1. అయిదవ దూత బూర ఊదినప్పుడు ఆకాశమునుండి భూమిమీద రాలిన యొక నక్షత్రమును చూచితిని. అగాధముయొక్క తాళపుచెవి అతనికి ఇయ్యబడెను.

ఈ నక్షత్రం అసలైన నక్షత్రం కాదు గాని ఒక జీవి (“అతడు” – వ 2). బహుశా అతడు ఒక దేవదూత. “అగాధం”– లూకా 8:31 ప్రకారం ఇది అదృశ్య లోకంలోని శిక్ష స్థలం (2 పేతురు 2:4 పోల్చి చూడండి). దానికి దయ్యాలు అధికంగా భయపడుతాయి. రోమీయులకు 10:7 లో ఇదే మాట ఉంది. అక్కడ దీని అర్థం చనిపోయినవారు ఉన్న స్థలం. “తాళం చెవి”– ప్రకటన గ్రంథం 20:1, ప్రకటన గ్రంథం 20:3 పోల్చి చూడండి.

2. అతడు అగాధము తెరవగా పెద్ద కొలిమిలోనుండి లేచు పొగవంటి పొగ ఆ అగాధములోనుండి లేచెను; ఆ అగాధములోని పొగచేత సూర్యునిని వాయుమండలమున చీకటి కమ్మెను.
ఆదికాండము 19:28, నిర్గమకాండము 19:18, యోవేలు 2:10

“పొగ”– ప్రకటన గ్రంథం 8:4 పోల్చి చూడండి. పరలోకంలోని ఆ పొగకూ ఈ నరక సంబంధమైన పొగకూ ఎంతో తేడా ఉంది.

3. ఆ పొగలోనుండి మిడతలు భూమి మీదికి వచ్చెను, భూమిలో ఉండు తేళ్లకు బలమున్నట్టు వాటికి బలము ఇయ్యబడెను.
నిర్గమకాండము 10:12, నిర్గమకాండము 10:15

“మిడతలు”– ఇవి అగాధంలో నుంచి వచ్చాయని తేటగా చెప్పబడలేదు గాని ఆ పొగలోనుంచి అంటే ఆ అగాధంలోనుంచి వచ్చిన పొగలోనుంచి వచ్చి ఉండవచ్చు. ఇవి మన దేశంలోని మిడతల్లాంటి మామూలు మిడతలు కావు. ఏ మిడతా ఏ విషయంలోనూ తేళ్ళలాంటిది కాదు.

4. మరియు నొసళ్లయందు దేవుని ముద్రలేని మనుష్యులకే తప్ప భూమిపైనున్న గడ్డికైనను ఏ మొక్కలకైనను మరి ఏ వృక్షమునకైనను హాని కలుగజేయకూడదని వాటికి ఆజ్ఞ ఇయ్యబడెను.
యెహెఙ్కేలు 9:4

వాస్తవమైన మిడతలు తినేది గడ్డి, మొక్కలు, చెట్ల ఆకులు. “దేవుని ముద్ర”– ప్రకటన గ్రంథం 7:3 లో ఈ మాట యూదుల విషయంలో వాడబడింది. అయినా విశ్వాసులందరూ దేవుని ముద్ర పొందినవారు – 1 కోరింథీయులకు 1:22; ఎఫెసీయులకు 1:13; ఎఫెసీయులకు 4:30.

5. మరియు వారిని చంపుటకు అధికారము ఇయ్యబడలేదు గాని అయిదు నెలలవరకు బాధించుటకు వాటికి అధికారము ఇయ్యబడెను. వాటివలవ కలుగు బాధ, తేలు మనుష్యుని కుట్టినప్పుడుండు బాధవలె ఉండును.

“అయిదు నెలలపాటు”– ఇది కూడా చిహ్నం అనుకోనవసరం లేదు. ఈ గ్రంథంలో అనేక చిహ్నాలు, సంకేతాలు ఉండడంవల్ల దీనిలోని ప్రతిదీ మరి దేనికో చిహ్నం అనుకోకూడదు. ఒక చిహ్నం కనిపిస్తే అది చిహ్నమని సాధారణంగా స్పష్టంగా ఉంది. అక్కడ వాడిన భాషను బట్టీ, లేక సందర్భాన్ని బట్టీ అది చిహ్నమని తెలిసిపోతుంది. లేక ఆ చిహ్నం గురించిన వివరణ ఇవ్వబడుతుంది. ప్రకటన గ్రంథం 1:20; ప్రకటన గ్రంథం 2:28 తో; ప్రకటన గ్రంథం 22:16; ప్రకటన గ్రంథం 12:5 తో; ప్రకటన గ్రంథం 19:15-16; ప్రకటన గ్రంథం 12:9; ప్రకటన గ్రంథం 12:14 తో; ప్రకటన గ్రంథం 12:6; ప్రకటన గ్రంథం 13:11 తో; ప్రకటన గ్రంథం 16:13-14; ప్రకటన గ్రంథం 17:15, ప్రకటన గ్రంథం 17:18; మొ।। పోల్చి చూడండి.

6. ఆ దినములలో మనుష్యులు మరణమును వెదకుదురు గాని అది వారికి దొరకనే దొరకదు; చావవలెనని ఆశపడుదురు గాని మరణము వారియొద్దనుండి పారిపోవును.
యోబు 3:21, యిర్మియా 8:3, హోషేయ 10:8

ప్రకటన గ్రంథం 6:16; యిర్మియా 8:3 పోల్చి చూడండి – చావాలని ఆశిస్తారు గాని ఆత్మహత్య చేసుకోవడానికి భయపడుతారు.

7. ఆ మిడతల రూపములు యుద్ధమునకు సిద్ధపరచబడిన గుఱ్ఱములను పోలి యున్నవి. బంగారమువలె మెరయు కిరీటములవంటివి వాటి తలలమీద ఉండెను; వాటి ముఖములు మనుష్య ముఖములవంటివి,
యోవేలు 2:4

ఈ మిడతలు భూమిపై ఎప్పుడైనా కనబడే జీవుల్లో అపురూపమైనవి. ఇవి దాదాపుగా వర్ణించశక్యం గానివి. గుర్రాలూ రెక్కలూ వడిని సూచిస్తాయి. కిరీటాలు అంటే అవి ఏమేమి చేస్తాయో, అలా చేయడానికి వాటికి అధికారం ఉందన్నమాట. మనుషుల ముఖాలు వాటికి వ్యక్తిత్వం, తెలివి ఉన్నాయని సూచిస్తాయి. ఈ మిడతలు వేటికి చిహ్నంగా ఉన్నాయి? ఇవి అగాధంలోనుంచి వస్తే (వ 2,3. ఇది నమ్మదగినది) ఇవి దురాత్మలు, దయ్యాలు. ఇవి అగాధంలోనుంచి పొగవల్ల కలిగితే ఇవి సైతాను, లోకంలో పని చేసే వాడి అనుచరులు కలగజేసే ఒక విధమైన తెగులును, లేక ఈతిబాధను, లేక విపత్తును సూచించవచ్చు.

8. స్త్రీల తలవెండ్రుకలవంటి వెండ్రుకలు వాటికుండెను. వాటి పండ్లు సింహపు కోరలవలె ఉండెను.
యోవేలు 1:6

9. ఇనుప మైమరువులవంటి మైమరువులు వాటి కుండెను. వాటి రెక్కల ధ్వని యుద్ధమునకు పరుగెత్తునట్టి విస్తారమైన గుఱ్ఱపు రథముల ధ్వనివలె ఉండెను.
యోవేలు 2:5

10. తేళ్లతోకలవంటి తోకలును కొండ్లును వాటికుండెను. అయిదు నెలలవరకు వాటి తోకలచేత మనుష్యులకు హాని చేయుటకు వాటికి అధికారముండెను.

11. పాతాళపు దూత వాటిపైన రాజుగా ఉన్నాడు; హెబ్రీభాషలో వానికి అబద్దోనని పేరు, గ్రీసుదేశపు భాషలో వానిపేరు అపొల్లుయోను.
యోబు 26:6, యోబు 28:22

“అబద్దోన్”, “అపొల్లుయోన్”– ఈ రెండు పేర్లకు నాశనం అని అర్థం. వాడు సైతాను అని కొందరి అభిప్రాయం. నిజమే కావచ్చు. సైతాను మనుషుల్ని నాశనం చేసేవాడని మనకు తెలుసు – యోహాను 8:44; హెబ్రీయులకు 2:14; 1 పేతురు 5:8. కానీ వాడు ఈ మిడతలతోపాటు అగాధంలో ఉంచబడి ఉంటే (వ 1-3) వాడు సైతాను కాదు. క్రీస్తు తిరిగి వచ్చిన తరువాతే సైతానును అగాధంలో పడవేయడం జరుగుతుంది – ప్రకటన గ్రంథం 20:1-3.

12. మొదటి శ్రమ గతించెను; ఇదిగో మరి రెండు శ్రమలు ఇటుతరువాత వచ్చును.

“ఇంకా రెండు విపత్తులు”– వ 13-19; ప్రకటన గ్రంథం 16:1.

13. ఆరవ దూత బూర ఊదినప్పుడు దేవునియెదుట ఉన్న సువర్ణ బలిపీఠముయొక్క కొమ్ములనుండి యొక స్వరము యూఫ్రటీసు
నిర్గమకాండము 30:1-3

“వేదిక”– ప్రకటన గ్రంథం 8:3-4. “కొమ్ముల”– నిర్గమకాండము 30:1.

14. అను మహానదియొద్ద బంధింపబడియున్న నలుగురు దూతలను వదిలిపెట్టుమని బూర పట్టుకొని యున్న ఆ యారవ దూతతో చెప్పుట వింటిని.
ఆదికాండము 15:18, ద్వితీయోపదేశకాండము 1:7

“యూఫ్రటీసు”– ప్రకటన గ్రంథం 16:12. ఈ పొడవైన నది టర్కీనుంచి సిరియా ఇరాక్‌ల గుండా పారుతూ పర్షియన్ సముద్ర శాఖలో అంతం అయ్యేది. “బంధించి ఉన్న”– అంటే దేవుడు అనుమతి ఇచ్చేవరకు వారు చర్య తీసుకోలేరని అర్థం. “నలుగురు దేవదూతలను”– ప్రకటన గ్రంథం 7:1 లో కనిపించిన దేవదూతలు కాదని కనబడుతున్నది.

15. మనుష్యులలో మూడవ భాగమును సంహరింపవలెనని అదే సంవత్సరమున అదే నెలలో అదే దినమున, అదే గంటకు సిద్ధపరచబడియుండిన ఆ నలుగురు దూతలు వదిలిపెట్ట బడిరి.

“ఈ గంటకూ”– అన్నీ దేవుని వశంలో ఉన్నాయి. ప్రతిదానికీ ఆయన ఒక సమయాన్ని నియమించాడు. అపో. కార్యములు 1:7 చూడండి. “మూడో భాగాన్ని”– చాలా అధిక సంఖ్య. ప్రస్తుతం లోకంలో సుమారు 600 కోట్ల మంది ప్రజలు ఉంటారు. మూడో భాగం 200 కోట్లమంది. ఇంతమంది మరణించాలంటే నాశనం చేసే అతి భయంకరమైన సాధనాలు అవసరం.

16. గుఱ్ఱపురౌతుల సైన్యముల లెక్క యిరువదికోట్లు; వారి లెక్క యింత అని నేను వింటిని.

యోవేలు 2:2-11 పోల్చి చూడండి. 20 కోట్లంటే మహా గొప్ప సైన్యం, ప్రస్తుతం లోకంలోని అన్ని దేశాల సైన్యాలనూ కలిపినా ఇంత కంటే చాలా తక్కువ. “వారి లెక్క విన్నాను” (వ 16) – ఆ లెక్క విస్మయం కొలిపేదని అతనికి తెలుసు గనుక తాను దాన్ని అతిశయోక్తిగా చెప్పడం లేదని తెలియజేస్తున్నాడు. అయితే రౌతులు కూచునివున్న ఈ వింతైన భయంకరమైన గుర్రాలు దేనికి సూచన? బీకరమైన ఆయుధాలున్న మహా గొప్ప మానవ సైన్యాలా? భూమి మీదికి రాబోయే బ్రహ్మాండమైన దయ్యాల మూకా? ఎవరు ఖచ్చితంగా చెప్పగలరు? రాబోయే సంఘటనల గురించిన కొన్ని ఇతర భవిష్యత్ వాక్కుల లాగానే ఈ సంఘటనలు జరగకముందు అవి ఎలా నెరవేరుతాయో మనం తెలుసుకోలేమేమో.

17. మరియు నాకు కలిగిన దర్శనమందు ఈలాగు చూచితిని. ఆ గుఱ్ఱములకును వాటి మీద కూర్చుండియున్నవారికిని, నిప్పువలె ఎరుపు వర్ణము, నీలవర్ణము, గంధకవర్ణముల మైమరువు లుండెను. ఆ గుఱ్ఱముల తలలు సింహపు తలలవంటివి, వాటి నోళ్లలోనుండి అగ్ని ధూమగంధకములు బయలు వెడలుచుండెను.
నిర్గమకాండము 9:16

18. ఈ మూడు దెబ్బలచేత, అనగా వీటి నోళ్లలోనుండి బయలువెడలుచున్న అగ్ని ధూమగంధకములచేత, మనుష్యులలో మూడవ భాగము చంపబడెను,

19. ఆ గుఱ్ఱముల బలము వాటి నోళ్లయందును వాటి తోకల యందును ఉన్నది, ఎందుకనగా వాటి తోకలు పాములవలె ఉండి తలలు కలిగినవైనందున వాటిచేత అవి హాని చేయును.

20. ఈ దెబ్బలచేత చావక మిగిలిన జనులు, దయ్యములను, చూడను వినను నడువను శక్తిలేనివై, బంగారు వెండి కంచు రాయి కర్రలతో చేయబడిన తమ హస్తకృతములైన విగ్రహములను పూజింపకుండ విడిచిపెట్టునట్లు మారుమనస్సు పొందలేదు.
ద్వితీయోపదేశకాండము 32:17, కీర్తనల గ్రంథము 115:7, కీర్తనల గ్రంథము 135:15-17, యెషయా 17:8, దానియేలు 5:3-4, దానియేలు 5:23

“పశ్చాత్తాపపడలేదు”– ప్రకటన గ్రంథం 16:9, ప్రకటన గ్రంథం 16:11; మత్తయి 3:2, మత్తయి 3:8; లూకా 13:3-5; అపో. కార్యములు 17:30. అన్ని రకాల బాధలు, నొప్పులు, తెగుళ్ళు, విపత్తులు కలిగినా, మనుషులు వారిమీదికి దేవుని తీర్పును, శిక్షను తెచ్చిపెట్టే పాపాలను విడిచి దేవుని వైపుకు తిరగరు. తమ విగ్రహాలు, దుష్ట అలవాట్లు అంటే వారికి ఎంతో ఇష్టం. తమ చుట్టూరా చాలా మంది ఘోరమైన దెబ్బలు తింటూ చచ్చిపోతూ ఉన్నప్పుడు కూడా తమ విగ్రహాలను, పాపాలను విడిచిపెట్టరు. వారికి ప్రియంగా ఉన్న పాపాలను గమనించండి. “దయ్యాలను...పూజించడం”– ద్వితీయోపదేశకాండము 32:17; 1 కోరింథీయులకు 10:20 (మనుషులు వాటిని దేవుళ్ళనీ దేవతలనీ అంటారు).

21. మరియు తాము చేయు చున్న నరహత్యలును మాయమంత్రములును జారచోరత్వములును చేయకుండునట్లు వారు మారుమనస్సు పొందిన వారు కారు.
2 రాజులు 9:22

“హత్యలు”– కొందరు మనుషులకు ఇతరుల్ని చంపడం అంటే ఇష్టం అనేది విచారకరమైన విపరీత విషయం. “మంత్ర ప్రయోగాలు”– అపో. కార్యములు 8:9-11; అపో. కార్యములు 19:17-20; నిర్గమకాండము 7:11-12, నిర్గమకాండము 7:22; నిర్గమకాండము 8:7, నిర్గమకాండము 8:18-19; ద్వితీయోపదేశకాండము 18:10-12; ప్రకటన గ్రంథం 21:8; ప్రకటన గ్రంథం 22:15. “వ్యభిచారాలూ”– ఈ పాపం మనుషుల హృదయాల్ని చాలా గట్టిగా పట్టుకొనేది (సామెతలు 2:16-19). ఈ జీవిత విధానం బహు చెడ్డదని బైబిలు తేటతెల్లంగా బయలుపరుస్తున్నది – 1 కోరింథీయులకు 6:9-10; ఎఫెసీయులకు 5:3-7; హెబ్రీయులకు 13:4; ప్రకటన గ్రంథం 21:8; ప్రకటన గ్రంథం 22:15. “దొంగతనాలు”– నిర్గమకాండము 20:15; యిర్మియా 7:9; హోషేయ 4:2; మత్తయి 19:18; రోమీయులకు 2:21; రోమీయులకు 13:9; ఎఫెసీయులకు 4:28.