1. యోనా దీనిచూచి బహు చింతాక్రాంతుడై కోపగించుకొని

“కోపంతో”– ఇంత గొప్ప ఫలితం చూశాక చరిత్రలో ఏ బోధకుడు ఇలా మండిపడ్డాడు? యోనాకు ఎందుకు కోపం వచ్చింది? నీనెవె ఇస్రాయేల్‌కు బద్ధ విరోధి. దేవుడు దానిపై జాలి చూపరాదని యోనాకు అనిపించింది. ఎవరిమీదైనా కరుణ చూపదలచుకుంటే అది కేవలం ఇస్రాయేల్‌పైనే చూపాలి గాని ఇస్రాయేల్‌వారి శత్రువులైన ఇతర జనాలపై కాదనుకొన్నాడు. యోనా నిజ దేవుని ప్రవక్త అయినప్పటికీ ఈ విషయాల్లో అతని హృదయం దేవుని హృదయంతో ఏకీభవించడం లేదు. దేవుడు కోరినది అతడు కోరడం లేదు. దేవునికి ఇష్టమైనది అతనికి ఇష్టం కాలేదు.

2. యెహోవా, నేను నా దేశమందుండగా ఇట్లు జరుగునని నేననుకొంటిని గదా? అందు వలననే నీవు కటాక్షమును జాలియును బహు శాంతమును అత్యంత కృపయుగల దేవుడవై యుండి, పశ్చాత్తాపపడి కీడుచేయక మానుదువని నేను తెలిసికొని దానికి ముందు గానే తర్షీషునకు పారిపోతిని.

నిర్గమకాండము 34:6-7; కీర్తనల గ్రంథము 86:15; కీర్తనల గ్రంథము 103:8; కీర్తనల గ్రంథము 116:5; యోవేలు 2:13 మొదలైన చోట్ల కనిపించే సత్యం అతనికి తెలుసు. అయితే ఆ సత్యం తనకు తన ప్రజలకే తప్ప, ఇతరులకు వర్తించకూడదని అతని ఉద్దేశం.

3. నేనిక బ్రదుకుటకంటె చచ్చుట మేలు; యెహోవా, నన్నిక బ్రదుకనియ్యక చంపుమని యెహోవాకు మనవి చేసెను.

“నా ప్రాణం”– 1 రాజులు 19:4 పోల్చి చూడండి. దేవుని ప్రవర్తన తనకు ఇష్టమైన విధానానికి వ్యతిరేకంగా ఉంది గనుక యోనాకు తన ప్రాణంపై విరక్తి పుట్టింది. అన్ని జనాల, జాతులకంటే పైగా ఇస్రాయేల్ గొప్ప కావాలి అని అతని కోరిక. అందుకు మార్గం నీనెవె పట్ల దేవుడు వ్యవహరిస్తున్న తీరేనని అతడు గ్రహించలేదు.

4. అందుకు యెహోవా నీవు కోపించుట న్యాయమా? అని యడిగెను.

మరో సారి దెబ్బ తిని కోపంగా ఉన్న తన ప్రవక్త విషయం దేవుడు చూడవలసి వచ్చింది. ఈ అధ్యాయం చివరివరకు ఆయన ఎంత నాజూకుగా, మృదువుగా, సున్నితంగా ఈ పని చేశాడో చూస్తాం. ఈ వచనంలోని ప్రశ్నకు జవాబు కేవలం “కాదు” అనే. దేవుని మార్గాలను ప్రశ్నించేందుకు ఎవరికీ హక్కు లేదు (రోమీయులకు 9:20 పోల్చి చూడండి). దేవుని మార్గాలను నేర్చుకుని, సంతోషంతో వాటి ప్రకారం చెయ్యడమే మన విధి.

5. అప్పుడు యోనా ఆ పట్టణములోనుండి పోయి దాని తూర్పుతట్టున బసచేసి అచ్చట పందిలి యొకటి వేసికొని పట్టణమునకు ఏమి సంభవించునో చూచెదనని ఆ నీడను కూర్చుని యుండగా

“ఏమి సంభవిస్తుందో”– బహుశా నీనెవెలో కనిపించిన పశ్చాత్తాపం పై పై రంగేననీ, చివరికి దేవుడు దాన్ని తప్పక నాశనం చేస్తాడనీ అతడు ఆశించి ఉండవచ్చు.

6. దేవుడైన యెహోవా సొరచెట్టొకటి ఏర్పరచి అతనికి కలిగిన శ్రమ పోగొట్టుటకై అది పెరిగి యోనా తలకుపైగా నీడ యిచ్చునట్లు చేసెను; ఆ సొర చెట్టును చూచి యోనా బహు సంతోషించెను.

“సిద్ధం చేసి ఉంచాడు”– వ 7,8; యోనా 1:17. దేవుడు యోనాకు ఒక ప్రాముఖ్యమైన గుణపాఠం నేర్పించసాగాడు. వ్యక్తిగత సౌకర్యాల వంటి అల్ప విషయాల గురించి యోనా పట్టించుకుంటున్నాడు గాని తనవారు కాని ఇతర జనాల రక్షణ గురించి అతనికి చీమ కుట్టినట్టయినా లేదు. అనేక క్రైస్తవ సంఘాలలో చాలామంది ఇతనిలాగే నేడు ఉండడం చాలా విచారకరమైన సంగతి. తమ సుఖాలు సౌకర్యాల విషయం ఆనందిస్తారు గాని మనుషుల ఆత్మల గురించి పట్టించుకోరు.

7. మరుసటి ఉదయమందు దేవుడు ఒక పురుగును ఏర్పరచగా అది ఆ చెట్టును తొలిచినందున చెట్టు వాడిపోయెను.

దేవుడు మనకు ఎంత సునాయాసంగా సౌకర్యాలు ఏర్పరచగలడో అంతే తేలిగ్గా వాటిని తొలగించగలడు కూడా. ఒక వేళ మనకు గుణపాఠం నేర్పేందుకు ఇలా చెయ్యవచ్చు.

8. మరియు ఎండ కాయగా దేవుడు వేడిమిగల తూర్పుగాలిని రప్పిం చెను. యోనాతలకు ఎండ దెబ్బ తగలగా అతడు సొమ్మ సిల్లిబ్రదుకుటకంటె చచ్చుట నాకు మేలనుకొనెను.

ఇక్కడ మళ్ళీ యోనా తన సౌఖ్యం గురించే పూర్తిగా ఆలోచిస్తూ, తాను ఎవరికి పరిచర్య చేసేందుకు పంపబడ్డాడో ఆ ప్రజల గురించి పట్టించుకోకపోవడం చూస్తున్నాం. ఇప్పటికీ అతనికి చనిపోవాలనే ఉంది – ఆ సొరచెట్టు గురించి కాదు, దేవుని విధానాలతోను, ఆయన హృదయంతోను ఇంకా ఏకీభావం అతనికి లేనందువల్లే.

9. అప్పుడు దేవుడుఈ సొరచెట్టును గురించి నీవు కోపించుట న్యాయమా? అని యోనాను అడుగగా యోనాప్రాణము పోవునంతగా కోపించుట న్యాయమే అనెను.
మత్తయి 26:38, మార్కు 14:34

“మంచిదే”– ఇది కేవలం పొరపాటు. దేవుడు ఒకప్పుడు ఇచ్చినదాన్ని ఆయన తీసివేసుకుంటే ఆయన పై కోపం తెచ్చుకునే హక్కు ఎవరికీ లేదు. యోనా మనస్తత్వాన్ని యోబుతో పోల్చి చూడండి – యోబు 1:21-22. యోబు తన కాలంలో అందరికన్నా ఉత్తముడని, యోనా తన కాలంలో అందరికంటే ఉత్తముడు కాదనీ అనిపించుకోవడానికి ఒక కారణం ఇది. మనలో చాలామంది యోబు లాగా కాక యోనాలాగే ఉన్నాం గదా. మనం కోరుకున్న రీతిగా దేవుడు చేయకపోతే, మనకు ఇష్టమైనవాటిని మననుంచి తీసివేస్తే కొన్ని సార్లు ఆయనపై విసుక్కుంటాం గదా.

10. అందుకు యెహోవానీవు కష్టపడకుండను పెంచకుండను ఒక రాత్రిలోనే పుట్టి పెరిగి ఒక రాత్రిలో గానే వాడి పోయిన యీ సొరచెట్టు విషయములో నీవు విచారపడు చున్నావే;

యోనా నేర్చుకోవలసిన పాఠం ఇది. మనం కూడా నేర్చుకుందాం. యోనాకు నీడకోసం మొలిచిన సొరచెట్టులాగే లోకంలోనివన్నీ గతించిపోయేవే (1 యోహాను 2:17). దేవుడు వేటిపై శ్రద్ధ కలిగి ఉన్నాడో వాటి పైనే మన హృదయం ఉండాలని నేర్చుకుందాం. దేవునికి ఈ లోకంలోని మనుషులందరి పట్లా శ్రద్ధ ఉంది. మనమైతే మన గురించి, మన సౌకర్యాల గురించే అస్తమానం చూచుకుంటున్నామా?

11. అయితే నూట ఇరువదివేలకంటె ఎక్కువై, కుడియెడమలు ఎరుగని జనమును బహు పశువులును గల నీనెవె మహాపురము విషయములో నేను విచారపడవద్దా? అని యోనాతో సెలవిచ్చెను.