Acts - అపొ. కార్యములు 10 | View All

1. ఇటలీ పటాలమనబడిన పటాలములో శతాధిపతి యైన కొర్నేలీ అను భక్తిపరుడొకడు కైసరయలో ఉండెను.

2. అతడు తన యింటి వారందరితోకూడ దేవుని యందు భయభక్తులు గలవాడైయుండి, ప్రజలకు బహు ధర్మము చేయుచు ఎల్లప్పుడును దేవునికి ప్రార్థన చేయు వాడు.

3. పగలు ఇంచుమించు మూడు గంటలవేళ దేవుని దూత అతనియొద్దకు వచ్చి కొర్నేలీ, అని పిలుచుట దర్శనమందు తేటగా అతనికి కనబడెను.

4. అతడు దూత వైపు తేరి చూచి భయపడి ప్రభువా, యేమని అడిగెను. అందుకు దూతనీ ప్రార్థనలును నీ ధర్మకార్యములును దేవుని సన్నిధికి జ్ఞాపకార్థముగా చేరినవి.

5. ఇప్పుడు నీవు యొప్పేకు మనుష్యులను పంపి, పేతురు అను మారు పేరుగల సీమోనును పిలిపించుము;

6. అతడు సముద్రపు దరినున్న సీమోనను ఒక చర్మకారుని యింట దిగియున్నాడని అతనితో చెప్పెను.

7. అతనితో మాటలాడిన దూతవెళ్లిన పిమ్మట అతడు తన యింటి పనివారిలో ఇద్దరిని,తన యొద్ద ఎల్లప్పుడు కనిపెట్టుకొని యుండువారిలో భక్తి పరుడగు ఒక సైనికుని పిలిచి

8. వారికి ఈసంగతులన్నియు వివరించి వారిని యొప్పేకు పంపెను.

9. మరునాడు వారు ప్రయాణమైపోయి పట్టణమునకు సమీపించినప్పుడు పగలు ఇంచుమించు పండ్రెండు గంటలకు పేతురు ప్రార్థనచేయుటకు మిద్దెమీది కెక్కెను.

10. అతడు మిక్కిలి ఆకలిగొని భోజనము చేయగోరెను; ఇంటివారు సిద్ధము చేయుచుండగా అతడు పరవశుడై

11. ఆకాశము తెరవబడుటయు, నాలుగు చెంగులు పట్టి దింపబడిన పెద్ద దుప్పటివంటి యొకవిధమైన పాత్ర భూమిమీదికి దిగివచ్చుటయు చూచెను.

12. అందులో భూమి యందుండు సకల విధములైన చతుష్పాద జంతువులును, ప్రాకు పురుగులును, ఆకాశపక్షులును ఉండెను.

13. అప్పుడు పేతురూ, నీవు లేచి చంపుకొని తినుమని ఒక శబ్దమతనికి వినబడెను.

14. అయితే పేతురువద్దు ప్రభువా, నిషిద్ధమైనది అపవిత్ర మైనది ఏదైనను నేనెన్నడును తినలేదని చెప్పగా
లేవీయకాండము 11:1-47, యెహెఙ్కేలు 4:14

15. దేవుడు పవిత్రము చేసినవాటిని నీవు నిషిద్ధమైన వాటినిగా ఎంచవద్దని మరల రెండవ మారు ఆ శబ్దము అతనికి వినబడెను.

16. ఈలాగు ముమ్మారు జరిగెను. వెంటనే ఆ పాత్ర ఆకాశమున కెత్తబడెను.

17. పేతురు తనకు కలిగిన దర్శనమేమై యుండునో అని తనలో తనకు ఎటుతోచక యుండగా, కొర్నేలి పంపిన మనుష్యులు సీమోను ఇల్లు ఏదని విచారించి తెలిసికొని, వాకిట నిలిచి యింటివారిని పిలిచి

18. పేతురు అను మారుపేరుగల సీమోను ఇక్కడ దిగియున్నాడా? అని అడిగిరి

19. పేతురు ఆ దర్శనమునుగూర్చి యోచించుచుండగా ఆత్మ ఇదిగో ముగ్గురు మనుష్యులు నిన్ను వెదకు చున్నారు.

20. నీవు లేచి క్రిందికిదిగి, సందేహింపక వారితో కూడ వెళ్లుము; నేను వారిని పంపియున్నానని అతనితో చెప్పెను.

21. పేతురు ఆ మనుష్యులయొద్దకు దిగి వచ్చిఇదిగో మీరు వెదకువాడను నేనే; మీరు వచ్చిన కారణ మేమని అడిగెను.

22. అందుకు వారునీతిమంతుడును, దేవునికి భయపడువాడును, యూద జనులందరివలన మంచిపేరు పొందినవాడునైన శతాధిపతియగు కొర్నేలియను ఒక మనుష్యుడున్నాడు; అతడు నిన్ను తన యింటికి పిలువనంపించి నీవు చెప్పు మాటలు వినవలెనని పరిశుద్ధదూత వలన బోధింపబడెనని చెప్పిరి; అప్పుడు అతడు వారిని లోపలికి పిలిచి ఆతిథ్యమిచ్చెను.

23. మరునాడు అతడు లేచి, వారితోకూడ బయలుదేరెను; యొప్పేవారైన కొందరు సహోదరులును వారితోకూడ వెళ్లిరి.

24. మరునాడు వారు కైసరయలో ప్రవేశించిరి. అప్పుడు కొర్నేలి తన బంధువులను ముఖ్య స్నేహితులను పిలిపించి వారికొరకు కనిపెట్టుకొని యుండెను.

25. పేతురు లోపలికి రాగా కొర్నేలి అతనిని ఎదుర్కొని అతని పాద ములమీద పడి నమస్కారము చేసెను.

26. అందుకు పేతురునీవు లేచి నిలువుము, నేనుకూడ నరుడనే అని చెప్పి అతని లేవనెత్తి

27. అతనితో మాటలాడుచు లోపలికి వచ్చి, అనేకులు కూడియుండుట చూచెను.

28. అప్పుడతడు అన్యజాతివానితో సహవాసము చేయుటయైనను, అట్టివానిని ముట్టుకొనుటయైనను యూదునికి ధర్మముకాదని మీకు తెలియును. అయితే ఏ మనుష్యుడును నిషేధింప దగినవాడనియైన అపవిత్రుడనియైనను చెప్పకూడదని దేవుడు నాకు చూపించియున్నాడు.

29. కాబట్టి నన్ను పిలిచినప్పుడు అడ్డమేమియు చెప్పక వచ్చితిని గనుక, ఎందునిమిత్తము నన్ను పిలువ నంపితిరో దానినిగూర్చి అడుగు చున్నానని వారితో చెప్పెను.

30. అందుకు కొర్నేలి నాలుగు దినముల క్రిందట పగలు మూడుగంటలు మొదలు కొని యీ వేళవరకు నేను ఇంట ప్రార్థన చేయుచుండగా ప్రకాశమానమైన వస్త్రములు ధరించిన వాడొకడు యెదుట నిలిచి

31. కొర్నేలీ, నీ ప్రార్థన వినబడెను; నీ ధర్మకార్యములు దేవుని సముఖమందు జ్ఞాపకముంచబడి యున్నవి గనుక నీవు యొప్పేకు వర్తమానము పంపి

32. పేతురు అను మారుపేరుగల సీమోనును పిలిపించుము; అతడు సముద్రపు దరినున్న చర్మకారుడైన సీమోను ఇంట దిగియున్నాడని నాతో చెప్పెను.

33. వెంటనే నిన్ను పిలిపించితిని; నీవు వచ్చినది మంచిది. ప్రభువు నీకు ఆజ్ఞా పించినవన్నియు వినుటకై యిప్పుడు మేమందరము దేవుని యెదుట ఇక్కడ కూడియున్నా మని చెప్పెను. అందుకు పేతురు నోరుతెరచి ఇట్లనెను

34. దేవుడు పక్షపాతి కాడని నిజముగా గ్రహించి యున్నాను.
ద్వితీయోపదేశకాండము 10:17, 2 దినవృత్తాంతములు 19:7

35. ప్రతి జనములోను ఆయనకు భయపడి నీతిగా నడుచుకొనువానిని ఆయన అంగీకరించును.
కీర్తనల గ్రంథము 65:2

36. యేసుక్రీస్తు అందరికి ప్రభువు. ఆయనద్వారా దేవుడు సమాధానకరమైన సువార్తను ప్రకటించి ఇశ్రాయేలీయులకు పంపిన వర్తమానము మీరెరుగు దురు.
కీర్తనల గ్రంథము 107:20, కీర్తనల గ్రంథము 145:18, కీర్తనల గ్రంథము 147:18, యెషయా 52:7, నహూము 1:15

37. యోహాను బాప్తిస్మము ప్రకటించిన తరువాత గలిలయమొదలు కొని యూదయ యందంతట ప్రసిద్ధమైన సంగతి మీకు తెలియును

38. అదేదనగా దేవుడు నజరేయుడైన యేసును పరిశుద్ధాత్మతోను శక్తితోను అభిషేకించెనను నదియే. దేవుడాయనకు తోడైయుండెను గనుక ఆయన మేలు చేయుచు, అపవాదిచేత పీడింపబడిన వారినందరిని స్వస్థపరచుచు సంచరించుచుండెను.
యెషయా 61:1

39. ఆయన యూదుల దేశమందును యెరూషలేమునందును చేసినవాటికన్నిటికిని మేము సాక్షులము. ఆయనను వారు మ్రానున వ్రేలాడదీసి చంపిరి.
ద్వితీయోపదేశకాండము 21:22-23

40. దేవుడాయనను మూడవ దినమున లేపి

41. ప్రజలకందరికి కాక దేవునిచేత ముందుగా ఏర్పరచబడిన సాక్షులకే, అనగా ఆయన మృతులలోనుండి లేచిన తరువాత ఆయనతో కూడ అన్నపానములు పుచ్చుకొనిన మాకే, ఆయన ప్రత్యక్షముగా కనబడునట్లు అనుగ్రహించెను.

42. ఇదియుగాక దేవుడు సజీవులకును మృతులకును న్యాయాధి పతినిగా నియమించిన వాడు ఈయనే అని ప్రజలకు ప్రకటించి దృఢసాక్ష్యమియ్యవలెనని మాకు ఆజ్ఞాపించెను.
కీర్తనల గ్రంథము 72:2-4

43. ఆయనయందు విశ్వాసముంచువాడెవడో వాడు ఆయన నామము మూలముగా పాపక్షమాపణ పొందునని ప్రవక్త లందరు ఆయననుగూర్చి సాక్ష్య మిచ్చుచున్నారనెను.
యెషయా 33:24, యెషయా 53:5-6, యిర్మియా 31:34, దానియేలు 9:24

44. పేతురు ఈ మాటలు ఇంక చెప్పుచుండగా అతని బోధ విన్నవారందరిమీదికి పరిశుద్ధాత్మ దిగెను.

45. సున్నతి పొందినవారిలో పేతురుతోకూడ వచ్చిన విశ్వాసులందరు, పరిశుద్ధాత్మ వరము అన్యజనులమీద సయితము కుమ్మరింప బడుట చూచి విభ్రాంతినొందిరి.

46. ఏలయనగా వారు భాషలతో మాటలాడుచు దేవుని ఘనపరచుచుండగా వినిరి.

47. అందుకు పేతురు మనవలె పరిశుద్ధాత్మను పొందిన వీరు బాప్తిస్మము పొందకుండ ఎవడైనను నీళ్ళకు ఆటంకము చేయగలడా అని చెప్పి

48. యేసు క్రీస్తు నామమందు వారు బాప్తిస్మము పొందవలెనని ఆజ్ఞాపించెను. తరువాత కొన్ని దినములు తమయొద్ద ఉండుమని వారతని వేడుకొనిరి.



బైబిల్ అధ్యయనం - Study Bible
10:1 ఫిలిప్పు కైసరయలో సువార్త ప్రకటించాడు (8:40), కాబట్టి కొర్నేలీ ఇంటిలో ఈ సంఘటనకు ముందే క్రైస్తవ్యాన్ని గురించిన అవగాహన అక్కడ ఉండివుండవచ్చు. శతాధిపతులు రోమా సైన్యంలో ముఖ్యమైన వారు. ఎందుకంటే వారు సైనికులను నడిపించే సామర్థ్యం విషయంలో ప్రత్యేకమైనవారు. ఇటలీ పటాలము అనేది, అసలు గుంపులో ఇటలీ సైనికులు ఉండి వుండే అవకాశం ఉన్నప్పటికీ, బహుశా స్థానిక సైనికులతో (ఇటలీవారు, రోమీయులు కాకుండా) కూడిన దండు కావచ్చు. స్థానిక ప్రజలను తరచు దోచుకోవడం, అణచివేయడంలో రోమా సైనికులు పాల్గొనడం బట్టి ప్రజలలో వారికి మంచి పేరు లేదు. 

10:2 దైవభీతి గలవారు యూదుల నమ్మకాలను ఆచారాలను గౌరవించేవారు (ఆహార నియమాలు, ప్రత్యేకమైన రోజులతో సహా). వారు తరచు యూదులతో సాంగత్యం చేసేవారు కానీ వారు పూర్తిస్థాయిలో మతం మార్చుకునేవారు కాదు. ఎందుకంటే వారు యూదా మతంలోనికి మారితే యూదుల ఇతర ఆచారాలను పాటించడంతో పాటు సున్నతి పొందాల్సివచ్చేది.

10:3-4 బైబిల్ వృత్తాంతాలలో, దేవుని స్వరం లేక ప్రత్యక్షతకు భయపడడం, గాభరాపడడం అనేది సామాన్యమైన స్పందన (9:4). కొర్నేలీ ప్రార్థనలును, ధర్మకార్యములును అతనికి పేతురు ద్వారా మరింతగా దైవిక ప్రత్యక్షత కలగడానికి దోహదపడ్డాయి (వ.5-6). 

10:5-8 దీనిని కొర్నేలీ చాలా ముఖ్యమైన పనిగా భావించి వుంటాడు, ఎందుకంటే అతడు తాను బాగా నమ్మిన సేవకులను పేతురు కోసం పంపాడు. 

10:9-10 ఈలోగా, పేతురు ఇంకా యెప్పేలోనే ఉన్నాడు. మిద్దెమీద ప్రార్ధన చేయడం చాలా సాధారణ విషయం. పగలు ఇంచుమించు పండ్రెండు గంటలకు (అంటే మధ్యాహ్నం), పేతురు మంచి ఎండలో ఉన్నాడు. కానీ పేతురు, కొర్నేలీ జీవితాలను అనుసంధానించే సంఘటనల క్రమాన్ని బట్టి, పేతురు పరవశుడు కావడం అనేది కేవలం ఆకలి వల్ల కలిగిన సహజమైన అనుభవం కంటే మించినది. అది దేవుని నుండి పంపబడిన సందేశం. 

10:11-16. అపవిత్రమైన జంతువులను చంపుకొని తినుమని దేవుడు ఆజ్ఞాపించడం, పేతురు జీవితకాలం హత్తుకొని ఆచరించిన యూదుల ఆహార నియమాలకు విరుద్ధం (లేవీ 11). ఈ దర్శనం పేతురుకు మూడుసార్లు వచ్చింది. ఇన్నిసార్లు రావడం నివ్వెరపరచే ఈ సందేశాన్ని స్థిరపరచడానికి, దాని ప్రాముఖ్యతను నొక్కి చెప్పడానికి పనికొచ్చింది.

10:17 కోర్నేలితో దేవదూత మాట్లాడాడు,దేవుడు పేతురుకు దర్శనం అనుగ్రహించిన తర్వాత, ఆత్మ అతనితో మాట్లాడాడు. ఇలా పరిశుద్దాత్మ, దేవదూతలు ప్రతినిధులుగా మాట్లాడడం మరొకచోట కూడా జరిగింది (8:26,29) 

10:22-28 పేతురు వారికి ఆతిథ్యమివ్వడం అనేది, తాను పొందిన దర్శనాన్ని అతడు అర్థం చేసుకోవడం ఆరంభించాడని తెల్పుతుంది. 

10:24. ఒక వ్యక్తి జీవితంలో దేవుడు శక్తివంతమైన కార్యం చేసినప్పుడు, తరుచూ కలిగే సాధారణ స్పందన, బంధువులను, ముఖ్య స్నేహితులను పిలిపించి, వారితో తమ అనుభవాన్ని పంచుకోవడంగా ఉంటుంది. ఈ సందర్భంలో పేతురు అందించిన జీవితాన్ని మార్చే నిరీక్షణ సందేశ ప్రభావం అనేక రెట్లు అధికం కావడానికి అది సహాయపడింది. 

10:25-26 కొర్నేలీ పేతురును కలిసినప్పుడు, అతడు పేతురు పాదములమీద పడి నమస్కారము చేసెను. తాను కూడా నరుడనే అని చెప్పి పేతురు దానిని వ్యతిరేకించాడు. అపొస్తలులు ఎల్లప్పుడూ దేవుని మహిమపరచడానికే చూశారు గాని తమను తాము గొప్ప చేసుకోలేదు.

10:27-28 దేవుడు పేతురుకు చూపిన దర్శనం యూదులు అన్యజనులతో సహవాసం చేయడాన్ని నిషేధించే పవిత్రతకు సంబంధించిన ప్రమాణాలు రద్దయిపోయాయని అతనికి నేర్పింది. పేతురు దృక్పథంలో పెను ప్రకంపనలు తెచ్చిన ఈ మార్పును అతిగా అంచనా వేయడం కష్టం. 

10:29-32. కొర్నేలీ దర్శనం మరలా చెప్పడం ఇది మూడవసారి. తానెందుకు అక్కడికి వచ్చాడో పేతురుకు తెలియకపోవచ్చు, కానీ అతడు సరైన చోటనే ఉన్నాడని అతనికి నిశ్చయంగా తెలుసు. 

10:33 దేవుడు పేతురుకు ఆజ్ఞాపించినది వినుటకై లేక చేయడానికై వారందరూ దేవునియెదుట కూడుకున్నారు అని చెప్పడం ద్వారా కొర్నేలీ, యేసు తన శిష్యుల నుండి కోరిన (లూకా 18:15-17) చిన్నబిడ్డలవంటి నిష్కాపట్యతను చూపాడు. 

10:34-35 దర్శనాన్ని బట్టి, దేవుడు పక్షపాతి కాడని పేతురు ఇప్పుడు అర్థం చేసుకున్నాడు (రోమా 2:11-12; గలతీ 2:6). అంటే ప్రజలు తన పట్ల ఎలా స్పందించినా దేవుడు అందర్నీ స్వీకరిస్తాడని లేక తనకు భయపడేవారు క్రీస్తును కలిగి లేకపోయినా ఆయన అంగీకరిస్తాడని కాదు. అలా కాకుండా, దేవుడు ఏ దేశం లేక జాతివారైనా రక్షణ ఆశీర్వాదాన్ని పొందకుండా నిషేధించడని దాని భావం.

10:36 దేవుడు సువార్తను మొదట యూదుల యొద్దకు పంపినా, ఆయన అందరికి ప్రభువు, అంటే సువార్త అందరికీ ఉద్దేశించబడింది అని సూచిస్తుంది.

10:37-41 మీకు తెలియును అనే మాటలు, అప్పటికి యేసు జీవితానికి సంబంధించిన ప్రాథమిక చరిత్ర విస్తృతంగా తెలుసని సూచిస్తున్నాయి. అయినప్పటికీ యేసు జీవితాన్ని గురించిన సాక్షులు వచ్చి, తెలియని విషయాలను తెలియజేసి, అవిశ్వాసులను రక్షణ విశ్వాసంలోనికి పిలవాల్సిన అవసరత ఇంకా ఉంది. 

10:42-43 మనుషులందరికీ తీర్పు తీర్చుటకు దేవుడు... న్యాయాధిపతినిగా నియమించిన వాడు తానే అని యేసు తన శిష్యులకు స్వయంగా చెప్పాడు. ఈ విషయాన్ని సమర్థించడానికి ప్రవక్తలందరి సాక్ష్యాలున్నాయి (లూకా 24:44). 

10:44-46 క్రమంలో మార్పు ఉన్నప్పటికీ విశ్వాసం, పరిశుద్దాత్మకుమ్మరింప బడడం, విశ్వాసుల బాప్తిస్మం మారుమనస్సులోని అంశాలే. మారుమనస్సు పొందిన అన్యజనులు, పెంతెకొస్తు దినాన యూదులైన విశ్వాసులు మాట్లాడినట్లే (2:4-11) అన్యభాషలలో మాట్లాడి, దేవుని ఘనపరచుచుండగా, పేతురుతో కూడ వచ్చిన సున్నతి పొందిన విశ్వాసులందరు... విభ్రాంతినొందిరి. 

10:47-48 కొత్తగా విశ్వాసంతో స్పందించినవారికి వెంటనే బాప్తిస్మం ఇవ్వడం ఇక్కడ మరొకసారి చూస్తాం (8:36-39). 


Shortcut Links
అపో. కార్యములు - Acts : 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 |
ఆదికాండము - Genesis | నిర్గమకాండము - Exodus | లేవీయకాండము - Leviticus | సంఖ్యాకాండము - Numbers | ద్వితీయోపదేశకాండము - Deuteronomy | యెహోషువ - Joshua | న్యాయాధిపతులు - Judges | రూతు - Ruth | 1 సమూయేలు - 1 Samuel | 2 సమూయేలు - 2 Samuel | 1 రాజులు - 1 Kings | 2 రాజులు - 2 Kings | 1 దినవృత్తాంతములు - 1 Chronicles | 2 దినవృత్తాంతములు - 2 Chronicles | ఎజ్రా - Ezra | నెహెమ్యా - Nehemiah | ఎస్తేరు - Esther | యోబు - Job | కీర్తనల గ్రంథము - Psalms | సామెతలు - Proverbs | ప్రసంగి - Ecclesiastes | పరమగీతము - Song of Solomon | యెషయా - Isaiah | యిర్మియా - Jeremiah | విలాపవాక్యములు - Lamentations | యెహెఙ్కేలు - Ezekiel | దానియేలు - Daniel | హోషేయ - Hosea | యోవేలు - Joel | ఆమోసు - Amos | ఓబద్యా - Obadiah | యోనా - Jonah | మీకా - Micah | నహూము - Nahum | హబక్కూకు - Habakkuk | జెఫన్యా - Zephaniah | హగ్గయి - Haggai | జెకర్యా - Zechariah | మలాకీ - Malachi | మత్తయి - Matthew | మార్కు - Mark | లూకా - Luke | యోహాను - John | అపో. కార్యములు - Acts | రోమీయులకు - Romans | 1 కోరింథీయులకు - 1 Corinthians | 2 కోరింథీయులకు - 2 Corinthians | గలతియులకు - Galatians | ఎఫెసీయులకు - Ephesians | ఫిలిప్పీయులకు - Philippians | కొలొస్సయులకు - Colossians | 1 థెస్సలొనీకయులకు - 1 Thessalonians | 2 థెస్సలొనీకయులకు - 2 Thessalonians | 1 తిమోతికి - 1 Timothy | 2 తిమోతికి - 2 Timothy | తీతుకు - Titus | ఫిలేమోనుకు - Philemon | హెబ్రీయులకు - Hebrews | యాకోబు - James | 1 పేతురు - 1 Peter | 2 పేతురు - 2 Peter | 1 యోహాను - 1 John | 2 యోహాను - 2 John | 3 యోహాను - 3 John | యూదా - Judah | ప్రకటన గ్రంథం - Revelation |

Explore Parallel Bibles
21st Century KJV | A Conservative Version | American King James Version (1999) | American Standard Version (1901) | Amplified Bible (1965) | Apostles' Bible Complete (2004) | Bengali Bible | Bible in Basic English (1964) | Bishop's Bible | Complementary English Version (1995) | Coverdale Bible (1535) | Easy to Read Revised Version (2005) | English Jubilee 2000 Bible (2000) | English Lo Parishuddha Grandham | English Standard Version (2001) | Geneva Bible (1599) | Hebrew Names Version | Hindi Bible | Holman Christian Standard Bible (2004) | Holy Bible Revised Version (1885) | Kannada Bible | King James Version (1769) | Literal Translation of Holy Bible (2000) | Malayalam Bible | Modern King James Version (1962) | New American Bible | New American Standard Bible (1995) | New Century Version (1991) | New English Translation (2005) | New International Reader's Version (1998) | New International Version (1984) (US) | New International Version (UK) | New King James Version (1982) | New Life Version (1969) | New Living Translation (1996) | New Revised Standard Version (1989) | Restored Name KJV | Revised Standard Version (1952) | Revised Version (1881-1885) | Revised Webster Update (1995) | Rotherhams Emphasized Bible (1902) | Tamil Bible | Telugu Bible (BSI) | Telugu Bible (WBTC) | The Complete Jewish Bible (1998) | The Darby Bible (1890) | The Douay-Rheims American Bible (1899) | The Message Bible (2002) | The New Jerusalem Bible | The Webster Bible (1833) | Third Millennium Bible (1998) | Today's English Version (Good News Bible) (1992) | Today's New International Version (2005) | Tyndale Bible (1534) | Tyndale-Rogers-Coverdale-Cranmer Bible (1537) | Updated Bible (2006) | Voice In Wilderness (2006) | World English Bible | Wycliffe Bible (1395) | Young's Literal Translation (1898) | Telugu Bible Verse by Verse Explanation | పరిశుద్ధ గ్రంథ వివరణ | Telugu Bible Commentary |