథం 3:7, ప్రకటన గ్రంథం 3:14. రాసివున్నదానిలో యోహాను దేన్నీ కల్పించలేదు. “నక్షత్రాలను...దీపస్తంభాల మధ్య”– ప్రకటన గ్రంథం 1:12, ప్రకటన గ్రంథం 1:16, ప్రకటన గ్రంథం 1:20.

2. నీ క్రియలను నీ కష్టమును నీ సహనమును నేనెరుగుదును; నీవు దుష్టులను సహింపలేవనియు, అపొస్తలులు కాకయే తాము అపొస్తలులమని చెప్పుకొను వారిని పరీక్షించి వారు అబద్ధికులని నీవు కనుగొంటివనియు,

“నాకు తెలుసు”– ప్రభువు ప్రతి సంఘంతో ఇలా చెప్పాడు. కీర్తనల గ్రంథము 33:13-15; కీర్తనల గ్రంథము 139:1-4; సామెతలు 5:21; యిర్మియా 16:17; యిర్మియా 23:24; హెబ్రీయులకు 4:13 పోల్చి చూడండి. వ్యక్తులుగా, సంఘాలుగా ఉన్న మనం ఏమై ఉన్నామో ఏమి చేస్తున్నామో ఆలోచిస్తున్నామో అదంతా ఆయనకు తెలుసు. దీవెన లేక శిక్ష ఇవ్వడానికి ఆయన సిద్ధంగా నిలబడి ఉన్నాడు. “దుర్మార్గులు...ఓర్చుకోలేవని”– కీర్తనల గ్రంథము 101:3-5; 1 కోరింథీయులకు 5:13 పోల్చి చూడండి. ఎఫెసీయులకు 5:5-7 లో పౌలు ఇచ్చిన ఆదేశాన్ని వారు అనుసరించారు. దుర్మార్గతతో దుర్మార్గులతో రాజీపడడానికి నిరాకరించారు. “పరిశీలించి”– 1 యోహాను 4:1; 1 థెస్సలొనీకయులకు 5:21; 1 కోరింథీయులకు 14:29 పోల్చి చూడండి. ఈ రోజుల్లో కూడా అలా చేయడం అవసరం, చాలా ముఖ్యమైన సంగతి. “అబద్ధికులు(కపటులు)”– మత్తయి 7:15-20; 2 కోరింథీయులకు 11:13-15; 2 పేతురు 2:1. అపో. కార్యములు 20:28-31 లో పౌలు ఎఫెసు సంఘ నాయకులతో మాట్లాడుతూ ఇలాంటి అబద్ధ బోధకుల గురించి హెచ్చరించాడు.

3. నీవు సహనము కలిగి నా నామము నిమిత్తము భారము భరించి అలయలేదనియు నేనెరుగుదును.

“భారం”– అపో. కార్యములు 14:22; యోహాను 16:33. “అలసిపోలేదు”– గలతియులకు 6:9; యెషయా 40:30-31.

4. అయినను మొదట నీకుండిన ప్రేమను నీవు వదిలితివని నేను నీమీద తప్పు ఒకటి మోపవలసియున్నది.

“అభ్యంతరం”– కొన్ని విధాలుగా ఈ సంఘం ఆదర్శ సంఘం. చాలా సేవ చేసేది. సహనం చూపేది. చెడ్డవాళ్ళ గురించి, చెడ్డ సిద్ధాంతాల గురించి జాగ్రత్త వహించేది. అయినా అన్నిటికంటే ప్రాముఖ్యమైన విషయంలో వారు తప్పిపోయారు – ప్రేమ. 1 కోరింథీయులకు 13:1-3, 1 కోరింథీయులకు 13:13; మత్తయి 22:37-40 చూడండి. వారికి ప్రేమ బొత్తిగా లేదని ప్రభువు చెప్పలేదు. వారు సంఘంగా ఏర్పడినప్పుడు వారికి ఉన్న ప్రేమ కంటే ఇప్పుడు వారికున్న ప్రేమ తక్కువగా ఉన్నదని చెపుతున్నాడు. ఎఫెసీయులకు 3:16-19 లో పౌలు వారికి రాసిన విషయానికి వారు దూరమయ్యారని కనిపిస్తున్నది.

5. నీవు ఏ స్థితిలోనుండి పడితివో అది జ్ఞాపకము చేసికొని మారు మనస్సుపొంది ఆ మొదటి క్రియలను చేయుము. అట్లుచేసి నీవు మారు మనస్సు పొందితేనే సరి; లేనియెడల నేను నీయొద్దకు వచ్చి నీ దీపస్తంభమును దాని చోటనుండి తీసివేతును.

“పడిపోయావు”– మొదట ఉన్న ప్రేమను కోల్పోవడం పాపం. అది అల్ప పాపం కాదు గాని అన్ని విషయాల్లో ముఖ్యమైన దానిలో విఫలం కావడం, తప్పిపోవడం. “పశ్చాత్తాపపడి”– వ 16,22; ప్రకటన గ్రంథం 3:3, ప్రకటన గ్రంథం 3:19. యేసు ఈ మాట చెప్పడంతో ఈ లోకంలో తన సేవను ఆరంభించాడు (మత్తయి 4:17). తన ప్రజలకు తాను ఇప్పుడు చేస్తున్న సేవలో ఆ మాట చెపుతూ సాగుతున్నాడు. కోల్పోయిన మొదటి ప్రేమ మళ్ళీ కలగడం సాధ్యమేనని ఈ మాట మనకు ప్రోత్సాహకరంగా ఉండాలి. పశ్చాత్తాపపడాలన్న క్రీస్తు ఆజ్ఞకు లోబడని ఒక సంఘానికి గానీ ఒక వ్యక్తికి గానీ దేవుని తీర్పు తప్పదు. ప్రేమ నీరసించిపోవడం మొదలైతే సంఘంలో దేవుని విలువైనవన్నీ దానితో పాటు పోవడం మొదలవుతాయని మనం గ్రహించాలి. “తీసివేస్తాను”– అంటే వారు ఇంకా సంఘంగా ఉండలేకపోతారు, లేక ఆయన ఇంకా సంఘంగా దానితో సాంగత్యం చేయడని అర్థం.

6. అయితే ఈ యొకటి నీలో ఉన్నది, నీకొలాయితుల క్రియలు నీవు ద్వేషించుచున్నావు; నేనుకూడ వీటిని ద్వేషించుచున్నాను.
కీర్తనల గ్రంథము 139:21

“నీకొలాయితులు”– వ 15. వీరు ఏమేమి నమ్ముకొన్నారో నేర్పించారో దాని గురించి బైబిలు ఏమీ చెప్పడం లేదు. వారు చేసేది, నేర్పేది దేవునికి అసహ్యం కాబట్టి ఆ రెండూ ఆయన వాక్కుకు విరుద్ధమని మనం తెలుసుకోవచ్చు.

7. చెవిగలవాడు ఆత్మ సంఘములతో చెప్పుచున్నమాట వినునుగాక. జయించు వానికి దేవుని పరదైసులో ఉన్న జీవవృక్షఫలములు భుజింప నిత్తును.
ఆదికాండము 2:8, ఆదికాండము 2:9, ఆదికాండము 3:22, ఆదికాండము 3:24, యెహెఙ్కేలు 28:13, యెహెఙ్కేలు 31:8

“ఆత్మ”– యేసు దేవుని ఆత్మమూలంగా యోహానుతో మాట్లాడాడు. యోహాను దేవుని ఆత్మతో నిండి వుండి ఆయన మాటలు రాశాడు. ఈ మాట ద్వారా దేవుని ఆత్మ మనతో మాట్లాడుతున్నాడు. “వింటాడు గాక”– మత్తయి 11:15; మత్తయి 13:9, మత్తయి 13:43. ప్రభువు ఈ మాట ఆ ఏడు సంఘాల్లో ప్రతిదానికీ చెప్పాడు. ఆ విధంగా ఈ రోజుల్లో ఉన్న అన్ని సంఘాలకూ, క్రైస్తవులందరికీ కూడా ఈ మాట చెప్తున్నాడు. “జయించే వ్యక్తికి”– ఇలాంటివారికి ఏడు సంఘాలకు వ్రాసిన ప్రతి లేఖలోనూ ఒక వాగ్దానం ఉంది. జయం గుర్తించి ప్రకటన గ్రంథం 21:7; మత్తయి 16:18; లూకా 10:19; యోహాను 16:33; రోమీయులకు 8:37; 1 యోహాను 2:13-14; 1 యోహాను 4:4; 1 యోహాను 5:4-5; చూడండి. విశ్వాసులు యుద్ధంలో ఉన్నారు. వారు గెలవాలి. ఎఫెసీయులకు 6:10-18 చూడండి. క్రొత్త ఒడంబడిక గ్రంథంలో జయించడం అన్నది ఎన్ని కష్టాలూ, విషమ పరీక్షలూ, దుష్‌ప్రేరణలూ, కడగండ్లూ, హింసలూ కలిగినా, లోకం, శరీర స్వభావం, సైతాను మనల్ని ఎంత ఎదిరించినా జీవితాంతం వరకూ క్రీస్తు మీద నమ్మకం ఉంచుతూ ఉండడం. జయించేవారు విశ్వాసంలో నమ్మకంతో ముందుకు సాగిపోతూ, తాము అలా చేస్తున్నామని రుజువు పరుస్తూ ఉంటారు (హెబ్రీయులకు 10:39; హెబ్రీయులకు 11:6; యాకోబు 2:14-17; మొ।। పోల్చి చూడండి). “పరమానంద నివాసం”– లూకా 23:43; 2 కోరింథీయులకు 12:4. “జీవ వృక్షం”– ఆదికాండము 2:9; ఆదికాండము 3:22-24 పోల్చి చూడండి. అప్పుడు దేవుడు పాపం చేసినవారిని జీవవృక్షం దగ్గరికి రాకుండా అడ్డగించాడు. చివరికి దేవుని కృప మూలంగా పాపులు క్షమాపణ పొంది విశ్వాసం వల్ల జయిస్తూ శాశ్వత జీవంలోకి ప్రవేశిస్తారు. పాపం చేయడం వల్ల మానవుడు దేన్ని కోల్పోయాడో క్రీస్తు మూలంగా దాన్ని మళ్ళీ పొందగలడు. దానికంటే ఎక్కువ పొందగలడు. మనం జీవవృక్ష ఫలాన్ని తినేలా క్రీస్తు శిక్ష అనుభవించి మ్రానుమీద చనిపోయాడు (అపో. కార్యములు 5:30; గలతియులకు 3:13; 1 పేతురు 2:24). ఈ జీవవృక్ష ఫలం క్రీస్తు మీద నమ్మకం ఉంచి విశ్వాసంతో అంతంవరకు సాగి పోయేవారి కోసమే. విశ్వాసంతో అంతం వరకు సాగిపోవడం గురించి కొలొస్సయులకు 1:23; హెబ్రీయులకు 3:6, హెబ్రీయులకు 3:14; హెబ్రీయులకు 6:12; హెబ్రీయులకు 10:38-39 చూడండి.

8. స్ముర్నలోఉన్న సంఘపుదూతకు ఈలాగు వ్రాయుము మొదటివాడును కడపటివాడునై యుండి, మృతుడై మరల బ్రదికినవాడు చెప్పు సంగతులేవనగా
యెషయా 44:6, యెషయా 48:12

“స్ముర్న”– ఎఫెసుకు ఉత్తరాన దాదాపు 60 కిలోమీటర్ల దూరాన ఉన్న పట్టణం. అది చాలా అందమైన పట్టణమని పేరు పొందినది. ప్రస్తుత టర్కీలో దాని మారు పేరు ఇజ్మీర్. “దూత”– ప్రకటన గ్రంథం 1:20. “మొదటివాడూ, చివరివాడూ”– ప్రకటన గ్రంథం 1:17. “మళ్ళీ బ్రతికినవాడు”– ప్రకటన గ్రంథం 1:18.

9. నీ శ్రమను దరిద్రతను నేనెరుగుదును, అయినను నీవు ధనవంతుడవే; తాము యూదులమని చెప్పుకొనుచు, యూదులు కాక సాతాను సమాజపు వారివలన నీకు కలుగు దూషణనే నెరుగుదును. నీవు పొందబోవు శ్రమలకు భయపడకుము.

“బాధలు”– స్ముర్న నివాసులూ, అక్కడ పెద్ద సమాజంగా ఉన్న యూదులూ క్రైస్తవులను హింసించారు. ఆ పట్టణం అందంగా ఉన్నా దాని ప్రజలు దేవుని ప్రజలపట్ల చూపిన ప్రవర్తన వికారంగా ఉంది. “దరిద్రం”– అక్కడి క్రైస్తవులు అందరికంటే పేదవారుగా ఉండి శుభవార్త నమ్మినవారు కావచ్చు (కొందరేమో క్రీస్తును అనుసరించేందుకు ఇష్టపూర్వకంగా తమ ఆస్తిని వదలిపెట్టి తమను తాము పేదలనుగా చేసుకుని ఉండవచ్చు). యాకోబు 2:5; లూకా 6:20-22; లూకా 14:33 పోల్చి చూడండి. “తెలుసు”– వ 2. “ధనవంతుడివే”– 1 కోరింథీయులకు 3:21-23; 2 కోరింథీయులకు 8:9; ఎఫెసీయులకు 1:3. ఈ లోక సంబంధమైన విషయాల్లో వారు దరిద్రులు, ఆధ్యాత్మిక విషయాల్లో పరలోక విషయాల్లో వారు ధనవంతులు. “యూదులు కాకపోయినా”– జాతిప్రకారం వారు యూదులే గాని యూదులు దేవుని దృష్టిలో ఎలా ఉండాలో వారు అలా లేరు. రోమీయులకు 2:28-29; ఫిలిప్పీయులకు 3:2-3 పోల్చి చూడండి. “సైతాను సమాజం”– ప్రకటన గ్రంథం 3:9. తాము దేవుని సమాజమని వారు అనుకొన్నారు. కానీ వారు విధేయత చూపినది సైతానుకే. యిర్మియా 17:9 చూడండి. సైతాను గురించి 1 దినవృత్తాంతములు 21:1; మత్తయి 4:1-10; యోహాను 8:44; మొ।। నోట్స్ చూడండి.

10. ఇదిగో మీరు శోధింపబడునట్లు అపవాది మీలో కొందరిని చెరలో వేయింపబోవుచున్నాడు; పది దినములు శ్రమ కలుగును; మరణమువరకు నమ్మకముగా ఉండుము. నేను నీకు జీవకిరీట మిచ్చెదను.
దానియేలు 1:12, దానియేలు 1:14

“భయపడకు”– మత్తయి 10:26-28, మత్తయి 10:31; లూకా 12:32; యోహాను 14:27; యోహాను 16:33; హెబ్రీయులకు 13:5-6; రోమీయులకు 8:28. “పరీక్ష”– వారిని హింసించి చితగ్గొట్టేయాలని సైతాను ఉద్దేశం. అది వారిని పరీక్షించాలని దేవుని ఉద్దేశం. కీర్తనల గ్రంథము 66:10-12; 1 థెస్సలొనీకయులకు 2:4; 1 పేతురు 1:6-7; 2 పేతురు 2:9; యాకోబు 1.2-3:1; ఆదికాండము 50:20 చూడండి. “పది రోజులపాటు”– పరీక్ష ఎంతకాలం జరుగుతూ ఉండాలో దేవునికి తెలుసు. మనం సహించగలిగినంతకంటే ఎక్కువ సహించాలని దేవుడు ఏర్పాటు చేయడు. “నమ్మకంగా ఉండు”– హింసలు, పరీక్షల మధ్య క్రీస్తు మీద నమ్మకముంచుతూ, వాటిని తప్పించుకొనేందుకు ఆయనను కాదనకు అని అర్థం. “జీవ కిరీటం”– యాకోబు 1:12.

11. సంఘములతో ఆత్మచెప్పుచున్న మాట చెవిగలవాడు వినును గాక. జయించువాడు రెండవ మరణమువలన ఏ హానియుచెందడు.

“వింటాడు గాక”– వ 7. “జయించే వ్యక్తి”– వ 7. “రెండో మరణం”– ప్రకటన గ్రంథం 20:6, ప్రకటన గ్రంథం 20:14; ప్రకటన గ్రంథం 21:8. ఇది దేవునినుంచి శాశ్వతంగా వేరైపోవడం. 2 థెస్సలొనీకయులకు 1:8-9 చూడండి.

12. పెర్గములోఉన్న సంఘపు దూతకు ఈలాగు వ్రాయుము వాడియైన రెండంచులుగల ఖడ్గముగలవాడు చెప్పు సంగతులేవనగా
యెషయా 49:2

“పెర్గము”– ఎఫెసుకు ఉత్తరాన దాదాపు 160 కిలోమీటర్ల దూరాన ఉన్న పట్టణం. ఆ రోజుల్లో అది ప్రఖ్యాతిగల పట్టణం. “దూత”– ప్రకటన గ్రంథం 1:20. “ఖడ్గం”– ప్రకటన గ్రంథం 1:16. ఇది పెర్గము సంఘంలో ఆయన ఎదిరించిన కొన్ని విషయాలు ఉన్నాయనీ ఆయన వాటికి తీర్పు తీర్చడానికి సిద్ధంగా ఉన్నాడనీ సూచిస్తున్నది.

13. సాతాను సింహాసనమున్న స్థలములో నీవు కాపురమున్నావని నేనెరుగుదును. మరియు సాతాను కాపురమున్న ఆ స్థలములో, నాయందు విశ్వాసియైయుండి నన్నుగూర్చి సాక్షియైన అంతిపయనువాడు మీమధ్యను చంపబడిన దినములలో నీవు నా నామము గట్టిగా చేపెట్టి నాయందలి విశ్వాసమును విసర్జింపలేదని నేనెరుగుదును.

“తెలుసు”– వ 2. “సైతాను సింహాసనమున్న స్థలం”– సైతానుకు సింహాసనం ఉందా? ఉంది. అది నరకంలో లేదు. భూమిమీదే ఉంది. యోహాను 12:31; యోహాను 14:30; 2 కోరింథీయులకు 4:4; ఎఫెసీయులకు 6:12; 2 తిమోతికి 2:26; 1 పేతురు 5:8; 1 యోహాను 5:19 పోల్చి చూడండి. ఆ కాలంలో వాడు తన ప్రజలను ఏలే స్థలం పెర్గము. వాడి కార్యాలకు కేంద్ర స్థలం అక్కడే. ఇప్పుడు అది ఇంకెక్కడో ఉండాలి. ప్రస్తుతం పెర్గము ఆ రోజుల్లో దానికున్న ప్రాముఖ్యతను కోల్పోయింది. ఆ రోజుల్లో అది రోమ్ చక్రవర్తిని పూజించడానికి ఆ ప్రాంతంలో ఉన్న కేంద్రం. అంతేగాక మొదటి శతాబ్దంలో దేవుడు జరిగించిన అద్భుతమైన పనికి కేంద్ర స్థలానికి దగ్గరగా ఉంది. అది రోమ్‌కూ జెరుసలంకూ దాదాపు సమ దూరమైన స్థలం, పౌలు, ఇతరులు ఆసియా మైనొర్‌లోను గ్రీసు, మాసిదోనియాల్లోను స్థాపించిన సంఘాల దగ్గర ఉన్న స్థలం. “సైతాను నివాసముంటున్న”– సైతాను ఏ స్థలాన్ని తన నివాసంగా చేసుకుంటాడో అది ఎలాంటిదై ఉండాలో! ఆ మాటకొస్తే వాడి సింహాసనం ఉన్న ఈ లోకం ఎలాంటిదో! పెర్గము ప్రజలు విశేషంగా వాడికి హృదయ పూర్వకమైన స్వాగతం ఇచ్చి ఉండాలి. “నమ్మకమైన సాక్షి”– ప్రకటన గ్రంథం 1:5 పోల్చి చూడండి. నమ్మకమైన సాక్షి క్రీస్తు అతనిలో ఉండి పని చేయడంవల్ల అతడు కూడా నమ్మకమైన సాక్షి కాగలిగాడు. “అంతిపాస్”– ఆసియా రాష్ట్రంలో క్రీస్తుకోసం హత్యకు గురి అయిన మొదటివారిలో ఒకడు. “కాదనలేదు”– యేసు క్రీస్తును ఎదిరించడానికీ, ఆయన ప్రజలను హింసించడానికీ కేంద్రమైన ఆ స్థలంలో కూడా వారు ఆయనను వదలక తమ ప్రభువుగా ముక్తిదాతగా ఒప్పుకొంటూ వచ్చారు.

14. అయినను నేను నీమీద కొన్ని తప్పిదములు మోపవలసియున్నది. అవేవనగా, విగ్రహములకు బలియిచ్చిన వాటిని తినునట్లును, జారత్వము చేయునట్లును, ఇశ్రాయేలీయులకు ఉరి యొడ్డుమని బాలాకునకు నేర్పిన బిలాముబోధను అనుసరించువారు నీలో ఉన్నారు
సంఖ్యాకాండము 25:1-2, సంఖ్యాకాండము 31:16

“అభ్యంతరాలు”– వ 4. తన ప్రజలలో కనబడిన మంచి వాటిని గురించి క్రీస్తు వారిని మొదట మెచ్చుకొంటాడు. ఆ తరువాత వారు తప్పిపోయిన విషయాల గురించి మాట్లాడుతాడు. “బిలాము”– సంఖ్యాకాండము 22:5; సంఖ్యాకాండము 25:1-3; సంఖ్యాకాండము 31:16; 2 పేతురు 2:15; యూదా 1:11. “బాలాకు”– సంఖ్యాకాండము 22:1-6. ప్రభువు ఈ సంఘంలో ఖండించిన ఈ రెండు విషయాలు కొరింతులోని సంఘాన్ని కూడా కష్టపెట్టాయి. 1 కోరింథీయులకు 5:1-2; 1 కోరింథీయులకు 6:9; 1 కోరింథీయులకు 8:1-13 చూడండి. అపో. కార్యములు 15:20, అపో. కార్యములు 15:29 కూడా చూడండి. సైతాను బయటనుంచి హింసల ద్వారా సంఘాన్ని నాశనం చేయలేక లోపలనుంచి దాన్ని చెడగొట్టడానికి ప్రయత్నించాడు. ఈ రెండో విధానం మొదటిదానికంటే ఎక్కువ అపాయకరం.

15. అటువలెనే నీకొలాయితుల బోధ ననుసరించు వారును నీలో ఉన్నారు.

“నీకొలాయితులు”– వ 6 పోల్చి చూడండి. అలవాట్లు, ఆచారాలు రానురాను వాటిని బలపరచే బోధనలకు దారి తీస్తాయి.

16. కావున మారుమనస్సు పొందుము; లేనియెడల నేను నీయొద్దకు త్వరగా వచ్చి నా నోటనుండి వచ్చు ఖడ్గముచేత వీరితో యుద్ధముచేసెదను.
యెషయా 49:2

“పశ్చాత్తాపపడు”– వ 5. “త్వరగా”– తీర్పు ఆలస్యంగా రాదు. “ఖడ్గం”– యెషయా 31:8 పోల్చి చూడండి. “యుద్ధం జరిగిస్తాను”– యిర్మియా 21:5 పోల్చి చూడండి. మనం బోధనలు, ఉపదేశాలు, సిద్ధాంతాల విషయంలో శ్రద్ధ వహించాలి. లేకపోతే ప్రభువు తానే మనతో పోరాడడం అనే స్థితిని మనం అనుభవించవలసి వస్తుందేమో.

17. సంఘములతో ఆత్మ చెప్పుచున్న మాట చెవిగలవాడు వినును గాక. జయించువానికి మరుగైయున్న మన్నాను భుజింప నిత్తును. మరియు అతనికి తెల్లరాతినిత్తును; ఆ రాతిమీద చెక్కబడిన యొక క్రొత్తపేరుండును; పొందిన వానికే గాని అది మరి యెవనికిని తెలియదు.
కీర్తనల గ్రంథము 78:24, యెషయా 62:2, యెషయా 65:15

“వింటాడు గాక...జయించే వ్యక్తి”– వ 7. “మరుగైన మన్నా”– క్రీస్తే. నిర్గమకాండము 16:14-16, నిర్గమకాండము 16:31; యోహాను 6:35, యోహాను 6:48-51 చూడండి. ఈ లోకంనుంచి మన్నా మరుగై ఉంది. “తెల్లని రాయి”– ఆ రోజుల్లో కొన్ని సార్లు తెల్లని రాళ్ళు మహోత్సవాలకు టికెట్టుగా వాడబడ్డాయి. ఇక్కడి అర్థం ఇదే కావచ్చు – ఈ తెల్ల రాయి గొర్రెపిల్ల పెండ్లి విందుకు (ప్రకటన గ్రంథం 19:9) హాజరయ్యే హక్కును సూచించవచ్చు. “కొత్త పేరు”– వ్యక్తులకు క్రీస్తు ఇచ్చిన పేర్లు వారు ఏమై ఉన్నారో దాన్ని సరిగానే సూచిస్తాయి. ఆదికాండము 17:5; ఆదికాండము 32:28 పోల్చి చూడండి.

18. తుయతైరలో ఉన్న సంఘపు దూతకు ఈలాగు వ్రాయుము అగ్నిజ్వాలవంటి కన్నులును అపరంజిని పోలిన పాదములునుగల దేవుని కుమారుడు చెప్పు సంగతులేవనగా
దానియేలు 10:6

“తుయతైర”– పెర్గముకు ఆగ్నేయ దిక్కున దాదాపు 70 కిలోమీటర్ల దూరాన ఉన్న పట్టణం. “దూత”– ప్రకటన గ్రంథం 1:20. “మంటల్లాంటి...కంచులాంటి”– ప్రకటన గ్రంథం 1:14-15. “దేవుని కుమారుడు”– మత్తయి 3:17 నోట్ చూడండి.

19. నీ క్రియలను, నీ ప్రేమను, నీ విశ్వాసమును, నీ పరిచర్యను, నీ సహనమును నేనెరుగుదును; నీ మొదటి క్రియల కన్న నీ కడపటి క్రియలు మరియెక్కువైనవని యెరుగుదును.

“ప్రేమ, విశ్వాసం”– గలతియులకు 5:6 నోట్. “తెలుసు”– వ 2. “ఎక్కువే”– కాలం గడిచే కొద్దీ క్రీస్తు కోసం ఆసక్తి, సేవ తక్కువవుతున్న కొన్ని సంఘాలవంటిది కాదు ఈ సంఘం.

20. అయినను నీమీద తప్పు ఒకటి నేను మోపవలసి యున్నది; ఏమనగా, తాను ప్రవక్త్రినని చెప్పుకొనుచున్న యెజెబెలను స్త్రీని నీ వుండనిచ్చుచున్నావు. జారత్వము చేయుటకును, విగ్రహములకు బలియిచ్చిన వాటిని తినుటకును అది నా దాసులకు బోధించుచు వారిని మోసపరచుచున్నది.
సంఖ్యాకాండము 25:1-3, 1 రాజులు 16:31, 2 రాజులు 9:22

“అభ్యంతరం”– వ 4,14. “యెజెబెల్”– బైబిలు చరిత్రలో ఉన్న చెడ్డ స్త్రీలలో యెజెబెల్ ఒకతె. 1 రాజులు 16:30-33; 1 రాజులు 18:4; 1 రాజులు 19:1-2; 1 రాజులు 21:1-23; 2 రాజులు 9:7, 2 రాజులు 9:10, 2 రాజులు 9:22, 2 రాజులు 9:30-37 చూడండి. యెజెబెల్ అంత చెడ్డ స్త్రీ ఒకతె తుయతైర సంఘంలో ఉండి తాను క్రీస్తును అనుసరిస్తున్నాననీ దేవుని ప్రవక్త్రిననీ చెప్పుకొంటూ దేవుని నుంచి తనకు సందేశాలు వస్తున్నట్టు నటించింది. ఆమె నేర్పినది పెర్గము సంఘంలో ఉన్న “బిలాము ఉపదేశం” లాంటిది (వ 14). “ఉండనిస్తున్నావు”– వ 2తో పోల్చి చూడండి. దుర్మార్గులను, దుర్మార్గతను ఓర్చుకోవడం, సంఘంలో ఉండనివ్వడం చాలా పెద్ద పొరపాటు. దాని మూలంగా సంఘానికీ సమస్త దుర్మార్గతను అసహ్యించుకొంటున్న క్రీస్తుకూ మధ్య వ్యతిరేక స్థితి కలుగుతుంది.

21. మారుమనస్సు పొందుటకు నేను దానికి సమయమిచ్చితినిగాని అది తన జారత్వము విడిచిపెట్టి మారుమనస్సు పొందనొల్లదు.

“పశ్చాత్తాపపడడానికి...సమయమిచ్చాను”– రోమీయులకు 2:4; 2 పేతురు 3:9. “పశ్చాత్తాపపడలేదు”– ప్రకటన గ్రంథం 9:20; ప్రకటన గ్రంథం 16:9, ప్రకటన గ్రంథం 16:11; మత్తయి 23:37 పోల్చి చూడండి.

22. ఇదిగో నేను దానిని మంచము పట్టించి దానితోకూడ వ్యభిచరించు వారు దాని క్రియలవిషయమై మారుమనస్సు పొందితేనే గాని వారిని బహు శ్రమలపాలు చేతును,

పశ్చాత్తాపపడడానికి నిరాకరించడంవల్ల ఇప్పుడు గానీ తరువాత గానీ దేవుని శిక్ష తప్పక వస్తుంది. “వ్యభిచరించిన”– ఈ మాట అక్షరాల వ్యభిచారాన్ని సూచించవచ్చు లేక ఆత్మ సంబంధమైన వ్యభిచారాన్ని సూచించవచ్చు (అంటే దేవుని పట్ల అపనమ్మకంగా ఉండడం – యిర్మియా 2:20; యిర్మియా 3:1-9; యెహెఙ్కేలు 23:37; హోషేయ 1:2; హోషేయ 4:15), లేక ఈ రెంటినీ సూచించవచ్చు.

23. దాని పిల్లలను నిశ్చయముగా చంపెదను. అందువలన అంతరింద్రియములను హృదయములను పరీక్షించువాడను నేనే అని సంఘము లన్నియు తెలిసికొనును. మరియు మీలో ప్రతివానికి వాని వాని క్రియల చొప్పున ప్రతిఫలము ఇచ్చెదను.
కీర్తనల గ్రంథము 7:9, కీర్తనల గ్రంథము 62:12, సామెతలు 24:12, యిర్మియా 11:20, యిర్మియా 17:10

“ఆమె పిల్లలు”– ఆమె ఉపదేశాన్ని అనుసరించినవారు. “చంపి తీరుతాను”– ఆ రెండు రకాల వ్యభిచారానికీ దేవుడు నియమించిన శిక్ష ఇదే (లేవీయకాండము 20:10; ద్వితీయోపదేశకాండము 22:22-24; యెహెఙ్కేలు 16:38-40; యెహెఙ్కేలు 23:46-49). “పరిశీలించేవాణ్ణి”– 1 సమూయేలు 16:7; 1 రాజులు 8:39; కీర్తనల గ్రంథము 139:1-2; సామెతలు 24:12; యిర్మియా 17:10; హెబ్రీయులకు 4:13. “తెలిసిపోతుంది”– ఒక సంఘంలోని దుర్మార్గుల మీదికి శిక్ష పంపడం ద్వారా ఇతర సంఘాలు కొన్ని ముఖ్య సత్యాలు నేర్చుకోవాలని దేవుని ఉద్దేశం. “క్రియలకు తగినదాన్ని”– ప్రకటన గ్రంథం 18:6; ప్రకటన గ్రంథం 20:12-13; ప్రకటన గ్రంథం 22:12; మత్తయి 16:27; రోమీయులకు 2:6.

24. అయితే తుయతైరలో కడమవారైన మీతో, అనగా ఈ బోధను అంగీకరింపక సాతానుయొక్క గూఢమైన సంగ తులను ఎరుగమని చెప్పుకొనువారందరితో నేను చెప్పుచున్నదేమనగా మీపైని మరి ఏ భారమును పెట్టను.

“గూఢమైన విషయాలు”– ఆ యెజెబెల్ తన ఉపదేశాలు దేవుని గూఢమైన సత్యాలని చెప్పి ఉంటుంది. గానీ ఆమె సైతాను బానిస (2 కోరింథీయులకు 11:14-15 పోల్చి చూడండి). దుర్మార్గత చేయడం మూలంగా సైతాను రహస్య విషయాలను నేర్చుకోగలమనీ, దాని వల్ల వాణ్ణి ఓడించడానికి అవసరమైన అనుభవాలను పొందగలమనీ మొదటి శతాబ్దంలో కొందరు బోధించారు. ఇది సత్యాన్ని తారుమారు చేయడం, తలక్రిందులుగా చేయడం. సైతానుకు లొంగిపోవడంవల్ల మనం సైతానును జయించలేము. పాపం చేయడం వల్ల పాపాన్ని గెలవలేము. లోకానికి చెందినవాటిని అనుసరించడం వల్ల లోకం మీద విజయం సాధించలేము. ఆ తప్పుడు బోధ విజయానికి కాదు, బానిసత్వానికే దారి తీస్తుంది.

25. నేను వచ్చువరకు మీకు కలిగియున్నదానిని గట్టిగా పట్టుకొనుడి.

ఈ సంఘం ఏమేమో చేయాలని క్రీస్తు ఆదేశించలేదు. దానిమీద పెద్ద భారాలు మోపలేదు (మత్తయి 11:29-30 పోల్చి చూడండి). వారు దేవుని నిజ సేవకుల నుంచి పొందిన సత్యాన్ని గట్టిగా చేపట్టి అబద్ధ ప్రవక్తల ఉపదేశాలను విసర్జిస్తే చాలు. యోహాను 8:31-32; 1 కోరింథీయులకు 15:2; 2 థెస్సలొనీకయులకు 2:15; 1 తిమోతికి 3:9; తీతుకు 1:9; హెబ్రీయులకు 4:14 పోల్చి చూడండి. “నేను వచ్చేంత వరకు”– చరిత్రలో ఉన్న తుయతైర సంఘం క్రీస్తు రెండో రాకడ సమయంలో ఉనికిలో ఉండదు గానీ తుయతైర సంఘం దేనికి ప్రతినిధిగా, సూచనగా ఉందో అది అప్పుడు ఉనికిలో ఉంటుంది. ప్రకటన గ్రంథం 1:20 నోట్ చూడండి.

26. నేను నా తండ్రివలన అధికారము పొందినట్టు జయించుచు, అంతమువరకు నా క్రియలు జాగ్రత్తగా చేయువానికి జనులమీద అధికారము ఇచ్చెదను.
కీర్తనల గ్రంథము 2:8-9

“జయించే వ్యక్తి”– వ 7 నోట్. “అంతం వరకు”– కొలొస్సయులకు 1:23; హెబ్రీయులకు 3:14; మత్తయి 24:13.

27. అతడు ఇనుపదండముతో వారిని ఏలును; వారు కుమ్మరవాని పాత్రలవలె పగులగొట్టబడుదురు;
కీర్తనల గ్రంథము 2:8-9

“పరిపాలిస్తాడు”– ఇదే వాగ్దానం తండ్రియైన దేవుడు కీర్తనల గ్రంథము 2:8-9 లో క్రీస్తుకు చేశాడు. జయించేవారు క్రీస్తుతో ఐక్యత గలవారు. ఇప్పుడు వారు ఆయన బాధల్లో పాలుపొందుతున్నారు గానీ ఆయన వచ్చిన తరువాత ఆయనతో కూడా పరిపాలిస్తారు – ప్రకటన గ్రంథం 3:21; ప్రకటన గ్రంథం 20:4, ప్రకటన గ్రంథం 20:6; 2 తిమోతికి 2:12. “తండ్రి నాకు కూడా...ఇచ్చాడు”– మత్తయి 28:18; యోహాను 3:35.

28. మరియు అతనికి వేకువ చుక్కను ఇచ్చెదను.

“వేకువచుక్క”– క్రీస్తును సూచిస్తున్నది. ప్రకటన గ్రంథం 22:16 చూడండి.

29. సంఘములతో ఆత్మ చెప్పుచున్న మాట చెవి గలవాడు వినునుగాక.

వ 7.