36:1 యెహోయాహాజు. యోషీయా కుమారుడైన ఇతడు యూదాకు పదిహేడవ రాజు, యూదాదేశపు జనులు యెహోయాహాజును రాజుగా చేశారని వృత్తాంతకారుడు తెలియజేశాడు. ఫరో నెకో ఇతడిని పదవీచ్యుతుడిని చేసి చెరపట్టుకు పోయాడు. ఇతడు రాజుగా ఉండాలని ప్రజలు చేసుకున్న ఎంపికకు, నెకో తన ఇష్ట ప్రకారం మరొకరిని రాజుగా ఏర్పాటుచేయడానికి మధ్య మూడు నెలల సమయం గడచిందని ఇక్కడ జాగ్రత్తగా గమనించాలి..
36:2-3 కర్కెమీషు యుద్ధంలో (క్రీ.పూ 605) బబులోనీయులు గెలిచి అష్నూరు, ఐగుప్తు దేశాల ప్రాబల్యాన్ని తగ్గించారు. ఆ విధంగా నెకో యూదాదేశానికి తిరిగి వచ్చినప్పుడు, కొత్తగా అధికారంలోనికి వచ్చిన రాజువలన యోషీయా కలిగించిన విధంగా సమస్యలు కలగకూడదని అనుకున్నాడు. అందుకే యెహోయాహాజు మూడు నెలలు మాత్రమే పరిపాలించినా అతడిని అధికారం నుంచి - తొలగించి వేశాడు. తన పితరులు చేసిన విధంగానే దుష్టత్వం కొనసాగించడానికి యెహోయాహాజు ప్రయత్నించాడని 2రాజులు 23:32లో కనబడుతుంది. ఆ యూదాదేశం ఎక్కువకాలం నిలవడానికి , అతని చెరవలన ఎలాంటి ప్రయోజనం కలగకపోగా, నెకో అతనిని చెర తీసుకునిపోయి, అతని సహోదరుడైన ఎల్యాకీమును (2దిన 36:4; యిర్మీయా 22:10-12 పోల్చండి) రాజుగా చేయడం వలన దేశానికి ఎలాంటి నష్టము కలగలేదు.
36:4 యెహోయాకీము: యోషీయాకు. మరొక కుమారుడైన ఇతడు యూదాకు పద్దెనిమిదవ రాజు. ఫరో నెకో ఇతనిని రాజుగా చేశాడు. ఇతడు దుష్టత్వం జరిగించాడు. యూదాదేశానికి వెండి, బంగారం (వ.3) జుల్మానాగా విధించిన ఫరో నెకో ఎల్యాకీమును సింహాసనం ఎక్కించి, అతని పేరు యెహోయాకీముగా మార్చాడు. ఆ విధంగా తనకు కొత్త సామంతునిగా మారిన రాజు పేరు, సాధారణంగా దేవుని సూచించే (ఏల్) మాటకు సమానంగా ఉండకుండా, అతడు ఆరాధిస్తాడని భావించిన దేవుని పేరుతో (“యెహో అనే మాట, యెహోవాను సూచిస్తుంది) సమానంగా ఉండేలా చేశాడు. ఈ రెండింటికి “దేవుడు లేపును" అని అర్థం. దైవభయం లేని రాజుకు ఇది ఒక హాస్యాస్పదమైన పేరుగా కనబడుతుంది.
36:5-8 యెహోయాకీము చెడునడత గల దుష్టుడైన రాజు. ఇతడు విగ్రహారాధన జరిగించి, దేవునినుంచి యిర్మీయా ప్రవక్త ద్వారా తనకు వచ్చిన దేవుని వాక్కును తిరస్కరించాడు (యిర్మీయా 36:10-26). తత్ఫలితంగా నెబుకద్నెజరు క్రీ.పూ 605లో ఇతనిని బబులోను చెర పట్టుకుపోయాడు. అతనితో పాటు యెరూషలేములో ఉన్నత కుటుంబాలకు చెందిన అనేకమంది యవ్వనులను కూడా చెరపట్టుకుపోయాడు. మూడింటిలో మొదటిదైన ఈ చెరలో, దానియేలును, అతని స్నేహితులను బబులోనుకు చెరగొనిపోయారు (దాని 1:1-4).
36:9-10 యెహోయాకీను: యెహోయాకీము కుమారుడైన ఇతడు యూదాకు పందొమ్మిదవ రాజు, చివరినుంచి రెండవ రాజు. నెబుకద్నెజరు ఇతడిని పదవీచ్యుతుడిని చేసి చెరపట్టుకుపోయాడు. యెహోయాకీను కేవలం పదిరోజులు మాత్రమే యెహోయాహాజు కంటే అధికంగా (అంటే మూడు నెలల పది దినములు) సింహాసనంపై ఉన్నాడు. అయితే నెబుకద్నెజరును మరింత రెచ్చగొట్టడానికి అతనికి ఈ సమయం చాలును. ఇతనిమీద కోపోద్రిక్తుడైన బబులోను రాజు యెరూషలేము తిరిగివచ్చి ఇంకా అధికమైన సంపద దోచుకున్నాడు. క్రీ.పూ. 597లో మరొక గుంపును బబులోనుకు చెరపట్టుకుపోయాడు. అతడు చెరపట్టుకుపోవడం ఇది రెండవసారి. ఈసారి చెరపట్టుకుపోయిన వారిలో యెహెజ్కేలు ప్రవక్త కూడా ఉన్నాడు (యెహె 1:1). ఇతని తరవాత రాజైన సిద్కియాను ఇతని సహోదరుడని పేర్కొన్నారు. కానీ ఈ సందర్భంలో ఈ మాటను “బంధువు” అని అన్వయించాలి. సిద్కియా, యెహోయాహాజు, ఎల్యాకీము/యెహోయాకీములు యోషీయా కుమారులు (వ.1; యిర్మీయా 36:1; 37:1). యెహోయాకీను, యెహోయాకీము కుమారుడు. అందుచేత సిద్కియా యెహోయాకీను పినతండ్రి అవుతాడు.
36:11-14 సిద్కియా: యోషీయా కుమారుడును, యెహోయాకీనుకు పినతండ్రియునైన ఇతడు యూదాకు ఇరవైయవ, చివరి రాజు. ఇతడు నెబుకద్నెజరుకు లోబడకుండా తిరుగుబాటు చేసి, యెరూషలేము నాశనాన్ని కన్నులారా చూశాడు. నెబుకద్నెజరుపై తిరుగుబాటు చేసి తప్పించుకోవచ్చని అనుకున్నాడు, ఐగుప్తు తనకు సహాయం చేయడానికి వస్తుందని ఆశించి, పొరబడ్డాడు. యెరూషలేమును, దేశంలో మిగిలివున్న కొద్దిపాటి భక్తిని ఆధ్యాత్మిక దారిద్ర్యానికి నడిపించాడు. యాజకులను, లేవీయులను కూడా తప్పుడు ఆరాధనకు నడిపించాడు.
36:15-17 దేవుడు దయచూపించి యూదా ప్రజలు మారుమనస్సు పొందటానికి అనేక అవకాశాలు ఇచ్చిన తరవాత, చివరిగా యెరూషలేమును నాశనం చేసి ప్రజలను బబులోను తీసుకుపోడానికి నెబుకద్నెజరును పంపించాడు. రాజులు వ్యక్తిగతంగా మార్పు చెందినప్పుడు, దేవుడు పలుమార్లు వారిపట్ల కటాక్షము చూపించి తన కోపాన్ని నివారించుకున్నాడు (7:14; 30:20). అయితే దుష్టత్వంపై ఆయన ఉగ్రత చివరికి తారాస్థాయికి చేరింది. ఈ భాగం వృత్తాంతకారుడు కొన్ని ఉత్తరాది గోత్రాల విషయంలో చేసిన వ్యాఖ్యలను పోలివుంది (1దిన 5:25-26).
36:18-20 తిరుగుబాటు చేసిన యూదాదేశానికి నాలుగు శిక్షలు విధించబడ్డాయి. (1) దేవుని మందిరపు విలువైన ఉపకరణములు అన్నీ బబులోనుకు తీసుకుపోయారు. (2) దేవుని మందిరాన్ని, దాని నగరులు అన్నింటినీ కాల్చివేశారు. (3) యెరూషలేము ప్రాకారమును పడగొట్టారు. (4) అక్కడ మిగిలి వున్న ప్రజలను బబులోనుకు చెర తీసుకొనిపోయారు.
36:21 యూదా దుష్టత్వాన్ని బట్టి బబులోనీయులు యూదాను జయించి, దాని నివాసులను చెర తీసుకువెళతారనే ప్రవచనం యిర్మీయా గ్రంథంలో నమోదు చేయబడి వుంది (యిర్మీయా 25:8-12, 29:10).
36:22-23 ఈ వృత్తాంతం ఇంతటితో అయిపోలేదు. తరవాత కాలంలో పారసీక దేశపు రాజైన కోరెషు బబులోనీయులను జయించాడు. బబులోను, పర్షియా దేశాలలో ఉన్న అన్యదేవతలను వారివారి ప్రదేశాలకు వెనుకకు ఆ తీసుకు వెళ్ళాలని ఆదేశించాడు. వాటిని ఆరాధించే ప్రజలు తమ ప్రదేశాలకు వెళ్ళి తమ దేవతలకు కొత్త ఆలయాలు కట్టాలని ఆజ్ఞ ఇచ్చాడు. ఈ ఆజ్ఞ ఇవ్వడంలో కోరెషు దేవుని చేతిలో ఉపకరణంగా పనిచేశాడని యూదులు సరిగానే పరిగణించారు. యూదులను విడిచిపెట్టాలని క్రీ.పూ. 539లో కోరెషు ఆజ్ఞ ఇచ్చాడు. ఎజ్రా 1:1-4 కూడా చూడండి.