కీర్తన-17. భక్తిహీనులైన శత్రువులు తనపై దాడి చేసినప్పుడు దేవున్ని ఒక న్యాయాధిపతిగా సంబోధిస్తూ కీర్తనకారుడు చేసిన విన్నపం. యూదుల రాజుల ముందుకు ప్రజలు తీసుకువచ్చే వ్యాజ్యాల వంటి పోలికలు ఈ కీర్తనలో సమృద్ధిగా కనిపిస్తాయి.
17:1-2 హెబ్రీలోని పదాల్లో సూక్ష్మభేదమున్నప్పటికీ న్యాయము కోసం విజ్ఞప్తి చేయడమనే భావన 9:3 లో కూడా కనబడుతుంది. 9:3 లోని సందర్భంలో తన వ్యాజ్యాన్ని విన్నందుకు, తన ప్రార్థనకు జవాబిచ్చినందుకు కీర్తనకారుడు దేవుణ్ణి స్తుతిస్తున్నాడు. కపటమైన పెదవుల నుండి వచ్చునది కాదు అనే మాటలు కీర్తనకారుని నిర్దోషత్వాన్ని, సత్యసంధతను తెలియజేస్తున్నాయి. దేవుడు మోసాన్ని సహించడు (101:7). తీర్పు వచ్చును గాక... న్యాయముగా చూచును అనడంలో కీర్తనకారుడు న్యాయం కోసం చేసే విజ్ఞప్తి కనబడుతుంది. దేవుని దృష్టిలో ఏది న్యాయమో దాని ప్రకారమే జరగాలని కీర్తనకారుడు అడుగుతున్నాడు. తీర్పు, న్యాయం అనే న్యాయస్థానపు పరిభాష దేవుణ్ణి ఒక న్యాయాధిపతిగా సూచిస్తున్నాయి.
17:6 నీవు నాకుత్తరమిచ్చెదవు అంటూ దావీదు తన ప్రార్థనకు వచ్చే జవాబు విషయంలో నిశ్చయత కనపరుస్తున్నాడు. ఎందుకంటే అతని వ్యాజ్యెంలో న్యాయం ఉండడమే గాక (వ.1), అతడు దేవుని కృప కోసం వేడుకొంటున్నాడు (వ.8-9).
17:7-9 నిర్గమంనాటి సంఘటనల్ని ఇశ్రాయేలీయుల విమోచనలో దేవుని ఆశ్చర్యకార్యాల్ని వర్ణించే మోషే కీర్తనలో కూడా కుడిచేత... కృపాతిశయములను చూపుము అనే వర్ణన కనబడుతుంది. (నిర్గమ 15:11-13). కృపాతిశయాల్ని చూపడమంటే ఆశ్చర్యకార్యాల్ని చేయడమని అర్ధం (9:1 నోట్సు చూడండి), ఇవి సాధారణంగా దేవుని సృష్టిలోని అద్భుతఘటనలు కావచ్చు, లేదా అవసర సమయంలో కీర్తనకారునికి అందిన దైవసహాయం కావచ్చు. కనుపాపను... రెక్కల నీడను అనే రెండూ కాపుదలకు సాదృశ్యంగా ఉన్నాయి. “కనుపాపను” జాగ్రత్తగా పరిరక్షించుకోవడం జరుగుతుంది. (ద్వితీ 32:10; సామె 7:2). “రెక్కల నీడను" అనే సాదృశ్యం తల్లి పక్షి తన పిల్లల్ని రెక్కల చాటున కాపాడుకున్నట్టు దేవుడు తన ప్రజల్ని కాపాడతాడని తెలియజేస్తున్నది (36:7; 57:1). దావీదు తన ప్రాణాన్ని తీయాలనుకున్న వారిని నా ప్రాణ శత్రువులని పిలిచాడు.
17:10-12 వారు తమ హృదయములను కఠినపరచుకొని యున్నారు అనే మాటలకు హెబ్రీలో “వారు తమ క్రొవ్వుతో హృదయములను మూసికొన్నారు” అని అక్షరార్థం. క్రొవ్వు ధనధాన్య సమృద్ధిని సూచిస్తుంది, అయితే ఈ సమృద్ధి వీరిని జాలిలేని కఠినహృదయులుగా, అవిధేయులుగా చేసింది (73:7; ద్వితీ 32:15; యిర్మీయా 5:28). ఈ వచనాల్లోని భావం కీర్తనకారుని శత్రువులు దేవుని పట్ల కఠినస్వభావాన్ని చూపడంతోబాటు, జాలిలేకుండా భక్తిపరుడైన కీర్తనకారుని చుట్టుముట్టి అతని మీద దాడి చేయాలనుకుంటున్నారు (వ.11; వ.8-9). సింహమువలెను కోసం 7:1-2 నోట్సు చూడండి.