1. యెహోవా, నీ కోపముచేత నన్ను గద్దింపకుము నీ ఉగ్రతతో నన్ను శిక్షింపకుము.

దేవుడు తనను శిక్షిస్తున్న విషయం దావీదుకు తెలుసు. తాను ఫలానా పాపం చేశానని అతను ఇక్కడ చెప్పడం లేదు గాని తాను మందలింపుకు, శిక్షకు పాత్రుడనేనని అతనికి బాగా తెలుసు. అతను దేవుణ్ణి బ్రతిమాలుతున్నది దేనికోసమంటే తన విషయంలో కఠినంగా ప్రవర్తించవద్దని (కీర్తనల గ్రంథము 38:1 పోల్చిచూడండి).

2. యెహోవా, నేను కృశించి యున్నాను, నన్ను కరుణించుము యెహోవా, నా యెముకలు అదరుచున్నవి, నన్నుబాగుచేయుము

దావీదు మనస్సులోను దేహంలోను కూడా ఎంతో బాధననుభవిస్తున్నాడు. అతడు అధికంగా జబ్బుపడ్డాడు. తన చావు సమీపించిందేమోనని భయపడుతున్నాడు (వ 5). తన న్యాయవర్తనను బట్టి కాక దేవుని కృపను బట్టే దయ చూపాలని అర్థిస్తున్నాడు (వ 4).

3. నా ప్రాణము బహుగా అదరుచున్నది.యెహోవా, నీవు ఎంతవరకు కరుణింపక యుందువు?
యోహాను 12:27

“ఎంతకాలం”– కష్టాలకూ విషమ పరీక్షలకూ గురి అయిన విశ్వాసి తరచుగా పెట్టే మొర ఇదే (కీర్తనల గ్రంథము 13:1-2; కీర్తనల గ్రంథము 35:17; కీర్తనల గ్రంథము 74:10; కీర్తనల గ్రంథము 80:4; కీర్తనల గ్రంథము 89:46; కీర్తనల గ్రంథము 90:13; కీర్తనల గ్రంథము 94:3).

4. యెహోవా, తిరిగి రమ్ము, నన్ను విడిపింపుమునీ కృపనుబట్టి నన్ను రక్షించుము.

5. మరణమైనవారికి నిన్ను గూర్చిన జ్ఞాపకము లేదుపాతాళములో ఎవరు నీకు కృతజ్ఞతాస్తుతులు చెల్లించు దురు?

దావీదు రోజుల్లోనూ, అంతకుముందు కాలంలోనూ దేవుడు చనిపోయినవారి స్థితి గురించి మనుషులకు వెల్లడి చేసినది చాలా తక్కువ. ఆ రోజుల్లో విశ్వాసుల దృష్టిలో మరణ లోకం అంటే చీకటి నిండిన స్థలం, ఈ లోక విషయాలు జ్ఞాపకానికి రాని స్థలం (యోబు 10:21-22; కీర్తనల గ్రంథము 30:9; కీర్తనల గ్రంథము 88:10-12; కీర్తనల గ్రంథము 115:17; ప్రసంగి 9:10; యెషయా 38:18).

6. నేను మూలుగుచు అలసియున్నానుప్రతి రాత్రియు కన్నీరు విడుచుచు నా పరుపు తేలజేయుచున్నాను.నా కన్నీళ్లచేత నా పడక కొట్టుకొని పోవుచున్నది.

దావీదు ఉన్న దీనదశ గురించి అతని శత్రువులు ఆనందించారు. అతని దుఃఖాన్ని మరింత ఎక్కువ చేశారు. దీనిని బట్టి వారు ఎంత పాపాత్ములో తెలుస్తున్నది.

7. విచారముచేత నా కన్నులు గుంటలు పడుచున్నవినాకు బాధ కలిగించువారిచేత అవి చివికియున్నవి.

8. యెహోవా నా రోదన ధ్వని వినియున్నాడు పాపముచేయు వారలారా, మీరందరు నాయొద్దనుండి తొలగిపోవుడి.
మత్తయి 7:23, లూకా 13:27

ఉన్నట్టుండి అంతా తేలికపడింది. దేవుడు అతని విన్నపం విన్నాడని పవిత్రాత్మ దావీదుకు నిశ్చయత ఇచ్చాడు. తాను దేని కోసమైతే దేవుణ్ణి అడిగాడో అది దొరికింది అని అతనికి తెలిసింది. ప్రార్థన ద్వారా, నమ్మకం ద్వారా విజయం సాధించాడు. విశ్వాసులందరికీ ఈ విధానం అందుబాటులో ఉంది (మార్కు 11:24; 1 యోహాను 5:14-15).

9. యెహోవా నా విన్నపము ఆలకించి యున్నాడు యెహోవా నా ప్రార్థన నంగీకరించును.

10. నా శత్రువులందరు సిగ్గుపడి బహుగా అదరుచున్నారు వారు ఆకస్మికముగా సిగ్గుపడి వెనుకకు మళ్లుదురు.