7:1-10:44 ఎజ్రాలోని రెండవ ప్రధాన భాగంలో ప్రాథమికంగా ఎజ్రా యొక్క జ్ఞాపకాలే ఉన్నాయి (పరిచయంలో ఉన్న "గ్రంథనిర్మాణం" చూడండి). శాస్త్రి అయిన ఎజ్రా యూదు ప్రజలకు ఏ విధంగా ఆధ్యాత్మిక నూతనత్వాన్ని తీసుకొచ్చాడో ఈ భాగంలో మనకు కనబడుతుంది. 6 అధ్యా. చివరి వచనాలు క్రీ.పూ. 515 లో జరిగాయి. అయితే సుమారు 50 సంవత్సరాల వ్యవధి తర్వాత యెరూషలేముకు ఎజ్రా చేసిన ప్రయాణంతో క్రీ.పూ. 458 లో 7వ అధ్యా. ఆరంభమవుతుంది.
7:12-26 వచనాల్లో అర్తహషస్త రాసిన లేఖ మాత్రమే అరమేయిలో ఉంది. కానీ మిగతా వచనాలన్నీ హెబ్రీ భాషలోనే ఉన్నాయి.
7:1-5 "యెహోవా సహాయం చేశాడు" అని అర్థమిచ్చే అజర్యా అనే సాధారణ హెబ్రీ పేరుకు సంక్షిప్త రూపమే ఎజ్రా, ఈ పేరుకు ముందు, తర్వాత వివిధ రకాలైన బిరుదులు ప్రస్తావించబడ్డాయి. "యాజకుడైన ఎజ్రా" (వ.12; 10:10,16; నెహెమ్యా 8:2 చూడండి), శాస్త్రియైన ఎజ్రా" (నెహెమ్యా 8:4,13; 12:36 చూడండి), "శాస్త్రియు-యాజకుడు అయిన ఎజ్రా" (ఎజ్రా 7:11; నెహెమ్యా 8:9), "దేవుని ధర్మశాస్త్రములో శాస్త్రియు యాజకుడునైన ఎజ్రా" (ఎజ్రా 7:21). ఎజ్రా యొక్క వంశావళి సంపూర్ణంగా ఇవ్వలేదు గాని అతని వంశంలో ముఖ్యమైనవారి పేర్లను మాత్రమే అతడు ప్రస్తావించాడు. 1దిన 6:3-15 తో దీన్ని పోల్చినప్పుడు ఇది అర్థమవుతుంది. అయితే ఎజ్రా వంశచరిత్ర ఖచ్చితమైందని చూపించడానికి ఇది సరిపోతుంది.
7:6 ఎజ్రా ఒక శాస్త్రి (హెబ్రీ. సోఫెర్). ఈ సందర్భంలో ఈ పదానికి అర్థాలు- రాయడం, చదవడం, గ్రంథాలను భద్రపరచడం అనే వాటికి మించి శాస్త్రి పని ఉండేది. ధర్మశాస్త్రంలో నిష్ణాతుడు, ధర్మశాస్త్రాన్ని చదివి, దానికి అర్ధం చెప్పగలిగేవాడు. ఇక్కడ, వ.11 లో కూడా ఉన్న పదాన్ని బట్టి ఎజ్రా ఒక పర్షియా ప్రభుత్వాధికారి అని కొందరు పండితులు అర్థం చేసుకుంటున్నారు. అయితే యూదు సమాజంలో ధర్మశాస్త్ర బోధకునిగా, దానికి వివరణ ఇచ్చేవానిగా అతని పాత్రను ఈ పేరు కచ్చితంగా ప్రస్తావిస్తుంది.
7:7 ఎనిమిది సంవత్సరాల క్రితం జెరుబ్బాబెలు, యేషూవల నాయకత్వంలో తిరిగి వచ్చిన వారి జాబితా (2:2-53) రాసి ఉన్న క్రమంలోనే ఎజ్రాతో తిరిగి వచ్చిన వారి పేర్ల జాబితా కూడా రాసి ఉంది.
7:8-9 ఎజ్రా యెరూషలేముకు ప్రయాణం బహుశా క్రీ.పూ. 458 ఏప్రిల్ 8 తేదీన ప్రారంభించి ఉంటాడు. లేవీయులు ఎవ్వరూ తమతో లేరని గుర్తించగానే ప్రయాణం ఆలస్యమైందని 8:15-31 చెబుతుంది. దగ్గర దారిలో వెళ్తే ఇది 500 మైళ్ల దూరం ప్రయాణం ... అయితే వేసవిలో ఈ ఎడారి ప్రయాణం జరిగి ఉండదు. మరి ముఖ్యంగా రాజకీయ అల్లరులు జరుగుతున్న సమయంలో ప్రయాణాలు మరింత ప్రమాదకరం. అందువల్ల అత్యంత సాధారణమైన అనువైన మార్గం సుమారు 900 మైళ్లు ఉంటుంది. సుమారు 14 వారాల యాత్ర తర్వాత ఆగస్టు 4వ తేదీ, క్రీ.పూ... 458 లో వారు యెరూషలేముకు చేరుకుని ఉంటారు.
7:10 యెహోవా ధర్మశాస్త్రమును పరిశోధించి దాని చొప్పున నడుచుకొనుట కును దానిని ఇశ్రాయేలీయులకు నేర్పుటకును ఎజ్రా తీసుకొన్న తీర్మానంలో అతని గొప్పతనం కనబడుతుంది.
7:11-28 రాజైన అర్తహషస్త రాసిన లేఖతో ఎజ్రా యెరూషలేముకు వచ్చాడు. తనతోపాటు యెరూషలేముకు వెళ్లాలనుకునే వారికి అనుమతీ అధికారమూ ఆ లేఖలో ఉన్నాయి (వ.13). ఈ లేఖ కల్పితమని గతంలో కొద్దిమంది పండితులు దానిని తోసిపుచ్చారు (వ.12-26). అయితే ఇప్పుడు చాలామంది దాని యథార్థతను గుర్తిస్తున్నారు. ఈ లేఖ అరమేయిలో రాయబడింది. (4:8). నాటి కాలంలో ఇది అత్యంత సాధారణం. పర్షియా పాలనాయుగంలో ఇది అత్యంత సహజమైన శైలిలో రాయబడింది. ఎజ్రాయే ఈ లేఖ రాసి, దానిని అర్తహషస్త రాజు ఆమోదం కోసం. అతని ముందు ఉంచి ఉంటాడు.
7:11 అరమేయిలో అర్తహషస్త రాసిన తాకీదుకు (వ. 12-26) హెబ్రీ భాషలో రాసిన ఈ వచనం పరిచయంగా ఉంది.
7:12 (రాజులకు) రాజైన అనే సాధారణమైన పర్షియా రాజుల బిరుదునే అర్తహషస్త ఉపయోగించుకున్నాడు, కొ.ని.లో ఈ బిరుదు దేవుణ్ణి గురించి తెలియచేయడానికి ఉపయోగించబడింది (1తిమోతి 6:15; ప్రక 19:16). ఇక్కడ ధర్మశాస్త్రము అనేది సాధారణ హెబ్రీ పదమైన "టోరా" కాదు కానీ దాత అనే పర్షియా మూలం నుంచి అరువు తెచ్చుకున్న పదం దాత్. చెర తర్వాతి కాలంలో ఇది హెబ్రీ, అరామిక్ భాషల్లో కనబడింది.
7:13-14 పర్షియా రాజులు నమ్మదగిన ఏడుగురు మంత్రుల్ని కలిగి ఉండేవారు అని గ్రీకు చరిత్రకారుడు హెరడోటస్ వర్ణించాడు. అర్తహషస్త ఏడుగురు నమ్మకమైన మంత్రుల పేర్లను ఎస్తేరు 1:13-14 తెలియచేస్తుంది. వారికి రాజుతో వ్యక్తిగతమైన సంభాషణ జరిపే అవకాశముందని ఈ వచనాలు వివరిస్తున్నాయి.
7:15-17 యెరూషలేము ప్రయాణానికి, అక్కడ బలి అర్పణలకు జంతువులను కొనడానికి అవసరమైన ధనం ఎజ్రాకి రాజు గారి ఖజానా నుండీ, బబులోను చెరలో ఉన్న యూదులు ఇచ్చిన బహుమానాల నుండీ ఇవ్వబడింది.
7:18 రాజు ఎజ్రాను పూర్తిగా నమ్మాడు. మీ దేవుని చిత్తానుసారముగా అనే మాట బహుశా మోషే ధర్మశాస్త్రాన్ని సూచిస్తుండవచ్చు.
7:19 ఇక్కడ రాజు ఉపకరణములు (అరమేయిక్. మాన్) ఏమిటో స్పష్టంగా లేదు. క్రీ.పూ. 586. లో దేవాలయం నుంచి నెబుకద్నెజరు చేత కొల్లపెట్టబడి, రాజైన కోరెషు చేత తిరిగి పంపించబడిన (1:7) బంగారు, వెండి వస్తువులను వర్ణించడానికి 5:14లో ఇదే పదం ఉపయోగించబడింది.
7:20 ఎజ్రాకు రాజు తన సంతకం పెట్టిన “ఖాళీ చెక్కును ఇచ్చినట్టు చేయడం అద్భుతమైన విషయం.
7:21-22 ఎజ్రాకు సమకూర్చబడిన వాటిని అనుదినమూ దేవాలయంలో బలి అర్పణల కోసం ఉపయోగించడం జరిగింది. ఇక్కడ పొందుపరచిన సరుకుల, వస్తువుల జాబితా సుమారు 2 సంవత్సరాలకు సరిపోతాయి. రెండువందల మణుగుల (3402 కిలోలు) వెండి ఇతర వస్తువుల కంటే మించి ఉంది. “నది యివతల" ప్రాంతానికి ఒక సంవత్సరానికి పన్ను మొత్తం 350 తలాంతులు (10500 కి.లో), శాస్త్రులు సంఖ్యల జాబితాను నకలు ప్రతులు రాస్తున్నప్పుడు పొరపాట్లు దొర్లడం సర్వసాధారణం. హేతుబద్ధత లేనంత వెండి మొత్తం ప్రస్తావనకు ఈ పొరపాటే కారణం. పది తలాంతుల వెండిని (340 కిలోలు) బహుమానంగా ఇవ్వడమే ఒక గొప్ప బహుమానంగా పరిగణించవచ్చు.
7:23 తన కోసమూ తన కుమారుల కోసమూ ప్రార్థన చేయమని యూదు ప్రజలను ఒకప్పుడు రాజైన దర్యావేషు అడిగాడు. (6:10). అనుదిన అర్పణలు, ఆరాధన సక్రమంగా జరగాలని ఇప్పుడు అర్తహషస్త రాజు ఆదేశించాడు.
7:24 దేవాలయాలకు అందులో పనిచేసే సిబ్బందికీ పన్ను మినహాయించడం అనేది పర్షియా సామ్రాజ్యపు - ఆచారం. దీనిని పర్షియా, గ్రీకు రచనలు ధృవీకరిస్తున్నాయి.
7:25 ఎజ్రాకు ఇక్కడ ఇచ్చిన బాధ్యత స్పష్టంగా లేదు. అతడు అధికారులను, న్యాయాధిపతులను నియమించాలి. వీరి పాత్ర క్రమమైన పర్షియా అధికారుల, న్యాయాధిపతుల విషయంలో ఎలా ఉంటుందో ఖచ్చితంగా తెలియదు. బహుశా ఈ అధికారులు, న్యాయాధిపతులు కేవలం పా.ని. ధర్మశాస్త్రానికి సంబంధించిన వివాదాలను మాత్రమే పరిష్కరించేవారేమో!
7:26 ధర్మశాస్త్రమును అనుసరించకుండా తిరస్కరించినవారికి పర్షియా సామ్రాజ్యంలో అమలయ్యే సాధారణ శిక్షలు విధించబడతాయి. ఖైదు చేయబడడం పా.ని. ధర్మశాస్త్రంలో ఆదేశించబడలేదు కానీ చెరకు ముందు ఇశ్రాయేలులో ఇది అమలుచేయబడింది.. ఉదా: ప్రవక్తయైన యిర్మీయా (యిర్మీయా 37-38).
7:27-28 అరమేయిలో రాయబడిన అధికారిక తాకీదు పూర్తయిన తర్వాత (వ. 12-26) గ్రంథకర్త తిరిగి హెబ్రీలో రాయడం కొనసాగించాడు. ఎజ్రా జ్ఞాపకాల్లో అతని మొదటి మాటలు ఇక్కడ, వ.27 లో మొదలవుతాయి (పరిచయంలో గ్రంథ నిర్మాణం" చూడండి).