1. పస్కా అనబడిన పులియని రొట్టెల పండుగ సమీ పించెను.

నిర్గమకాండము 12:1-20; లేవీయకాండము 23:4-8.

2. ప్రధానయాజకులును శాస్త్రులును ప్రజలకు భయపడిరి గనుక ఆయనను ఏలాగు చంపింతుమని ఉపాయము వెదకుచుండిరి.

“యాజులు”– నిర్గమకాండము 28:1.

3. అంతట పండ్రెండుమంది శిష్యుల సంఖ్యలో చేరిన ఇస్కరియోతు అనబడిన యూదాలో సాతాను ప్రవేశించెను

యోహాను 13:27. క్రొత్త ఒడంబడిక గ్రంథంలో దయ్యం పట్టినవారి గురించి అనేక చోట్ల కనిపిస్తున్నాయి. కానీ ఒక్క యూదా ఇస్కరియోతు విషయంలో మాత్రమే దయ్యాల ప్రధాని సాక్షాత్తూ సైతానే అతనిలో ప్రవేశించాడని రాసి ఉంది. అంటే సైతాను తన ఉద్దేశాలు నెరవేర్చుకునేందుకు యూదాను పూర్తిగా ఆవహించాడన్నమాట. యేసుప్రభువును త్రోసిపుచ్చిన వారందరిలోనూ కొంతవరకు సైతాను పని చేస్తాడన్నది నిజమే. ఎఫెసీయులకు 2:2 చూడండి. అక్కడ సైతాను వాయుమండల రాజ్యాధికారి అనడం గమనించండి. సైతాను గురించి నోట్స్ 1 థెస్సలొనీకయులకు 21:1; మత్తయి 4:1-10; యోహాను 8:44; యోహాను 12:31 చూడండి.

4. గనుక వాడు వెళ్లి, ఆయనను వారికేలాగు అప్పగింపవచ్చునో దానినిగూర్చి ప్రధాన యాజకులతోను అధిపతులతోను మాటలాడెను.

మత్తయి 26:14-16; మార్కు 14:10-11; జెకర్యా 11:12.

5. అందుకు వారు సంతో షించి వానికి ద్రవ్యమియ్య సమ్మతించిరి.

6. వాడు అందుకు ఒప్పుకొని, జనసమూహము లేనప్పుడు ఆయనను వారికి అప్పగించుటకు తగిన సమయము వెదకుచుండెను.

7. పస్కాపశువును వధింపవలసిన పులియని రొట్టెల దినమురాగా
నిర్గమకాండము 12:6, నిర్గమకాండము 12:14, నిర్గమకాండము 12:15

వ 1.

8. యేసు పేతురును యోహానును చూచిమీరు వెళ్లి మనము భుజించుటకై పస్కాను మనకొరకు సిద్ధపరచుడని వారిని పంపెను.
నిర్గమకాండము 12:8-11

మార్కు 14:12-16; మత్తయి 26:17-19.

9. వారుమేమెక్కడ సిద్ధపరచగోరుచున్నావని ఆయనను అడుగగా

10. ఆయన ఇదిగో మీరు పట్టణములో ప్రవేశించునప్పుడు నీళ్లకుండ మోసికొనిపోవుచున్న యొకడు మీకు ఎదురుగా వచ్చును; అతడు ప్రవేశించు ఇంటిలోనికి అతని వెంట వెళ్లి

11. నేను నా శిష్యులతో కూడ పస్కాను భుజించుటకు విడిది గది యెక్కడనని బోధకుడు నిన్నడుగుచున్నాడని యింటి యజమానునితో చెప్పుడి.

12. అతడు సామగ్రిగల యొక గొప్ప మేడగది మీకు చూపించును; అక్కడ సిద్ధ పరచుడని వారితో చెప్పెను.

13. వారు వెళ్లి ఆయన తమతో చెప్పినట్టు కనుగొని పస్కాను సిద్ధపరచిరి.

14. ఆ గడియ వచ్చినప్పుడు ఆయనయు ఆయనతోకూడ అపొస్తలులును పంక్తిని కూర్చుండిరి.

15. అప్పుడాయన నేను శ్రమపడకమునుపు మీతోకూడ ఈ పస్కాను భుజింపవలెనని మిక్కిలి ఆశపడితిని.

క్రీస్తు వారితో కలిసి పస్కా గొర్రెపిల్ల విందును భుజించడం వారి విమోచన, పాపవిముక్తిని సూచిస్తున్నది. త్వరలో వారి కోసం తాను అనుభవించబోయే హింసలను అది సూచిస్తున్నప్పటికీ ఇలా చెయ్యడం క్రీస్తుకు ఆనందంగా ఉంది.

16. అది దేవుని రాజ్య ములో నెరవేరువరకు ఇక ఎన్నడును దాని భుజింపనని మీతో చెప్పుచున్నానని వారితో చెప్పి

దేవుని గొర్రెపిల్ల అయిన యేసు బలి కావడం పస్కాబలి ఆధ్యాత్మికంగా నెరవేరడమే (1 కోరింథీయులకు 5:7). దేవుని రాజ్యం మనుషుల్లో, మనుషులతో ఉండడం దీనివల్ల సాధ్యపడింది. ఇప్పుడు ప్రభురాత్రి భోజనాన్ని సరిగా ఆచరించే వారందరితో ఆయన అదృశ్య సన్నిధి నిలిచి ఉంది (1 కోరింథీయులకు 11:23-26). ఈ యుగం అంతమైన తరువాత ఆయన సన్నిధి తన ప్రజలతో ప్రత్యక్షంగానే ఉంటుంది (ప్రకటన 19 అధ్యాయం). “దేవుని రాజ్యం”– మత్తయి 4:17.

17. ఆయన గిన్నె ఎత్తికొని కృతజ్ఞతాస్తుతులు చెల్లించిమీరు దీనిని తీసి కొని మీలో పంచుకొనుడి;

మత్తయి 26:26-29.

18. ఇకమీదట దేవుని రాజ్యము వచ్చువరకు నేను ద్రాక్షారసము త్రాగనని మీతో చెప్పు చున్నాననెను.

19. పిమ్మట ఆయన యొక రొట్టె పట్టుకొని కృతజ్ఞతాస్తు తులు చెల్లించి దాని విరిచి, వారి కిచ్చిఇది మీ కొరకు ఇయ్యబడుచున్న నా శరీరము; నన్ను జ్ఞాపకము చేసికొనుటకు దీనిని చేయుడని చెప్పెను.

“ధారదత్తమైన”– వ 19. యేసు తన శరీరం బలిగా ఇచ్చాడన్న మాట.

20. ఆ ప్రకారమే భోజనమైన తరువాత ఆయన గిన్నెయు పట్టు కొనిఈ గిన్నె మీకొరకు చిందింపబడుచున్న నా రక్తము వలన నైన క్రొత్త నిబంధన.
నిర్గమకాండము 24:8, యిర్మియా 31:31, యిర్మియా 32:40, జెకర్యా 9:11

21. ఇదిగో నన్ను అప్పగించు వాని చెయ్యి నాతోకూడ ఈ బల్లమీద ఉన్నది.
కీర్తనల గ్రంథము 41:9

యేసు ఈ ప్రభురాత్రి ఆచరణను స్థాపించి, దానిలో పాల్గొంటున్నప్పుడు యూదా అక్కడే ఉన్నాడనీ దీనివల్ల స్పష్టంగా ఉన్నట్టున్నది.

22. నిర్ణయింపబడిన ప్రకారము మనుష్యకుమారుడు పోవు చున్నాడుగాని ఆయన ఎవరిచేత అప్పగింపబడుచున్నాడో ఆ మనుష్యునికి శ్రమయని చెప్పెను.

మత్తయి 26:24.

23. వారుఈ పనిని చేయబోవువాడెవరో అని తమలో తాము అడుగుకొన సాగిరి.

యూదా కపట వేషం ఎంత సమర్థవంతంగా ఉందంటే వారతన్ని ఎన్నడూ అనుమానించలేదు (యోహాను 13:26-29).

24. తమలో ఎవడు గొప్పవాడుగా ఎంచబడునో అను వివాదము వారిలో పుట్టగా

ఇది వారికి కొత్తేమీ కాదు (లూకా 9:46; మత్తయి 18:1; మార్కు 9:33-34). అయినప్పటికీ క్రీస్తు సిలువ వేయబడక ముందు రాత్రే వాళ్ళు మళ్ళీ ఈ జగడం పెట్టుకోవడం వారిలో ఆధ్యాత్మిక దృష్టి, పరిపక్వత లేని విషయాన్ని తెలియజేస్తున్నది.

25. ఆయన వారితో ఇట్లనెను అన్యజనములలో రాజులు వారిమీద ప్రభుత్వము చేయుదురు; వారిమీద అధికారము చేయువారు ఉప కారులనబడుదురు.

మత్తయి 20:25-27.

26. మీరైతే ఆలాగు ఉండరాదు; మీలో గొప్పవాడు చిన్నవానివలెను, అధిపతి పరిచారకుని వలెను ఉండవలెను.

27. గొప్పవాడెవడు? భోజనపంక్తిని కూర్చుండువాడా పరిచర్యచేయువాడా? పంక్తినికూర్చుండు వాడే గదా? అయినను నేను మీ మధ్య పరిచర్య చేయు వానివలె ఉన్నాను.

మత్తయి 20:28; యోహాను 13:3-5; ఫిలిప్పీయులకు 2:5-7.

28. నా శోధనలలో నాతో కూడ నిలిచి యున్నవారు మీరే;

రోమీయులకు 8:17; 2 తిమోతికి 2:12; 1 పేతురు 4:13 పోల్చి చూడండి.

29. గనుక నాతండ్రి నాకు రాజ్యమును నియమించినట్టుగా నా రాజ్యములో నా బల్లయొద్ద అన్నపానములు పుచ్చుకొని,

30. సింహాసనముల మీద కూర్చుండి ఇశ్రాయేలు పండ్రెండు గోత్రములవారికి మీరు తీర్పుతీర్చుటకై, నేనును మీకు రాజ్యమును నియమించుచున్నాను.

మత్తయి 19:28.

31. సీమోనూ, సీమోనూ, ఇదిగో సాతాను మిమ్మును పట్టి గోధుమలవలె జల్లించుటకు మిమ్మును కోరుకొనెను గాని
ఆమోసు 9:9

సీమోను అనేది పేతురుకు మరో పేరు. పేతురునూ, ఇతర శిష్యులనూ గట్టిగా కుదిపివేసి, గందరగోళంలో పడవేసి నాశనం చెయ్యాలన్నది సైతాను ఉద్దేశం. “మిమ్ములను”– గ్రీకు భాషలో బహువచనం వాడినందువల్ల తక్కిన శిష్యుల గురించి కూడా యేసు మాట్లాడుతున్నాడని తెలుస్తున్నది. అయితే పేతురు మీద మాత్రం సైతాను బాగా కన్నువేసి ఉంచాడు.

32. నీ నమ్మిక తప్పిపోకుండునట్లు నేను నీకొరకు వేడుకొంటిని; నీ మనసు తిరిగిన తరువాత నీ సహోదరులను స్థిరపరచుమని చెప్పెను.

ఇప్పుడు యేసుప్రభువు విశ్వాసులందరికోసమూ ప్రార్థన చేస్తున్నాడు (యోహాను 17:9, యోహాను 17:15; హెబ్రీయులకు 7:25; 1 యోహాను 2:1). చివరివరకూ వీరి విశ్వాసం చెక్కుచెదరకుండా ఉండడానికి కారణం ఇదే. దీని అర్థం తెలిసిన వారందరికీ ఇది గొప్ప ప్రోత్సాహం. యోహాను 6:39-40; యోహాను 10:28; ఫిలిప్పీయులకు 1:6; హెబ్రీయులకు 10:39; 1 పేతురు 1:5 పోల్చి చూడండి. యేసు ఇక్కడ “నీవు మళ్ళీ దేవునివైపు తిరిగినప్పుడు” అంటున్నాడు గానీ “తిరిగినట్టయితే” అనడం లేదు. పేతురు కోసం తాను చేస్తున్న ప్రార్థన సఫలం అవుతుందని ఆయనకు తెలుసు. మనకోసం ఆయన చేసిన ప్రార్థన కూడా తప్పక సఫలం అవుతుంది యోహాను 11:41-42.

33. అయితే అతడు ప్రభువా, నీతోకూడ చెరలోనికిని మరణమునకును వెళ్లుటకు సిద్ధముగా ఉన్నానని ఆయనతో అనగా

మత్తయి 26:33-35.

34. ఆయనపేతురూ, నీవు నన్నెరుగనని ముమ్మారు చెప్పు వరకు, నేడు కోడికూయదని నీతో చెప్పుచున్నాననెను.

35. మరియు ఆయనసంచియు జాలెయు చెప్పులును లేకుండ నేను మిమ్మును పంపినప్పుడు, మీకు ఏమైనను తక్కువాయెనా అని వారినడిగినప్పుడు వారుఏమియు తక్కువకాలేదనిరి.

లూకా 9:3; లూకా 10:4; మత్తయి 10:9-10.

36. అందుకాయన ఇప్పుడైతే సంచి గలవాడు సంచియు జాలెయు తీసికొని పోవలెను; కత్తి లేనివాడు తన బట్టనమ్మి కత్తి కొనుక్కొనవలెను;

ఇలా అనడంద్వారా యేసు ఈ విషయాలను సూచిస్తున్నాడు – కాలం మారుతున్నది, ఎక్కువ విరోధం, ఎక్కువ హింస శిష్యులకు కలుగుతాయి గనుక వారు సిద్ధపడి ఉండాలి. తమ సొంత ఖర్చులతో వారు ప్రయాణాలు చెయ్యాలి (మత్తయి 18:11-14 లో చెప్పినట్టు కాదు). కత్తిని గురించి చెప్పడంలో యేసు తాను ఇంతకుముందు చెప్పిన మాటలను వదిలేసి (మత్తయి 5:11-12, మత్తయి 5:38-41) యుద్ధ మార్గాన్ని అవలంబించాలని సూచించడం లేదు. బహుశా “కత్తి” అనేది ఇక్కడ అలంకారికంగా ఉపయోగించిన మాట. ముందు రాబోతున్న గొప్ప బాధలను ఇది సూచిస్తూ ఉండవచ్చు. మత్తయి 26:51-52 లో యేసుప్రభువు హింసా ప్రవృత్తిని, బలాత్కారాన్ని ఖండించడం గమనించండి.

37. ఆయన అక్రమకారులలో ఒకడుగా ఎంచబడెను
యెషయా 53:12

యెషయా 53:12; మత్తయి 5:17; లూకా 24:44-45.

38. అని వ్రాయబడిన మాట నాయందు నెరవేరవలసియున్నది; ఏలయనగా నన్నుగూర్చిన సంగతి సమాప్తమవుచున్నదని మీతో చెప్పుచున్నాననెను.

శిష్యులు యేసు మాటల్ని ఉన్నవి ఉన్నట్టుగా తీసుకున్నారు. (మత్తయి 16:5-12 మొ।। పోల్చి చూడండి). యేసు వారి మందబుద్ధిని చూచి అప్పటికి ఏమీ చెప్పకుండా ఊరుకున్నాడు. ఈ సంగతి తరువాత వారికి స్పష్టంగా అర్థం అయింది.

39. వారు ప్రభువా, ఇదిగో ఇక్కడ రెండు కత్తులున్నవనగా-చాలునని ఆయన వారితో చెప్పెను.

మత్తయి 26:36-46. ఆలీవ్ కొండ పశ్చిమ వాలున ఉన్న గెత్‌సేమనే తోటలకు వారు వెళ్ళారు.

40. తరువాత ఆయన బయలుదేరి, తన వాడుక చొప్పున ఒలీవలకొండకు వెళ్లగా శిష్యులును ఆయనవెంట వెళ్లిరి.

41. ఆ చోటు చేరి ఆయన వారితోమీరు శోధనలో ప్రవేశించకుండునట్లు ప్రార్థనచేయుడని చెప్పి

42. వారి యొద్ద నుండి రాతివేత దూరము వెళ్లి మోకాళ్లూని

43. తండ్రీ, యీ గిన్నె నా యొద్దనుండి (తొలగించుటకు) నీ చితమైతే తొలగించుము; అయినను నా యిష్టముకాదు, నీ చిత్తమే సిద్ధించునుగాక అని ప్రార్థించెను.

లూకా ఒక్కడే దీన్ని రాశాడు. ఆ సమయంలో యేసు అనుభవం బహు భయంకరం, ఆ పరీక్ష బహు కఠినం కాబట్టి ఆయన మానవ స్వభావం ఈ వత్తిడికి బలహీనమైపోయింది. తనకు వాటిల్లబోయే దాన్ని ఎదుర్కొనేందుకు ఆయన్ను బలపరచడం అవసరం. “దేవదూతలు”– ఆదికాండము 16:7.

44. అప్పుడు పర లోకమునుండి యొకదూత ఆయనకు కనబడి ఆయనను బలపరచెను.

లూకా ఒక్కడే దీన్ని రాశాడు. ఇది క్రీస్తు మనోవేదన, దుఃఖంలోని తీవ్రతలను ఎంత ప్రస్ఫుటంగా చిత్రీకరిస్తున్నది! ఆయన తాగవలసి ఉన్న గిన్నె నిజంగా ఎంత బీభత్సమో! మత్తయి 26:38-39; యోహాను 18:11.

45. ఆయన వేదనపడి మరింత ఆతురముగా ప్రార్థన చేయగా ఆయన చెమట, నేల పడుచున్న గొప్ప రక్త బిందువులవలె ఆయెను.

శిష్యుల నిద్రమత్తుకు కారణం లూకా ఒక్కడే చెప్పాడు. క్రీస్తు అనుభవిస్తున్న వేదన వారి హృదయాల్లో వేదన పుట్టించింది. దాన్ని తప్పించుకునేందుకు వారు నిద్రపోయారు.

46. ఆయన ప్రార్థన చాలించి లేచి తన శిష్యులయొద్దకు వచ్చి, వారు దుఃఖము చేత నిద్రించుట చూచి

47. మీరెందుకు నిద్రించు చున్నారు? శోధనలో ప్రవేశించకుండునట్లు లేచి ప్రార్థన చేయుడని వారితో చెప్పెను.

మత్తయి 26:47-56.

48. ఆయన ఇంకను మాటలాడుచుండగా, ఇదిగో జనులు గుంపుగా వచ్చిరి. పండ్రెండుమందిలో యూదా అన బడినవాడు వారికంటె ముందుగా నడిచి, యేసును ముద్దు పెట్టుకొనుటకు ఆయనయొద్దకు రాగా

ఈ ప్రశ్న వ 49లోని ప్రశ్న లూకా ఒక్కడే రాశాడు.

49. యేసు యూదా, నీవు ముద్దుపెట్టుకొని మనుష్యకుమారుని అప్పగించు చున్నావా అని వానితో అనగా

యేసు “సరే” అని జవాబియ్యలేదు – వ 36 నోట్ చూడండి.

50. ఆయన చుట్టుఉన్న వారు జరుగబోవు దానిని చూచిప్రభువా, కత్తితో నరుకుదుమా అని ఆయనను అడిగిరి.

51. అంతలో వారిలో ఒకడు ప్రధానయాజకుని దాసుని కొట్టి, వాని కుడి చెవి తెగనరికెను.

52. అయితే యేసు ఈ మట్టుకు తాళుడని చెప్పి, వాని చెవి ముట్టి బాగుచేసెను.

53. యేసు తన్ను పట్టుకొనవచ్చిన ప్రధానయాజకులతోను దేవాలయపు అధిపతులతోను పెద్దలతోనుమీరు బందిపోటు దొంగ మీదికి వచ్చినట్టు కత్తులతోను గుదియలతోను బయలుదేరి వచ్చితిరా?

54. నేను అనుదినము మీచెంత దేవాలయములో ఉన్నప్పుడు మీరు నన్ను పట్టుకొనలేదు; అయితే ఇది మీ గడియయు అంధకార సంబంధమైన అధికారమును అనెను.

మత్తయి 26:57-58.

55. వారాయనను పట్టి యీడ్చుకొనిపోయి ప్రధాన యాజకుని యింటిలోనికి తీసికొనిపోయిరి. పేతురు దూర ముగా వారి వెనుక వచ్చుచుండెను.

మత్తయి 26:69-75; మార్కు 14:69.

56. అంతట కొందరు నడుముంగిట మంటవేసి చుట్టు కూర్చుండి నప్పుడు, పేతురును వారి మధ్యను కూర్చుండెను.

57. అప్పుడొక చిన్నది ఆ మంట వెలుతురులో అతడు కూర్చుండుట చూచి అతని తేరిచూచివీడును అతనితో కూడ ఉండెనని చెప్పెను.

58. అందుకు పేతురు అమ్మాయీ, నేనతని నెరుగననెను.

59. మరి కొంత సేపటికి మరియొకడు అతని చూచినీవును వారిలో ఒకడవనగా పేతురు ఓయీ, నేను కాననెను.

60. ఇంచుమించు ఒక గడియయైన తరువాత మరియొకడు నిజముగా వీడును అతనితో కూడ ఉండెను, వీడు గలిలయుడని దృఢముగా చెప్పెను.

61. అందుకు పేతురు ఓయీ, నీవు చెప్పినది నాకు తెలియ దనెను. అతడింకను మాటలాడుచుండగా వెంటనే కోడి కూసెను.

లూకా ఒక్కడే దీన్ని రాశాడు. పేతురు హృదయం బ్రద్దలు కావడానికి యేసు చూచిన ఒక్క చూపు చాలు.

62. అప్పుడు ప్రభువు తిరిగి పేతురు వైపు చూచెను గనుక పేతురు నేడు కోడి కూయకమునుపు నీవు ముమ్మారు నన్ను ఎరుగనందువని ప్రభువు తనతో చెప్పిన మాట జ్ఞాపకము చేసికొని

63. వెలుపలికిపోయి సంతాపపడి యేడ్చెను.

మత్తయి 26:67-68. యేసును హేరోదు, అతని సైనికులు కూడా వెక్కిరించారు (లూకా 23:11). తరువాత ఆయన సిలువపై ఉన్నప్పుడు అనేకమంది ఆయన్ను వెక్కిరించారు (లూకా 23:35-36).

64. యేసును పట్టుకొనిన మనుష్యులు ఆయనను అపహసించి కొట్టి, ఆయన ముఖము కప్పి,

65. నిన్ను కొట్టిన వాడెవడో ప్రవచింపుమని ఆయనను అడిగిఒ ఆయనకు విరోధముగా ఇంకను అనేక దూషణ వచనములాడిరి.

66. ఉదయము కాగానే ప్రజల పెద్దలును ప్రధాన యాజకులును శాస్త్రులును సభకూడి, ఆయనను తమ మహా సభలోనికి తీసికొనిపోయి

మత్తయి 26:63-66.

67. నీవు క్రీస్తువైతే మాతో చెప్పుమనిరి. అందుకాయన నేను మీతో చెప్పినయెడల మీరు నమ్మరు.

68. అదియుగాక నేను మిమ్మును అడిగినయెడల మీరు నాకు ఉత్తరము చెప్పరు.

69. ఇది మొదలుకొని మనుష్యకుమారుడు మహాత్మ్యముగల దేవుని కుడిపార్శ్వమున ఆసీనుడగునని వారితో చెప్పెను.
కీర్తనల గ్రంథము 110:1, దానియేలు 7:13

కీర్తనల గ్రంథము 110:1; అపో. కార్యములు 2:33-34; రోమీయులకు 8:34; ఎఫెసీయులకు 1:20; హెబ్రీయులకు 1:3, హెబ్రీయులకు 1:13; హెబ్రీయులకు 8:1.

70. అందుకు వారందరు అట్లయితే నీవు దేవుని కుమారుడవా? అని అడుగగా ఆయన మీరన్నట్టు నేనే ఆయనను అని వారితో చెప్పెను.

71. అందుకు వారు మనకిక సాక్షులతో పని ఏమి? మనము అతని నోటిమాట వింటిమిగదా అని చెప్పిరి.