1. అమ్మోనీయులనుగూర్చి యెహోవా ఈలాగు సెలవిచ్చుచున్నాడు ఇశ్రాయేలునకు కుమారులు లేరా? అతనికి వారసుడు లేకపోయెనా? మల్కోము గాదును ఎందుకు స్వతంత్రించుకొనును? అతని ప్రజలు దాని పట్టణములలో ఎందుకు నివసింతురు?

అమ్మోనువారి గురించిన సందేశాలు ఇక్కడ కాకుండా ఇంకా యెహెఙ్కేలు 25:1-7; ఆమోసు 1:13-15; జెఫన్యా 2:8-11 లో కూడా ఉన్నాయి. అమ్మోను ప్రదేశం మోయాబుకు ఉత్తరాన, యొర్దానునదికి తూర్పుదిక్కున ఉంది. అమ్మోనువారు కూడా అబ్రాహాము తమ్ముడి కొడుకు లోతు సంతానమే కాబట్టి మోయాబువారికి బంధువులే (ఆదికాండము 19:36-38). “మల్కోం”– 1 రాజులు 11:5 లో మిల్కోం అని ఉంది. యిర్మియా 7:31 నోట్ చూడండి. “గాదు”– యొర్దాను నదికి తూర్పున ఉన్న ఇస్రాయేల్ గోత్రం అయిన గాదువారి భూమి (యెహోషువ 13:24-28). ఇస్రాయేల్ ఉత్తర రాజ్యం పతనమైన తరువాత అమ్మోనువారు గాదు ప్రదేశాన్ని స్వాధీనం చేసుకున్నారు.

2. కాగా యెహోవా ఈలాగున సెలవిచ్చుచున్నాడు రాగల దినములలో నేను అమ్మోనీయుల పట్టణమగు రబ్బా మీదికి వచ్చు యుద్ధము యొక్క ధ్వని వినబడజేసెదను; అది పాడుదిబ్బయగును, దాని ఉపపురములు అగ్నిచేత కాల్చబడును, దాని వారసులకు ఇశ్రాయేలీయులు వారసులగుదురని యెహోవా సెలవిచ్చుచున్నాడు.

అమ్మోనువారి ముఖ్యపట్టణం రబ్బా. ప్రస్తుతం జోర్డాన్ దేశం ముఖ్యపట్టణం కూడా రబ్బా ప్రదేశంలోనే ఉంది. “వెళ్ళగొట్టిన”– యెషయా 14:1-2; యిర్మియా 30:16 పోల్చి చూడండి.

3. హెష్బోనూ, అంగ లార్చుము, హాయి పాడాయెను, మల్కోమును అతని యాజకులును అతని యధిపతులును చెరలోనికి పోవు చున్నారు; రబ్బా నివాసినులారా, కేకలువేయుడి, గోనెపట్ట కట్టుకొనుడి, మీరు అంగలార్చి కంచెలలో ఇటు అటు తిరుగులాడుడి.

“హాయీ”– యెహోషువ 8వ అధ్యాయంలో ఉన్న హాయీ కాదు. మోయాబువారి కెమోష్ దేవుడిలాగే (యిర్మియా 48:7) ఈ మల్కోందేవుడు కూడా పనికిమాలిన వట్టి విగ్రహమని రుజువౌతున్నది. “హెష్బోను”– యిర్మియా 48:45.

4. విశ్వాసఘాతకురాలా నా యొద్దకు ఎవడును రాలేడని నీ ధనమునే ఆశ్రయముగా చేసికొన్నదానా,

“ధనం”– యిర్మియా 48:7. ఈ వచనంలో ఇస్రాయేల్ కాని జనాన్ని “కుమారి” అంటున్నాడు దేవుడు. యిర్మియా 31:22 లో యూదా గురించి ఇదే వాక్య భాగాల్ని వాడాడు.

5. నీ లోయలో జలములు ప్రవహించు చున్నవని, నీవేల నీ లోయలనుగూర్చి యతిశయించు చున్నావు? ప్రభువును సైన్యములకధిపతియునగు యెహోవా ఈలాగు సెలవిచ్చుచున్నాడు

6. నేను నీ చుట్టునున్న వారందరివలన నీకు భయము పుట్టించు చున్నాను; మీరందరు శత్రువుని కెదురుగా తరుమబడు దురు, పారిపోవువారిని సమకూర్చు వాడొకడును లేక పోవును, అటుతరువాత చెరలోనున్న అమ్మోనీయులను నేను రప్పించెదను; ఇదే యెహోవా వాక్కు.

యిర్మియా 48:47.

7. సైన్యములకధిపతియగు యెహోవా ఎదోమునుగూర్చి ఈలాగు సెలవిచ్చుచున్నాడు తేమానులో జ్ఞానమిక నేమియులేదా? వివేకులకు ఇక ఆలోచన లేకపోయెనా? వారి జ్ఞానము వ్యర్థమాయెనా?

ఎదోంను గురించిన ఇతర సందేశాలు – యెషయా 21:11-12; యెహెఙ్కేలు 25:12-14; ఆమోసు 1:11-12; ఓబద్యా 1:1-16; మలాకీ 1:3-5. ఎదోం మోయాబుకూ, మృత సముద్రానికీ దక్షిణంగా ఉంది. ఎదోం ప్రజలు యాకోబు అన్న ఏశావు సంతానం (ఆదికాండము 36:1, ఆదికాండము 36:9). “తేమాను”– ఎదోం ప్రాంతంలోని ముఖ్య పట్టణాల్లో ఒకటి. యోబు స్నేహితుల్లో ఒకడైన ఎలీఫజు తేమానువాడే (యోబు 2:11). “జ్ఞానం”– ఎదోంవారు జ్ఞానవంతులని ప్రసిద్ధికెక్కిన వారు.

8. ఏశావును విమర్శించుచు నేనతనికి కష్టకాలము రప్పించుచున్నాను; దదానీయు లారా, పారిపోవుడి వెనుకకు మళ్లుడి బహులోతున దాగు కొనుడి.

9. ద్రాక్షపండ్లు ఏరువారు నీయొద్దకు వచ్చిన యెడల వారు పరిగెలను విడువరా? రాత్రి దొంగలు వచ్చినయెడల తమకు చాలునంత దొరుకువరకు నష్టము చేయుదురు గదా?

10. నేను ఏశావును దిగంబరినిగా చేయు చున్నాను, అతడు దాగియుండకుండునట్లు నేనతని మరుగు స్థలమును బయలుపరచుచున్నాను, అతని సంతానమును అతని స్వజాతివారును అతని పొరుగువారును నాశన మగు చున్నారు, అతడును లేకపోవును.

“ఇక ఉండదు”– మోయాబు, అమ్మోనువారిలాగా కాకుండా ఎదోంలో మాత్రం నాశనం తరువాత ఎవరూ మిగలరని దేవుడు నిర్ణయించాడు (ఓబద్యా 18). దేవుడు ఎదోంను ఇంత కఠినంగా శిక్షించడానికి గల కారణం యెహెఙ్కేలు 25:12-14; ఓబద్యా 1:10-14 లో ఉంది.

11. అనాధులగు నీ పిల్లలను విడువుము, నేను వారిని సంరక్షించెదను, నీ విధవరాండ్రు నన్ను ఆశ్రయింపవలెను.
1 తిమోతికి 5:5

12. యెహోవా ఈలాగు సెలవిచ్చుచున్నాడు న్యాయముచేత ఆ పాత్రలోనిది త్రాగను రానివారు నిశ్చయముగా దానిలోనిది త్రాగుచున్నారే, నీవుమాత్రము బొత్తిగా శిక్ష నొందకపోవుదువా? శిక్ష తప్పించుకొనక నీవు నిశ్చయముగా త్రాగుదువు.

యిర్మియా 25:28-29.

13. బొస్రా పాడుగాను అపహాస్యాస్పదముగాను ఎడారి గాను శాపవచనముగాను ఉండుననియు, దాని పట్టణము లన్నియు ఎన్నటెన్నటికి పాడుగానుండుననియు నా తోడని ప్రమాణము చేసియున్నానని యెహోవా సెల విచ్చుచున్నాడు.

ఈ బొస్రా యిర్మియా 48:24 లో మోయాబు ప్రాంతంలో కనిపిస్తున్న బొస్రా కాదు.

14. యెహోవా యొద్దనుండి నాకు వర్త మానము వచ్చెను; జనముల యొద్దకు దూత పంపబడి యున్నాడు, కూడికొని ఆమెమీదికి రండి యుద్ధమునకు లేచి రండి.

ఓబద్యా 1:1-4 చూడండి. మోయాబులాగా ఎదోంకు కూడా అకారణమైన గర్వం బాగా ఉంది.

15. జనములలో అల్పునిగాను మనుష్యులలో నీచునిగాను నేను నిన్ను చేయుచున్నాను.

16. నీవు భీకరుడవు; కొండసందులలో నివసించువాడా, పర్వత శిఖరమును స్వాధీనపరచుకొనువాడా, నీ హృదయగర్వము నిన్ను మోసపుచ్చెను, నీవు పక్షిరాజువలె నీ గూటిని ఉన్నత స్థలములో కట్టుకొనినను అక్కడనుండి నిన్ను క్రింద పడద్రోసెదను; ఇదే యెహోవా వాక్కు.

17. ఎదోము పాడైపోవును, దాని మార్గమున నడుచువారు ఆశ్చర్యపడి దాని యిడుమలన్నియు చూచి వేళాకోళము చేయుదురు.

18. సొదొమయు గొమొఱ్ఱాయు వాటి సమీప పట్టణములును పడగొట్టబడిన తరువాత వాటిలో ఎవడును కాపురముండక పోయినట్లు ఏ మనుష్యుడును అక్కడ కాపురముండడు, ఏ నరుడును దానిలో బసచేయడు.

“సొదొమ”– ఆదికాండము 19:24-25.

19. చిరకాలము నిలుచు నివాసమును పట్టుకొనవలెనని శత్రువులు యొర్దాను ప్రవాహములో నుండి సింహమువలె వచ్చుచున్నారు, నిమిషములోనే నేను వారిని దాని యొద్దనుండి తోలివేయుదును, నేనెవని నేర్పరతునో వానిని దానిమీద నియమించెదను; నన్ను పోలియున్న వాడై నాకు ఆక్షేపణ కలుగచేయువాడేడి? నన్ను ఎదిరింప గల కాపరియేడి?

ఎదోము నాశనాన్ని జరిగించేవాణ్ణి నేనే అని దేవుడు చెప్తున్నాడు. ఇస్రాయేల్ వారి దేవుడూ, విశ్వానికి రాజు అయిన యెహోవాను ఎదిరిస్తే జయం లేదని గర్విష్ఠులైన ఎదోం పరిపాలకులు గ్రహిస్తారు.

20. ఎదోమునుగూర్చి యెహోవా చేసిన ఆలోచన వినుడి. తేమాను నివాసులనుగూర్చి ఆయన ఉద్దేశించినదాని వినుడి. నిశ్చయముగా మందలో అల్పులైన వారిని శత్రువులు లాగుదురు, నిశ్చయముగా వారి నివాస స్థలము వారినిబట్టి ఆశ్చర్యపడును.

21. వారు పడిపోగా అఖండమైన ధ్వని పుట్టెను; భూమి దానికి దద్దరిల్లుచున్నది, అంగలార్పు ఘోషయు ఎఱ్ఱసముద్రము దనుక వినబడెను.

22. శత్రువు పక్షిరాజువలె లేచి యెగిరి బొస్రామీద పడవలె నని తన రెక్కలు విప్పుకొనుచున్నాడు; ఆ దినమున ఎదోము బలాఢ్యుల హృదయములు ప్రసవించు స్త్రీ హృదయమువలె ఉండును.

“గరుడ పక్షి”– యిర్మియా 48:40.

23. దమస్కును గూర్చిన వాక్కు. హమాతును అర్పాదును దుర్వార్త విని సిగ్గు పడు చున్నవి అవి పరవశములాయెను సముద్రముమీద విచారము కలదుదానికి నెమ్మదిలేదు.

సిరియాకు అప్పటికీ, ఇప్పటికీ ముఖ్య పట్టణం దమస్కు. దమస్కుకు ఉత్తరంగా హమాతు అర్పాదు అనే పట్టణాలు ఉన్నాయి. దమస్కును గురించిన ఇతర సందేశాల కోసం యెషయా 17:1-3; ఆమోసు 1:3-5 చూడండి.

24. దమస్కు బలహీనమాయెను. పారిపోవలెనని అది వెనుకతీయుచున్నది వణకు దానిని పట్టెను ప్రసవించు స్త్రీని పట్టునట్లు ప్రయాసవేదనలు దానిని పట్టెను.

25. ప్రసిద్ధిగల పట్టణము బొత్తిగా విడువబడెను నాకు ఆనందమునిచ్చు పట్టణము బొత్తిగా విడువ బడెను.

అప్పటికే దమస్కు చాలా పురాతనమైన పట్టణం (ఆదికాండము 14:14). అందానికి వన్నెకెక్కినది.

26. ఆమె ¸యౌవనులు ఆమె వీధులలో కూలుదురు ఆ దినమున యోధులందరు మౌనులైయుందురు ఇదే సైన్యములకధిపతియగు యెహోవా వాక్కు.

“ఆ రోజు”– అంటే ఏ కాలమో ఖచ్చితంగా చెప్పలేము. యెషయా 17:1 ప్రకారం దమస్కు సంపూర్తిగా నాశనమైపోతుంది. అదింకా జరగలేదు.

27. నేను దమస్కు ప్రాకారములో అగ్ని రాజబెట్టెదను అది బెన్హదదు నగరులను కాల్చివేయును.

దమస్కు మీదికి రావలసిన శిక్ష సంగతి దేవుడే చూసుకుంటాడు. “బెన్‌హదద్”– యూదా రాజు ఆసా రోజుల్లో ఉన్న సిరియా రాజు (1 రాజులు 15:18).

28. బబులోనురాజైన నెబుకద్రెజరు కొట్టిన కేదారును గూర్చియు హాసోరు రాజ్యములనుగూర్చియు యెహోవా సెల విచ్చినమాట లేచి కేదారునకు వెళ్లుడి తూర్పుదేశస్థులను దోచు కొనుడి.

అరేబియా ఎడారిలో తిరుగులాడుతూ జీవనం చేసే తెగల స్వస్థలం కేదారు (యెషయా 21:13-15). ఇష్మాయేల్ కొడుకుల్లో ఒకడి పేరు కేదారు. బహుశా ఇతణ్ణిబట్టి ఇతడి సంతానానికీ, వారు నివసించే ప్రాంతానికీ ఆ పేరు వచ్చి ఉండవచ్చు (ఆదికాండము 25:13). ఈ హాసోరు గలలీ సరస్సుకు ఉత్తరంగా ఉన్న పట్టణం కాదు (యెహోషువ 11:1), గాని కేదారు దగ్గర అరేబియా ఎడారిలో ఉన్న ప్రాంతం.

29. వారి గుడారములను గొఱ్ఱెల మందలను శత్రువులు కొనిపోవుదురు తెరలను ఉపకరణములను ఒంటెలను వారు పట్టు కొందురు నఖముఖాల భయమని వారు దానిమీద చాటింతురు

30. హాసోరు నివాసులారా, బబులోనురాజైన నెబుకద్రెజరు మీమీదికి రావలెనని ఆలోచన చేయుచున్నాడు మీమీద పడవలెనను ఉద్దేశముతో ఉన్నాడు యెహోవా వాక్కు ఇదే పారిపోవుడి బహులోతున వెళ్లుడి అగాధస్థలములలో దాగుడి

31. మీరు లేచి ఒంటరిగా నివసించుచు గుమ్మములు పెట్టకయు గడియలు అమర్చకయు నిశ్చింతగాను క్షేమముగాను నివసించు జనముమీద పడుడి.

ఇక్కడి మాటలు ఈ ప్రజలు స్థిరనివాసం లేని సంచారులని సూచిస్తున్నాయి. యిర్మియా 46:26; యిర్మియా 48:47; యిర్మియా 49:6 లో ఉన్నట్టుగా వీరిని గురించి ఎలాంటి వాగ్దానమూ లేదు.

32. వారి ఒంటెలు దోపుడుసొమ్ముగా ఉండును వారి పశువులమందలు కొల్లసొమ్ముగా ఉండును గడ్డపు ప్రక్కలను కత్తిరించుకొనువారిని నఖముఖాల చెదరగొట్టుచున్నాను నలుదిక్కులనుండి ఉపద్రవమును వారిమీదికి రప్పించుచున్నాను ఇదే యెహోవా వాక్కు,

33. హాసోరు చిరకాలము పాడై నక్కలకు నివాస స్థలముగా ఉండును అక్కడ ఏ మనుష్యుడును కాపురముండడు ఏ నరుడును దానిలో బసచేయడు.

34. యూదారాజైన సిద్కియా యేలుబడి ఆరంభములో యెహోవా వాక్కు ప్రవక్తయైన యిర్మీయాకు ప్రత్యక్షమై ఏలామునుగూర్చి

టైగ్రస్, యూఫ్రటీస్ నదులకు తూర్పున ఉన్న ప్రాంతం ఏలాం. ఈ కాలంలో ఇది ఇరాన్ దేశంలో ఉంది.

35. ఈలాగు సెలవిచ్చెనుసైన్యములకధిపతి యగు యెహోవా సెలవిచ్చినదేమనగానేను ఏలాము యొక్క బలమునకు ముఖ్యాధారమైన వింటిని విరుచు చున్నాను.

36. నలుదిశలనుండి నాలుగు వాయువులను ఏలాముమీదికి రప్పించి, నలుదిక్కులనుండి వచ్చువాయు వులవెంట వారిని చెదరగొట్టుదును, వెలివేయబడిన ఏలాము వారు ప్రవేశింపని దేశమేదియు నుండదు.
ప్రకటన గ్రంథం 7:1

అన్ని వైపులనుండీ బాధలు వచ్చి పడతాయని అర్థం.

37. మరియు వారి శత్రువులయెదుటను వారి ప్రాణము తీయజూచు వారియెదుటను ఏలామును భయపడ జేయుదును, నా కోపాగ్నిచేత కీడును వారి మీదికి నేను రప్పించుదును, వారిని నిర్మూలము చేయువరకు వారివెంట ఖడ్గము పంపు చున్నాను; ఇదే యెహోవా వాక్కు.

38. నా సింహాసనమును అచ్చటనే స్థాపించి ఏలాములో నుండి రాజును అధిపతులను నాశనముచేయుదును; ఇదే యెహోవా వాక్కు.

“నా సింహాసనం నిలిపి”– తన బలప్రభావాలనూ, అధికారాన్నీ ఆ ప్రజలపై చూపుతాడని భావం. యిర్మియా 1:15 పోల్చి చూడండి.

39. అయితే కాలాంతమున చెరపట్టబడిన ఏలాము వారిని నేను మరల రప్పించెదను; ఇదే యెహోవా వాక్కు.

యిర్మియా 46:26; యిర్మియా 49:6; యిర్మియా 48:47; అపో. కార్యములు 2:9.