45:1-8 సంఘటనలు నెరవేరడానికి కనీసం 140 సంవత్సరాలకు పూర్వం రాయబడిన ఈ విభాగంలో దేవుడు కోరెషుతో మాట్లాడుతున్నాడు, ఆయన కోరెషును తన ప్రతినిధిగా ఎలా ఉపయోగించుకోవాలను కుంటున్నాడో ప్రకటిస్తున్నాడు. కోరెషుకు తాను దేవుని ప్రతినిధిగా పనిచేస్తున్నాననే స్పృహ ఉండవచ్చేమో అనుకొనడం సైతం నమ్మశక్యం గాని విషయం. అషూరుకు బబులోనుకు కూడా అవి దేవుని ఉగ్రతను అమలు చేసే సాధనాలనే ఊహ సైతం ఉండి ఉండదు. వాస్తవానికి, వ.4 లోని చివరి పంక్తి దీన్నే తెలియజేస్తుంది.
45:1 దేవుడు కోరెషు గురించి తాను అభిషేకించిన కోరెషు అని చెబుతున్నాడు. ఇక్కడ దేవుడు అగోచరంగా ఒక భూరాజును తన ప్రతినిధిగా తన ప్రజల్ని విడిపించే విమోచకునిగా అభిషేకించడం (“మెస్సియ”) అలంకారిక వర్ణనలో కనబడుతుంది. ప్రాచీన పశ్చిమాసియా ప్రాంత భావనలో దేవుడు ఎవరి కుడిచేతినైనా పట్టుకొనడం విలక్షణమైన దైవానుగ్రహాన్ని, ప్రత్యేకమైన పనికి నియమించడాన్ని, దైవసంబంధమైన మార్గదర్శనాన్ని, నిపుణతను సూచిస్తుంది.
45:2 దేవుడు అన్యజనుల బలమైన దుర్గాలు కోరేషు ముందు కూలిపోయేలా చేస్తాడు. దేవుడు కోరెషు దాడిని శీఘ్రతరం చేయడానికి మెట్టగా ఉన్న స్థలములను చదును చేస్తాడు (40:3-6 తో పోల్చండి).
45:3 కోరెషు ఆయా జనాంగాలను (మాదీయులు, లూదీయులు, బబులోనీయులు) ఓడించినప్పుడు వారి నిధులు అతని సొత్తవుతాయి. ఇవి ఇప్పటివరకు లోకానికి కనబడనివి కాబట్టి వీటిని అంధకారస్థలములలో ఉంచబడిన నిధులని, రహస్యస్థలములలో దాచబడిన ధనమని చెప్పడం జరిగింది.
45:4 దేవుడు కోరెషు పట్ల జరిగించిన చర్యలకు, కోరెషు పట్ల గానీ పారసీకుల పట్ల గానీ ఆయనకున్న ప్రేమకు సంబంధం లేదు. ఆయన తన సేవకుడైన ఇశ్రాయేలు పక్షాన కోరెషు నుపయోగించుకుంటు న్నాడు (44:1 నోట్సు చూడండి). వాస్తవానికి దేవుడు కోరెషుకు పేరు పెట్టడం, అతడి నేర్పరచుకొనడం పారసీకరాజు దేవుని అధీనంలో ఉన్నాడనే వాస్తవాన్ని తెలియజేస్తుంది. దేవుడు యెషయా ద్వారా కోరెషు గురించి ముందుగానే ప్రకటించడం భవిష్యత్కాలాన్ని చూసే ఆయన సామర్థ్యాన్ని తెలియజేస్తుంది.
45:5-7 ఈ ఘనమైన విమోచనాకార్యాల్ని ఏకైక నిజదేవుడైన యెహోవాకు తప్ప వేరెవరికీ ఆపాదించలేరు. ఆయన ప్రభుత్వం ఇశ్రాయేలు మీద మాత్రమే కాక, సర్వలోకం (తూర్పుదిక్కు నుండి పడమటి దిక్కు వరకు) మీద కూడా ఉంది. మానవచరిత్రలోని మేలుకీడులన్నీ ఆయన అధీనంలోనే ఉన్నాయి.
45:8 ఈ వచనం అక్షరార్థంగా ఫలించడాన్ని మించి వర్ణిస్తుంది. దేవుడు ఆజ్ఞ ఇచ్చినప్పుడు భూమి నీతితో నిండి ఉంటుందని ఇది తెలియజేస్తుంది.
45:9-13 దేవుడు తన ఉద్దేశాల్ని నెరవేర్చుకోడానికి కోరెషువంటి అన్య జనాల్లోని రాజును వాడుకోవడం గురించి దేవునితో వాదించేవారికి ఈ వచనాల్లోని శ్రమ ప్రవచనం జవాబు చెబుతుంది.
45:9 శ్రమ ప్రవచనాల గురించి 1:4; 5:8-30 నోట్సు చూడండి. మనుషులు మంటికుండ వంటివారు, దేవుడు దాన్ని రూపించిన కుమ్మరి. ఈ సాదృశ్యం మనుషుల్ని దేవునితో సంబంధంలో సరైన స్థానంలో ఉంచుతుంది. ఇది ఆది 2:7 వచనాన్ని సూచిస్తుండవచ్చు, దేవుడు నేలమంటితో ఆదామును నిర్మించాడు. ప్రాచీన పశ్చిమాసియా పురాణాలైన అట్రహసిస్, ఎనుమా ఎలీష్ మనుషుల్ని మట్టిబొమ్మలుగా వర్ణించాయి. అయితే ఈ పౌరాణిక గాథలకు, బైబిల్లో దేవుడు నరుని సృష్టించడానికి సంబంధించిన వృత్తాంతానికి ముఖ్యమైన వ్యత్యాసం దేవుడు నరునిలోనికి తన జీవవాయువును ఊదడం. ఇది నరుని శ్రేష్టతను సూచిస్తుంది. మెసపోతమియా గాథల్లో ఇది ఉండకపోగా, నరునిలో రాక్షస దేవతల రక్తం ఉందనే వర్ణన కనబడుతుంది, ఇది నరుణ్ణి అత్యల్ప స్థాయిలో కనపరుస్తుంది.
45:10 దేవుడు నరులకు తండ్రి అనేది రెండవ సాదృశ్యం (తండ్రితో... స్త్రీతో), నరుడు సృష్టించబడిన విధానాన్ని శిశువుతో పోల్చడం కూడా నరునికి దేవునికి మధ్య ఉన్న సంబంధాన్ని సమతూకంలో తెలియజేయదు. కుండ తనను చేసిన కుమ్మరిని ప్రశ్నించడం అసాధ్యమైనట్టుగానే శిశువు తన జన్మ గురించి ప్రశ్నించడం అసాధ్యం. అదే విధంగా ఇశ్రాయేలు దేవుని ఉద్దేశాన్ని ప్రశ్నించడానికి అర్హత లేనిది.
45:11 ఇశ్రాయేలు పరిశుద్ధ దేవుడగు గురించి 1:4 నోట్సు చూడండి.
45:12 ఆకాశములను విశాలపరచెను గురించి 42:5 నోట్సు చూడండి.
45:13 దేవుని ఉద్దేశాల కోసం రేపబడినవాడు కోరెషు (రేపితిని).
45:14 ఐగుప్తు, కూషు (ఐతియోపియా - 18:1-7 నోట్సు చూడండి) నైలు లోయలో ఉన్న ప్రాంతాలు. సెబాయీయులు అరబీ తెగ. ఈ వచనం అన్యజనాంగాలు ఇశ్రాయేలు దేవుడే ఏకైక నిజదేవుడని గుర్తించే కాలాన్ని సూచిస్తుంది.
45:15 దేవుడు తనను తాను మరుగుపర్చుకొనడం గురించి వ.19 నోట్సు చూడండి.
45:16-17 విగ్రహములు నాశ్రయించువారి నమ్మిక సరైనదానిలో లేదు కాబట్టి వారు సిగ్గుపడతారు. యెహోవా నాశ్రయించు వారెన్నటికీ సిగ్గుపడరు.
45:18 దేవుడు భూమిని నిరాకారముగా ఉండడానికి సృష్టించలేదనే భావన ప్రాచీన పశ్చిమాసియా పురాణ కథనాన్ని విభేదిస్తుంది. ఈ కథనం దిగువ శ్రేణి దేవతలు కాలువలు త్రవ్వే పని ఆపివేసినప్పుడు ఆ పని కొనసాగించడానికి నరులు సృష్టించబడ్డారని వర్ణిస్తుంది.
45:19 దేవుడు తాను చేసిన సృష్టికంటె అధికుడు (వ.15) కాబట్టి ఆయన మరుగుగా ఉన్నా, ఆయన సృష్టితో తన సంబంధాన్ని కొనసాగిస్తున్నాడు, తనను తాను సృష్టి అంతటికీ వెల్లడి చేసుకుంటున్నాడు.
45:20 అన్యజనాంగాలు పారిపోయిన శరణార్థులనే వర్ణన (తప్పించుకొనిన వారలారా) గతంలో వారి మీదకు వచ్చిన తీర్పును సూచిస్తుండవచ్చు.
45:21 మీ ప్రమాణవాక్యములు నా సన్నిధిని తెలియజేయుడి అనే మాటలు న్యాయస్థానపు నేపథ్యాన్ని సూచిస్తున్నాయి. ఇక్కడ సమస్య భవిష్యత్తు గురించి తెలియజేయడంలో దేవుని శక్తి గురించినది.
45:23 పౌలు ఈ వచనాన్ని రోమా 14:11-12 లో ఉటంకించాడు.